Ndi Omowụt Esịtekọm Aban̄a Mme Edidiọn̄ Fo?

NDITỌ Israel ẹma ẹnen̄ede ẹkop idatesịt ke ndondo oro ẹkenyan̄ade mmọ ke utịbe utịbe usụn̄ ẹsio ke ufụn ke isọn̄ Egypt man ẹkenam n̄kpọ Jehovah. (Ex. 14:29–15:1, 20, 21) Edi oro ekedi ke usen ifan̄ kpọt. Mmọ ẹma ẹtọn̄ọ ndiseme idem. Ntak-a? Sia mmọ ẹma ẹtọn̄ọ ndiwụk ekikere ke se mmọ ẹsobode ke wilderness utu ke ndiwụk ke se Jehovah anamde ọnọ mmọ. Mmọ ẹma ẹdọhọ Moses ẹte: “Ntak emi mbufo ẹkedade nnyịn ẹwọn̄ọ ke Egypt ẹte idikpan̄a ke wilderness? Koro uyo idụhe, mmọn̄ inyụn̄ idụhe, ndien ukpọn̄ nnyịn amasua obukpo uyo [manna] emi.”—Num. 21:5.

Ke isua ikie ifan̄ ẹbede, Edidem David eke Israel eset ama ọkwọ ete: “Amaedi ami, mmọbuọt idem ke ima-mfọnido fo; yak edinyan̄a fo adat mi esịt. Ami nyọkwọ nnọ Jehovah, koro enye ọfọnde ye ami.” (Ps. 13:5, 6) David ikefreke mme edinam ima-mfọnido oro Jehovah akanamde ọnọ enye. Edi enye ama esitie ekere mmọ. (Ps. 103:2) Jehovah ọdiọn̄ nnyịn n̄ko, ndien owụt eti ibuot nnyịn ndida se enye anamde ọnọ nnyịn ke akpan n̄kpọ. Ẹyak ineme ndusụk edidiọn̄ oro Abasi ọnọde nnyịn mfịn.

‘Edidi Ata Ufan Jehovah’

Andiwet psalm ọkọkwọ ete: “Mmọ eke ẹbakde Jehovah ẹdi ata ufan esie.” (Ps. 25:14) Nso akwa ifet ke edi ntem mme anana-mfọnmma owo ndidi n̄kpet n̄kpet ufan Jehovah! Edi nso iditịbe edieke ediwak mbubehe uwem emi mîyakke inyene ini ibọn̄ akam? Kere ban̄a nte eti itie ebuana oro inyenede ye Jehovah editiede. Sia Jehovah edide ufan nnyịn, enye oyom nnyịn ibuọt idem inyụn̄ in̄wan̄a esịt nnyịn inọ imọ ke akam, itịn̄ mfịna, se iyomde, ye se itịmerede nnyịn esịt inọ imọ. (N̄ke 3:5, 6; Phil. 4:6, 7) Ke  ntem, ndi ikpọfọnke inen̄ede ikere iban̄a nte akam nnyịn esitiede?

Ke ini ekpri eyenete kiet emi ekerede Paul ekekerede aban̄a akam esie, enye ama ọfiọk ke oyom inam ukpụhọde. * Enye ọkọdọhọ ete: “Nsiwak nditịn̄ ukem ikọ ke ini mbọn̄de akam nnọ Jehovah.” Nte enye akanamde ndụn̄ọde aban̄a akam ke Watch Tower Publications Index, enye ama okụt ke n̄kpọ nte akam 180 ẹdu ke Bible. Mme asan̄autom Abasi ke eset ẹken̄wan̄a esịt mmọ ẹnọ Jehovah ke mme akam emi. Paul ọkọdọhọ ete: “Editie n̄kere mme uwụtn̄kpọ N̄wed Abasi emi anam mi n̄kpep nditịn̄ mme akpan n̄kpọ ke ini mbọn̄de akam. Emi an̄wam mi n̄n̄wan̄a esịt mi nnọ Jehovah. Idahaemi esịt enem mi ndisan̄a n̄kpere Abasi ke akam.”

