N̄wam Nditọwọn̄ Ẹmehe ye Esop Jehovah

NDITỌWỌN̄ ẹsima ndikpep n̄kpọ. Kere ban̄a mbụme emi ekemede ndidi nditọwọn̄ Israel emi ẹkedude ke Egypt ẹma ẹbụp ke okoneyo oro ẹkenịmde akpa Passover: ‘Ntak emi ẹwotde eyenerọn̄?’ ‘Ntak emi Papa esịmede iyịp ke enyịnusụn̄?’ ‘M̀mọ̀n̄ ke iyom ndika?’ Se Jehovah ọkọdọhọde mme ete ke Israel ẹnam owụt ke enye isuaha utọ mbụme emi. Jehovah ọkọdọhọ nditọ Israel ntem aban̄a Passover oro mmọ ẹdinịmde ke ini iso, ete: “Ke ini nditọ mbufo ẹdibụpde mbufo, ẹte, Mbufo ẹnam utom emi ẹban̄a nso? Ndien mbufo ẹdọhọ, ẹte, Enye edi uwa passover Jehovah, emi ekebede mme ufọk nditọ Israel ke Egypt, ke ini enye okowotde nditọ Egypt, onyụn̄ anyan̄ade mme ufọk nnyịn.” (Ex. 12:24-27) Ndien nte ini akakade, Jehovah ama eti mme ete ye eka ke Israel ufọn edisibọrọ nditọ mmọ mbụme oro ẹban̄ade “mme ewụhọ, ye mme item” emi enye ọkọnọde mmọ.—Deut. 6:20-25.

 Emi enen̄ede owụt ke Jehovah ama oyom ẹbọrọ nditọwọn̄ mbụme oro ẹban̄ade utuakibuot akpanikọ, ẹnọ mmọ ibọrọ emi ẹdinamde mmọ ẹma Jehovah nte Abasi ye Andinyan̄a mmọ. Ntem ke Jehovah osụk oyom ẹnam ye mme uyen mfịn. Usụn̄ kiet emi mme ete ye eka ẹkemede ndinam nditọ mmọ ẹnen̄ede ẹma Abasi ye ikọt esie edi ndin̄wam mmọ ẹmehe ye esop Jehovah ẹnyụn̄ ẹnam an̄wan̄a mmọ nte mmọ ẹkemede ndidia ufọn ndutịm oro esop Jehovah anamde. Ẹyak ineme ndusụk usụn̄ oro ẹkemede ndin̄wam mme uyen ẹnen̄ede ẹfiọk esop Abasi.

N̄wam Nditọ Fo Ẹmehe ye Esop Mbufo

Ọfọn nditọwọn̄ ẹdiọn̄ọ esop emi mmọ ẹdude. Man mmọ ẹkeme ndinam emi, oyoyom mbufo mme ete ye eka ẹsida nditọ mbufo ẹka kpukpru mbono esop. Ndinam ntem owụt ke ẹmenam ewụhọ emi Jehovah ọkọnọde nditọ Israel mi ete: ‘Bon kpukpru owo ọtọ kiet, iren-owo ye iban, ye nditọwọn̄, man mmọ ẹkop, man mmọ ẹnyụn̄ ẹkpep, ẹnyụn̄ ẹbak Jehovah Abasi mbufo, ẹnyụn̄ ẹkpeme ndinịm kpukpru ikọ mbet emi: man nditọ mmọ emi mîkọfiọkke, ẹkop n̄ko-n̄ko, ẹnyụn̄ ẹkpep ndibak Jehovah Abasi mbufo.’—Deut. 31:12, 13.

Nditọwọn̄ ẹkeme nditọn̄ọ ke nsek n̄kpep Ikọ Jehovah. Kop se apostle Paul eketịn̄de aban̄a Timothy mi: “Toto ke nsek afo ama ọfiọk ndisana uwetn̄kpọ.” (2 Tim. 3:15) Se ẹsikpepde ke mbono esop ke Ufọkmbono Obio Ubọn̄ nnyịn esin̄wan̄a idem ata n̄kpri nditọ, mmọ ẹsinyụn̄ ẹkpep ndikwọ ikwọ Obio Ubọn̄. Do ke mmọ ẹsikpep ndikama  Bible ye mme n̄wed un̄wam ukpep Bible nnam n̄kpọ nnyụn̄ ntịm mmọ n̄kama. Adianade do, mmọ ẹsikụt ke nditọete oro ẹdụkde mme mbono esop ẹnyene ata ima, kpa edu oro ẹdade ẹdiọn̄ọ ata mme anditiene Christ. Jesus ọkọdọhọ ete: “Ami mmọnọ mbufo obufa ibet, nte mbufo ẹma kiet eken; kpa nte n̄kamade mbufo, nte mbufo n̄ko ẹma kiet eken. Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:34, 35) Ufiop ufiop ima oro nditọete ẹnyenede ye ifụre oro odude ke Ufọkmbono Obio Ubọn̄ ẹyenen̄ede enem nditọwọn̄ ndien emi ayanam mmọ ẹma ndidụk mbono esop kpukpru ini.

