Yak Ifịk Utuakibuot Akpanikọ Adia Fi Idem
Yak Ifịk Utuakibuot Akpanikọ Adia Fi Idem
“Idọk okpon, edi mme anamutom iwakke.”—MATT. 9:37.
1. Nso isinam owo anam n̄kpọ usọp usọp?
YAK idọhọ ke okosụk etem udia, ndien ntokon odụk fi enyịn. Nso ke akpanam? Ayada ofiori ete, “Mbọk ẸSỌSỌP ẹda mmọn̄ ẹsọk mi.” Mîdịghe, ke asan̄a ye owo aka ndikodụk ata akpan edinam, edi etie nte ini ọmọn̄ ebebe. Nso ke akpanam? Ọyọdọhọ enye, “Mbọk sọp isan̄ ke INI ỌMỌN̄ EBEBE!” Ih, edieke enyenede se anade anam, ndien ini idụhe, idem edida fi urua urua, ndien eyenen̄ede ọsọp idem anam n̄kpọ nte ekekeme. Se isinamde owo anam n̄kpọ usọp usọp edi oro!
2. Nso idi ata akpan utom oro anade mme Christian ẹsọsọp ẹnam mfịn?
2 Ata mme Christian ẹnyene akpan utom emi oyomde ẹsọsọp ẹnam ẹkan n̄kpọ en̄wen ekededi, oro edi, edikwọrọ etop eti mbụk Obio Ubọn̄ nnyụn̄ nnam mme owo ke kpukpru idụt ẹdi mbet. (Matt. 24:14; 28:19, 20) Mark mbet Jesus ama afiak etịn̄ se Jesus eketịn̄de ete ke “ẹnyene ndibem iso n̄kwọrọ eti mbụk [emi] ke kpukpru idụt” mbemiso utịt edide. (Mark 13:10) Ntre ke okponyụn̄ edi. Jesus ọkọdọhọ ete: “Idọk okpon, edi mme anamutom iwakke.” Ini idọk ama ekekem, owo isisioho enye inịm ini en̄wen; ẹsisọsọp ẹnam emi mbemiso ini ebede.—Matt. 9:37.
3. Nso ke ediwak owo ẹnam man ẹsọsọp ẹkwọrọ ikọ?
3 Sia utom ukwọrọikọ edide akpan utom ntre, ana inen̄ede isịn ofụri ukeme ye ini nnyịn inam enye nte ikpekekeme. Edi n̄kpọ inemesịt ndifiọk ke ediwak owo ke ẹnam oro. Ndusụk owo ẹnyịme ndidu mfefere uwem man ẹkeme ndinam utom usiakusụn̄, m̀mê utom isụn̄utom, m̀mê utom Bethel. Mmọ ẹnyene ekese ndinam. Ekeme ndidi mmọ ẹnam ekese n̄waidem, ẹnyụn̄ ẹsobo ediwak n̄kpọ-ata. Edi Jehovah enen̄ede ọdiọn̄ mmọ. Nnyịn imokop inemesịt etieti ke se mmọ ẹnamde. (Kot Luke 18: 28-30.) Ke adan̄aemi mmọ eken mîkemeke nditiene nnam utom uyọhọ ini, mmọ ẹsinen̄ede ẹsịn idem nte ẹkekeme ẹnam utom unyan̄a uwem emi, ndien emi esịne ndin̄wam nditọ nnyịn man mmọ ẹtiene ẹnyene edinyan̄a.—Deut. 6:6, 7.
4. Nso ikeme ndinam ndusụk owo ẹtek ke ifịk?
4 Nte ima ikokokụt, mme owo ẹsisọp idem ẹnam n̄kpọ ke ini ẹkụtde ke ini ọmọn̄ okụre ọkpọn̄ mmimọ. Nnyịn idu uwem ke akpatre ini editịm n̄kpọ emi, imonyụn̄ inyene ekese uyarade—ke N̄wed Abasi ye ke mbụk—ndiwụt ke emi edi akpanikọ. (Matt. 24:3, 33; 2 Tim. 3:1-5) Edi baba owo kiet idiọn̄ọke ata nnennen ini emi ererimbot emi edisịmde utịt. Ke ini Jesus eketịn̄de ofụri se iditịbede nte “idiọn̄ọ . . . akpatre ini editịm n̄kpọ emi,” enye ama ọdọhọ in̄wan̄-in̄wan̄ ete: “Baba owo kiet ifiọkke usen ye hour oro, mme angel ke heaven ifiọkke, Eyen inyụn̄ ifiọkke, ke mîbọhọke Ete ikpọn̄.” (Matt. 24:36) Emi ekeme ndinam ọsọn̄ ndusụk owo ndika iso nnam n̄kpọ usọp usọp, idem ọkpọkọm mmọ ẹma ẹsinanam oro ke anyan ini. (N̄ke 13:12) Ndi esitie fi ntre ke idem ndusụk ini? Nso ikeme ndin̄wam nnyịn itọn̄ọ ndinam n̄kpọ usọp usọp, inyụn̄ ika iso ikama ke ubọk oro nte inamde utom emi Jehovah Abasi ye Jesus Christ ẹnọde nnyịn mfịn?
