Ndinam Ekese ke Esop Jehovah

Nte Vernon Zubko obụkde

N̄KOKPON ke in̄wan̄ emi ekperede Stenen, obio emi odude ke Saskatchewan, ke Canada. Ete ye eka mi, Fred ye Adella, ẹma ẹnam utom ọkpọsọn̄ man ẹnọ mi, Aurellia adiaha eka mi, Alvin, Allegra, ye Daryl, n̄kpri nditọeka mi, udia eke spirit ye eke obụk. Nnyịn isụk ikọkọm ete ye eka nnyịn tutu esịm mfịn emi ke ndikekpep nnyịn akpanikọ.

Papa, emi ekedide Christian oro ẹyetde aran, ekedi ọkwọrọ eti mbụk oro enyenede uko. Enye ama anam utom ọkpọsọn̄ man inyene se idiade, enye ama onyụn̄ okụt ete ke kpukpru owo ẹdiọn̄ọ imọ nte Ntiense. Enye ama esitịn̄ aban̄a akpanikọ Bible kpukpru ini. Ndifreke ifịk ye uko esie tutu amama. Enye ama esidọhọ mi ete, “Nyene ekese ndinam ke esop Jehovah, ndien ọyọbọhọ ekese mfịna.”

Nnyịn ikesiwak ndinọ ikọ ntiense efak ke Stenen ye mme obio eken ke n̄kann̄kụk oro. Ikesimemke utom inọ mi ndinam oro kpukpru ini. Mbon ntịme ẹma ẹdu ke obio kiet kiet oro ikọkwọrọde ikọ, ndien mmọ ẹma ẹsisak nnyịn emi ikedide nditọwọn̄ nsahi. Isan̄ kiet ke ini n̄kedide isua itiaita, n̄kparawa ẹma ẹdi ẹdikan mi ẹkụk nte n̄kosụk n̄kamade Enyọn̄-Ukpeme ye Awake! nda ke inụk kiet. Mmọ ẹma ẹyarade mi obufa itam oro n̄kayarade ẹdọri ke eto oro akadade ekpere mi. Edi akamba eyenete eren oro n̄kasan̄ade kiet ama ada okụt se iketịbede, onyụn̄ asan̄a edi edibụp ete, “Vern, nso itịbe?” N̄kparawa oro ẹma ẹfen̄e inikiet inikiet. Okposụkedi se iketịbede oro mîkenemke mi esịt, mma n̄kpep ke n̄kpenyeneke ndituak nda ke ebiet kiet nte eto ke ini nnọde ikọ ntiense ke efak. Utọ ukpep oro ama an̄wam mi ke ini uyen mi onyụn̄ ọnọ mi uko ndikwọrọ ikọ to ke enyịnusụn̄ sịm enyịnusụn̄.

Ami ye Alvin ikana baptism ke May 1951. N̄kedi isua 13 ini oro. Nsụk nteti nte Brọda Jack Nathan emi ọkọnọde utịn̄ikọ baptism nnyịn ekekpede nnyịn ubọk ete ikûdedei iyak ọfiọn̄ kiet ebe emi nnyịn mîtịn̄ke iban̄a Jehovah. * Ubon nnyịn ẹkeda utom usiakusụn̄ nte mfọnn̄kan ubọkọkọ. Ntre, ke mma n̄kokụre n̄wed ke 1958, mma n̄wọrọ n̄ka Winnipeg, ke Manitoba, man n̄kasiak usụn̄. Okposụkedi emi Papa akpakamade ami nnam utom ye imọ ke usiakifia ubon nnyịn nte ọkwọhọde eto nnam ọdọnọ, enye ye Mama ẹma ẹnen̄ede ẹma utom uyọhọ ini; ntre mmọ ẹma ẹnyịme n̄ka Winnipeg n̄kasiak usụn̄.

Obufa Ebietidụn̄ ye Obufa Nsan̄a

Ke 1959, n̄kọk itieutom ẹma ẹdọhọ owo eke ekemede ọwọrọ aka Quebec emi ẹkenen̄erede ẹyom mme ọkwọrọ eti mbụk. Mma  n̄ka n̄kasiak usụn̄ ke Montreal. Nso ukpụhọde ke emi ekedi ntem! Kpukpru n̄kpọ ẹketie mi esen esen nte n̄kosụk ndomode ndikpep usem French ye obufa usụn̄ unamn̄kpọ. Esenyịn circuit nnyịn ama ọdọhọ mi ete: “Kûdedei udọhọ ute, ‘Nte ikesinamde ke edem nnyịn edi emi.’” Oro ekedi eti item.—1 Cor. 9:22, 23.

N̄kenyeneke nsan̄a usiakusụn̄ ke ini n̄kọwọrọde n̄ka Quebec. Edi eyenete an̄wan emi ekerede Shirley Turcotte oro n̄kosobode ke Winnipeg ama akabade edi nsinsi nsan̄a mi ke February 1961 ke ini ikọdọde ndọ. Enye okoto ubon emi ẹmade Jehovah. N̄kọfiọkke nte ke enye eyenen̄ede ọsọn̄ọ mi idem onyụn̄ ọnọ mi nsịnudọn̄ nte enye anamde ke mme isua emi ẹbede.

