Nte Ẹkemede Ndika Iso Nnam Akpanikọ ke Ererimbot Unana Edinam Akpanikọ

UNANA edinam akpanikọ ọyọyọhọ kpukpru ebiet nte ofụm emi isin̄wekde. Mme owo ẹsisu nsu, ẹtụk owo, ẹyịp inọ, imaha ndikpe isọn, ẹnyụn̄ ẹnam inua ẹban̄a n̄wo oro mmọ ẹdiade. Sia idụn̄de ke otu mmọ, imesisobo mme idaha oro ẹnamde ọsọn̄ nnyịn ndinam akpanikọ. Didie ke ikeme ndika iso n̄kan udọn̄ editre ndinam akpanikọ? Yak ineme akpan n̄kpọ ita oro ẹdin̄wamde nnyịn inam ntre. Mmọ ẹdi mbak Jehovah, eti ubieresịt, ye ediyụhọ ye se inyenede.

Ata Mbak Jehovah

Prọfet Isaiah ekewet ete: “Jehovah edi Ebiereikpe nnyịn, Jehovah edi Owụk-ewụhọ nnyịn, Jehovah edi Edidem nnyịn.” (Isa. 33:22) Ndifiọk idaha Jehovah esinam owo enyene mbak Abasi—kpa se isinamde owo akan udọn̄ editre ndinam akpanikọ. Mme N̄ke 16:6 ọdọhọ ete: “Ndibak Jehovah anam owo ọwọn̄ọde ọkpọn̄ idiọk.” Mbak emi idịghe owo ndifehe Abasi sia enye ekemede ndinọ nnyịn utịp idiọkido nnyịn, edi edi ata udọn̄ oro inyenede nditre ndinam se mînemke Ete nnyịn eke heaven, emi enen̄erede oyom ufọn nnyịn, esịt.—1 Pet. 3:12.

Odu n̄kpọntịbe kiet emi owụtde ufọn edinyene utọ mbak oro. Ricardo ye Fernanda n̄wan esie ẹma ẹkesio dollar U.S. ikie itiaba ke itie unịm okụk mmọ. * Fernanda ikabatke okụk emi edi ama emen ntre esịn ke ekpat. Ke ini mmọ ẹkesịmde ufọk ke ẹma ẹkesio okụk oro ẹkpe ke ndusụk n̄kpọ, mmọ ẹma ẹkụt okụk emi ayakde esisịt ndiwak nte se mmọ ẹkesiode ke itie unịm okụk ke ekpatubọk Fernanda. Mmọ ẹma ẹkere ke ekeme ndidi ‘n̄wan emi ọkọnọde mmimọ okụk ke itie unịm okụk ama ọnọ awak akan se ikoyomde.’ Akpa, mmọ ẹma ẹkere ndida okụk oro sia mmọ ẹkesụk ẹnyenyene ediwak n̄kpọ ndisio enye n̄kpe. Ricardo ọdọhọ ete: “Ima iben̄e Jehovah ọnọ nnyịn ukeme ndida okụk oro n̄kayak. Se ikanamde iyom ndida okụk oro n̄kayak ekedi man idat Jehovah esịt nte ẹdọhọde ke Mme N̄ke 27:11.”

Ubieresịt Oro Bible Ọnọde Ukpep

Edikpep Bible nnyụn̄ ndomo ndinam se ikpepde ekeme ndinọ ubieresịt nnyịn ukpep. Ima inam emi, ‘Ikọ Abasi emi enyenede uwem onyụn̄ enyenede odudu’ eyesịm esịt ye ekikere nnyịn. Emi ayanam nnyịn “[inam] akpanikọ ke kpukpru n̄kpọ.”—Heb. 4:12; 13:18.

Kere ban̄a se iketịbede inọ João. Enye ama akama owo dollar U.S. tọsịn ition. Ekem enye ọwọrọ aka ebiet en̄wen ikpehe isọn oro. Ke isua itiaita ẹbede, João ama ekpep akpanikọ, ndien ubieresịt esie emi Bible ọnọde ukpep ama anam enye aka okosio isọn̄ oro! Sia João mîkenen̄ekede inyene okụk, onyụn̄ esede aban̄a n̄wan esie ye nditọ mmọ inan̄, andinyene okụk oro ama enyịme enye esikpe okụk oro nsịtnsịt kpukpru ọfiọn̄.

