Da Utom Jehovah ke Ata Akpan N̄kpọ
Da Utom Jehovah ke Ata Akpan N̄kpọ
“N̄kpọ ekededi eke odotde ẹtịm ẹkere, . . . ẹka iso ẹkere mme n̄kpọ emi.”—PHIL. 4:8.
1, 2. Nso inam ediwak owo ke ererimbot emi ẹda uwem didie didie, ndien emi edemede mme mbụme ewe?
NNYỊN idu uwem ke ererimbot emi akananam n̄kpọ mîsọn̄ke mînyụn̄ idiọkke ntem. Amaedi mbon emi mînen̄ekede idiọn̄ọ Jehovah, ekeme nditie mmọ nte ke owo ikemeke ndiyọ “ndiọkeyo emi ọsọn̄de ndiyọ” mi. (2 Tim. 3:1-5) Mmọ ẹnyụn̄ ẹyọ usen kiet kiet ke odudu idemmọ—ndien mmọ isinen̄ekede ikụt unen. Sia ediwak owo mîyomke ndikere n̄kaha mban̄a uwem, mmọ ẹsiyom unọ idem inemesịt kpukpru ini man ẹfre uwa.
2 Mme owo ẹsiwak ndida unọ idem inemesịt nte ebeiso n̄kpọ man ẹyọ mme mfịghe uwem. Edieke mme Christian mîkpemeke, mmọ ẹkeme nditọn̄ọ ndidu uwem ntre n̄ko. Nnyịn ikeme ndisan̄a didie mfep oro? Ndi ọwọrọ ke nnyịn ikpedehedei inọ idem inemesịt? Didie ke ikeme ndinọ idem inemesịt nnyụn̄ nda mbiomo nnyịn n̄ko ke akpan n̄kpọ? Mme edumbet Bible ewe ẹkpeda nnyịn usụn̄, man ke adan̄aemi inen̄erede ikere iban̄a uwem, nnyịn idaha idem nnyịn ke owo Abasi ikaha?
Da N̄kpọ ke Akpan N̄kpọ ke Ererimbot Oro Amade Inem Uwem
3, 4. Didie ke N̄wed Abasi an̄wam nnyịn ifiọk ufọn edida n̄kpọ ke akpan n̄kpọ?
3 Ufọn idụhe nditetịn̄, ererimbot emi ada “unọ idem inemesịt” ke ata akpan n̄kpọ. (2 Tim. 3:4) Ererimbot ndida udia uwem ke ata akpan n̄kpọ ekeme ndibiat itie ufan nnyịn ye Abasi. (N̄ke 21:17) Imokụt ndien ntak emi leta oro Paul ekewetde ọnọ Timothy ye Titus ẹsịnede n̄ko item emi aban̄ade edida n̄kpọ ke akpan n̄kpọ. Ndinam item oro idiyakke nnyịn ida uwem didie didie nte mbon ererimbot ẹdade.—Kot 1 Timothy 2:1, 2; Titus 2:2-8.
4 Ediwak isua ikie mbemiso oro, Solomon ama ewet aban̄a ufọn editre unọ idem inemesịt ndusụk ini man ẹtie ẹkere ẹban̄a mme akpan n̄kpọ ke uwem. (Eccl. 3:4; 7:2-4) Ke akpanikọ, ke ntak emi uwem omụhọde, oyom ‘in̄wana ọkpọsọn̄’ man inyene edinyan̄a. (Luke 13:24) Ke ntak oro, oyom ika iso ikere iban̄a kpukpru n̄kpọ eke “odotde ẹtịm ẹkere.” (Phil. 4:8, 9) Oro ọwọrọ ndinen̄ede n̄kere mban̄a kpukpru ikpehe uwem nnyịn nte Christian.
