Nte Afo Amasua Ubiatibet?

‘Afo [Jesus] amasua ubiatibet.’—HEB. 1:9.

1. Nso ke Jesus ekekpep aban̄a ima?

MAN Jesus Christ owụt nte ima edide akpan n̄kpọ, enye ọkọdọhọ mme mbet esie ete: “Ami mmọnọ mbufo obufa ewụhọ, nte mbufo ẹma kiet eken; kpa nte n̄kamade mbufo, nte mbufo n̄ko ẹma kiet eken. Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:34, 35) Jesus okowụk mme mbet esie ete ẹnyene ima n̄waidem ẹnọ kiet eken. Ima oro ke ẹkenyene ndida mfiọk mmọ. Jesus ama eteme mmọ n̄ko ete: “Ẹka iso ẹma mme asua mbufo ẹnyụn̄ ẹbọn̄ akam ẹyom ufọn mmọ eke ẹkọbọde mbufo.”—Matt. 5:44.

2. Mme anditiene Christ ẹkpenyene ndikpep ndisua nso?

² Edi ke adianade ye edikpep mme mbet esie mban̄a ima, Jesus ama ekpep mmọ se ẹkpesuade. Ẹketịn̄ ntem ẹban̄a Jesus: “Afo amama edinen ido, onyụn̄ asua ubiatibet [idiọkido].” (Heb. 1:9; Ps. 45:7) Emi owụt ke inaha ikpep ndima edinen ido kpọt, edi ke ana ikpep n̄ko ndisua idiọkn̄kpọ, m̀mê ubiatibet. Odot itịm ifiọk ke apostle John ọkọdọhọ ete: “Owo ekededi eke anamde idiọkn̄kpọ abiat ibet n̄ko, ndien ke ntre idiọkn̄kpọ edi edibiat ibet.”—1 John 3:4.

3. Ewe ikpehe inan̄ ke uwem ke ibuotikọ emi edineme kaban̄a edisua ubiatibet?

³ Do, sia idide mme Christian, odot ibụp idem nnyịn ite, ‘Nte ami mmasua ubiatibet?’ Ẹyak ineme nte ikemede ndiwụt ke imasua se idiọkde ke ikpehe inan̄ ke uwem: (1) edu nnyịn kaban̄a edin̄wọn̄ mmịn mbe ubọk, (2) nte nnyịn isede ndedịbe odudu, (3) nte nnyịn isinamde n̄kpọ iban̄a oburobụt ido, ye (4) nte nnyịn isede mbon oro ẹmade ubiatibet.

 N̄wọn̄ Mmịn ke Ufat

4. Nso ikanam Jesus enyene ifụre utịn̄ikọ ke ini enye ọkọnọde item aban̄a edin̄wọn̄ mmịn mbe ubọk?

⁴ Jesus ama esin̄wọn̄ wine ke ini ke ini sia enye akada wine nte enọ Abasi. (Ps. 104:14, 15) Edi akananam enye ibiatke enọ emi ke ndin̄wọn̄ mmịn mbe ubọk. (N̄ke 23:29-33) Ke ntem, Jesus ama enyene ifụre utịn̄ikọ ke ini enye ọkọnọde item aban̄a orụk edinam oro. (Kot Luke 21:34.) Edin̄wọn̄ mmịn mbe ubọk ekeme ndida nsịm ikpọ idiọkn̄kpọ en̄wen. Ntem, apostle Paul ama ewet ete: “N̄ko, ẹkûkpa mmịn, koro emi esidade esịm etịme etịme ido, edi ẹka iso ẹyọhọ ye spirit.” (Eph. 5:18) Enye ama eteme n̄kaniban ke esop n̄ko ete “ẹkûnyụn̄ ẹdụk ufụn ẹnọ edin̄wọn̄ ediwak mmịn.”—Titus 2:3.

5. Mme mbụme ewe ke mbon oro ẹmekde ndin̄wọn̄ mmịn ẹkpebụp idemmọ?

⁵ Edieke afo emekde ndin̄wọn̄ mmịn, ọkpọfọn obụp idemfo ete: ‘Ndi mmenyene edu Jesus kaban̄a edin̄wọn̄ mmịn mbe ubọk? Edieke anade nnọ mbon en̄wen item mban̄a n̄kpọ emi, ndi mmenyene ifụre utịn̄ikọ? Ndi mmesin̄wọn̄ mmịn man mbọhọ mfịna m̀mê man mfre uwa? Nsin̄wọn̄ mmịn awak adan̄a didie kpukpru urua? Nsinam n̄kpọ didie ke ini mbon en̄wen ẹdọhọde ke etie nte mmọn̄wọn̄ mmịn n̄kaha? Ndi mmesinyan̄a idem mîdịghe n̄kam nyat esịt?’ Edieke idụkde ufụn inọ edin̄wọn̄ ediwak mmịn, emi ekeme ndibiọn̄ọ ukeme nnyịn ndikere n̄kpọ ọfọn nnyụn̄ nnam nti ubiere. Mme anditiene Christ ẹdomo ndikpeme ukeme ukere n̄kpọ mmọ.—N̄ke 3:21, 22.