Kpebe Uwụtn̄kpọ Jesus
5. Didie ke Jesus okowụt ke imọdiọn̄ọ ke oyom isọsọp inam utom imọ?
5 Idụhe owo ndomokiet emi esịnde ifịk anam n̄kpọ Abasi usọp usọp nte Jesus Christ. Ntak kiet emi akanamde enye ọsọsọp anam n̄kpọ ntre ekedi sia enye ekenyene isua ita ye ubak kpọt ndinam ofụri se enye ekenyenede ndinam. Kpa ye oro, idụhe eke anamde se Jesus akanamde ke ufan̄ isua ifan̄ oro. Enye ama anam mme owo ẹdiọn̄ọ enyịn̄ ye uduak Ete esie, ọkwọrọ eti mbụk Obio Ubọn̄, ayarade mbubịk ye nsunsu ukpepn̄kpọ mme adaiso ido ukpono eyo oro, ọsọn̄ọ ada ye ukara Jehovah, onyụn̄ akam enyịme n̄kpa ke ntak oro. Enye ama enen̄ede esịn ifịk ọkwọrọ ikọ, an̄wam mme owo, onyụn̄ ọkọk mme owo udọn̄ọ ke kpukpru ebiet oro enye akakade. (Matt. 9:35) Idụhe eke anamde kpukpru se Jesus akanamde ke utọ ekpri ini oro. Jesus ama enen̄ede esịn idem anam n̄kpọ Abasi.—John 18:37.
6. Nso ikenen̄ede ibehe Jesus?
6 Nso ikanam Jesus enen̄ede esịn ifịk anam utom esie? Enyene ndidi ntịn̄nnịm ikọ Daniel ama anam Jesus ọfiọk udomo ini oro Jehovah okoyomde enye anam utom esie. (Dan. 9:27) Ntịn̄nnịm ikọ Daniel owụt ke Jesus ekenyene nditre utom esie ke isọn̄ “ke ubak urua” kiet, oro edi, isua ita ye ubak. Esisịt ini ke Jesus ama akawat nte Edidem okodụk Jerusalem ke ini idọk isua 33 E.N., enye ama ọdọhọ ete: “Ini ekem ndinọ Eyen owo ubọn̄.” (John 12:23) Okposụkedi emi Jesus ọkọfiọkde ke ẹmọn̄ ẹwowot imọ, enye ikayakke oro afịna enye, m̀mê ndiyak oro anam enye enen̄ede esịn idem anam n̄kpọ Abasi do ndien. Utu ke oro, Jesus ekesịn idem oyom ndida kpukpru ifet oro enye enyenede nnam uduak Ete esie, nnyụn̄ mma mme owo. Ima emi akanam enye ọkọ mme mbet, ekpep mmọ ndikwọrọ ikọ, onyụn̄ osion̄o mmọ ọdọn̄ ẹkekwọrọ ikọ. Enye akanam emi man mmọ ẹka iso ke utom emi enye ọkọtọn̄ọde, ẹnyụn̄ ẹkam ẹnanam ẹkan se enye akanamde.—Kot John 14:12.
7, 8. Nso ke mme mbet Jesus ẹketi ke ini enye akanamde temple asana, ndien ntak emi Jesus akanamde n̄kpọ ntre?
7 Se Jesus akanamde isan̄ kiet ama enen̄ede owụt nte enye ekenyenede ifịk. Emi ekedi ke nsonso oro enye ọkọtọn̄ọde utom ukwọrọikọ esie ke Passover eke isua 30 E.N. Jesus ye mme mbet esie ẹma ẹka Jerusalem ẹkekụt “mme anyam enan̄ ye erọn̄ ye ibiom ye mme okpụhọ okụk nte ẹtiede ke temple.” Nso ke Jesus akanam, ndien didie ke edinam esie okotụk mme mbet esie?—Kot John 2:13-17.