5. Nso idi ikpehe kiet ke uwem oro ikpadade ke akpan n̄kpọ?
5 Ke uwụtn̄kpọ, mme Christian ẹkpebe Jehovah ye Jesus ẹnyụn̄ ẹda edisịn ifịk nnam utom ke ata akpan n̄kpọ. (John 5:17) Emi anam ẹsinen̄ede ẹtoro mmọ ke ndisịn ifịk nnam utom nnyụn̄ ndi se ẹberide edem. Mme ibuot ufọk ẹsinen̄ede ẹsịn ifịk ẹnam utom man ẹse ẹban̄a ubon mmọ. Mmọn̄ọ, n̄kọ owo nditre ndise mban̄a ubon esie ọwọrọ “ndikan̄ mbuọtidem”!—1 Tim. 5:8.
Da Utuakibuot Nnyịn ke Akpan N̄kpọ ye N̄kpọ Idatesịt
6. Nnyịn isan̄a didie ifiọk ke ana ida utuakibuot nnyịn nnọ Jehovah ke akpan n̄kpọ?
6 Jehovah esida utuakibuot akpanikọ ke akpan n̄kpọ kpukpru ini. Ke uwụtn̄kpọ, ke ini nditọ Israel ẹkedude ke idak Ibet Moses, mmọ ẹma ẹnen̄ede ẹbọ ufen ke ini mmọ ẹkeyode ẹkpọn̄ utuakibuot Jehovah. (Josh. 23:12, 13) Ke n̄kpọ nte isua 2,000 emi ẹkebede, ama oyom mme anditiene Christ ẹn̄wana etieti mbak nsunsu ukpepn̄kpọ ye mbiara edu mme owo idisabade utuakibuot akpanikọ. (2 John 7-11; Edi. 2:14-16) Mfịn, ata mme Christian ke ẹka iso ndida utuakibuot akpanikọ ke akpan n̄kpọ.—1 Tim. 6:20.
7. Didie ke Paul eketịm idem ọnọ utom ukwọrọikọ esie?
7 Utom ukwọrọikọ nnyịn edi n̄kpọ idatesịt. Edi, man ika iso ikop idatesịt ke utom ukwọrọikọ, oyom inen̄ede itie ikere iban̄a enye inyụn̄ ibem iso itịm idem. Paul etịn̄ nte imọ ikekerede iban̄a mbon oro imọ ikekpepde n̄kpọ. Enye ekewet ete: “Mmakabade ndi kpukpru n̄kpọ nnọ kpukpru orụk owo, man ke usụn̄ ekededi n̄kpanyan̄a ndusụk mmọ. Edi nnanam kpukpru n̄kpọ kaban̄a eti mbụk, man n̄kpabuana enye ye mbon en̄wen.” (1 Cor. 9:22, 23) Paul ama okop idatesịt ndin̄wam mme owo ke n̄kan̄ eke spirit, ndien enye ama enen̄ede etie ekere aban̄a nte enye edinen̄erede in̄wam mme andikpan̄ utọn̄ nnọ enye. Ntem enye ama ekeme ndinọ mmọ nsịnudọn̄ ye ntak ndituak ibuot nnọ Jehovah.
8. (a) Nso edu ke ikpenyene iban̄a mbon oro ikpepde n̄kpọ ke utom ukwọrọikọ nnyịn? (b) Didie ke ndinịm ukpepn̄kpọ Bible etiene anam owo okop idatesịt?
8 Utom ukwọrọikọ Paul ekedi akpan n̄kpọ adan̄a didie ọnọ enye? Enye ama enyịme ‘ndidụk ufụn’ nnọ Jehovah ye mbon oro ẹkeyomde ndibọ etop akpanikọ. (Rome 12:11; 1 Cor. 9:19) Ke ini inyịmede ndikpep mme owo Ikọ Abasi—edide ke ukpepn̄kpọ Bible, ke mbono esop Christian, m̀mê ke ini Utuakibuot Ubon—ndi imesinen̄ede ikere iban̄a mbon oro ikpepde n̄kpọ? Ekeme ndidi imesikere ke ndinịm ukpepn̄kpọ Bible kpukpru ini ọsọn̄ akan nnyịn. Edi akpanikọ ke esiyom ida ini oro ikpadade inam mbubehe idem nnyịn in̄wam mbon en̄wen. Edi ndi oro ikemke ye ikọ Jesus oro ọdọhọde ke “inemesịt odu ke ndinọnọ akan ke ndibọbọ”? (Utom 20:35) Nnyịn ke idem nnyịn ndikpep mbon en̄wen usụn̄ edinyan̄a ọyọnọ nnyịn inemesịt oro owo mîkemeke ndimen ndomo ye utom en̄wen ekededi.