Fep Ndedịbe Odudu

6, 7. (a) Jesus akanam n̄kpọ didie ye Satan ye mme demon? (b) Ntak emi mme owo ẹmade ndedịbe odudu ke kpukpru ebiet mfịn?

⁶ Ke ini Jesus okodude ke isọn̄, enye ama enen̄ede ọbiọn̄ọ Satan ye mme demon. Enye ama ọbiọn̄ọ en̄wan iso ye iso oro Satan akan̄wanade ye nsọn̄ọnda esie. (Luke 4:1-13) Enye ama ọfiọk onyụn̄ ọbiọn̄ọ n̄kari n̄kari ukeme oro Satan ekesịnde ndikara ekikere ye mme edinam esie. (Matt. 16:21-23) Jesus ama an̄wam mbon oro ẹkedotde ẹbọhọ mme demon emi ẹkesitụhọrede mmọ.—Mark 5:2, 8, 12-15; 9:20, 25-27.

⁷ Ke Jesus ama akada ubọn̄ ke 1914, enye ama anam heaven asana ọbọhọ idiọk odudu Satan ye mme demon. Ke ntak emi, Satan ke odomo idahaemi akan nte akanam odomode ‘ndida kpukpru mme andidụn̄ isọn̄ ntụn usụn̄.’ (Edi. 12:9, 10) Do ikpanaha akpa nnyịn idem ndikụt ke mme owo ẹma ndedịbe odudu ke kpukpru ebiet, enye onyụn̄ ọdọdiọn̄ ọkọri. Nso ke ikeme ndinam man ikpeme idem nnyịn?

8. Didie ke ikeme ndidụn̄ọde idem nnyịn kaban̄a unọ idem inemesịt oro imekde?

⁸ Bible odụri owo utọn̄ in̄wan̄-in̄wan̄ aban̄a mme afanikọn̄ oro ẹsan̄ade ye ubụpekpo. (Kot Deuteronomy 18:10-12.) Mfịn, Satan ye mme demon ẹda mme fim, n̄wed, ye mme mbre kọmputa oro ẹsịnde udọn̄ ẹnọ mme edinam ndedịbe odudu, ẹbiat ekikere mme owo. Mmọdo, ke ini imekde unọ idem inemesịt, owo nnyịn kiet kiet  ekpenyene ndibụp idemesie ete: ‘Ke ufan̄ ọfiọn̄ ifan̄ emi ẹbede, ndi mmese fim, edinam TV, mbre mbre kọmputa, n̄kot mme n̄wed, m̀mê nse mme edinam idọkọ emi ẹban̄ade mme edinam ndedịbe odudu? Ndi mmọfiọk ufọn edifep ndedịbe odudu, mîdịghe ndi nda mmọ nte n̄kpọ mbubru? Ndi mmakam n̄kere mban̄a nte Jehovah esede unọ idem inemesịt oro mmekde? Edieke mbererede usụn̄ nnọ mme utọ odudu Satan oro, ndi ima oro mmade Jehovah ye ndinen edumbet esie ẹyenyịk mi nnam n̄kpọ ye iwụk nnyụn̄ nsọsọp mberi usụn̄ oro?’—Utom 19:19, 20.

