Jehovah Esikop Eseme Owo Emi Ofụhọde

ENYENE-ỌNIỌN̄ Edidem Solomon eke eset ọkọdọhọ ke ‘ini ye unọmọ ẹsisịm kpukpru nnyịn.’ (Eccl. 9:11) N̄kpọ mmọn̄eyet m̀mê idiọk idomo ekeme ndinen̄ede ntịmede uwem nnyịn. Ke uwụtn̄kpọ, mbabuat n̄kpa owo nnyịn esinen̄ede abiak owo esịm ọkpọ. Nnanenyịn emi ekeme ndinam ifụhọ ke ediwak ọfiọn̄. Emi ekeme ndinam ibuot oyon̄ nnyịn tutu itọn̄ọ ndikere m̀mê akam enyene se iduede, inyụn̄ ikemeke aba ndibọn̄ akam nnọ Jehovah ke ntak oro.

Ke mme idaha ntem, imesiyom nsịnudọn̄, edikere mban̄a, ye ima. David, andiwet psalm ama ọkwọ ikwọ emi ọnọde ndọn̄esịt ete: “Jehovah omụm mmọ eke ẹduọn̄ọde, akama, onyụn̄ emenede mmọ eke ẹnụhọde.” (Ps. 145:14) Bible ọdọhọ ke ‘enyịn Jehovah asasan̄a ke ofụri ererimbot, man enye ọsọn̄ọ omụm mmọ eke ofụri esịt mmọ odude ye enye akama.’ (2 Chron. 16:9) Enye esidu ye ‘mbon emi ẹnuakde ẹnyụn̄ ẹfụhọde, man edemede spirit mme usụhọde owo onyụn̄ edemede esịt mbon oro ẹnuakde.’ (Isa. 57:15, NW) Didie ke Jehovah esin̄wam onyụn̄ ọnọ mbon emi ẹfụhọde ndọn̄esịt?

“Ikọ ke Ekem Ini”

Usụn̄ kiet emi Jehovah esin̄wamde nnyịn ke ekemini edi ndida nditọete nnyịn n̄n̄wam nnyịn. Ẹteme mme Christian ẹte “ẹtịn̄ ikọ ẹsọn̄ọ ukpọn̄ eke ofụhọde esịt.” (1 Thess. 5:14) Ima ima ikọ ndọn̄esịt oro nditọete emi ẹnyenede esịtmbọm ẹtịn̄de ekeme ndin̄wam eyenete emi enyenede mfịna m̀mê ofụhọde. Ndọn̄esịt emi ẹnọde idem ke ini emi ẹnemede ibio ibio nneme ekeme ndidemede ukpọn̄ emi ofụhọde. Mbon emi ẹma ẹkesosobo ukem mfịna emi ẹkeme ndinọ owo utọ ndọn̄esịt emi. Mîdịghe, ufan emi emehede ye mbon emi ẹkenyụn̄ ẹkụtde utọ ukụt emi ekeme ndin̄wam n̄ko. Ntem ke Jehovah esidemede spirit owo emi ofụhọde.

Da Alex emi edide ebiowo ke uwụtn̄kpọ. Idiọk udọn̄ọ ama owot n̄wan esie esisịt ini ke enye ama ọkọdọ ndọ. Enyene-esịtmbọm esenyịn oro asan̄ade-san̄a ama ọkọdọn̄ Alex esịt. N̄wan esenyịn emi n̄ko ama akpa, edi ebịghi enye akafiak ọdọ n̄wan en̄wen. Esenyịn emi ama etịn̄ nte imọ ikofụhọde ke ini n̄wan imọ akakpade. Ndien ke se ikesinọde imọ esisịt utan̄ifia ekedi mbono esop ye an̄wautom. Edi ke ndobo ama esiyom ndiwot imọ ima isesịm ufọk. Alex ọdọhọ ete, “Esịt enen̄ede ana mi  sụn̄ ndifiọk ke idịghe ami kpọt ke esitie ntem ke idem, ke esinyụn̄ etie mbon en̄wen.” Ke akpanikọ, ‘ikọ emi ẹtịn̄de ke ekem ini’ ekeme ndidọn̄ owo emi ofụhọde esịt.—N̄ke 15:23.