9, 10. (a) Ndi ndida n̄kpọ ke akpan n̄kpọ ọwọrọ ke inaha inọ idem nduọkodudu inyụn̄ ikop inem uwem ye mme owo? Nam an̄wan̄a. (b) Nso idinam ebiowo esisịn udọn̄ ọnọ owo onyụn̄ edi se ẹkemede ndisan̄a n̄kpere?
9 Ndida n̄kpọ ke akpan n̄kpọ iwọrọke ke nnyịn ikemeke ndinọ idem nduọkodudu nnyụn̄ n̄kop inem uwem ye mme owo. Jesus ama enịm mfọnmma uwụtn̄kpọ ke ndida ini n̄kpep mme owo n̄kpọ, nduọk odudu, nnyụn̄ nnyene eti itie ebuana ye mbon en̄wen. (Luke 5:27-29; John 12:1, 2) Ndida n̄kpọ ke akpan n̄kpọ iwọrọke n̄ko ke akpana iso ọnọniọn̄ nnyịn kpukpru ini. Edieke Jesus akpakadade kpukpru n̄kpọ ke akpan n̄kpọ kpukpru ini onyụn̄ ọsọn̄ iso, ke akpanikọ mme owo ikpakasan̄ake ikpere enye. Idem nditọwọn̄ ẹma ẹnyene ifụre ndisan̄a n̄kpere enye. (Mark 10:13-16) Didie ke ikeme ndikpebe Jesus nnyụn̄ n̄wụt eti ibuot?
10 Eyenete kiet eketịn̄ ntem aban̄a ebiowo kiet, “Enye esiyom ekese oto idemesie edi idehedei iyom mbon en̄wen ẹfọn ẹma.” Ndi ẹkeme ndidọhọ ke afo etie ntre? Odot iyom mbon en̄wen ẹnam n̄kpọ ke ndusụk udomo. Ke uwụtn̄kpọ, nditọwọn̄ ẹsinam ọfọn ke ini ete ye eka ẹnịmde mme utịtmbuba oro ẹdotde ẹnyụn̄ ẹn̄wamde nditọ mmọ ẹsịm mme utịtmbuba oro. Kpasụk ntre, mbiowo ẹkeme ndin̄wam mme owo ke esop ẹkọri ke n̄kan̄ eke spirit ẹnyụn̄ ẹnọ mmọ mme akpan ekikere ke nte ẹkpenamde n̄kọri. N̄ko-n̄ko, ke ini ebiowo mîdaha idem esie ke n̄kpọ ikaha, mme owo ẹyesan̄a ẹkpere enye ẹnyụn̄ ẹbọ nsịnudọn̄. (Rome 12:3) Eyenete an̄wan kiet ọkọdọhọ ete: “Nyomke ebiowo ada kpukpru n̄kpọ nte mbubru. Edi enye ama onyụn̄ ada kpukpru n̄kpọ ke akpan n̄kpọ, ọsọsọn̄ ndisan̄a n̄kpere enye.” Eyenete an̄wan en̄wen ete ke imọ ikere ke ndusụk mbiowo “ẹkeme ndinyene ndịk etieti ke ntak emi mmọ ẹnamde etie nte mmọ ẹsida kpukpru n̄kpọ ke akpan n̄kpọ ẹkaha.” Mbiowo ikpoyomke ndinam kpukpru mme andinịm ke akpanikọ ẹtre ndikop idatesịt ke utuakibuot oro mmọ ẹtuakde ẹnọ Jehovah, kpa “Abasi inemesịt.”—1 Tim. 1:11.