8 Se Jesus akanamde ama eti mme mbet esie ntịn̄nnịm ikọ emi David ekewetde ke psalm ete: “Koro ifịk ufọk fo adiade mi idem.” (Ps. 69:9) Didie? Sia se enye akanamde ekedi n̄kpọ emi ekemede ndida owo ibuot. N̄kọ ọmọfiọk ke ikpọ owo temple—mme oku, mme scribe, ye mmọ eken—ẹkenyene ubọk ke idiọk mbubehe oro ẹkenamde ke temple oro. Ndikayarade n̄wo mmọ emi nnyụn̄ nsuan n̄kpọurua mmọ ọkọwọrọ ndikabade asua mme adaiso ido ukpono emi. Edi nte mme mbet esie ẹketịmde ẹfiọk, ‘ifịk ufọk Abasi,’ m̀mê ifịk oro Jesus ekenyenede ọnọ utuakibuot akpanikọ akanam enye anam oro. Nso idi ifịk? Ndi ndisịn ifịk nnam n̄kpọ okpụhọde ye ndinam n̄kpọ usọp usọp.
Ifịk ye Edinam N̄kpọ Usọp Usọp
9. Nso idi ifịk?
9 N̄wed ukabade ikọ kiet ọdọhọ ke ifịk edi “ndinen̄ede nsịn idem nnam n̄kpọ,” nnyụn̄ “nnyene ifiopesịt ke n̄kpọ,” nte n̄kpọ eke ẹbarade owo ikan̄ ke esịt. Ntre ke Jesus akanam utom esie mi ke isọn̄. Ntak edi oro Psalm 69:9 ke Today’s English Version ọdọhọde ntem ete: “Ima oro mmade ufọk fo, O Abasi, asasak mi ke esịt nte ikan̄.” Omokụt do ntak emi mme mbet Jesus ẹketide ikọ David ke ini mmọ ẹkekụtde se enye akanamde ke temple. Nso ikabara Jesus ikan̄ ke esịt ntre inam enye anam n̄kpọ ntre?
10. Nso ke Bible okot ifịk?
10 “Ifịk” oro David etịn̄de aban̄a ke Psalm 69:9 oto ikọ Hebrew oro ẹsiwakde ndikabade nte “ufụp” ke mme itie Bible en̄wen. Edikabade Eke Obufa Ererimbot esikabade ikọ emi ndusụk ini nte ‘ndiyom san̄asan̄a utuakibuot.’ (Kot Exodus 20:5; 34:14; Joshua 24:19.) Kop se n̄wed ukabadeikọ Bible kiet etịn̄de aban̄a ikọ emi mi: ‘Ẹsiwak nditịn̄ ikọ emi ke ndọ. Kpa nte ebe m̀mê n̄wan esifịbede ufụp edieke owo mmọ kiet akade akama owo en̄wen, ntre n̄ko ke Abasi esifịbe ufụp ke ini ikọt esie ẹkpọn̄de enye ẹkekpono n̄kpọ en̄wen sia enye oyom ikọt esie ẹnọ imọ san̄asan̄a utuakibuot, m̀mê ẹtuak ibuot ẹnọ imọ ikpọn̄-ikpọn̄.’ Omokụt do ke se Bible okotde ifịk idịghe sụk ifiopesịt oro owo enyenede ọnọ n̄kpọ, utọ nte ifiopesịt oro mme owo ẹsinyenede ẹnọ mbre mbuba oro mmọ ẹmade. Ufụp emi David ekenyenede ọnọ Abasi ikayakke enye ododop uyo ese owo ekededi emi okodomode idem ye Abasi, esuenede enyịn̄ Abasi, m̀mê anamde n̄kpọ ekededi oro edidade ndek iyet enyịn̄ Abasi. Ufụp emi akanam enye anam kpukpru se enye ekpekekeme man enyịn̄ Abasi asana.
11. Nso ikanam Jesus esịn ifịk anam utom Abasi?
11 Mme mbet Jesus ẹma ẹnen ndibuan se Jesus akanamde ye ntịn̄nnịm ikọ David. Ufụp emi Jesus ekefịbede aban̄a enyịn̄ Ete esie ye edisana utuakibuot akanam enye esịn idem anam utom Abasi, idịghe sia ini mîkodụhe. Ke ini enye okokụtde kpukpru esuene oro ẹkesuenede enyịn̄ Abasi ẹnyụn̄ ẹsụn̄ide Enye, enye ikekemeke ndime, ntre ufụp oro enye ekefịbede aban̄a enyịn̄ Abasi ama anam enye anam n̄kpọ man emen esuene oro efep. Ke ini Jesus okokụtde nte mme adaiso ido ukpono ẹfịkde ẹnyụn̄ ẹwode mme ubuene, ifịk oro enye ekenyenede ama anam enye ọsọsọp anam n̄kpọ man anyan̄a mme ubuene oro onyụn̄ atan̄a etop ubiomikpe odori mme adaiso ido ukpono oro ẹkefịkde mmọ.—Matt. 9:36; 23:2, 4, 27, 28, 33.
