Wụk Ekikere ke Se Jehovah Anamde Ọnọ Fi

ESISỊT ini ke ẹma ẹkenam Jesus eset, mbet esie iba ẹketo Jerusalem ẹka Emmaus. Gospel emi Luke ewetde ọdọhọ ete: “Nte mmọ ẹtịn̄de ikọ ẹnyụn̄ ẹnemede nneme, Jesus ke idemesie asan̄a ekpere onyụn̄ asan̄a ye mmọ; edi mmọ idiọn̄ọke enye.” Ekem Jesus ọdọhọ mmọ ete: “‘Nso n̄kpọ ke mbufo ẹneneni ntem ke otu idem mbufo nte mbufo ẹsan̄ade ke usụn̄?’ Ndien mmọ ẹtuak ẹda, ẹtie mfụhọ mfụhọ.” Ntak emi mmọ ẹkefụhọde? Mme mbet ẹkekere ke Jesus ayanyan̄a Israel ini oro osio ke ukara mme Gentile, edi utọ edinyan̄a oro ikedịghe kan̄a. Utu ke oro, ẹma ẹwot Jesus. Emi ama anam mmọ ẹfụhọ.—Luke 24:15-21; Utom 1:6.

Jesus ama ọtọn̄ọ ndikọk ibuot ye mme mbet oro. “Enye ọtọn̄ọ ke Moses ye kpukpru mme Prọfet asiak mme n̄kpọ emi ẹketịn̄de ẹban̄a enye ke ofụri N̄wed Abasi ọnọ mmọ.” Ke nditịm ntịn̄, ediwak n̄wọrọnda n̄kpọ ye mme n̄kpọ oro ẹsọn̄ọde mbuọtidem owo ẹma ẹtịbe ke ini utom ukwọrọikọ Jesus! Nte mme mbet oro ẹkekpan̄de utọn̄ ẹkop se Jesus etịn̄de, mmọ ikokopke aba mfụhọ edi ẹkekam ẹkop idatesịt. Nte ini akakade ke mbubreyo oro, mmọ ẹma ẹdọhọ ẹte: “Nte esịt ikofiopke nnyịn ke ini enye ekenemede nneme ye nnyịn ke usụn̄, nte enye akatatde N̄wed Abasi ọnọ nnyịn ọyọhọ ọyọhọ?” (Luke 24:27, 32) Nso ke ikeme ndikpep nto nte mme mbet Jesus oro ẹkenamde n̄kpọ?

Didie ke Idotenyịn Nnyịn Ndikpa Mfụhọ Ekeme Nditụk Nnyịn?

Mbet iba oro ẹkesan̄ade ke usụn̄ uka Emmaus ẹkekop mfụhọ sia mme n̄kpọ oro mmọ ẹkedoride enyịn mîketịbeke. Se ẹwetde ke Mme N̄ke 13:12 eketịbe ọnọ mmọ. Itie oro ọdọhọ ete: “Idotenyịn emi ebịghide ndidi anam esịt ọdọn̄ọ.” Kpasụk ntre, ndusụk owo ke otu nnyịn emi ẹnamde n̄kpọ Jehovah ke ediwak isua, ẹkekere ke etisịm emi ke “akwa ukụt” ededi ebe. (Matt. 24:21; Edi. 7:14) An̄wan̄a owo ke esisịt ini emi, ke idotenyịn ndikpa mfụhọ ntre ekeme ndinam owo okop mfụhọ.

Edi ti ke mbet iba oro ẹkefiak ẹkop idatesịt ke Jesus ama akan̄wam mmọ ẹwụk ekikere mmọ ke mme ntịn̄nnịm ikọ oro ẹma ẹkesosu—idem ke eyouwem mmọ. Nnyịn  imekeme ndika iso n̄kop idatesịt nnyụn̄ nyọ idotenyịn nnyịn oro akpade mfụhọ kpasụk ntre. Michael, ebiowo Christian emi enyenede mbufiọk ọkọdọhọ: “Kûwụk ekikere ke se Jehovah mînamke kan̄a. Kam wụk ekikere ke se enye ama akananam.” Ke akpanikọ, eti item edi oro!

Se Jehovah Ama Akananam

Kere ban̄a ndusụk n̄wọrọnda n̄kpọ oro Jehovah ama akananam. Jesus ọkọdọhọ ete: “Owo eke ọbuọtde idem ye ami, enye n̄ko ayanam utom eke ami nnamde; enye oyonyụn̄ anam utom eke okponde akan emi.” (John 14:12) Mfịn, mme asan̄autom Abasi ẹnam utom okpon akan nte akanam mme Christian ẹnamde. Se ibede owo miliọn itiaba ẹdori enyịn ndibọhọ akwa ukụt. Kere ban̄a emi, akananam idụhe ini emi mme anam-akpanikọ asan̄autom Jehovah oro ẹwakde ntem ẹnamde utom ke ediwak idụt ntre ke ofụri isọn̄! Jehovah amanam ntịn̄nnịm ikọ Jesus oro aban̄ade “utom eke okponde akan emi” osu.

Nso en̄wen ke Jehovah anam ọnọ nnyịn? Enye amanam mbon oro ẹnyenede esịt akpanikọ ẹkeme ndiwọrọ n̄kpọn̄ idiọk ererimbot ke ndamban̄a usụn̄, ẹnyụn̄ ẹdụk paradise eke spirit oro enye anamde. (2 Cor. 12:1-4) Da ini tie kere ndusụk n̄kpọ emi nnyịn inyenede ke paradise eke spirit oro. Ke uwụtn̄kpọ, top enyịn se ọkpọkpọ itie ubon n̄wed fo m̀mê eke Ufọkmbono Obio Ubọn̄. Kụbọde Watch Tower Publications Index, mîdịghe dụn̄ọde Watchtower Library. Bre drama Bible oro ẹkemụmde ẹnịm. Fiak tie kere se iketịbede ke akamba mbono eke ndondo emi. Ke adianade do, kere ban̄a edinem itie ufan oro inyenede ye nditọete Christian nnyịn. Jehovah atat ubọk didie ntem ọnọ nnyịn akpakịp udia eke spirit ye nditọete oro ẹmade nnyịn—ke akpanikọ, emi enen̄ede edi paradise eke spirit.

David andiwet psalm ọkọdọhọ ete: “Afo amanam ediwak n̄kpọ, O Jehovah Abasi mi, idem mme utịbe utom fo ye ekikere fo kaban̄a nnyịn.” (Ps. 40:5) Ih, ke ndiwụk ekikere ke mme utịbe utịbe n̄kpọ oro Jehovah ama akananam ọnọ nnyịn ye ke nditie n̄kere nti n̄kpọ oro enye ekerede aban̄a nnyịn, nnyịn iyafiak inyene odudu ndisọn̄ọ nda nyọ ke utom ofụri esịt oro inamde inọ Ete nnyịn eke heaven, kpa Jehovah.—Matt. 24:13.

[Ndise ke page 31]

Jesus ama an̄wam mme mbet esie ẹwụk ekikere ke se Jehovah ama akananam ọnọ mmọ

[Mme Ndise ke page 32]

Fiak tie kere se iketịbede ke akamba mbono eke ndondo emi