‘Se Enye Akanamde Etiene Enye Nnennen Nnennen’

THEODORE JARACZ, owo Otu Ukara Mme Ntiense Jehovah, ama okụre utom esie ke isọn̄ ke usenubọk Wednesday June 9, 2010. Enye ekedi isua 84, akpa ọkpọn̄ Melita an̄wan esie—emi enye ọkọdọde ke ofụri isua 53—ye adiahaeka esie, ye nditọ adiahaeka esie ita, erenowo kiet ye iban iba.

Brọda Jaracz akamana ke September 28, 1925, ke Pike ke Kentucky, U.S.A. Enye akana baptism ke August 10, 1941, ke ini enye ekedide isua 15. Ke isua iba ama ekebe, ke ini enye edide isua 17, enye ama ọtọn̄ọ utom usiakusụn̄ ofụri ini, emi ekedide ntọn̄ọ utom uyọhọ ini emi enye akanamde ke n̄kpọ nte isua 67.

Ke 1946, ke ini enye ekedide isua 20, Brọda Jaracz ama odụk ọyọhọ otu itiaba ke Ufọkn̄wed Gilead. Ke ama okokụre Gilead, ẹma ẹmek enye esenyịn emi asan̄ade-san̄a ke Cleveland ke Ohio ke United States. Ke 1951, ẹma ẹmek enye esenyịn n̄kọk itieutom Australia. 1983 Yearbook of Jehovah’s Witnesses ọdọhọ ke ‘ifịk oro Brọda Jaracz ekenyenede ke n̄kpọ Abasi ye nte enye ekesinamde n̄kpọ ke nde ke nde, onyụn̄ adade usụn̄ edifọn edifọn ke an̄wautom ama enen̄ede esịn udọn̄ ọnọ nditọete ke ofụri idụt oro.’

Ke ama akafiak ọnyọn̄ United States, Brọda Jaracz ama ọdọ Melita Lasko ke December 10, 1956. Enye ama asan̄a ye n̄wan esie esịn idem anam utom esenyịn oro asan̄ade-san̄a, ke mme circuit ye mme district ke ata ediwak itie ke United States. Ke November 1974, ẹma ẹmek Brọda Jaracz ndidi kiet ke otu owo Otu Ukara Mme Ntiense Jehovah.

Owo idisọpke ifre Brọda Jaracz nte asan̄autom Jehovah emi ekenen̄erede esịn idem ye ofụri esịt anam n̄kpọ Abasi. Enye ekedi eti ebe oro akamade onyụn̄ ekerede aban̄a n̄wan esie. Enye ama esinen̄ede ama mme n̄kpọ eke spirit, esinyụn̄ ama ndibem iso n̄kere mban̄a ufọn mbon en̄wen. (1 Cor. 13:4, 5) Utọ ima emi akanam enye esidọhọ ẹnam n̄kpọ ukem ukem ye kpukpru owo, ẹtua kpukpru owo mbọm, ẹkûnyụn̄ ẹsari owo ndomokiet. N̄ko, ifịk oro enye ekenyenede ke an̄wautom owụt nte enye ekenen̄erede ama onyụn̄ ekere aban̄a mme owo.

Kpa ye oro inen̄erede ifụhọ nte itabade ifịk ifịk edima eyenete nnyịn emi ekedide owo ubon Bethel mi, nnyịn imokop inemesịt ke ediwak isua oro Brọda Jaracz ekesịnde idem anam n̄kpọ Jehovah. Nnyịn imenen̄ede inịm ke enye ‘ọbọ anyanya uwem sia ama akanam akpanikọ tutu esịm n̄kpa.’ (Edi. 2:10) Imonyụn̄ inịm ke ‘se enye akanamde etiene enye nnennen nnennen.’—Edi. 14:13.