Ndikama Ifetutom ke Esop
11. Nso ke ‘ndinyanade mbịne’ ifetutom ke esop ọwọrọ?
11 Ke ini Paul ekesịnde udọn̄ ọnọ irenowo ke esop ete ẹnam n̄kpọ man ẹdot ndikama ifetutom ke esop, uduak esie ikedịghe ndisịn udọn̄ nnọ owo ekededi oyom ikpọ itie ọnọ idemesie. Utu ke oro, enye ekewet ete: “Edieke owo ekededi anyanarede ebịne itieutom esenyịn, enye oyom eti utom.” (1 Tim. 3:1, 4) Irenowo Christian ‘ndinyanade mbịne’ ọwọrọ mmọ ndinyene ọkpọsọn̄ udọn̄ ndisịn ifịk nnyene mme edu eke spirit oro ẹyomde man ẹnam n̄kpọ ẹnọ nditọete mmọ. Edieke ọyọhọde isua kiet ke nsụhọde n̄kaha tọn̄ọ eyenete akana baptism, enye onyụn̄ anamde mme n̄kpọ N̄wed Abasi oro oyomde mme asan̄autom unamutom ẹnam, emi ẹwụtde ke 1 Timothy 3:8-13, ẹkeme nditoro enye nnọ man ẹmek. N̄kọ ẹmekụt ke ufan̄ikọ 8 ọdọhọ ete: “Mme asan̄autom unamutom ẹkpenyene ndidi mbon emi ẹdade n̄kpọ ke akpan n̄kpọ.”
12, 13. Tịn̄ mme usụn̄ oro nditọete irenowo emi ẹdide n̄kparawa ẹkemede ndinyanade mbịne ifetutom.
12 Ndi afo edi erenowo oro ama akana baptism, emi adade n̄kpọ ke akpan n̄kpọ onyụn̄ ekperede ndisịm isua 20? Odu ediwak usụn̄ emi afo ekemede ndinyanade mbịne ifetutom. Usụn̄ kiet edi ndinam n̄kọri ke utom ukwọrọikọ fo. Ndi afo emesima ndisan̄a ye nditọete oro ẹdude ke nsio nsio isua emana ke an̄wautom? Ndi afo ke odomo ndiyom owo emi ekemede ndikpep Bible? Ke ini adade mme ekikere oro ẹnọde ke mme mbono esop Christian enịm ukpepn̄kpọ Bible, oyofori ukeme unọ ukpep fo. Akan oro, afo eyekpep ndinịm idemfo ke itie owo oro ekpepde mme usụn̄ Jehovah. Nte eyen ukpepn̄kpọ fo ọtọn̄ọde ndikụt ufọn edinam mme ukpụhọde, afo eyekpep ndida ime ye usọ n̄n̄wam enye ada mme edumbet Bible esịn ke edinam.
13 Mbufo nditọete irenowo emi ẹdide n̄kparawa ẹmekeme ndinọ n̄kani owo idem mbufo ke esop, ẹnyịme ndin̄wam mmọ ke usụn̄ ekededi oro ẹkemede. Ẹmekeme n̄ko ndise nte Ufọkmbono Obio Ubọn̄ etiede, ẹn̄wam ndinam enye asana onyụn̄ eye. Ke ini ọnọde idemfo ndin̄wam ke usụn̄ ekededi oro ekemede, emi owụt ke afo amada utom fo ke akpan n̄kpọ. Ukem nte Timothy, afo emekeme ndikpep nditịm nse mban̄a mme n̄kpọ oro ẹban̄ade esop.—Kot Philippi 2:19-22.
14. Didie ke ẹkeme ‘ndidomo nditọete irenowo emi ẹdide n̄kparawa nse m̀mê mmọ ẹdot’ ndikama ifetutom ke esop?
14 Mbiowo, mbọk ẹkụt ẹte ke imọnọ nditọete irenowo emi ẹdide n̄kparawa emi ẹdomode ‘ndifehe n̄kpọn̄ mme udọn̄ ini uyen’ ẹnyụn̄ ẹbịnede “edinen ido, mbuọtidem, ima, ye emem,” ye nti edu eken, utom ẹnam. (2 Tim. 2:22) Edieke ẹnọde mmọ n̄kpọ ẹnam ke esop, ẹkeme ndida oro ‘ndomo mmọ nse m̀mê mmọ ẹdot’ ndikama ifetutom, man “kpukpru owo ẹkpekụt n̄kọri” mmọ.—1 Tim. 3:10; 4:15.