Ebiowo en̄wen emi emehede ye mbon emi iban m̀mê ebe mmọ ẹkpade ama etiene ọkọdọn̄ Alex esịt. Ebiowo emi ama ada esịtmbọm ye ima anam enye ọfiọk ke Jehovah ọdiọn̄ọ nte etiede nnyịn ke idem ndien ke enye ọyọnọ nnyịn se iyomde. Ebiowo oro ama ọdọhọ enye ete, “Nte ini akade, edieke ọdọn̄de fi ndifiak ndọ ndọ, emekeme ndinam ntre, Jehovah ikpanke oro.” Imọfiọk ke idịghe kpukpru mbon emi ebe m̀mê n̄wan akpade, emi ẹkpenyụn̄ ẹmade ndifiak ndọ ndọ ẹsikeme ndifiak ndọ. Ke Alex ama eketie ekere ikọ eyenete emi, enye ama ọdọhọ ete: “Owo ndikam nteti fi ke Jehovah enyịme ẹfiak ẹdọ ndọ iyakke esịt afịna fi m̀mê iyakam idue nsan̄a imọ, m̀mê iyonyụn̄ ikam ibiat ndutịm ndọ Jehovah edieke ifiakde idọ ndọ ke ini iso.”—1 Cor. 7:8, 9, 39.

David, andiwet psalm, emi okosobode idomo ye ukụt ọdọhọ ete: “Enyịn Jehovah ese mbon eti ido, utọn̄ esie onyụn̄ ọbiọn̄ọ ọnọ eseme mmọ.” (Ps. 34:15) Ke edikem ini, Jehovah esibọrọ akam mbon oro ẹfụhọde ke ndinam nditọete oro ẹkọride ẹsịm ọyọhọ idaha, emi ẹnyụn̄ ẹnyenede esịtmbọm ẹda usọ ye mbufiọk ẹdọn̄ mmọ esịt. Emi edi ata eti ye ọsọn̄urua enọ.

Ndibọ Un̄wam Nto Mme Mbono Esop Nnyịn

Owo emi ofụhọde esikere nsio nsio ndiọi ekikere emi ẹkemede ndinam enye ama ndidu ikpọn̄. Edi Mme N̄ke 18:1 (NW) eteme ete: “Owo eke adian̄arede etie ikpọn̄ ediyom ibụk ibụk udọn̄ idemesie; enye oyofụmi kpukpru ata ọniọn̄.” Alex ọdọhọ ete: “Nsan̄a fo ama akpakpa, edikere ntịme.” Enye eti nte ikobụpde idem imọ ite: “‘Ndi enyene n̄kpọ en̄wen emi akpakanade nnam? Ndi akpakana nnen̄ede n̄kere mban̄a n̄wan mi n̄kan nte n̄kekerede?’ N̄koyomke ndidu ikpọn̄. N̄konyụn̄ nyomke  ndidụn̄ nte owo emi mîdọhọ ndọ. Imemke utom nditre utọ ekikere emi sia idụhe usen emi n̄kpọ mînamke fi eti ke odu ikpọn̄.”

Mme ini ntem ke owo emi ofụhọde esinen̄ede oyom nti ufan. Nti ufan ẹyọyọhọ Ufọkmbono Obio Ubọn̄ nnyịn. Mi ke Abasi esikpep nnyịn n̄kpọ onyụn̄ ọsọn̄ọ nnyịn idem.

Mme mbono esop ẹsin̄wam nnyịn ida uwem nte inyụn̄ ikụtde. Nte ikpan̄de utọn̄ ikop mme itie N̄wed Abasi oro ẹkotde inyụn̄ itiede ikere mmọ, ntre ke idinen̄ede ikere se idide akpan n̄kpọ—oro edi, unen oro Jehovah enyenede ndikara ekondo ye edinam enyịn̄ esie asana—utu ke nditak ke ndikere se iwọrọde nnyịn. Ke adianade do, ndikpep n̄kpọ mban̄a Jehovah ke mme mbono esop nnyịn esinen̄ede anam ikụt ke ekpededi mbon en̄wen ifiọkke se iwọrọde nnyịn m̀mê nte etiede nnyịn ke idem, ke Jehovah ọfiọk. Enye ọfiọk ke “mfụhọ obụn̄ spirit owo.” (N̄ke 15:13) Jehovah oyom ndin̄wan̄wam nnyịn, ndien emi enen̄ede ọsọn̄ọ nnyịn idem.—Ps. 27:14.

