Mme Uyen—Nso ke Ẹdida Uwem Mbufo Ẹnam?
Mme Uyen—Nso ke Ẹdida Uwem Mbufo Ẹnam?
“Nte ami ntopde ita idịghe nditọ ofụm.”—1 COR. 9:26.
1, 2. Man okụt unen nte osụk akabarede akwa owo, nso ke ana anam?
EDIEKE okpoyomde ndika ebiet oro akanam mûkaha, eyedi akpakama n̄wed usụn̄isan̄ ye ukwak uwụt owo usụn̄ emi ẹkotde ekanem mbakara m̀mê compass. N̄wed usụn̄isan̄ oro ayan̄wam fi ọdiọn̄ọ ebiet emi odude ye ebiet emi okpodụkde. Ekanem mbakara oro ayan̄wam fi asan̄a ke nnennen usụn̄. Edi n̄wed usụn̄isan̄ ye ekanem mbakara oro idinyeneke ufọn edieke afo mûfiọkke ebiet emi akade. Mbak edidi oyo aka mi oyo aka ko, oyoyom ọfiọk akpan ebiet emi afo akade.
2 Se afo osobode edi oro nte osụk akabarede akwa owo. Afo emenyene ata eti n̄wed usụn̄isan̄ ye ekanem mbakara. Bible edi n̄wed usụn̄isan̄ emi edin̄wamde fi ọfiọk nnennen usụn̄ emi okpodụkde. (N̄ke 3:5, 6) Ama enen̄ede ọnọ ubieresịt fo ukpep, enye ekeme ndin̄wam fi asan̄a ke nnennen usụn̄. (Rome 2:15) Enye ekeme ndikabade ntie nte ekanem mbakara. Edi, man okụt unen ke uwem, ana ọfiọk n̄ko ebiet emi afo akade. Ana afo enịm mme utịtmbuba.
3. Ke 1 Corinth 9:26, Paul ọdọhọ ke nso idi ufọn edinịm utịtmbuba?
3 Apostle Paul ama etịn̄ ntak emi ọfọnde inịm utịtmbuba inyụn̄ idomo ndisịm mmọ ke ini ekewetde ete: “Nte ami mfehede idịghe nte mînyeneke iwụk; nte ami ntopde ita idịghe nditọ ofụm.” (1 Cor. 9:26) Edieke enịmde mme utịtmbuba, afo eyefehe mbuba fo ye iwụk. Ibịghike afo ayanam ikpọ ubiere ke utọ n̄kpọ nte utuakibuot, utom, ndọ, ye ubon, ke ndisiak ibat ibat. Ndusụk ini, ekeme nditie fi nte se enyenede ndinam awak akaha. Edi edieke ebemde iso ada akpanikọ oro ekpepde ye mme edumbet Ikọ Abasi ebiere se edinamde, afo ududụkke ebiet emi mûkpodụkke.—2 Tim. 4:4, 5.
4, 5. (a) Nso ikeme nditịbe edieke afo mûnịmke mme utịtmbuba unọ idemfo? (b) Ntak emi okpoyomde ndinem Abasi esịt ke kpukpru se ebierede ndinam?
4 Edieke mûnịmke utịtmbuba unọ idemfo, mme ubọkn̄ka fo ye mme andikpep ẹkeme ndidomo ndinam fi anam se mmọ ẹkerede ke ọyọfọn ye afo. Edi, kpa ye oro enịmde utịtmbuba, ndusụk owo ẹkeme ndisụk ntịn̄ se mmọ ẹkpemade fi anam. Ke ini mmọ ẹtịn̄de emi, bụp idemfo, ‘ndi mme n̄kpọ emi ẹyen̄wam mi nti Andibot mi ke ini nsụk ndide akparawa mi mîdịghe ndi mmọ ẹyekpan mi ndinam oro?’—Kot Ecclesiastes 12:1.
5 Ntak emi okpoyomde ndinem Abasi esịt ke kpukpru se ebierede ndinam? Akpa ntak edi ke Jehovah ọnọ nnyịn kpukpru nti n̄kpọ oro inyenede. (Jas. 1:17) Ke akpanikọ, kpukpru nnyịn imenyene ntak ndiwụt esịtekọm nnọ Jehovah. (Edi. 4:11) Mfọnn̄kan usụn̄ ndiwụt esịtekọm edi nditi Jehovah ke ini enịmde mme utịtmbuba. Ẹyak ineme mme utịtmbuba emi ekpenịmde ye se akpanamde man esịm mmọ.
