Nte Afo Emeti?

Nte afo ama ọbọ ufọn oto edikot mme nsiondi Enyọn̄-Ukpeme eke ndondo emi? Ọfọn, se m̀mê emekeme ndibọrọ mme mbụme oro ẹtienede mi:

• Ewe ido ukpono ikọtọn̄ọ ndikpep nte ke Abasi ama ebebiere se owo kiet kiet edidede?

Ido ukpono Calvin enen̄ede enịm ke Abasi ama ebebiere se owo kiet kiet edidide. Ke ẹsụk ẹkpekpep Ukpepn̄kpọ Jean Cauvin, (John Calvin) ke mme utọ ufọkabasi nte Reformed, Presbyterian, Congregational, ye Puritan.—9/1, page 18-21.

• Cain akada m̀mọ̀n̄ n̄wan esie?

Bible ọdọhọ ke Eve ama aman “nditọiren ye nditọiban,” ntre enyene ndidi Cain ọkọdọ kiet ke otu nditọeka esie iban m̀mê eyen eyeneka esie. (Gen. 5:4)—9/1, page 25.

• Ewe angel ke Abasi ọkọdọn̄ ebem nditọ Israel iso ke ini Abasi okosiode mmọ ke Egypt? (Ex. 23:20, 21)

Owụt ifiọk ndinịm ke angel emi ‘enyịn̄ Jehovah odude enye ke idem’ edi akpan Abasi emi nnyịn idiọn̄ọde nte Jesus.—9/15, page 21.

• Ntak emi 1 Corinth enemede aban̄a unam emi ẹkewade ẹnọ ndem?

Ẹma ẹsiwa unam ke mme temple Greece ye Rome, edi etie nte ẹma ẹsida nyọhọ-nsụhọ unam oro owo mîkataha ẹkenyam ke urua. Mme Christian ikesitieneke ikpono ndem, edi ufọn ikodụhe mmọ ndikere ke ndidep utọ unam emi ke urua ekeme ndinam owo edehe ke enyịn Abasi. Apostle Paul ekewet ete: “Ẹta kpukpru unam eke ẹnyamde ke urua, ẹkûbụp mbụme mbak ubieresịt edifịna mbufo; koro ‘isọn̄ ye se iyọhọde ke esịt ẹnyene Jehovah.’” (1 Cor. 10:25, 26)—10/1, page 12.

• Nso idi ndusụk ntak oro owo ekemede ndinọ, ndien Abasi inyịmeke?

‘Ọsọn̄ akaha. Idọn̄ke mi. Nnyeneke ini. Ntịmke ndot. Owo ama anam se iyatde mi.’ Ndomokiet ke otu emi idịghe eti ntak emi akpanamde owo etre ndinam n̄kpọ Abasi.—10/15, page 12-15.

• Nso idi ndusụk n̄kpọ oro akpanamde man mbono esop enem fi ye mbon en̄wen?

Bem iso tịm idem. Dụk kpukpru ini. Sịm ke eti ini. Kama Bible ye (mme) n̄wed oro ẹdikpepde ka. Fep se iwọn̄ọrede owo ntịn̄enyịn. Tiene buana. Nọ mbio mbio ibọrọ. Nam se ẹnọde fi anam. Toro mbon oro ẹkenamde n̄kpọ. Neme nneme ye nditọete mbemiso mbono esop ọtọn̄ọ ye ke ama akasuana.—10/15, page 22.

• Udọn̄ọ akpamfia emi esịnede se ẹdiọn̄ọde mfịn nte udọn̄ọ Hansen, esịne ke ewe mbụk Bible emi abuanade ekpri eyenan̄wan?

Udiana Ndidem ibuot 5 etịn̄ aban̄a ekpri eyenan̄wan Israel, emi ekedide eyenufọk Naaman akwa owoekọn̄ Syria. Akwa owoekọn̄ emi ọkọdọn̄ọ akpamfia, ntre ekpri eyenan̄wan emi ama ọdọhọ enye aka ke prọfet Elisha ayanam enye asana.—11/1, page 22.

• Aaron ndikayak mme uke ẹnụk enye anam se mîkpanamke ekpep nnyịn nso?

Ke Moses ama akadaha, ekemmọ nditọ Israel ẹma ẹdọhọ Aaron anam abasi ọnọ mmimọ. Enye ama enyịme onyụn̄ anam. Emi owụt ke idịghe mme uyen kpọt ke mme uke ẹsinyịk ẹnam se mîkpanamke. Emi esitịbe ọnọ ikpọ owo n̄ko emi ẹyomde ndinam se inende. Mmọdo, ana in̄wana ibiọn̄ọ utọ n̄kpọ emi.—11/15, page 8.

• Ewe idi akpanikọ, ewe edi abian̄a?

Satan edi ata owo: akpanikọ. (2 Cor. 11:14) Kpukpru mme akpan̄kpa ẹka obio mme spirit: abian̄a. (Eccl. 9:5) Mme anam-akpanikọ angel ẹkere ẹban̄a nnyịn: akpanikọ. (Ps. 34:7) Jesus edi n̄ka ye Abasi: abian̄a. (1 Cor. 11:3)—12/1, page 8-9.