Mme Mbụme Oro Mme Andikot Ẹbụpde

Jesus ọkọdọhọ mbon oro ẹkekopde ikọ esie ete: “Ana mbufo . . . ẹfọn ẹma, kpa nte Ete mbufo ke heaven ọfọnde ama.” Didie ke owo ‘ekeme ndifọn mma’ mfịn?—Matt. 5:48.

Se idinamde mbụme emi an̄wan̄a nnyịn edi ndifiọk se Bible okotde “mfọnmma.” Idịghe nte ke Bible ama okokot n̄kpọ “mfọnmma,” ke n̄kpọ oro anana ndo. Jehovah ikpọn̄-ikpọn̄ ọfọn ama anana ndo. Edi owo m̀mê n̄kpọ ekeme ndifọn mma, edi inanake ndo. Ikọ Hebrew ye Greek oro ẹkabarede ke Bible nte “mfọnmma” esiwak ndiwọrọ “n̄kpọ emi ekemde,” m̀mê “n̄kpọ emi ẹnamde ata nnennen nnennen man ekekem ye se ẹyomde.” Ke uwụtn̄kpọ, ẹma ẹdọhọ ke owo eye anana ndo, ndi oro ọwọrọ ke enye inyeneke ndo ndomokiet?

Adam ye Eve ẹma ẹfọn ẹma ke ido uwem, ke n̄kan̄ eke spirit, ye ke ikpọkidem. Mmọ ẹma ẹfọn ẹma nte Andibot okonyụn̄ oyomde. Edi ke ndondo oro mmọ ẹkesọn̄de ibuot mînyụn̄ idụhe aba uwem nte Andibot okoyomde, mmọ ikọfọnke aba ima, ikonyụn̄ ikemeke n̄ko ndinyene eyen ndomokiet oro ọfọnde ama. Ntre ke idiọkn̄kpọ akanam Adam ayak unana mfọnmma ye n̄kpa ọnọ ofụri ubonowo.—Rome 5:12.

Edi Jesus ama ọdọhọ ke Ukwọrọikọ esie ke Obot ete ke idem mme anana-mfọnmma owo ẹkeme ndifọn mma, kpa ye oro mîdinanake ndo. Enye ama owụt nte ẹkpenyenede ata ima. Utọ ima emi ke Abasi ama ubonowo. Jesus ọkọdọhọ ete: “Ẹka iso ẹma mme asua mbufo ẹnyụn̄ ẹbọn̄ akam ẹban̄a mmọ eke ẹkọbọde mbufo; man mbufo ẹkpewụt ẹte mmimọ idi nditọ Ete mbufo emi odude ke heaven, sia enye anamde utịn esie asiaha ọnọ ndiọi owo ye nti owo onyụn̄ anamde edịm edep ọnọ ndinen owo ye mme anam ukwan̄ido.” (Matt. 5:44, 45) Ndima ima ntem owụt ke mme mbet Jesus ẹkpebe mfọnmma uwụtn̄kpọ Abasi.

Mfịn, Mme Ntiense Jehovah ke ofụri ererimbot ke ẹdomo ndima mme owo ntem. Mmọ ẹma ndin̄wam kpukpru orụk owo ẹnyene nnennen ifiọk akpanikọ Bible, inamke n̄kpọ m̀mê owo oto m̀mọ̀n̄, m̀mê esinyụn̄ aka ewe ido ukpono. Mme Ntiense Jehovah ke idụt 236 ke ẹnịm ukpepn̄kpọ Bible ye mbon oro ẹnyenede udọn̄, emi ẹwakde ẹbe owo 7,000,000.

Jesus okobụp ete: “Edieke mbufo ẹmade mmọ eke ẹmade mbufo, nso utịp ke mbufo ẹnyene? Nte mme ọbọ a-tax inamke kpasụk ntre? Ndien edieke mbufo ẹkọmde nditọete mbufo kpọt, nso n̄wọrọnda n̄kpọ ke mbufo ẹnam? Nte mbon idụt inamke kpasụk ntre?” (Matt. 5:46, 47) Ata mme Christian isisarike owo ke ntak emi mîtoho edem mmọ, m̀mê ke ntak ifiọkn̄wed, m̀mê ndima mbon oro ẹmade mmọ kpọt. Utu ke oro, mmọ ẹsin̄wam mme ubuene ye mbon udọn̄ọ, n̄kpri ye ikpọ. Ntre ke mme Christian ẹma ima nte Jehovah, ẹnyụn̄ ẹfọn ẹma, kpa ye oro mînanake ndo.

Edi ndi nnyịn iyosụk ifọn ima nte Adam ọkọfọnde ama ke Eden tutu amama? Ih, mbon oro ẹbuọtde idem ke uwa ufak Jesus ẹyefọn ẹma ke ini Jesus edikarade ke tọsịn isua, kpa ini emi enye ‘edibiatde utom Devil.’—1 John 3:8.