Mme Utịtmbuba Ewe ke Afo Ekpenịm?
6. Ata akpan utịtmbuba ewe ke afo ekpenịm, ndien ntak-a?
6 Nte ikekpepde ke ọyọhọ ibuotikọ iba, ata akpan utịtmbuba fo ekpedi ndidụn̄ọde nse m̀mê se ẹkpepde fi ke Bible enen̄ede edi akpanikọ. (Rome 12:2; 2 Cor. 13:5) Mme uke fo ẹkeme ndinịm ke unam okoforo owo, mîdịghe ẹnịm mme nsunsu ukpepn̄kpọ ido ukpono sia se ẹnyụn̄ ẹkpepde mmọ ẹdi oro. Edi afo ukpenyeneke ndinịm n̄kpọ ntre nnan nnan sia mbon en̄wen ẹdọhọde fi ke oro edi akpanikọ. Ti ete ke Jehovah oyom fi ada ofụri ekikere fo anam n̄kpọ imọ. (Kot Matthew 22:36, 37.) Ete nnyịn eke heaven oyom fi ada mme uyarade oro ẹdude ọsọn̄ọ mbuọtidem fo.—Heb. 11:1.
7, 8. (a) Siak mme utịtmbuba emi edisọpde isịm, oro ẹdisọn̄ọde mbuọtidem fo? (b) Nso iditịbe ama esesịm ndusụk utịtmbuba emi?
7 Ntak emi mûnịmke mme utịtmbuba emi ekemede ndisọp nsịm man ọsọn̄ọ mbuọtidem fo? Emi ekeme ndidi ndisibọn̄ akam kpukpru usen. Man esinyene se esịnde ke akam fo onyụn̄ ekeme ndisian Abasi akpan n̄kpọ emi oyomde, emekeme ndisimụm se itịbede ke usen ke usen ndọn̄ ke ibuot m̀mê ndiwewet ke n̄wed. Kûtịn̄ mfịna emi okosobode kpọt edi tịn̄ n̄ko nti n̄kpọ oro akamade. (Phil. 4:6) En̄wen ekpedi ndikot Bible ke usen ke usen. Ndi ama ọfiọk ke edieke okotde ikọn̄ Bible iba kpukpru usen ke oyokot ofụri Bible ama isua kiet kpọt? * Psalm 1:1, 2 ọdọhọ ke ‘ọfọfọn ọnọ owo eke mbet Jehovah adatde enye esịt, emi onyụn̄ osụk ekerede mbet esie ke uwemeyo ye ke okoneyo.’
8 Ọyọhọ utịtmbuba ita oro ekpenịmde, emi edisọpde isịm edi ndisitịm idem ndinọ ibọrọ ke kpukpru mbono esop. Afo emekeme nditọn̄ọ ke ndikokot ibọrọ m̀mê ndikot itie N̄wed Abasi. Nte ini akade, afo emekeme ndikpep ndinọ ibọrọ ke ikọ idemfo. Ke nditịm ntịn̄, ini ekededi emi afo ọnọde ibọrọ, afo awa uwa ekọm ọnọ Jehovah. (Heb. 13:15) Ama esesịm ndusụk utịtmbuba emi, mbuọtidem fo oyokpon, afo oyonyụn̄ enen̄ede owụt esịtekọm ọnọ Jehovah, onyụn̄ eben̄e idem ndinịm mme utịtmbuba emi ẹsidade ini ndisịm.
9. Edieke mûdịghe kan̄a asuanetop Obio Ubọn̄, siak mme utịtmbuba emi ẹsidade ini ndisịm, emi ekemede ndinịm.
9 Nso idi mme utịtmbuba emi ẹsidade ini ndisịm, emi ekemede ndinịm? Edieke mûtọn̄ọke kan̄a ndikwọrọ eti mbụk an̄wan̄wa, utịtmbuba emi ekpenịmde ekpedi ndiyom usụn̄ ndi asuanetop Obio Ubọn̄. Ama esesịm eti utịtmbuba emi, oyoyom esịn ifịk ọkwọrọ ikọ edifọn edifọn, uyakke ọfiọn̄ ebe emi mûkwọrọke ikọ. Oyoyom ekpep n̄ko ndisida Bible n̄kwọrọ ikọ. Nte anamde emi, afo oyokụt ke ukwọrọikọ eyesinem fi etieti. Ini emi ke afo edinen̄ede ama ndisidu ke an̄wautom mbịghi, nnyụn̄ mma ndinịm ukpepn̄kpọ Bible. Edieke edide asuanetop emi mînaha kan̄a baptism, ata eti utịtmbuba en̄wen emi ekpenịmde ekpedi ndinam n̄kpọ man odot ndina baptism onyụn̄ akabade edi kiet ke otu Mme Ntiense Jehovah oro ama akayak idem ọnọ Abasi.