Ndikwọrọ Ikọ ke Gaspé

Isua iba ke ima ikọdọ ndọ, ẹma ẹmek nnyịn akpan asiakusụn̄ ke Rimouski ke Quebec. Ke ini utọ oro eketienede, n̄kọk itieutom ẹma ẹdọhọ ika ikọkwọrọ ikọ ke Isuo Gaspé, emi odude ke esụk edem usiahautịn Canada. Utom nnyịn ekedi ndisuan n̄kpasịp akpanikọ Bible adan̄a nte ikekeme. (Eccl. 11:6) Nnyịn ima idọn̄ magazine oro ẹwakde ẹbe 1,000 ye n̄kpọ nte n̄wed 400, ọkọrọ ye udia ye ọfọn̄ ke ubomisọn̄ nnyịn inyụn̄ itọn̄ọ isan̄ utom ukwọrọikọ emi ekebịghide ke ọfiọn̄ kiet. Nnyịn ima ikwọrọ ikọ ke kpukpru n̄kpri obio oro ẹdude ke Gaspé ke adiana ke adiana. Itie usuanetop ekebe utịn̄ikọ n̄kann̄kụk ama ọtọt ke Mme Ntiense ke ẹdi onyụn̄ odụri mme owo utọn̄ ete ẹkûbọ n̄wed nnyịn. Edi, ntọt oro ikan̄wan̄ake ata ediwak owo; mmọ ẹkekam ẹkere ke ẹkedọhọ ibọ mme n̄wed nnyịn, ntre mmọ ẹma ẹbọ mme n̄wed nnyịn.

Ke mme isua oro, mme owo ke ndusụk itie ke Quebec ikọfiọkke ke ẹma ẹnọ nnyịn ifụre ndikwọrọ ikọ, ntre mme bodisi ẹma ẹsiwak ndidọhọ itre ukwọrọikọ. Emi ama etịbe ke obio kiet emi nnyịn ikenịmde n̄wed ke ekperede ndidi kpukpru enyịnusụn̄. Bodisi kiet ama ọdọhọ nnyịn itiene imọ ika itieutom mmimọ, nnyịn ima inyụn̄ itiene enye. Mma ndifiọk ke ekpeibet obio oro ọkọdọhọ ẹkûyak nnyịn ikwọrọ ikọ. Sia akwa owo bodisi mîkodụhe usen oro, mma n̄wụt ekpeibet oro leta emi n̄kọk itieutom ke Toronto ẹkenọde mi ndiwụt ke imenyene unen ndikwọrọ ikọ. Ke ekpeibet oro ama okokot leta oro, enye ama ọdọhọ inikiet inikiet ete: “Nyomke mfịna ndomokiet. Oku ufọkabasi ọkọdọhọ n̄kûyak mbufo ẹkwọrọ ikọ.” Sia ikoyomde mme owo ke efakutom oro ẹfiọk ke ibet enyịme ikwọrọ ikọ, nnyịn ima ifiak ika ebiet oro bodisi oro ọkọdọhọde nnyịn itre ukwọrọikọ ikaka iso ke ukwọrọikọ nnyịn.

Ke ndan̄nsiere, nnyịn ima ika ikokụt akamba owo bodisi, ndien esịt ama ọdiọk enye ndikop ke ẹma ẹdọhọ nnyịn itre ukwọrọikọ. Enye okosụk ayayat esịt idem ke ini enye ekenemede nneme ye ekpeibet oro ke urụk ukopikọ. Akamba owo bodisi oro ama ọdọhọ nnyịn isidi ibịne imọ ini ekededi oro inyenede mfịna, ke imọ iditreke ndin̄wam nnyịn. Okposụkedi emi ikekpepde-kpep usem French, mme owo ẹma ẹsifọn ido ye nnyịn. Nnyịn ima isibụp idem nnyịn, ‘M̀mê mmọ ẹyesụk ẹdifiọk akpanikọ?’ Nnyịn ima ibọrọ mbụme oro ke ediwak isua ẹbede, ke ini ikafiakde ika ikọbọp mme Ufọkmbono Obio Ubọn̄ ke Gaspé. Nnyịn ima idikụt ke ediwak mbon oro ikọkwọrọde ikọ inọ ẹdi nditọete nnyịn idahaemi. Ke akpanikọ, Jehovah anam utom nnyịn ọkọri.—1 Cor. 3:6, 7.