Yak Utuakibuot Akpanikọ Adia Fi Idem
12, 13. Nso ke mme ọkwọrọ ederi Christendom ẹnam ye (a) enyịn̄ Abasi? (b) Obio Ubọn̄ Abasi?
12 Se mbon oro ẹdọhọde ke ikpono Abasi mfịn ẹnamde onyụn̄ etie nte eke mbon eyo Jesus, ekpedi ikam idiọkke-diọk ikan oro. Ke uwụtn̄kpọ, ti ke akpa n̄kpọ oro Jesus ekekpepde mme anditiene enye ẹben̄e Abasi ke akam edi: “Yak ẹnam enyịn̄ fo asana.” (Matt. 6:9) Ndi mme adaiso ido ukpono mfịn, akpan akpan mme ọkwọrọ ederi Christendom, ẹkpep ikọt mmọ enyịn̄ Abasi ẹnyụn̄ ẹkpono, m̀mê ẹnam enyịn̄ oro asana? Utu ke ndinam emi, mmọ ẹkam ẹsu nsu ẹdori Abasi ẹte ke enye edi owo ita ke kiet, ẹnyụn̄ ẹkpep nsu en̄wen ẹte ke ukpọn̄ isikpaha ke nsinsi, ke ẹyetụhọde mme idiọk owo ke ikan̄ hell, ntre ẹnamde Abasi etie nte ata ibak ibak owo emi owo mîkemeke ndifiọk. Mmọ ẹsuene Abasi n̄ko ke ndidu obukpo uwem nnyụn̄ mbịk mbubịk. (Kot Rome 2:21-24.) N̄ko-n̄ko, mmọ ẹnam ofụri se ẹkekeme man mme owo ẹkûdiọn̄ọ enyịn̄ Abasi, idem ẹsiode enye ẹfep ke Bible mmọ. Ntem, mmọ iyakke mme owo ẹsan̄a ẹkpere Abasi, ẹnyụn̄ ẹnam ufan ye enye.—Jas. 4:7, 8.
13 Jesus ama onyụn̄ ekpep mme anditiene enye ete ẹbọn̄ akam, ẹte: “Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matt. 6:10) Okposụkedi emi mme ọkwọrọ ederi Christendom ẹsikwọde–kwọ akam emi nte ikwọ, mmọ ẹkam ẹsịn udọn̄ ẹnọ mme owo ẹte ẹberi edem ke ukara ye mme n̄ka ubọkowo. Ke adianade do, mmọ ẹsịn mbon oro ẹdomode nditan̄a etop Obio Ubọn̄ ke ndek. Oro anam ata ediwak mbon oro ẹdọhọde ke idi Christian ẹkûtetịn̄ aba uban̄a Obio Ubọn̄ Abasi, owo itịn̄ke-tịn̄ iban̄a edinyene mbuọtidem ke Obio Ubọn̄ emi.
14. Didie ke mme ọkwọrọ ederi Christendom ẹsiak mmọn̄ ke Ikọ Abasi?
14 Jesus ama etịn̄ in̄wan̄-in̄wan̄ ke akam emi enye ọkọbọn̄de ọnọ Abasi ete: “Ikọ fo edi akpanikọ.” (John 17:17) Mbemiso Jesus ọkọkpọn̄de isọn̄, enye ama emek “ofụn emi anamde akpanikọ onyụn̄ enyenede ọniọn̄” ete esinọ ikọt ufọk imọ udia eke spirit. (Matt. 24:45) Kpa ye oro mme ọkwọrọ ederi Christendom ẹsọpde inua ẹdọhọ ke ẹkeyak Ikọ Abasi ẹsịn mmimọ ke ubọk, ndi mmọ ẹnam utom emi Jesus ọkọdọn̄de mmọ? Ke m̀mọ̀n̄? Idịghe mmọ ẹsikam ẹdọhọ ke mme mbụk Bible ẹdi n̄ke. Utu ke ndinọ ikọt mmọ udia eke spirit man ẹdọn̄ mmọ esịt ẹnyụn̄ ẹnam mmọ ẹnyene ifiọk Abasi, mme ọkwọrọ ederi Christendom ẹkam ẹkpep mmọ ifiọk owo—kpa se mmọ ẹmade ndikop. Mmọ n̄ko ẹsiak mmọn̄ ke Ikọ Abasi, ẹkabade ẹkpep ekikere idemmọ, utu ke edumbet ido uwem oro Abasi enịmde.—2 Tim. 4:3, 4.