Ediyụhọ ye Se Inyenede

Apostle Paul ekewet ete: “Uten̄e Abasi emi edi usụn̄ akwa udori ke ini asan̄ade ye ediyụhọ ye se owo enyenede. . . . Ke inyenede se idiade ye se isịnede ye itie udakibuot, nnyịn iyoyụhọ ye mme n̄kpọ emi.” (1 Tim. 6:6-8) Ndikere mban̄a oro ayanam ifep afia idiọkitọn̄,  mbubehe emi etiede eyịghe eyịghe, m̀mê ndutịm emi ẹnamde man owo oforo ata usọp usọp. (N̄ke 28:20) Ima inam n̄ko item Paul oro, iyebem iso iyom Obio Ubọn̄ Abasi inyụn̄ idori enyịn ke iyenyene se idade idu uwem.—Matt. 6:25-34.

Edi sia ‘inyene enyenede odudu ndibian̄a owo,’ ikpanaha ikere ke tutu amama idiọkitọn̄ ye edisịn esịt ke n̄kpọ owo idikanke nnyịn ubọk. (Matt. 13:22) Ti se iketịbede inọ Achan. Enye ama odu ke ini ẹkenamde nditọ Israel ẹbe Akpa Jordan ke utịbe utịbe usụn̄. Kpa ye oro, idiọkitọn̄ ama akan enye ubọk onyụn̄ anam enye ekeyịp ndusụk silver, gold, ye ọsọn̄urua edisịnen̄kpọ ke otu mbụme Jericho. Emi ama ada enye ibuot. (Josh. 7:1, 20-26) Ntak edi oro Jesus okodụride mme owo utọn̄ ke ediwak isua ikie ẹma ẹkebe ete: “Ẹtịn̄ enyịn ẹkpeme idem ke kpukpru orụk edisịn esịt ke n̄kpọ owo.”—Luke 12:15.

Nam Akpanikọ ke Itieutom

Yak ineme ndusụk n̄kpọ emi ẹkemede ndinam ọsọn̄ nnyịn ndinam akpanikọ ke kpukpru n̄kpọ. Ndinam akpanikọ ke itieutom esịne “nditre ndiyịp n̄kpọ”—idem ọkpọkọm mme owo ẹsiwak ndinam ntre. (Titus 2:9, 10) Jurandir emi anamde utom ukara ama esinam akpanikọ ke ini ewetde okụk emi enye akabiatde ke ini akade isan̄. Edi mme nsan̄autom esie ẹma ẹsiwet okụk awak akan se mmọ ẹkebiatde. Mmọ ẹkenam emi sia esenyịn itie emi mmọ ẹkenamde utom ama esiyak mmọ ẹnam ntre. Esenyịn oro ama ọsọn̄ọ asua ọnọ Jurandir ke ndisiwet nnennen ibat okụk emi enye abiatde, onyụn̄ etre enye ndisika isan̄ mbubehe utom mmọ. Edi nte ini akakade, ẹma ẹdụn̄ọde okụk emi ẹsibiatde, ẹnyụn̄ ẹtoro Jurandir ke ndisinam akpanikọ. Ẹma ẹnọ enye akamba itie n̄ko.

Eteufọk André ama ọdọhọ André esibọ mbonurua mmọ okụk awak utịm ikaba akan nte ekpedide, ke se ededi emi mmọ ẹdepde. Eyenete nnyịn ama eben̄e Jehovah uko man anam se Bible ọdọhọde. (Ps. 145:18-20) Enye ama odomo nditịn̄ nnọ eteutom esie ntak emi imọ mîdikemeke ndinam oro—edi ufọn ikodụhe. Ntre André ama ọkpọn̄ utom oro ẹkesikpede enye ediwak okụk do. Edi ke n̄kpọ nte isua kiet ebede, akani eteufọk esie oro ama ọdọhọ enye afiak editọn̄ọ utom, ke mmimọ idiaha aba mbonurua mmimọ. Ẹma ẹmek André ndise mban̄a mbubehe oro.

Sio Isọn

Apostle Paul ọkọnọ mme Christian item ete: “Mbufo ẹkûkama owo ekededi isọn ndomokiet.” (Rome 13:8) Nnyịn imekeme  ndikere ke ufọn idụhe ndisio isọn nnyịn koro ikerede ke enyene okụk oro enyene n̄kpọ, ke enye iyomke aba okụk oro. Edi Bible ọdọhọ ke “Idiọkowo ọbọbuọt edi isioho.”—Ps. 37:21.