Nam Item Jesus Aban̄ade Oburobụt Ido

9. Didie ke owo ekeme ndikpep ndima ubiatibet?

⁹ Jesus ama ebere ye edumbet Jehovah kaban̄a idan̄. Enye ọkọdọhọ ete: “Nte mbufo ikokotke ite ke enye emi okobotde mmọ toto ke editọn̄ọ okobot mmọ eren ye n̄wan onyụn̄ ọdọhọ ete: ‘Ke ntak emi erenowo ọyọkpọn̄ ete ye eka esie onyụn̄ akadiana ye n̄wan esiemmọ, ndien mmọ mbiba ẹyekabade ẹdi obụk kiet’? Ntre mmọ idịghe aba owo iba, edi ẹdi obụk kiet. Mmọdo, se Abasi ama akadian yak baba owo kiet okûdian̄ade.” (Matt. 19:4-6) Jesus ama ọfiọk ke se idade enyịn nnyịn ise ekeme nditụk nnyịn esịt. Ke ntre, enye ọkọdọhọ ke Ukwọrọikọ esie Oro ke Obot, ete: “Mbufo ẹma ẹkop ẹte ẹkedọhọ ẹte, ‘Kûsịn efịbe.’ Edi ndọhọ mbufo nte owo ekededi eke owụkde enyịn ese n̄wan tutu udọn̄ idan̄ edemede enye, enye esesịn efịbe ye enye ama ke esịt esie.” (Matt. 5:27, 28) Mbon oro ẹfụmide item Jesus ẹkpep ndima ubiatibet.

10. Nọ ifiọkutom oro owụtde ke owo ekeme nditre ndise ndise idan̄.

¹⁰ Satan ada ndise idan̄ esịn udọn̄ ọnọ oburobụt ido idan̄. Ndise idan̄ ẹyọyọhọ editịm n̄kpọ emi. Esisọn̄ mbon oro ẹsede ndise idan̄ ndifre ndiọi ndise oro. Mmọ ẹkam ẹkeme ndinyene mbumehe edise ndise idan̄. Kere ban̄a se iketịbede inọ Christian kiet. Enye ọdọhọ ete: “Mma nsidịbe nse ndise idan̄. Mma nnyene ekikere emi n̄kadade ke edi isio ye enye oro n̄kadade nnam n̄kpọ Jehovah. Mma mfiọk ke n̄kpọ emi ikọfọnke, edi mma ndọhọ idemmi ke Abasi okosụk enyenyịme se n̄kanamde nnọ enye.” Nso ikokpụhọde ekikere eyenete emi? Enye ọdọhọ ete: “Okposụkedi emi ekedide n̄kpọ oro ọkọsọn̄de mi akan ndinam, mma nsian mbiowo mfịna mi.” Ke akpatre, eyenete emi ama etre ndedehe edu emi. Enye ọdọhọ ete: “Ke mma n̄kọkpọn̄ idiọkn̄kpọ emi, ama editie mi ke idem ndien nte ke mmenen̄ede nnyene eti ubieresịt.” Ana mbon oro ẹsuade ubiatibet ẹkpep ndisua ndise idan̄.

11, 12. Didie ke ikeme ndiwụt ke imasua ubiatibet ke se iban̄ade ikwọ?

¹¹ Ikwọ ye mme ikọ ikwọ ẹkeme ndinen̄ede ntụk nnyịn, ndien ke ntre, ẹkeme ndinen̄ede ntụk ndamban̄a esịt nnyịn. Ikwọ edi enọ Abasi ndien ẹmekwọ enye ke anyan ini ke utuakibuot akpanikọ. (Ex. 15:20, 21; Eph. 5:19) Edi idiọk ererimbot Satan emi esịn udọn̄ ọnọ ikwọ oro otorode oburobụt ido. (1 John 5:19) Afo ekeme ndisan̄a didie mfiọk m̀mê ikwọ oro akpan̄de utọn̄ ọnọ asabade fi m̀mê isabakede?

¹² Emekeme nditọn̄ọ ke ndibụp idemfo ete: ‘Ndi ikwọ oro n̄kpan̄de utọn̄ nnọ otoro  uwotowo, efịbe, use, ye ikọ isụn̄i? Edieke n̄kpokotde mme ikọ ikwọ oro nnọ owo, ndi owo oro ekpekere ke mmasua ubiatibet, mîdịghe ndi mme ikọ emi ẹkpewụt ke esịt mi asabarede?’ Nnyịn ikemeke ndidọhọ ke imasua ubiatibet ke adan̄aemi ikpan̄de utọn̄ inọ enye ke ikwọ. Jesus ọkọdọhọ ete: “Mme n̄kpọ emi ẹwọrọde owo ke inua ẹto esịt [ẹwọn̄ọ], kpa mme n̄kpọ emi ẹsabade owo. Ke uwụtn̄kpọ, ndiọi ekikere, uwotowo, efịbe, use, inọ, ikọ ntiense nsu, ikọ isụn̄i, ẹto owo ke esịt ẹwọn̄ọ.”—Matt. 15:18, 19; men James 3:10, 11 domo.