15. Esitie fi didie ke idem ke ini okụtde kpukpru se mme ọkwọrọ ederi Christendom ẹnamde ye enyịn̄ Abasi?
15 Se ediwak mme aka ufọkabasi ẹdọhọde ke inam inọ ata Abasi iyakke ediwak mbon oro ẹkpemade ndikpono Abasi ẹbuọt idem ye Abasi, m̀mê ke Bible. Mmọ ẹduọ ẹdụk afia Satan ye idiọk editịm n̄kpọ esie. Esitie fi didie ke idem ke ini okụtde m̀mê okopde se isụk inemede emi? Ke ini okụtde kpukpru isụn̄i ye esuene oro ẹsuenede enyịn̄ Abasi, ndi isidọn̄ke fi ndinam se ekekeme man enyịn̄ Abasi asana? Ke ini okụtde nte ẹbian̄ade ẹnyụn̄ ẹwode mbon oro ẹnyenede esịt akpanikọ, ndi isidọn̄ke fi ndinam se ekekeme man ọdọn̄ mmọ esịt? Ke ini Jesus okokụtde nte “ẹfiomode ẹnyụn̄ ẹsuande” mbon eyo esie “nte erọn̄ eke mînyeneke andikpeme,” enye ikawan̄ke-wan̄ ubọk ise mmọ ite, mbọm-o, edi ama “ọtọn̄ọ ndikpep mmọ ediwak n̄kpo.” (Matt. 9:36; Mark 6:34) Imenyene eti ntak ndiyak ifịk utuakibuot akpanikọ adia nnyịn idem kpa nte akadiade Jesus.
16, 17. (a) Ntak emi ikpesịnde ifịk ikwọrọ ikọ? (b) Nso ke idineme ke ibuotikọ oro etienede?
16 Ke ini inamde utom ukwọrọikọ nnyịn ntre, ikọ apostle Paul ke 1 Timothy 2:3, 4 eyenen̄ede an̄wan̄a nnyịn. (Kot.) Nnyịn isịnke ifịk ntem n̄kukụre sia ifiọkde ke idu ke mme akpatre usen, edi n̄ko sia imọfiọk ke Abasi oyom mme owo ẹfiọk akpanikọ man mmọ ẹkeme ndituak ibuot nnọ enye nnyụn̄ mbọ edidiọn̄. Se inamde isịn ifịk ikwọrọ ikọ idịghe n̄kukụre sia ererimbot emi ọmọn̄ esesịm utịt, edi sia iyom ndikpono enyịn̄ Abasi nnyụn̄ n̄n̄wam mme owo ẹdifiọk uduak esie. Ifịk utuakibuot akpanikọ adia nnyịn idem.—1 Tim. 4:16.
17 Jehovah anam nnyịn emi idide ikọt esie ifiọk se enye aduakde ọnọ ubonowo ye isọn̄. Enye ọnọ nnyịn se idade in̄wam mme owo ẹkop inemesịt ẹnyụn̄ ẹnyene ata idotenyịn ke ini iso. Nnyịn imekeme ndiwụt mmọ se ẹkpenamde man ẹbọhọ ke ini ẹdisobode editịm n̄kpọ Satan emi. (2 Thess. 1:7-9) Utu ke ndikop idiọkesịt nnyụn̄ n̄kop mmemidem sia usen Jehovah mîdịghe ke ini ikekerede, nnyịn ikpakam idadat esịt nte Abasi ọnọde nnyịn ini ndika iso nsịn ifịk ke utom esie. (Mic. 7:7; Hab. 2:3) Nso idin̄wam nnyịn inyene utọ ifịk oro? Se idinemede edi oro ke ibuotikọ oro etienede.
Nte Afo Emekeme Ndinam An̄wan̄a?
• Nso ikanam Jesus enen̄ede esịn ifịk anam utom esie?
• Nso ke Bible okot ifịk?
• Nso ke ikụt mfịn, emi anamde isịn ifịk inam utom Abasi?
[Mme Mbụme Ukpepn̄kpọ]
[Ndise ke page 8]
Jesus ama esịn idem anam uduak Ete esie, onyụn̄ ama mme owo
[Ndise ke page 10]
Imenyene eti ntak ndiyak ifịk utuakibuot akpanikọ adia nnyịn idem