Nso ke ikpanam edieke “n̄kpọntịbe unana idotenyịn” anamde nnyịn ikûkeme ndisio isọn nnyịn? (Eccl. 9:11) Francisco ama ọbuọt Alfredo okụk emi awakde esịm dollar U.S. tọsịn itiaba man ada osio isọn esie. Edi ke ntak emi mbubehe esie mîkọfọnke, Francisco ikekemeke ndikpe ebuọt oro ke usenọfiọn̄ emi ẹkedoride. Enye ama aka ebịne Alfredo ekeneme n̄kpọ emi, ndien Alfredo ama enyịme enye ekpe nsịtnsịt.

Kûnam nte Idi Owo Emi Mûdịghe

Ti idiọk uwụtn̄kpọ n̄wan ye ebe oro, Ananias ye Sapphira, ke esop Christian akpa isua ikie. Mmọ ẹma ẹnyam in̄wan̄ mmọ ẹda ubak okụk ẹdisọk mme apostle, edi ẹnam nte ke kpukpru ke ikada idi. Mmọ ẹkeyom ndinam mbon en̄wen ẹkere ke mmimọ imatat ubọk etieti. Edi edisana spirit Abasi ama anam apostle Peter ayarade abian̄a mmọ, ndien Jehovah ama amia mmọ owot.—Utom 5:1-11.

Edi mme andiwet Bible ẹma ẹnam akpanikọ ẹnyụn̄ ẹtie in̄wan̄-in̄wan̄, itiehe nte Ananias ye Sapphira. Moses ama ada esịt akpanikọ ewet ndudue esie emi akanamde enye okûdụk Isọn̄ Un̄wọn̄ọ. (Num. 20:7-13) Kpasụk ntre, Jonah ikedịpke ndudue oro enye akanamde mbemiso enye akade ọkọkwọrọ ikọ ye ke enye ama ọkọkwọrọ ikọ ọnọ mbon Nineveh ama. Utu ke ndidedịp, enye ama ewet mmọ enịm.—Jonah 1:1-3; 4:1-3.

Ke akpanikọ, oyom owo enyene uko man ekeme nditịn̄ akpanikọ idem ọkpọkọm oro edikpa enye n̄kpọ nte akakpade eyen isua 14 emi ekerede Nathalia, ke ufọkn̄wed. Enye ama odụn̄ọde udomo emi enye ekewetde onyụn̄ okụt ke ima ikpa n̄kpọ kiet emi andikpep mmọ mîkekwe. Kpa ye oro Nathalia ọkọfiọkde ke edieke imende n̄kpọ emi ikowụt andikpep ke ẹyesio n̄kpọ ke se imọ ikenyenede, enye ama emen aka. Enye ọkọdọhọ ete: “Ana nnam akpanikọ sia ete ye eka mi ẹsikpep mi ẹte nnam oro man nnem Jehovah esịt. Ubieresịt mi akpafịna mi edieke n̄kpetrede ndimen n̄kpọ oro n̄kowụt andikpep nnyịn.” Andikpep mmọ ama otoro Nathalia ke ndinam akpanikọ.

Edinam Akpanikọ—Edu Emi Ọnọde Jehovah Ukpono

Giselle, eyenan̄wan isua 17, ama okụt ekpri ekpatokụk emi esịnede mme akpan n̄wed ye dollar U.S. 35. Enye ama anam ndutịm man mme esenyịn ke ufọkn̄wed ẹda ekpat oro ẹsọk andinyene. Ke ọfiọn̄ kiet ebede, udiana etubom ufọkn̄wed ama okot leta emi otorode Giselle ke ndinam akpanikọ onyụn̄ ọkọmde ubon ye ido ukpono mmọ, ọnọ otu nditọ ufọkn̄wed mmọ. “Nti utom” esie ẹma ẹnọ Jehovah ubọn̄.—Matt. 5:14-16.

Enen̄ede oyom isịn ukeme man inam akpanikọ sia idụn̄ ke otu ‘mme ama idem, mme ama okụk, mbon n̄kohode idem, mbon iseri, ye ke otu mbon emi mînyeneke nsọn̄ọnda.’ (2 Tim. 3:2) Edi ata mbak Jehovah, ubieresịt oro Bible ọnọde ukpep, ye ediyụhọ ye se inyenede ẹyen̄wam nnyịn ika iso inam akpanikọ ke ererimbot unana edinam akpanikọ emi. Emi ayanam n̄ko inen̄ede idi ata ufan emi ikade-ka iso ikpere Jehovah, emi ‘edide edinen onyụn̄ amade ndinen edinam.’—Ps. 11:7.

[Ikọ Idakisọn̄]

[Mme Ndise ke page 7]

Ata mbak Jehovah anam ibiere ndika iso nnam akpanikọ

[Ndise ke page 8]

Edinam akpanikọ nnyịn esinọ Jehovah ubọn̄