Nte Ekemede Ndiwụt ke Amada N̄kpọ ke Akpan N̄kpọ ke Esop ye ke Ubon
15. Nte 1 Timothy 5:1, 2 ọdọhọde, didie ke nte idade mbon en̄wen ekeme ndiwụt m̀mê imada n̄kpọ ke akpan n̄kpọ?
15 Ndida n̄kpọ ke akpan n̄kpọ abuana ndinọ nditọete nnyịn irenowo ye iban uku. Paul ama owụt ke item oro enye ọkọnọde Timothy, nte ke oyom ẹnọ mbon en̄wen ukpono. (Kot 1 Timothy 5:1, 2.) Emi enen̄ede edi ntre akpan akpan ke ini inamde n̄kpọ ye mbon isio uduot. Enen̄ede odot ikpebe uwụtn̄kpọ Job ke nte enye ọkọnọde iban uku, akpan akpan n̄wan esie. Enye ama enen̄ede esịn ukeme mbak editịn̄ enyịn ke idem n̄wan en̄wen. (Job 31:1) Edieke idade nditọete nnyịn irenowo ye iban ke n̄kpọ, nnyịn idimaha mmọ mfụmmfụm ima m̀mê ndinam n̄kpọ ekededi oro akpanamde mmọ ẹfefehe nnyịn. Enen̄ede oyom inọ mbon en̄wen uku ke ini owo iba ẹyomde ima ye kiet eken man ẹdọ ndọ. Eyenete emi adade n̄kpọ ke akpan n̄kpọ ididehedei ida uyom ima owo isio uduot inam mbubru.—N̄ke 12:22.
16. Tịn̄ ukpụhọde oro odude ke nte ererimbot esede ebe ye ete ye nte Bible etịn̄de utom esie.
16 Oyom itịn̄ enyịn n̄ko ida utom oro Abasi ọnọde nnyịn ke ubon ke akpan n̄kpọ. Ererimbot Satan ada utom ebe ye eke ete anam n̄kpọ nsahi. Enenem mme ndutịm unọ idem inemesịt ndinam etie nte n̄kukụre n̄kpọ oro ibuot ufọk odotde ndibọ ẹdi nsahi ye emiom. Edi N̄wed Abasi ọnọ ebe akwa mbiomo, ete ke enye edi “ibuot ọnọ n̄wan esie.”—Eph. 5:23; 1 Cor. 11:3.
17. Tịn̄ nte nnyịn nditiene mbuana ke utuakibuot ubon ekemede ndiwụt ke nnyịn imada utom nnyịn ke akpan n̄kpọ.
17 Ebe ekeme ndinọ ubon esie n̄kpọ obụkidem. Edi edieke enye mînọhọ mmọ ndausụn̄ eke spirit, oro ọkpọwọrọ ke enye inyeneke mbufiọk ye ọniọn̄. (Deut. 6:6, 7) Ke ntem, 1 Timothy 3:4 ọdọhọ ke edieke afo edide ibuot ufọk onyụn̄ anyanarede ebịne mme ifetutom en̄wen ke esop, ke ana afo edi owo emi “akamade mbonufọk esie ke eti usụn̄, emi enyenede nditọ eke ẹsụkde ibuot ẹnyụn̄ ẹdade n̄kpọ ke akpan n̄kpọ.” Ke afan̄ emi, bụp idemfo ete, ‘Ndi mmesisio ini nnịm kpukpru ini nnọ utuakibuot ubon ke ufọk mi?’ Ekpere ndidi ndusụk iban Christian ẹsikpekpe mme ebe mmọ ubọk ẹte ẹda usụn̄ ke n̄kpọ eke spirit. Ebe kiet kiet ekpenyene ndinen̄ede ndụn̄ọde nte enye ke idem esiemmọ adade utom emi. Edi akpanikọ, n̄wan Christian ekpenyene ndinọ ndutịm mbubreyo Utuakibuot Ubon ibetedem onyụn̄ ebere ye ebe esie man ẹkụt unen.