“Udia ke Nnennen Ini”

Edidiọn̄ en̄wen emi Jehovah ọnọde nnyịn edi ntatara akpanikọ emi ikpepde ke N̄wed Abasi. Imenyene ntak “[ndisio] n̄kpo idara ke ntak idatesịt” emi ikopde ke ini idiade nti udia eke spirit. (Isa. 65:13, 14) Edi ana ikpeme mbak odudu idiọkn̄kpọ ekededi idinam ima oro imade akpanikọ ebịt. Ke uwụtn̄kpọ, ndiwụk ekikere ke nsu oro mbon mfiakedem ẹsuande ekeme ndibiat ekikere nnyịn onyụn̄ anam itre ndikụt ufọn “udia” eke spirit oro Jehovah adade “ofụn emi anamde akpanikọ onyụn̄ enyenede ọniọn̄,” ‘ọnọ ke nnennen ini.’—Matt. 24:45-47.

Ekikere mbon mfiakedem ama abian̄a André emi anamde n̄kpọ Jehovah ke ediwak isua. Enye ekekere ke nditop enyịn nse se mbon mfiakedem ẹwetde ke ikpehe Intanet idinamke imọ n̄kpọ ndomokiet. Edi enye eti ete: “Akpa, mma n̄kụt inua-okot akpanikọ oro mbon mfiakedem ẹsuande. Nte n̄kọdụn̄ọrede se mmọ ẹtịn̄de, ntre ke n̄kekere ke odot n̄kpọn̄ esop Jehovah. Edi ke ukperedem, ke ini nnamde ndụn̄ọde mban̄a se mmọ ẹketịn̄de ẹban̄a Mme Ntiense Jehovah, mma ndikụt ke nsunsu mme andikpep emi ẹnyene n̄kari etieti. Ikọ kiet m̀mê iba emi mmọ ẹkekade ẹkesio ẹkpọn̄ ikọ eken ke mmọ ẹkeda nte ‘ata uyarade’ ẹsu nsu ẹdori nnyịn. Ntem, mma mfiak ntọn̄ọ ndikot mme n̄wed nnyịn nnyụn̄ ndụk mme mbono esop. Ikebịghike mma ndikụt ke mma ntaba ediwak n̄kpọ.” Imokop inemesịt ke André ama afiak edidụk esop.

“Ofụri Otu Nditọete”

Ndima nditọete nnyịn emi idianade kiet ẹdi edidiọn̄ Jehovah. (Ps. 133:1) Apostle Peter ama enyene eti ntak ndiwet nte: “Ẹnyene ima ẹnọ ofụri otu nditọete.” (1 Pet. 2:17) Nnyịn ndisịne ke otu nditọete nnyịn amanam ibọ ima ima un̄wam oro mme ete, mme eka, nditọete irenowo, ye nditọete iban emi ẹdude ye nnyịn ke esop ẹsinọde nnyịn.—Mark 10:29, 30.

Edi nsio nsio n̄kpọ ẹkeme ndinam inyene n̄kpri mfịna ye nditọete nnyịn. Ke uwụtn̄kpọ, unana mfọnmma owo ekeme  ndinam iyat esịt ye enye isinyụn̄ ikụt ndudue inọ enye. Edieke emi etịbede, ndi ikpọfọnke eti ke Jehovah ama mme asan̄autom esie kpa ye mme unana mfọnmma mmọ? Ke akande oro, “edieke nnyịn idọhọde ite: ‘Nnyịn inyeneke idiọkn̄kpọ,’ nnyịn ibabian̄a idem nnyịn, akpanikọ inyụn̄ idụhe nnyịn ke idem.” (1 John 1:8) Ndi ifọnke nnyịn isịn ukeme ‘ndika iso nyọ kiet eken nnyụn̄ mfen kiet eken ke ofụri esịt’?—Col. 3:13.