10, 11. Siak mme utịtmbuba oro ẹsidade ini ndisịm, emi n̄kparawa oro ẹma ẹkena baptism ẹkpenịmde?
10 Edieke edide asan̄autom Jehovah emi ama akana baptism, kop mme utịtmbuba emi ẹsidade ini ndisịm, emi afo ekpenịmde mi. Afo emekeme ndisika n̄kan̄wam nsio nsio esop n̄kwọrọ ikọ ke mme efakutom oro owo mîsiwakke ndikwọrọ ikọ. Omonyụn̄ ekeme ndida ofụri ukeme fo nnam utom usiakusụn̄ unọ un̄wam mîdịghe eke ofụri ini edieke okopde nsọn̄idem. Ata ediwak mme asiakusụn̄ emi ẹkopde inemesịt ke utom mmọ ẹyesian fi ke utom uyọhọ ini enen̄ede edi ata eti usụn̄ nditi Andibot fo ke ini edide akparawa, ndien ke emi esinyene nti utịp. Afo emekeme ndisịm mme utịtmbuba emi ke ini osụk odude ye ete ye eka fo. Esop emi odude ẹyebọ ufọn edieke afo esịmde mme utịtmbuba emi.
11 Mme utịtmbuba en̄wen emi ẹsidade ini ndisịm, ẹkeme ndida fi n̄kpọn̄ esop mbufo. Ke uwụtn̄kpọ, afo emekeme ndinam ndutịm ndikọkwọrọ ikọ ke obio m̀mê idụt emi udọn̄ okponde. Emekeme ndikan̄wam ẹbọp mme Ufọkmbono Obio Ubọn̄ m̀mê n̄kọk itieutom ke mme idụt en̄wen. Afo emekeme ndikam n̄kanam utom ke Bethel mîdịghe emekeme ndikabade ndi isụn̄utom. Edi ata akpa n̄kpọ emi anade anam man ekeme ndisịm mme utịtmbuba emi edi ndibem iso nna baptism. Edieke mûnaha kan̄a baptism, kere ban̄a se akpanamde man odot.
Se Akpanamde man Odot Ndina Baptism
12. Nso isinam ndusụk owo ẹna baptism, edi ntak emi mîfọnke?
12 Afo ekere ke nso isinam mme owo ẹna baptism? Ndusụk owo ẹkeme ndikere ke ndina baptism ayanam mmimọ ikûnam idiọkn̄kpọ. Mbon en̄wen ẹkeme ndiyom ndina baptism sia ẹkụtde mme uke mmọ ẹnade. Mme uyen eken ẹkeme ndina baptism man ẹnem mme ete ye eka mmọ esịt. Edi baptism idikpanke fi ndinam mme n̄kpọ emi akpamade ndidịbe nnam; ikponyụn̄ inaha afo ana baptism sia mbon en̄wen ẹnyịkde fi ẹte ana. Afo ekpenyene ndina baptism ke ini enen̄erede ọfiọk se ọwọrọde ndidi kiet ke otu Mme Ntiense Jehovah ye ke ini okụtde ke imeben̄e idem ndinam ofụri se emi ediyomde fi anam.—Eccl. 5:4, 5.
13. Ntak emi afo akpanade baptism?
13 Ntak kiet emi akpanamde fi ana baptism edi koro Jesus ọkọdọhọ mme anditiene enye ete ‘ẹka ẹkenam mme mbet, ẹnịm mmọ baptism.’ Ndien enye n̄ko ama enịm uwụtn̄kpọ ke ndina baptism. (Kot Matthew 28:19, 20; Mark 1:9.) Akan oro, baptism edi akpan n̄kpọ emi mbon oro ẹyomde edinyan̄a ẹsinamde. Ke ini apostle Peter eketịn̄de aban̄a nte Noah ọkọkọn̄de ubom ada anyan̄a idemesie ye ubon esie, enye ama adian do ete: “Se isan̄ade ikekem ye emi ke anyan̄a mbufo n̄ko ke emi, oro edi, baptism, . . . ebe ke ediset ke n̄kpa Jesus Christ.” (1 Pet. 3:20, 21) Edi emi iwọrọke ke afo akpana baptism n̄kukụre man enyene edinyan̄a. Utu ke oro, afo akpana baptism ke ntak emi amade Jehovah onyụn̄ oyomde ndinam n̄kpọ esie ke ofụri esịt, ye ke ofụri ukpọn̄, ye ke ofụri ekikere, ye ke ofụri ukeme fo.—Mark 12:29, 30.