Udeme Jehovah

Lisa, adiaha nnyịn, akamana ke 1970. Udeme emi Jehovah ọnọde nnyịn mi ama anam uwem etetịm enem nnyịn. Ami, n̄wan mi, ye adiaha mi imetiene ibọp ediwak Ufọkmbono Obio Ubọn̄. Ke adiaha nnyịn ama okokụre n̄wed, enye ama ọdọhọ nnyịn ete: “Sia edide ami n̄kanam mbufo ẹkpọn̄ utom uyọhọ ini ke ndusụk ini, mmọn̄ nda itie mbufo ke ndidi asiakusụn̄.” Adiaha nnyịn asiak usụn̄ ebe  isua 20, ndien idahaemi, enye edinam utom emi ye Sylvain ebe esie. Enye ye ebe esie ẹtiene ẹbọp ediwak Ufọkmbono Obio Ubọn̄ ke nsio nsio idụt. Uduak nnyịn nte ubon edi ndidu mmemmem uwem nnyụn̄ nnyịme ndinam utom Jehovah. Mfreke ikọ oro adiaha nnyịn eketịn̄de ke ini enye ọkọtọn̄ọde utom usiakusụn̄. Ke akpanikọ, enye ama esịn udọn̄ ọnọ mi ndifiak ndụk utom uyọhọ ini ke 2001, ndien nsụk nsasiak usụn̄ tutu esịm emi. Utom usiakusụn̄ ekpep mi ndibuọt idem ye Jehovah ke kpukpru se nnamde nnyụn̄ ndu mmemmem uwem oro ọnọde uyụhọ ye inemesịt.

Utom Ubọpn̄kpọ Oyom Ima, Nsọn̄ọnda, ye Edinam Akpanikọ

Jehovah ekpep mi ke nnyịn iyọbọ ediwak edidiọn̄ edieke inyịmede ndinam utom ekededi oro imọ inọde nnyịn. Edi ọsọn̄urua ifet ndinam utom ye Kọmiti Ubọpufọk eke Ikpehe ke Ikpehe ndinyụn̄ ntiene nditọete mi mbọp n̄kpọ ke Quebec ye ke mme ebiet en̄wen.

Okposụkedi emi utịn̄ikọ ndusụk mme anamutom unyịmesịt emi mîsinen̄ekede inem, mmọ ẹnen̄ede ẹdiọn̄ọ ndibọp Ufọkmbono Obio Ubọn̄. Sia ndima nditọete emi ẹsisịnde esịt ke utom mmọ, mme owo ẹsikụt usọ mmọ. Ndien utịp esidi ediye ufọk emi ẹdade ẹtuak ibuot ẹnọ Jehovah.

Ẹsibụp mi ẹte: “Mme edu ewe ke ẹnen̄ede ẹyom mme anamutom unyịmesịt oro ẹbọpde Ufọkmbono Obio Ubọn̄ ẹnyene?” Se n̄kụtde edi ke ana owo ebem iso ama Jehovah ye Eyen esie onyụn̄ ama nditọete esie. (1 Cor. 16:14) N̄ko-n̄ko, ana owo edi owo oro ọsọn̄ọde ada onyụn̄ anamde akpanikọ. Ke ini n̄kpọ mîsan̄ake nte nnyịn iyomde—emi esitịbe—owo oro ọsọn̄ọde ada ayaka iso ebere ye ndutịm ukara Abasi. Edinam akpanikọ ayan̄wam enye enyịme ndika iso nnam utom.

Mmọkọm Jehovah

Okposụkedi emi ete mi akakpade ke 1985, nsụk nteti item oro enye ọkọnọde mi ete nnyene ekese ndinam ke esop Jehovah. Nte kiet ke otu mbon oro ẹsetde ẹka ikpehe esop Jehovah eke heaven, mmenịm ke enye n̄ko enyene ekese ndinam. (Edi. 14:13) Mama edi isua 97 idahaemi. Enye ikemeke nditịn̄ ikọ ọfọn nte ekesitịn̄de ke ntak akpauben̄, edi enye osụk ọfọfiọk Bible. Enye esikot mme itie N̄wed Abasi esịn ke mme leta oro enye esiwetde ada esịn udọn̄ ọnọ nnyịn ete isọn̄ọ ida inam n̄kpọ Jehovah. Esịt enem nnyịn ndinyene ete ye eka oro ẹmade nnyịn ntem.

Mmọkọm Jehovah ke ndinọ mi Shirley, edima an̄wan ye nsan̄a mi. Enye ifreke item oro eka esie ọkọnọde enye ete: “Ebe fo eyenyene ekese ndinam ke utom Ọbọn̄, ndien afo enyene ndikpep ndibuana ebe fo ye mbon en̄wen.” Ke ini ikọdọde ndọ ke isua 49 emi ẹbede, nnyịn ima ibiere ndidiana kiet nnam n̄kpọ Jehovah tutu isọn̄, ndien edieke nnyịn mbiba ibọhọde utịt editịm n̄kpọ emi, ika iso inam n̄kpọ Jehovah nte akparawa ye n̄kaiferi ke nsinsi. Ih, nnyịn imanam ‘ekese ke utom Ọbọn̄.’ (1 Cor. 15:58) Jehovah enen̄ede ese aban̄a nnyịn onyụn̄ okụt ete ke nnyịn inanake baba eti n̄kpọ kiet.

[Ikọ Idakisọn̄]

[Ndise ke page 31]

“Uduak nnyịn nte ubon edi ndidu mmemmem uwem nnyụn̄ nnyịme ndinam utom Jehovah”