Afo Emenyene Ntak Ndidat Esịt

KPUKPRU n̄kpọ oro ẹbotde ẹdi ke nde ke nde, ọtọn̄ọde ke ata nịn̄inịn̄i odu-uwem n̄kpọ tutu esịm ata ikpọ uyọ ntantaọfiọn̄ emi ẹtịmde ke n̄kpri ye ata ikpọ otu. Emi ikpaha owo idem koro Andibot “idịghe Abasi ndutịme.” (1 Cor. 14:33) Ndutịm emi Abasi anamde aban̄a utuakibuot esie otụk owo tutu. Kere ban̄a se Jehovah anamde. Enye amadian ata ediwak miliọn owo ye mme angel ọtọkiet anam esop ofụri ekondo esie. Mme owo ye mme angel emi ẹnyene ifụre ndimek se ẹmade ẹnyụn̄ ẹdiana kiet ke utuakibuot akpanikọ. Emi eye didie ntem!

Ke Israel eset, Jerusalem—emi temple Jehovah okodude, edidem emi enye eyetde aran onyụn̄ odụn̄de—akada aban̄a ikpehe esop Abasi mi ke isọn̄. Eyen Israel kiet emi ẹkemende ẹka ntan̄mfep ke Babylon eketịn̄ ntem aban̄a edisana obio oro: “Yak edeme mi adiana mi ke nsịn̄, edieke mmentịghi fi, edieke mmenamke Jerusalem okon̄ akan akpan ntak idatesịt mi.”—Ps. 137:6.

Ndi nte afo adade esop Abasi mfịn edi oro? Ndi enye anam fi okop idatesịt akan n̄kpọ en̄wen ekededi? Ndi nditọ fo ẹfiọk nte ikpehe esop Abasi ke isọn̄ ọkọtọn̄ọde ke eyomfịn ye nte enye anamde utom? Ndi mmọ ẹfiọk ke mmimọ idi ubak otu nditọete Mme Ntiense Jehovah ke ofụri ererimbot? (1 Pet. 2:17) Nsinam mûsịnke mme ekikere oro ẹnọde mi ke mbubreyo Utuakibuot Ubon mbufo man ẹnam ubon mbufo ẹnen̄ede ẹfiọk ẹnyụn̄ ẹma esop Jehovah?

Bụk Ban̄a “Eyo Oko”

Nditọ Israel ẹma ẹsisop idem kpukpru isua man ẹnịm Passover. Moses eketeme mmọ ntem ke ini ẹketọn̄ọde usọrọ oro, ete: “Ndien ama ekem edieke eyen fo edibụpde fi ke ini iso, ete, ‘Emi ọwọrọ nso?’ afo ndien enyene ndidọhọ enye ete, ‘Jehovah akada ọkpọsọn̄ ubọk osio nnyịn ke Egypt, ke ufọk ufụn.’” (Ex. 13:14) Ikanaha ẹfre se Jehovah akanamde ọnọ nditọ Israel. Ke akpanikọ, ediwak mme ete ke Israel ẹma ẹnam ewụhọ Moses. Ke ediwak emana ẹma ẹkebe, eyen Israel kiet ama ọbọn̄ akam ete: “O Abasi, nnyịn imokop ke utọn̄ nnyịn, mme ete ete nnyịn ẹmebụk ẹnọ nnyịn ẹban̄a edinam emi afo akanamde ke mme usen mmọ, ke eyo oko.”—Ps. 44:1.

Eyenọwọn̄ mfịn ekeme ndida mbụk Mme Ntiense Jehovah eke isua 100 emi ẹkebede n̄ko nte se iketịbede ke “eyo oko.” Afo ekeme ndinam didie man mbụk emi an̄wan̄a nditọ fo? Ndusụk ete ye eka ẹsida Jehovah’s Witnesses—Proclaimers of God’s Kingdom, Yearbook, mme mbụk eyouwem emi ẹmịn̄de ke mme n̄wed nnyịn, ye mme n̄kpọ eken oro ẹtịnde ẹban̄a mbụk ukara Abasi, emi esịnede obufa DVD emi aban̄ade ikọt Abasi ke eyomfịn. Mme vidio oro ẹban̄ade nte ẹkekọbọde nditọete nnyịn ke akani Soviet Union ye ke ini ukara Nazi ke Germany ẹkpep mme ubon nte ẹkemede ndiberi edem ke Jehovah ke mme ini idomo. Ẹsịn mme utọ n̄kpọ emi ke ndutịm mbubreyo Utuakibuot Ubon mbufo. Emi ayanam mbuọtidem nditọ mbufo ọkọri mbak edieke ẹdomode nsọn̄ọnda mmọ.