Da Mbon Oro Ẹmade Ubiatibet nte Jesus Adade Mmọ

13. Jesus ekese didie mbon oro ẹkekade iso ẹnam idiọk?

¹³ Jesus ọkọdọhọ ke imọ ikedi ndikot mme anamidiọk, m̀mê mme abiatibet man ẹkabade esịt. (Luke 5:30-32) Edi enye ekese didie mbon oro esịt ama okodoro ufiọn ke ndinam idiọkn̄kpọ? Jesus ama enen̄ede odụri owo utọn̄ ete ẹkûkpebe utọ mbon oro. (Matt. 23:15, 23-26) Enye ama onyụn̄ etịn̄ in̄wan̄-in̄wan̄ ete: “Idịghe kpukpru mbon oro ẹkotde mi, ‘Ọbọn̄, Ọbọn̄,’ ẹdidụk obio ubọn̄ heaven, edi edi enye emi anamde uduak Ete mi emi odude ke heaven edidụk. Ediwak owo ẹyedọhọ mi ke usen oro [usen emi Abasi edibierede ikpe] ẹte, ‘Ọbọn̄, Ọbọn̄, nte nnyịn iketịn̄ke nte prọfet ke enyịn̄ fo, inyụn̄ idaha enyịn̄ fo ibịn mme demon, inyụn̄ idaha enyịn̄ fo inam ediwak utom odudu?’” Edi enye eyesịn mbon oro ẹkade iso ẹbiat ibet mînyụn̄ ikabakede esịt, onyụn̄ ọdọhọ ete: “Ẹdian̄ade mi ke idem.” (Matt. 7:21-23) Ntak emi ẹdibierede ikpe ntem ẹnọ mmọ? Sia mme orụk owo oro ikponoke Abasi ẹnyụn̄ ẹnam mme owo idiọk ke ntak mme edinam ubiatibet mmọ.

14. Ntak emi ẹsisiode mme anamidiọk emi mîkabakede esịt ẹfep ke esop?

¹⁴ Ikọ Abasi owụk ete ẹsio mme anamidiọk oro mîkabakede esịt ẹfep ke esop. (Kot 1 Corinth 5:9-13.) Odot ẹnam emi ke nsụhọde n̄kaha ke ntak ita: (1) man ẹnam enyịn̄ Jehovah asana, (2) mbak ẹdisabade esop, ye (3) man ẹn̄wam anamidiọk akabade esịt edieke ẹkemede.

15. Edieke anade isọn̄ọ ida ye Jehovah, mme mbụme ewe ke ana ibụp idem nnyịn?

¹⁵ Ndi imese mbon oro esịt odorode ufiọn ke ndibiat ibet ukem nte Jesus esede mmọ? Oyom ikere iban̄a mme mbụme emi: ‘Ndi n̄kpemek ndidụk ndụk kpukpru ini ye owo emi ẹsiode ẹfep m̀mê emi ọkpọn̄de esop Christian ke idemesie? Nso ke n̄kpanam edieke enye edide n̄kpet n̄kpet iman emi mîdụn̄ke ke ufọk?’ Orụk idaha oro ekeme ndinen̄ede ndomo ima oro imade edinen ido ye nsọn̄ọnda nnyịn ye Abasi. *

16, 17. Nso mfịna ke eka kiet emi edide Christian okosobo, ndien nso ikan̄wam enye ebere ye ndutịm edisio anamidiọk oro mîkabakede esịt mfep?

¹⁶ Kere ban̄a se ikọwọrọde eyenete an̄wan kiet emi eyeneren esie emi ọkọride ọwọrọ owo ekesimade Jehovah ini kiet ko. Nte ededi, nte ini akakade, eyen oro ama emek  ndika iso mbiat ibet, ikabakede esịt. Ntem, ẹma ẹsio enye ẹfep ke esop. Eyenete an̄wan oro ama ama Jehovah, edi enye ama ama eyen esie n̄ko onyụn̄ enen̄ede ọsọn̄ enye ndinam ewụhọ N̄wed Abasi oro akpande enye ndidụk ndụk ye eyen esie.

¹⁷ Nso ke afo ekpeketeme eyenete an̄wan oro ete anam? Ebiowo ama anam enye ọfiọk ke ubiak esie an̄wan̄a Jehovah. Ebiowo oro ama ọdọhọ enye ekere aban̄a nte anade edi ama abiak Jehovah ke ini ndusụk mme angel esie ẹkesọn̄de ibuot. Ebiowo oro ama ọkọk ibuot ye enye ete ke okposụkedi emi Jehovah ọfiọkde nte utọ n̄kpọ oro ekemede ndibiak owo, enye oyom ẹsio anamidiọk oro mîkabakede esịt ẹfep. Enye ama enyịme item emi onyụn̄ ebere ye ndutịm edisio owo mfep. * Utọ nsọn̄ọnda oro anam esịt Jehovah adat.—N̄ke 27:11.