18. Didie ke nditọwọn̄ ẹkeme ndikpep ndida n̄kpọ ke akpan n̄kpọ?
18 Ẹsịn udọn̄ ẹnọ nditọwọn̄ n̄ko ẹtiene ẹda uwem ke akpan n̄kpọ. (Eccl. 12:1) Idiọkke edieke nditọwọn̄ ẹkpepde ndisịn ifịk nnam utom, nnam utom esịtufọk oro mmọ ẹkemede ndinam ke idaha isua emana mmọ. (Eseme 3:27) Edidem David ama ekpep ndidi eti ekpemerọn̄ ke ini emi enye ekedide eyenọwọn̄. Enye ama ekpep n̄ko ndikwọ nnyụn̄ n̄wed ikwọ—kpa mme usọ oro ẹkenamde enye asan̄a utom ọnọ edidem Israel. (1 Sam. 16:11, 12, 18-21) Eyịghe idụhe ke David ama ọfiọk ndibre mbre ke ini ekedide eyenọwọn̄, edi enye ama ekpep nti usọ n̄ko emi enye akadade otoro Jehovah nte ini akakade. Mme usọ oro enye ekenyenede nte ekpemerọn̄ ẹma ẹnam enye ada ime akara idụt Israel. Mbufo nditọwọn̄, usọ ifan̄ ke mbufo ẹkpep—emi ẹdin̄wamde mbufo ẹnam n̄kpọ Andibot mbufo ẹnyụn̄ ẹtịm mbufo idem ẹnọ se ẹdinamde ke ini iso?
Nyene Eti Ibuot
19, 20. Nso edu oro owụtde eti ibuot ke afo ebiere ndika iso nda nse idemfo ye utuakibuot fo?
19 Kpukpru nnyịn imekeme ndidomo ndinyene eti ibuot ke nte isede idem nnyịn—idaha idem nnyịn ke akpan n̄kpọ ikaha. Nnyịn iyomke ‘ndida idem ke edinen owo n̄kaha.’ (Eccl. 7:16) Ndida eti ibuot nnam n̄kpọ ekeme ndinam n̄kpọ ọfọn ke ini ibuot oyon̄de owo, edide ke ufọk, ke itieutom, m̀mê ke ini inamde n̄kpọ ye nditọete nnyịn iren ye iban. Oyom mbonubon ẹkpeme mbak ẹdida edikụt ndudue n̄kaha mbiat emem oro okpodude ke ufọk. Ke esop, kpukpru owo ẹkeme ndikpep ndisak imam nnyụn̄ n̄kop inem kiet eken, ẹneme nneme ẹnyụn̄ ẹkpep n̄kpọ ke usụn̄ oro ọbọpde-bọp onyụn̄ ọfọnde.—2 Cor. 13:10; Eph. 4:29.
20 Nnyịn idu uwem ke ererimbot oro mîdaha Jehovah m̀mê mme ibet esie ke akpan n̄kpọ. Edi ikọt Jehovah ẹda edikop uyo nnọ nnyụn̄ nsọn̄ọ nda ye Abasi mmọ nte ata akpan n̄kpọ. Enem didie ntem ndidi ubak akwa esop mbon oro ẹtuakde ibuot ẹnọ Jehovah “ẹnyụn̄ ẹdade n̄kpọ ke akpan n̄kpọ”! Nnyịn ikpakam ibiere ndika iso nda uwem ye utuakibuot nnyịn ke akpan n̄kpọ.
Didie ke Afo Ọkpọbọrọ?
• Ntak emi nnyịn ikpọbiọn̄ọde edu edida uwem didie didie ke ererimbot emi?
• Didie ke ikeme ndikop idatesịt nnyụn̄ nda utom ukwọrọikọ nnyịn ke akpan n̄kpọ?
• Didie ke nte nnyịn isede edibọ ifetutom owụt m̀mê nnyịn imada n̄kpọ ke akpan n̄kpọ m̀mê idaha?
• Tịn̄ ntak emi edinọ nditọete ye mbonubon nnyịn uku edide ata akpan n̄kpọ.
[Mme Mbụme Ukpepn̄kpọ]
[Mme Ndise ke page 12]
Ana ebe ọnọ ubon esie mme n̄kpọ obụkidem ye eke spirit