14. Nso isinam ndusụk owo ẹfehe ndina baptism, edi nso idin̄wam fi akan mfịna emi?
14 Ndusụk owo ẹkeme ndifehe ndina baptism sia ẹkerede ke ẹkeme ndibịn mmimọ mfep ke esop edieke inamde idiọkn̄kpọ. Ndi se afo efehede edi oro? Edieke edide ntre, utọ ndịk oro inen̄ekede idiọk. Emi owụt ke ọmọfiọk se ọwọrọde owo ndidi kiet ke otu Mme Ntiense Jehovah. Ndi odu n̄kpọ en̄wen emi ekemede ndinam fi efehe ndina baptism? Ekeme ndidi afo unịmke ke ndida edumbet Abasi ndu uwem edi mfọnn̄kan n̄kpọ owo ndinam. Ke edide ntre, edieke ekerede aban̄a se isitịbede inọ mbon oro mîdaha mme edumbet Bible idu uwem, emi ekeme ndinam fi ebiere se edinamde. N̄kpọ efen edi ke ekeme ndidi afo amama mme edumbet Abasi, edi ekere ke udukemeke ndida mmọ ndu uwem. Ke akpanikọ, utọ ekikere emi idiọkke, akam owụt ke afo omosụhọde idem. Idem n̄kpọ, Bible ọdọhọ ke esịt esibian̄a kpukpru mme anana mfọnmma owo. (Jer. 17:9) Edi afo emekeme ndikụt unen edieke afo akade iso ‘ekpeme ndinam Ikọ Abasi.’ (Kot Psalm 119:9.) Ntre, oyom akan se ededi emi anamde fi efehe ndina baptism. *
15, 16. Ekeme didie ndifiọk m̀mê omodot ndina baptism?
15 Ntre, ekeme didie ndifiọk m̀mê omodot ndina baptism? N̄kpọ kiet emi edin̄wamde fi edi ndibụp idemfo mme utọ mbụme ntem: ‘Ndi mmekeme ndinam mme akpan ukpepn̄kpọ Bible an̄wan̄a mbon en̄wen? Ndi mmesima ndika ukwọrọikọ idem ke ini ete ye eka mi mîkaha? Ndi mmesidomo ndidụk kpukpru mbono esop? Ndi odu mme ini n̄kesịnde ndinam se mme uke mi ẹkeyomde nnam? Ndi nyaka iso nnam n̄kpọ Jehovah idem ọkpọkọm ete ye eka mi ye mme ufan mi ẹtetre ndinam emi? Ndi mmọbọn̄ akam nnọ Jehovah ke nyom ndidi ufan esie? Ndi mmọbọn̄ akam nnọ Jehovah nnyụn̄ nyak idem ofụri ofụri nnọ enye?’
16 Baptism edi edinam emi enen̄erede okpụhọde uwem owo ndien owo ikpadaha enye mfefere mfefere. Ndi omokpon ekem ndinam utọ akwa n̄kpọ emi? Owo ndikpon n̄kem m̀mê ndikọri nsịm ọyọhọ idaha ikụreke ke owo ndikeme ndinọ utịn̄ikọ ọfọn m̀mê ndinọ nti ibọrọ ke mbono esop. Emi oyom owo ekeme ndinam ubiere ke enye ama eketịm ọfiọk mme edumbet Bible. (Kot Mme Hebrew 5:14.) Edieke okponde ekem onyụn̄ ekemede ndinam emi, ọwọrọ ke n̄kponn̄kan ifet oro owo ekemede ndinyene eberede ọnọ fi—oro edi, ifet ndinam n̄kpọ Jehovah ke ofụri esịt nnyụn̄ ndu uwem oro owụtde ke ama ayak idem ọnọ enye.