Nte ededi, edinọ anyan mbụkeset ekeme ndisọp mfek nditọwọn̄. Ntem buan nditọ fo. Ke uwụtn̄kpọ, afo emekeme ndidọhọ eyen fo emek idụt emi enye amade, anam ndụn̄ọde aban̄a mbụk ukara Abasi idụt oro, onyụn̄ eneme ndusụk se enye okokụtde ye ubon. Ekeme  ndidu mme Christian emi ẹsọn̄ọde ẹda ẹnam n̄kpọ Abasi ẹbịghi ke esop mbufo, ndien ẹmekeme ndikot mmọ ẹdidụk utuakibuot ubon mbufo usen kiet. Eyen mbufo ekeme ndibụp mmọ mbụme, anam mmọ ẹbụk ifiọkutom mmọ. Mîdịghe emekeme ndidọhọ eyen mbufo ewet ndise akpan n̄kpọntịbe ukara Abasi, utọ nte n̄kọk itieutom oro ẹkebọpde, mbono ofụri ererimbot, m̀mê nte ẹkedade ukwak ubre usanikwọ ẹkwọrọ ikọ ke ufọk ke ufọk.

Ẹkpep nte “Ikpehe Kiet Kiet” Anamde Utom Esie

Apostle Paul ekemen esop Christian odomo ye “ofụri idem, emi ẹnamde akpaha adiana kiet onyụn̄ anam utom ọtọkiet ebe ke kpukpru ikek oro ẹnọde se ẹyomde, nte ekemde ye utom ndido [“ikpehe,” New International Version] kiet kiet ke nnennen udomo, ọbọp idem ọkọri man anam enye ọsọn̄ọ owụhọ ke ima.” (Eph. 4:16) Ndikpep mban̄a nte idem owo anamde utom anam nnyịn idọdiọn̄ iwụt esịtekọm iban̄a inyụn̄ ikpono Andibot. Kpasụk ntre, ke ini idụn̄ọrede nte esop ofụri ererimbot anamde n̄kpọ, idem akpa nnyịn aban̄a “akwa ọniọn̄ Abasi oro ẹkụtde ke nsio nsio usụn̄.”—Eph. 3:10.

Jehovah etịn̄ nte esop esie, emi esịnede ikpehe eke heaven, anamde n̄kpọ. Ke uwụtn̄kpọ, enye asian nnyịn ke imọ ikebem iso inọ Jesus Christ ediyarade, ekem Jesus Christ “osio angel esie ọdọn̄ onyụn̄ ọnọ enye n̄kpọ emi ke mme idiọn̄ọ ete okowụt ofụn esie John, emi eketiede ntiense aban̄a.” (Edi. 1:1, 2) Edieke Abasi ayararede nte ikpehe esop esie oro owo mîkwe ke enyịn anamde n̄kpọ, ndi enye ikpoyomke nnyịn ifiọk “utom ikpehe kiet kiet”?

Ke uwụtn̄kpọ, edieke edide esenyịn circuit ọmọn̄ edi esop mbufo, ntak emi mûtiehe ye ubon fo uneme mme utom ye ifet oro esenyịn circuit enyenede? Didie ke mmọ ẹsin̄wam owo nnyịn kiet kiet? Mme mbụme en̄wen oro ikemede ndikere mban̄a ẹdi emi: Ntak emi edide akpan n̄kpọ ndisitọt ibatutom? Ẹda m̀mọ̀n̄ okụk ẹse ẹban̄a esop Abasi? Ẹtịm Otu Ukara didie, ndien didie ke enye esinọ udia eke spirit?

Ke ini ifiọkde nte ẹtịmde ikọt Jehovah, nnyịn iyọbọ ufọn ke nsụhọde n̄kaha ke ikpehe ita emi: Nnyịn iyenen̄ede iwụt esịtekọm iban̄a mbon oro ẹnamde utom ọkpọsọn̄ ke ibuot nnyịn. (1 Thess. 5:12, 13) Eyesịn udọn̄ ọnọ nnyịn ndibere ye ndutịm ukara Abasi. (Utom 16:4, 5) Ke akpatre, emi ayanam inen̄ede ibuọt idem ye mbon oro ẹdade usụn̄ sia ikụtde ke mmọ ẹda N̄wed Abasi ẹnam mme ubiere ye ndutịm.—Heb. 13:7.

“Ẹsan̄a Ẹse Mme Tọwa Ufọkidụn̄ Esie”

“Mbufo ẹsan̄a ẹkanade Zion, ẹnyụn̄ ẹkan enye ẹkụk, ẹbat mme tọwa esie. Ẹwụk esịt mbufo ke ibibene ukpeme esie. Ẹsan̄a ẹse mme tọwa ufọkidụn̄ esie, man mbufo ẹkpebụk ẹnọ emana ini iso.” (Ps. 48:12, 13) Andiwet psalm oro ekesịn udọn̄ ọnọ nditọ Israel ete ẹnen̄ede ẹwụk enyịn ẹse Jerusalem. Ndi emekeme ndida enyịn ikike n̄kụt nte mme ubon Israel emi ẹkesikade edisana obio oro man ẹkedụk mme usọrọ eke isua ke isua ẹnyụn̄ ẹkụtde ediye temple esie, ẹkenemede ẹban̄a mme n̄kpọ emi? Anaedi mmọ ẹma “[ẹsibụk] ẹnọ emana ini iso.”

