Enen̄ede Odot Ẹsịn Ukeme!

UTUAKIBUOT UBON ye ukpepn̄kpọ Bible ẹdi akpan n̄kpọ edieke anade ẹkama nditọ “ke ntụnọ ye ke item Jehovah.” (Eph. 6:4) Edieke afo edide ete m̀mê eka, ọmọfiọk ke n̄kpọ esisọp efek nditọwọn̄. Nso ke akpanam man mmọ ẹka iso ẹnọ ntịn̄enyịn? Kop se ndusụk mme ete ye eka ẹsinamde mi.

George, emi odụn̄de ke California ke U.S.A., ọdọhọ ete: “Ke ini nditọ nnyịn ẹkedide n̄kpri, ami ye n̄wan mi ima isidomo ndinam ukpepn̄kpọ Bible ubon enen̄ede enem. Ndusụk ini kpukpru nnyịn ima isisịne n̄kpọ nte mbon eyo Bible inanam mbụk emi ikotde ke N̄wed Mi eke Mme Mbụk Bible. Ima ikam inam akan̄kan̄, esan̄ ubọn̄, idọk akpasa, ye mme n̄kpọ ntre. Ima isida Bible n̄ko ibre ‘ami ndi anie?’ inyụn̄ inam obukpọk nsa emi esịnede mme mbụme Bible oro ẹmemde ye mbon oro ẹsọn̄de. Ima inam nsio nsio n̄kpọ, utọ nte ndikọn̄ mbiet ubom Noah m̀mê ndiwet nte mme mbụk Bible ẹketịbede ke adiana ke adiana. Ndusụk ini ima iwet ndise mbon emi ẹsiakde ke Bible m̀mê ke mme mbụk Bible. Idahaemi, ke inam ndutịm ndiwet ndise n̄kpọekọn̄ eke spirit emi ẹtịn̄de ẹban̄a ke Ephesus 6:11-17, emi nnyịn owo kiet kiet iditịn̄de se ndusụk n̄kpọekọn̄ oro ẹdade ẹban̄a. Mme n̄kpọ emi ẹsinam ukpepn̄kpọ ubon nnyịn enen̄ede enem.”

Debi, eka kiet ke Michigan ke U.S.A., ọdọhọ ete: “Ama ọsọn̄ mi ye ebe mi ndinam adiaha nnyịn owụk ntịn̄enyịn ke ini enye ekedide n̄kpọ nte isua ita. Ekem, usen kiet, nte ikosụk ikotde mbụk Isaac ye Rebekah ke N̄wed Mi eke Mme Mbụk Bible uyọ ọwọrọ, mma nsịn ubọk ntan̄ nditọ ọkpọ iba nnam nte kiet edi Isaac enye eken edi Rebekah nnyụn̄ nnam nte mmọ ẹtịn̄ se ikotde. Idahaemi enye esikpan̄ utọn̄ okop kpukpru se itịn̄de! Ke mme ọfiọn̄ oro ẹketienede, nditọ ọkpọ oro ẹma ẹkabade ẹdi nsio nsio owo oro ẹtịn̄de ẹban̄a ke Bible. Ke ini ikotde mbụk Bible, eyen nnyịn ama oyom n̄kpọmbre m̀mê mme n̄kpọ en̄wen oro ẹkemede ndida nnam mbụk oro n̄wụt. Eketie nte owo ndiyom n̄kpọuto! Efọk ikpaukot ye ndatndat urụk ẹkedi ufọk Rahab emi ẹyịride ididuot urụk. Urụkikọt oro ẹdade ọfọn̄ ẹnam, emi edide mita kiet ye ubak ẹnyụn̄ ẹwan̄de ke eto ekedi urụkikọt okpoho oro ẹtịn̄de ẹban̄a ke Numbers 21:4-9. Ima idọn̄ mme n̄kpọ emi ke akamba ekpat emi ẹdade ọfọn̄itai ẹnam. Esịt enem nnyịn ndisikụt eyen nnyịn etiede ke ufọtufọk osion̄o n̄kpọ ke ‘ekpat mbụk Bible esie’ ese. Esinem nnyịn esịt didie ntem ndikụt nte enye anamde mme mbụk oro owụt ke nte enye ekemede!”

Idịghe ekpri n̄kpọ ndibọk nditọ, inyụn̄ idịghe ndikpep mmọ n̄kpọ ke urua ke urua edinam ọdọn̄ mmọ ndinam n̄kpọ Jehovah. Edi ẹkeme ndida utuakibuot ubon ye ukpepn̄kpọ Bible n̄kpep mmọ mme n̄kpọ eke spirit. Ke akpanikọ, enen̄ede odot ẹsịn ukeme!