17. Nso idin̄wam fi akan mme idomo oro ekemede ndisobo ke ama akana baptism?
17 Ke ndondo oro anade baptism, eyenen̄ede ọdọn̄ fi ndinam n̄kpọ Abasi. Edi idibịghike, afo emekeme ndisobo mme n̄kpọ emi ẹdidomode mbuọtidem ye nsọn̄ọnda fo. (2 Tim. 3:12) Kûkere ke eyekeme ndibe mme idomo oro ikpọn̄. Dọhọ ete ye eka fo ẹteme fi se akpanamde. Dọhọ mbon emi ẹsịnde idem ẹnam n̄kpọ Abasi ke esop mbufo ẹn̄wam fi. Dụk nsan̄a ye mbon emi ẹdin̄wamde fi. Kûfre ke Jehovah ekere aban̄a fi, oyonyụn̄ ọnọ fi ukeme ndibe idomo ekededi.—1 Pet. 5:6, 7.
Nso ke Akpanam man Esịm Utịtmbuba Fo?
18, 19. Nso ufọn ke edibọ edieke odụn̄ọrede se esibemde iso anam?
18 Kpa ye ofụri ukeme oro esịnde, ndi osụk etie fi nte ke unyeneke ini unam se akpanade anam? Edieke edide ntre, fiak dụn̄ọde se esibemde iso anam. Ke uwụtn̄kpọ: Tan̄ ikpọ n̄kwa itiat dọn̄ ke bọket ọkpọ. Ekem wobi ntan dọn̄ yọhọ bọket oro. N̄kwa itiat ye ntan ẹdiyọhọ bọket oro. N̄wan̄a mmọ bon ke isọn̄. Isan̄ emi, bem iso wobi ntan oro dọn̄ ke bọket oro, ekem tan̄ ikpọ n̄kwa itiat oro dọn̄. Ndi ufan̄ oyodu ọnọ kpukpru n̄kwa itiat oro? Baba. Ntaka? Koro afo ekebem iso ọdọn̄ ntan ọyọhọ ọkpọ oro.
19 Ukem mfịna emi ke afo enyene ke se adade ini fo anam. Edieke adade unọ idem inemesịt nte akpa n̄kpọ ke uwem fo, oyokụt ke udunen̄ekede unyene ini unam ata akpan n̄kpọ—oro edi, n̄kpọ Abasi. Edi edieke ‘odụn̄ọrede ọfiọk se idide akpan n̄kpọ ikan’ nte Bible etemede, oyokụt ke eyenyene ini anam n̄kpọ Abasi onyụn̄ enyene ini ọnọ idem fo inemesịt.—Phil. 1:10.
20. Nso ke akpanam edieke esịt esitịmerede fi, esinyụn̄ enyenede eyịghe aban̄a idemfo nte osụk odomode ndisịm mme utịtmbuba fo?
20 Nte afo odomode ndisịm mme utịtmbuba fo, emi esịnede edina baptism, esịt ekeme nditịmede fi ndusụk ini, omonyụn̄ ekeme ndinyene eyịghe mban̄a idemfo. Ke mme utọ ini ntem, “top mbiomo fo nọ Jehovah, ndien enye ayakama fi.” (Psalm 55:22) Kan̄a ke emi, ifet eberede ọnọ fi nditiene mbuana ke utom emi esinọde owo ata inemesịt, oro edi, utom edikwọrọ ikọ ye edikpep owo Bible. (Utom 1:8) Afo emekeme ndimek nditre ndikwọrọ ikọ. Mîdịghe emek nditiene nnam. Kûtre nditiene nnam se ekemede ke utom Obio Ubọn̄ emi. Tutu amama, udutuaha n̄kpọfiọk ke ndinam n̄kpọ nnọ “Andibot fi ke ini afo edide akparawa.”—Eccl. 12:1.
[Mme Ikọ Idakisọn̄]
^ ikp. 7 Se Enyọn̄-Ukpeme eke August 1, 2009, page 15-18.
^ ikp. 14 Edieke oyomde un̄wam ke afan̄ emi, kot n̄wed emi, Mme Mbụme N̄kparawa Owo Ẹbụpde—Mme Ibọrọ Ẹnyenede Ufọn, ọyọhọ Eboho 2, ibuot 34.
Didie ke Afo Ọkpọbọrọ?
• Ntak emi ekpenịmde mme utịtmbuba ọnọ idemfo?
• Nso idi ndusụk nti utịtmbuba emi ọfọnde enịm?
• Nso ke akpanam man odot ndina baptism?
• Didie ke ndidụn̄ọde se esibemde iso anam edin̄wam fi esịm mme utịtmbuba fo?
[Mme Mbụme Ukpepn̄kpọ]
[Ndise ke page 13]
Ndi emenịm utịtmbuba ndisikot Bible ke usen ke usen?
[Ndise ke page 15]
Nso ke akpanam man odot ndina baptism?
[Ndise ke page 16]
Nso ke ndise emi ekpep fi?