Kere ban̄a ọbọn̄ an̄wan Sheba, emi ke akpa mîkenịmke mbụk oro enye okokopde aban̄a ubọn̄ ubọn̄ ukara Solomon ye akwa ọniọn̄ esie. Nso ikanam enye enịm ke mme n̄kpọ oro enye okokopde ẹkedi akpanikọ? Enye ọkọdọhọ ete: “N̄kenịmke ikọ mmọ ke akpanikọ tutu ndi man ndida enyịn mi n̄kụt.” (2 Chron. 9:6) Ke akpanikọ, se idade ‘enyịn nnyịn’ ikụt ekeme ndinen̄ede ntụk nnyịn.

Afo ekeme ndinam didie man nditọ fo ẹda ‘enyịn mmọ’ ẹkụt mme utịben̄kpọ esop Jehovah? Edieke n̄kọk itieutom Mme Ntiense Jehovah ekperede edem mbufo, ẹdomo ukeme man ẹka ẹkese. Ke uwụtn̄kpọ, ẹkebọk Mandy ye Bethany ke ebiet oro oyomde usụn̄ ke n̄kpọ nte kilomita 1,500 ọkpọn̄ Bethel ke idụt mmọ. Kpa ye oro, ete ye eka mmọ ẹma ẹsidiomi man  mmọ ẹsika ndien ndien ẹkese Bethel, akpan akpan ke ini emi nditọiban emi ẹkedide nditọwọn̄. Nditọ oro ẹdọhọ ẹte, “Mbemiso ikakade ikese Bethel, ikada enye nte ebiet emi n̄kani owo kpọt ẹdude, emi owo mînyụn̄ ikemeke ndinam mbubru. Edi ima ikụt n̄kparawa owo emi ẹsịnde ẹnam utom ẹnọ Jehovah ẹnyụn̄ ẹkopde inem utom mmọ! Ima ikụt ke esop Jehovah idịghe ekpri mbọhọ oro nnyịn idụn̄de kpọt, ndien ini kiet kiet oro ikakade ikese Bethel ama esịn udọn̄ ọnọ nnyịn ndinam n̄kpọ Abasi.” Ndinen̄ede n̄kụt nte esop Abasi etiede ama esịn udọn̄ ọnọ Mandy ye Bethany ẹtọn̄ọ utom usiakusụn̄, ndien ẹma ẹkot mmọ ẹdinam utom ke Bethel ke ibio ini.

Nnyịn imenyene usụn̄ en̄wen ‘ndikụt’ esop Jehovah, emi nditọ Israel mîkenyeneke. Ke mme isua ndondo emi, ikọt Abasi ẹmebọ mme vidio ye mme DVD emi ẹwụtde nsio nsio ikpehe esop Abasi, utọ nte Jehovah’s Witnesses—Organized to Share the Good News, Our Whole Association of Brothers, To the Ends of the Earth, ye United by Divine Teaching. Ke ini afo ye ubon fo ẹkụtde ọkpọsọn̄ utom mbon Bethel, mme anamutom unọ un̄wam, mme isụn̄utom, ye nditọete oro ẹtịmde ikpọ mbono, mbufo ẹyenen̄ede ẹwụt esịtekọm ẹban̄a nditọete ofụri ererimbot.

Esop ikọt Abasi kiet kiet anam akpan utom ke ndikwọrọ eti mbụk nnyụn̄ nnọ mme Christian ibetedem ke ebiet emi enye odude. Edi afo ye ubon fo ẹda ini ẹti “ofụri otu nditọete mbufo ke ererimbot.” Emi ayanam fi ye nditọ fo “ẹsọn̄ọ ẹda ke mbuọtidem,” ẹnyụn̄ ẹfiọk ke mmimọ imenyene ntak ndidat esịt.—1 Pet. 5:9.

 [Ekebe/Ndise ke page 18]

Esop Abasi Ibuotikọ Emi Odotde Ẹkpep Ẹban̄a

Nnyịn imenyene ekese n̄kpọ emi ẹdin̄wamde kpukpru nnyịn ifiọk ekese iban̄a mbụk esop Jehovah ye nte esop oro esinamde n̄kpọ. Mme mbụme oro ẹtienede mi ẹkeme ndin̄wam fi ọtọn̄ọ ndinam emi:

☞ Utom mme esenyịn oro ẹsan̄ade-san̄a ke eyomfịn ọkọtọn̄ọ didie?—Jehovah’s Witnesses—Proclaimers of God’s Kingdom, page 222-227; Enyọn̄-Ukpeme, November 15, 1996, page 10-15.

☞ Nso ikanam “Usen Nditọwọn̄” edi akpan usen ke Mbono Ukara Abasi Eke 1941?—Jehovah’s Witnesses—Proclaimers of God’s Kingdom, page 86, 88; Enyọn̄-Ukpeme, July 15, 2001, page 8.

☞ Otu Ukara ẹsinam ubiere didie?—“Bearing Thorough Witness” About God’s Kingdom, page 108-114; Enyọn̄-Ukpeme, April 1, 2007, page 24.