18, 19. (a) Edieke nnyịn itrede ndụk ye owo emi akade iso abiat ibet, oro owụt ke nnyịn isua nso? (b) Nso ikeme ndidi utịp edisọn̄ọ nda ye Abasi ye ndutịm esie?

¹⁸ Edieke orụk n̄kpọ oro ọwọrọde fi, mbọk ti ete ke enye abiak Jehovah n̄ko. Edieke etrede ndụk ye owo emi ẹsiode ẹfep m̀mê emi ọkpọn̄de esop ke idemesie, afo owụt ke imọ imasua mme edu ye edinam emi akanamde ẹsio enye ẹfep. Afo onyụn̄ owụt n̄ko ke amama anamidiọk oro tutu afo anam se itịmde ifọn ye enye. Afo ndisọn̄ọ nda ye Jehovah ekeme ndinam owo oro ẹtụnọde do ọsọp akabade esịt afiak etiene Jehovah.

¹⁹ Owo kiet emi ẹkesiode ẹfep ekem ẹfiak ẹda ekewet ete: “Mmokop inemesịt ke Jehovah ama ikọt esie tutu okụt ete ke ẹnam esop esie asana. N̄kpọ oro mbonan̄wa ẹdade nte nsọn̄ido ọfọn onyụn̄ enen̄ede edi edinam ima.” Ndi afo emekere ke ẹkpeken̄wam owo emi esịm orụk ubiere oro edieke mme andibuana ke esop, esịnede mbonubon esie, ẹkpekekade iso ẹdụk ndụk ye enye kpukpru ini ke ini ẹkesiode enye ẹfep? Edieke nnyịn iberede ye ndutịm N̄wed Abasi kaban̄a edisio owo mfep, oro owụt ke nnyịn imama edinen ido inyụn̄ ifiọk ke Jehovah enyene unen ndinọ mme edumbet oro ikpadade idu uwem.

“Ẹsua Se Idiọkde”

20, 21. Ntak emi ọfọnde ikpep ndisua ubiatibet?

²⁰ Apostle Peter odụri nnyịn utọn̄ ete: “Ẹnyene ikike, ẹnyụn̄ ẹdu ke ukpeme.” Ntak-a? Koro “asua mbufo, kpa Devil, ke oyoyo nte ekpe eke okụnide, oyom owo eke enye editade.” (1 Pet. 5:8) Ndi afo edidi owo oro? Emi enen̄ede ọkọn̄ọ ke adan̄a nte afo ekpepde ndisua ubiatibet.

²¹ Idịghe mmemmem n̄kpọ ndikpep ndisua se idiọkde. Nnyịn ikamana ke idiọkn̄kpọ, nnyịn inyụn̄ idu uwem ke ererimbot emi esịnde udọn̄ ọnọ nnyịn ndinam se idọn̄de ikpọkidem nnyịn. (1 John 2:15-17) Edi edieke ikpebede Jesus Christ inyụn̄ ikpepde ndinyene ata akamba ima nnọ Jehovah Abasi, nnyịn imekeme ndikụt unen ke ndikpep ndisua ubiatibet. Ẹyak ibiere ‘ndisua se idiọkde,’ inyụn̄ inen̄ede inịm ke Jehovah “ekpeme . . . mbon oro ẹsọn̄ọde ẹda ye enye; anyan̄a mmọ osio ke ubọk mme idiọkowo.”—Ps. 97:10.

[Mme Ikọ Idakisọn̄]

Didie ke Afo Ọkpọbọrọ?

• Nso ikeme ndin̄wam nnyịn idụn̄ọde edu nnyịn kaban̄a edin̄wọn̄ mmịn?

• Nso ke ikeme ndinam man ikpeme idem nnyịn mbak ndedịbe odudu?

• Ntak emi ndise idan̄ ọdiọkde?

• Didie ke ikeme ndiwụt ke imasua ubiatibet ke ini ẹsiode owo oro imade ẹfep?

[Mme Mbụme Ukpepn̄kpọ]

[Ndise ke page 29]

Nso ke ekpekere aban̄a edieke emekde ndin̄wọn̄ mmịn?

[Ndise ke page 30]

Kpeme idem ye odudu Satan ke unọ idem inemesịt

[Ndise ke page 31]

Owo emi esisede ndise idan̄ ekpep ndima nso?