Ndisibabak n̄ka mbono esop nnyụn̄ nsibet esisịt ke mbono esop ama akasuana ayanam nditọ fo ẹnyene ifet ndinam ufan. Utu ke ndiyak mmọ ẹnam ufan ye ubọkn̄ka mmọ ikpọn̄, emekeme ndinam mmọ ẹmehe ye kpukpru nditọete. Ndimehe ye ikpọ owo ayanam mmọ ẹdiọn̄ọ ke ikpọ owo ẹnyene ekese ifiọk ye ọniọn̄. Mbon oro ẹsọn̄ọde ẹda ẹnam n̄kpọ Jehovah ke ediwak isua ẹkeme ndinen̄ede n̄n̄wam nditọwọn̄ ukem nte Zechariah emi “ekenyenede ifiọk n̄kukụt Abasi” akan̄wamde ekpri Uzziah, edidem Judah. (2 Chron. 26:1, 4, 5) Ke ini ẹdude ke Ufọkmbono Obio Ubọn̄, emekeme ndinam mmọ ẹdiọn̄ọ ufọn itie ubon n̄wed, obukpọk ntọt, ye mme n̄kpọ eken.

Esop Ofụri Ererimbot

Ẹkpenyene ndinam nditọwọn̄ ẹdiọn̄ọ ke esop mmọ edi kiet ke otu esop Mme Ntiense Jehovah emi edide ebe 100,000 ke ofụri ererimbot. Nam mmọ ẹdiọn̄ọ nte ẹtịmde esop Abasi ye nte ẹsinamde n̄kpọ, ye nte nditọwọn̄ ẹkemede ndin̄wam ke utom emi ẹnamde ke esop Abasi. Tịn̄ nọ mmọ ntak emi afo esitiede-tie ebet mme mbono circuit, mbono district, ye edidi esenyịn circuit.—Se ekebe oro  “Se Ẹkpenemede ke Ini Utuakibuot Ubon,” ke page 28.

Edieke ifet odude, kot mme esenyịn oro ẹsan̄ade-san̄a, mme isụn̄utom, mbon Bethel ye mbon oro ẹnamde utom uyọhọ ini ufọk. Kûkere ke mmọ idinyeneke ini inọ nditọwọn̄. Mme anamutom uyọhọ ini ẹn̄wana ndikpebe Jesus, emi ekesidarade nditọwọn̄ kpukpru ini onyụn̄ eneme nneme ye mmọ. (Mark 10:13-16) Ndikop ifiọkutom nditọete emi nnyụn̄ n̄kụt nte mmọ ẹkopde inem utom Abasi, ekeme ndinam nditọ fo ẹyom ndidụk utom uyọhọ ini.

Nso en̄wen ke akpanam ke ubon man an̄wam nditọ fo ẹtetịm ẹmehe ye esop Jehovah? Se ise mme ekikere oro ẹnọde mi: Nam ndutịm man ubon fo okot n̄wed Jehovah’s Witnesses—Proclaimers of God’s Kingdom. Sọn̄ọ wụt nte ikọt Jehovah ẹnamde n̄kpọ esie, ẹsụhọrede idem, ẹnyụn̄ ẹsọn̄ọde ẹda ye enye. Wụt mmọ nte Jehovah akanamde ikọt esie ẹkwọrọ eti mbụk ke ofụri isọn̄. Da mme vidio esop Jehovah kpep mmọ mme akpan n̄kpọ emi ẹketịbede ke eset ye se ikade iso idahaemi. Edieke ẹkemede, ẹsan̄a ntre ẹka ẹkese n̄kọk itieutom ye ufọkidụn̄ Bethel ke idụt mbufo m̀mê ke idụt en̄wen. Ndika n̄kese n̄kọk itieutom ayanam nditọ fo ẹkụt nte ofụn anam-akpanikọ adade ikpehe esop Jehovah eke isọn̄ usụn̄ ndinọ nditọete nnyịn udia ye ndausụn̄ eke spirit ke ofụri ererimbot, kpa nte enye akanamde ke akpa isua ikie E.N.—Matt. 24:45-47; Utom 15:22-31.