Uyen kiet emi ẹkotde Ann ọkọdiọn̄ọ ufọn itie nditọete Christian ke enye ama okodụk afanikọn̄. Ke ndusụk udomo enye akanam n̄kpọ nte idiọk udọ oro ke uwụtn̄kpọ Jesus, ọwọrọ ọkpọn̄ esop Christian. Nte ini akakade, enyịn ama an̄wan̄a enye, ndien enye ama afiak edidụk esop. (Luke 15:11-24) Nso ke Ann ekekpep oto emi? Enye ọdọhọ ete: “Idahaemi mfiakde ndidụk esop Jehovah mi, nnen̄ede nda kpukpru nditọete mi ke ọsọn̄urua, kpa ye mme unana mfọnmma mmọ. Ke akpa, mma nsiwak ndikụt ndudue nnọ mmọ. Edi idahaemi mmenen̄ede mbiere nditre ndiyak n̄kpọ ekededi anam mi ntre ndikop inem nditọete. Idụhe se idude ke ererimbot, emi ikpọkpọn̄de paradise eke spirit emi idude mi ibịne.”

Wụt Esịtekọm Kpukpru Ini Ban̄a Mme Edidiọn̄ Fo

Idotenyịn oro inyenede nte ke Obio Ubọn̄ Abasi ọyọkọk kpukpru mfịna ubonowo edi ọsọn̄urua n̄kpọuto oro owo mîkemeke ndidep. Ima inen̄ede iwụt esịtekọm ke ini ikekpepde iban̄a idotenyịn oro. Nnyịn ikebiet owo urua emi Jesus eketịn̄de aban̄a ke n̄ke esie, emi “[akanyamde] kpukpru n̄kpọ emi enye enyenede” man edep “pearl kiet emi ekọmurua esie okponde.” (Matt. 13:45, 46) Jesus ikọdọhọke ke ama odu ini emi owo urua oro eketrede ndiwụt esịtekọm mban̄a pearl oro. Ukem ntre, ẹyak nnyịn ikûtre ndiwụt esịtekọm mban̄a utịbe utịbe idotenyịn nnyịn.—1 Thess. 5:8; Heb. 6:19.

Kere ban̄a uwụtn̄kpọ Jean, emi anamde n̄kpọ Jehovah ke se ibede isua 60. Eyenete an̄wan emi ọdọhọ ete: “Se in̄wamde mi n̄wụk ekikere ke Obio Ubọn̄ Abasi edi nditịn̄ enye nnọ mbon en̄wen. Ke ini n̄kụtde nte iso mmọ ayamade ke ntak emi ẹfiọkde se Obio Ubọn̄ Abasi edide, emi esinyene eti utịp ke idem mi. Ndikụt ukpụhọde oro akpanikọ Obio Ubọn̄ anamde ke idem eyen ukpepn̄kpọ Bible esinam mi n̄kere nte, ‘Mmenyene ata akpanikọ ndibuana ye mbon en̄wen!’”

Nnyịn imenyene nti ntak ndiwụt esịtekọm mban̄a ediwak n̄kpọ eke spirit oro inyenede. Okposụkedi emi utọ n̄kpọ nte ubiọn̄ọ, udọn̄ọ, usọn̄, editịmede esịt, n̄kpa owo nnyịn, ye unana okụk ẹkemede ndidomo nnyịn, imọfiọk ke mmọ ẹdi ke ibio ini. Ke adianade ye edidiọn̄ eke spirit emi, ẹyediọn̄ nnyịn n̄ko ke n̄kan̄ eke obụk ke Obio Ubọn̄ Abasi. Ufen ekededi oro ibọde idahaemi ididụhe aba ke obufa editịm n̄kpọ.—Edi. 21:4.

Kan̄a ke emi, ẹyak itie ikere iban̄a mme edidiọn̄ eke spirit oro ibọde inyụn̄ iwụt ukem esịtekọm oro andiwet Psalm okowụtde. Enye ọkọkwọ ete: “Afo amanam ediwak n̄kpọ, O Jehovah Abasi mi, idem mme utịbe utom fo ye ekikere fo kaban̄a nnyịn; idụhe owo eke ẹkemede ndimen ndomo ye afo. N̄kpoyom nditịn̄ nnyụn̄ mbụk mmọ, mmọ ẹwak ẹkan nte n̄kemede ndibụk.”—Ps. 40:5.

[Ikọ Idakisọn̄]

[Ndise ke page 18]

Ẹsinọ nnyịn ibetedem eke spirit ke ini idomo