Mme Mbụme Oro Mme Andikot Ẹbụpde

Ntak emi Moses akayatde esịt ye Eleazar ye Ithamar, nditọiren Aaron, ke Nadab ye Abihu nditọeka mmọ ẹma ẹkekpan̄a, ndien nso ikosụk enye esịt?—Lev. 10:16-20.

Ikebịghike ke ẹma ẹkemek mbon emi ẹdinamde utom oku ke tent utuakibuot, Jehovah ama owot Nadab ye Abihu, nditọiren Aaron, ke ntak emi mmọ ẹkedade esen ikan̄ ẹdi iso Esie. (Lev. 10:1, 2) Moses ama owụk nditọeka mmọ irenowo eken ete ẹkûtua mmọ. Edi ikebịghike ke oro ebede, Moses ama ayat esịt ye Eleazar ye Ithamar ke ntak emi mmọ mîkataha ebot uwa idiọkn̄kpọ. (Lev. 9:3) Ntak emi Moses akayatde esịt?

Ibet oro Jehovah ọkọnọde Moses ọkọdọhọ ke oku emi awade uwa idiọkn̄kpọ enyene ndita ubak uwa oro ke okụre ataya esop. Ẹkeda oro nte enye ndibiom idiọkn̄kpọ mbon oro ẹkewade uwa oro. Edi edieke ẹkedade ndusụk iyịp uwa oro ẹdụk Edisana Ebiet, oro edi, akpa ikpehe tent usopidem, ikanaha ẹta aba uwa oro. Utu ke oro, ẹkenyene ndifọfọp enye.—Lev. 6:24-26, 30.

Etie nte ke n̄kpọ mmọn̄eyet ama eketịbe usen oro, Moses ama enen̄ede okụt ete ke ẹnam kpukpru ewụhọ Jehovah. Ke ini enye ọkọfiọkde ke ẹma ẹfọp ebot idiọkn̄kpọ, enye ama ayat esịt obụp Eleazar ye Ithamar ntak emi mmọ mîkataha ebot oro nte ẹketemede sia owo mîkadaha ndusụk iyịp uwa oro idụk ke iso Jehovah ke Edisana Ebiet.—Lev. 10:17, 18

Aaron ọkọbọrọ mbụme oro sia enye ọkọdọhọ mme oku oro ẹkûta. Sia ẹkewotde nditọiren esie iba, ekeme ndidi Aaron ama ekere ke ekeme ndidi oku ndomokiet idinyeneke eti ubieresịt ndita uwa idiọkn̄kpọ usen oro. Ekeme ndidi enye ama ekere ke Jehovah idinemke esịt edieke mmọ ẹtade uwa oro, okposụkedi emi mîdịghe mmọ ẹkedọn̄ Nadab ye Abihu ẹnam se mmọ ẹkenamde.—Lev. 10:19.

Etie nte Aaron ama enen̄ede ekere ke akpana ikọt ufọk imọ ẹnen̄ede ẹkpeme ndinam kpukpru n̄kpọ nnem Jehovah esịt ke akpa ini emi mmọ ẹkewade uwa nte mme oku, idem ọkpọkọm ke ata ekpri n̄kpọ. Edi Nadab ye Abihu ẹma ẹsabade enyịn̄ Jehovah, Enye ama onyụn̄ ayat esịt ye mmọ. Ntre, ekeme ndidi Aaron ama ekere ke mme oku emi ẹtode ubon oro ẹkenamde utọ idiọkn̄kpọ oro do idotke ndita edisana uwa.

Etie nte Moses ama enyịme ibọrọ oro eyeneka esie ọkọnọde, sia Leviticus 10:20 ọdọhọ ete: “Ke ini Moses okopde n̄kpọ oro, n̄kpọ oro ọfọn enye ke enyịn.” Etie nte Jehovah n̄ko ama oyụhọ ye ibọrọ Aaron.