Nam Ukpepn̄kpọ Ekem ye Eyen Kiet Kiet

Ke ini ekpepde nditọ fo n̄kpọ, kûfre nte Jesus ekekpepde mme apostle esie n̄kpọ. Enye ama ọdọhọ mmọ ini kiet ete: “Mmenyene  ediwak n̄kpọ nditịn̄ nnọ mbufo, edi mbufo idikemeke ndibiom mmọ ke emi.” (John 16:12) Jesus ikekpepke mme mbet esie kpukpru n̄kpọ ini kiet. Edi enye ama ada ini ekpep mmọ akpanikọ sụn̄sụn̄ man an̄wan̄a mmọ. Nyụn̄ nam ntre n̄ko, kûkpep nditọ fo kpukpru n̄kpọ ini kiet. Mmọ ẹyenyene udọn̄ ẹnyụn̄ ẹma ndikpep n̄kpọ mban̄a esop Jehovah edieke ekpepde mmọ n̄kpọ nsịtnsịt kpukpru ini. Nte mmọ ẹkponide, emekeme ndifiak nti mmọ se ama ekekpekpep mmọ onyụn̄ adian mme n̄kpọ efen oro mûkukpepke mmọ ke akpa.

Esop Abasi edi ata akpan ebiet emi ekemede ndin̄wam nditọ fo ẹka iso ẹdi ufan Abasi, ndien mme uyen emi ẹsisịnde idem ẹtiene ẹnam n̄kpọ ke esop Abasi ẹsikeme ndibe idomo ererimbot Satan. (Rome 12:2) Imenịm ke eyenen̄ede okop inemesịt ndin̄wam nditọ fo ẹmehe ye esop Jehovah. Mmọ ẹkpekam ẹka iso ẹsọn̄ọ ẹda ye edima Abasi nnyịn ye esop esie man ẹkpebọ edidiọn̄ esie.

[Ekebe/Ndise ke page 28]

 Se Ẹkpenemede ke Ini Utuakibuot Ubon

Se ndusụk n̄kpọ emi ẹban̄ade esop Jehovah, emi ekemede ndineme ke mbubreyo Utuakibuot Ubon fo.

▪ Neme ban̄a mbụk esop mbufo. Ini ewe ke ẹkesiak enye, ndien nso ikanam ẹsiak enye? Ewe Ufọkmbono Obio Ubọn̄ ke esop mbufo ẹkesidụk mbono esop? Ntak emi mûkotke eyenete emi ebịghide ke esop mbufo edibọrọ mme mbụme nditọ fo?

▪ Tịn̄ uduak mme mbono esop ye eke n̄kpri ye ikpọ mbono nnyịn, ye nte nditọwọn̄ ẹkemede ndidia ufọn mmọ.

▪ Tịn̄ ntak oro esop Jehovah asiakde nsio nsio ufọkn̄wed. Bụk mme ifiọkutom emi ẹwụtde nti utịp emi mbon oro ẹkekade mme ufọkn̄wed emi ẹnyenede.

▪ Nam nditọ fo ẹfiọk ufọn edidi asuanetop eti mbụk. Wụt mmọ nte mmọ ẹkemede ndinam ibatutom mmọ ẹtiene ẹsịne ke ibatutom ofụri ererimbot oro ẹsiwetde ke Yearbook of Jehovah’s Witnesses.

▪ Tịn̄ nsio nsio ikpehe utom uyọhọ ini oro mme uyen ẹkemede ndidụk ke esop Jehovah. Ibuot 10 ke n̄wed Ẹtịm man Inam Uduak Jehovah ekeme ndin̄wam ke afan̄ emi.

▪ Nam an̄wan̄a nditọ fo ntak emi ẹnyenede akpan usụn̄ emi ẹsinamde ndusụk n̄kpọ ke esop Abasi. Tịn̄ ntak emi anade mmọ ẹtiene ndutịm esop Jehovah ke kpukpru n̄kpọ, idem ke ata n̄kpri n̄kpọ. Wụt mmọ nte nditiene ndausụn̄ mbiowo ekemede ndinam n̄kpọ asan̄a ke nde ke nde ke esop.

[Ndise]

Nditọ fo ẹyebọ ufọn ke ndinam ufan ye mbon oro ẹma ẹkenam n̄kpọ Abasi ẹbịghi

[Mme Ndise ke page 26]

Kpa nte ekedide ke Israel eset, akpana mme ete ye eka ẹsibọrọ nditọ mmọ mbụme oro ẹban̄ade esop Jehovah