Ini Ibehe Owo Ndinam N̄kpọ Abasi

Ke Málaga ke usụk usụk Spain, mma kiet ye eyen esie ẹma ẹna baptism ke December 19, 2009, ndien mmọ mbiba ẹkere Ana. Mmọ ẹkesịne ke otu owo 2,352 emi ẹkanade baptism ke Spain ke 2009. Enyene n̄kpọ emi akpade owo idem aban̄a baptism mmọ mbiba, oro edi, isua emana mmọ. Mma oro ekedi isua 107 ke ini eyen esie ekedide isua 83.

Nso ikanam mmọ ẹna baptism ndiwụt ke imayak idem inọ Jehovah? Ke ntọn̄ọ ntọn̄ọ iduọk isua 1970, mbọhọidụn̄ Ana eyen mma oro ama esikot enye Ukpepn̄kpọ N̄wed Esop oro ekesinịmde ke ufọk eyenete kiet. Ana ama esinyụn̄ odụk ke ini ke ini. Edi utom ikayakke enye anam n̄kọri akan oro.

Ke n̄kpọ nte isua duop ẹma ẹkebe, ndusụk nditọ Ana ẹma ẹkpep Bible ẹnyụn̄ ẹkabade mme asan̄autom Jehovah. Mari Carmen, kiet ke otu nditọ esie emi ẹdude ke esop, ama afiak an̄wam enye onyụn̄ anam enye ọtọn̄ọ ndikpep Bible. Ndien eka eka mmọ ama etiene oyom ndikpep Bible. Nte ini akakade, owo duop ke ubon emi ẹma ẹna baptism.

Esịt ama enen̄ede enem eka ye eyen emi etieti ke usen baptism mmọ. Ana eka eka Mari emi ekedide isua 107 ọkọdọhọ ke usen oro ete, “Jehovah ọfọn ye ami etieti ke ndiyak mi ndi ndikpono enye.” Eka Mari ọdọhọ ete, “Nyom ndikpono Jehovah, nnam uduak esie nnyụn̄ n̄kwọrọ eti mbụk nnọ adan̄a ediwak owo nte n̄kekeme, mbemiso Paradise edi.”

Mbono esop esinen̄ede anam ebeakpa iba emi ẹnen̄ede ẹkop inemesịt. Ebiowo kiet ke esop mmọ ọdọhọ ete, “Akananam mmọ ifiakke mbono esop. Mmọ ẹsinen̄ede ẹma ndibọrọ mbụme ke Ukpepn̄kpọ Enyọn̄-Ukpeme.”

Nsọn̄ọnda mmọ anam iti Anna, ebeakpa, emi ‘akananam mîtreke ndidu ke temple nnam edisana utom okoneyo ye uwemeyo, ntre udia nnyụn̄ nnam n̄kpeubọk.’ Emi ama anam enye etiene okụt Jesus, ini ẹkemende enye nsek ẹka temple. (Luke 2:36-38) Kpa ye Anna ekedide isua 84, enye ikọsọn̄ke ikaha ndinam n̄kpọ Jehovah, ukem ntre ye koko esie iba emi.

Ndi emenyene iman emi ẹmade ndikop etop Bible? Mîdịghe ndi ọmọfiọk owo emi ama ọkọsọn̄, edi emi esimade ndikop ukwọrọikọ? Utọ owo emi ekeme nditie nte Ana ye eka esie emi itịn̄de iban̄a mi, koro ini ibehe owo ndinam n̄kpọ ata Abasi, Jehovah.

[Se ẹwetde ke ikpọ abisi ke page 25]

“Jehovah ọfọn ye ami etieti”

[Se ẹwetde ke ikpọ abisi ke page 25]

“Nyom ndikpono Jehovah, . . . mbemiso Paradise edi”