Ke ini mme asua Edidem David ẹkenen̄erede ẹfịna enye, enye ama eseme ọnọ Abasi, ete: “Spirit mi omofụhọ mi ke idem; esịt akpa mi ke idem.” (Ps. 143:4) Ukụt esinen̄ede ọbọ owo odudu, onyụn̄ anam esịt owo akpa. Ukụt nnyịn ekeme ndidi udọn̄ọ m̀mê mmemidem ini usọn̄. Imenịm ke Jehovah ayan̄wam nnyịn iyọ. (Ps. 41:1-3) Okposụkedi emi Abasi mîkọkke owo udọn̄ọ mfịn ke utịbe utịbe usụn̄, enye esinọ mbon udọn̄ọ ọniọn̄ ye ukeme ndiyọ. Ti ke ini David okosobode nsio nsio idomo, enye ama ọdọhọ Jehovah ke akam ete: “Mmeti eyo oko; mmese ofụri utom fo; mmetie n̄kere se ubọk fo ẹkenamde.”—Ps. 143:5.

Jehovah ndiyak ẹwet ndinem ikọ ntem ẹdọn̄ ke Bible owụt ke enye ọfiọk nte etiede nnyịn ke idem. Mme utọ ikọ ntem ẹwụt ke enye iditreke ndibiọn̄ utọn̄ ke eseme nnyịn. Edieke iyakde Jehovah an̄wam nnyịn, “enye ayakama” nnyịn.—Ps. 55:22.

“Ẹkûdop Ndibọn̄ Akam”

James 4:8 ọdọhọ ete: “Ẹsan̄a ẹkpere Abasi, ndien enye ayasan̄a ekpere mbufo.” Usụn̄ kiet emi ikemede ndisan̄a n̄kpere Abasi edi ndibọn̄ akam. Apostle Paul eteme nnyịn ete ‘ikûdop ndibọn̄ akam.’ (1 Thess. 5:17) Idem edieke nnyịn mîkemeke nditịn̄ nte etiede nnyịn ke idem nnọ Abasi, “spirit ke idemesie [esinam] n̄kpeubọk ọnọ nnyịn ke mmụm oro uyo mîwọrọke.” (Rome 8:26, 27) Ke akpanikọ, Jehovah ọfiọk nte etiede nnyịn ke idem.

Monika emi enen̄erede ekpere Jehovah idem ọdọhọ ete: “Akam, edikot Bible, ye ukpepn̄kpọ idemmi ẹnam n̄kụt ke Jehovah edi ata akpan Ufan mi. Jehovah enen̄ede an̄wam mi kpukpru ini tutu editie nte n̄kpọ eke enye odude mi ye ami. Edi n̄kpọ ndọn̄esịt ndifiọk ke idem ini oro mmen̄kemeke nditịn̄ nte etiede mi ke idem, ke enye ọfiọk. Mmọfiọk ke mfọnido ye edidiọn̄ esie inyeneke adan̄a.”

Mmọdo, ẹyak kpukpru nnyịn inyịme ima ye ndọn̄esịt oro nditọete nnyịn ẹnọde, ida nti item ye mme ikọ oro ẹsọn̄ọde owo mbuọtidem, emi isikopde ke mme mbono esop nnyịn idu uwem, inyụn̄ in̄wan̄a esịt nnyịn inọ Jehovah ke akam. Kpukpru emi ke Jehovah ada owụt ke imekere iban̄a nnyịn. Alex etịn̄ se ikan̄wamde enye ete: “Edieke isịnde ofụri ukeme nnyịn ndida kpukpru se Jehovah Abasi ọnọde ndinam idem ọsọn̄ nnyịn ke n̄kan̄ eke spirit idu uwem, nnyịn iyenyene ‘odudu eke ebede ukeme owo’ ndiyọ idomo ekededi oro isobode.”—2 Cor. 4:7.

[Ekebe/Ndise ke page 18]

Ndọn̄esịt Emi Ẹnọde Owo Emi Ofụhọde

Nti ikọ oro ẹwụtde ke Jehovah esikop eseme owo emi nnanenyịn oyomde ndiwot ẹyọyọhọ psalm. Yak ise psalm ifan̄ emi:

“Nseme nnọ Jehovah ke nnanenyịn mi, nnyụn̄ mfiori n̄kot Abasi mi: enye etie ke temple esie okop uyo mi, mfiori mi onyụn̄ edi enye ke iso, odụk enye ke utọn̄.” —Ps. 18:6.

“Jehovah emekpere mmọ eke esịt obụn̄ọde mmọ; onyụn̄ anyan̄a mmọ eke esịt ọduọde.”—Ps. 34:18.

“Enye [Jehovah] ọkọk mmọ eke esịt mmọ anuahade, onyụn̄ ofụk mmọ unan.”—Ps. 147:3.

[Ndise ke page 17]

‘Ikọ emi ẹtịn̄de ke ekem ini’ esinen̄ede ọdọn̄ owo esịt ke usen ukụt