Ọyọhọ Mbuọtidem ke Jehovah Anam Owo Enyene Uko

“Jehovah oyokop ke ini n̄kotde enye.”—PS. 4:3.

1, 2. (a) Nso afanikọn̄ ikesịm David? (b) Mme psalm ewe ke idineme?

EDIDEM DAVID amakara Israel ebịghi, edi idahaemi afanikọn̄ esịm enye. Absalom eyen esie odụk odu onyụn̄ enịm idem ke edidem, ndien idahaemi ana David efehe ọkpọn̄ Jerusalem. Akpan ufan esie n̄ko okpu enye, ndien idahaemi, enye ke asan̄a ukot ukpọk ye owo ifan̄ kpọt emi ẹdade ye enye, asan̄a atua ke Obot Olive. Akan oro, Shimei, emi otode ubon Edidem Saul, ke otop David ke itiat, owobi ntan otop onyụn̄ osụn̄i enye.—2 Sam. 15:30, 31; 16:5-14.

² Ndi afanikọn̄ emi ayanam David ofụhọ onyụn̄ akpa n̄kpa esuene? Idinamke, sia enye ọbuọt idem ke Jehovah. Psalm ọyọhọ 3 emi David ekewetde aban̄a itọk esie, owụt emi. Kpa enye ekewet Psalm ọyọhọ 4. Psalm mbiba emi ẹwụt mbuọtidem oro inyenede ke Abasi esikop onyụn̄ eyere akam. (Ps. 3:4; 4:3) Mmọ ẹwụt nnyịn ke Jehovah esidu ye mme anam-akpanikọ asan̄autom esie uwemeyo ye okoneyo, an̄wam mmọ, anam mmọ ẹdu ke emem, onyụn̄ ekpeme mmọ. (Ps. 3:5; 4:8) Mmọdo, ẹyak ineme mme psalm emi ise nte mmọ ẹnamde inyene uko inyụn̄ ibuọt idem ye Abasi.

Ke Ini ‘Ediwak Owo Ẹdahade Ẹda Ẹn̄wana ye Nnyịn’

3. Psalm 3:1, 2 owụt ke nso iketịbe inọ David?

³ Isụn̄utom kiet edi edidọhọ ete: “Esịt nditọ Israel amakabade etiene Absalom.” (2 Sam. 15:13) Sia idem akpade David nte Absalom asan̄ade eyịp esịt ediwak owo ntre, enye obụp ete: “O Jehovah, ntak emi mme asua mi ẹwakde? Ntak emi ediwak owo ẹdahade ẹda ẹn̄wana ye ami? Ediwak owo ke ẹdọhọ ẹban̄a ukpọn̄ mi ẹte: ‘Abasi inyan̄ake enye.’” (Ps. 3:1, 2) Ediwak nditọ Israel ẹkekere ke Jehovah idinyan̄ake David isio ke ubọk Absalom ye mbon emi ẹdade ye enye.

4, 5. (a) Nso ke David ekenịm ke eyetịbe? (b) Nso ke ikọ oro, “Enye emi emenerede ibuot mi ke enyọn̄,” owụt?

⁴ Edi David ikopke ndịk sia enye enen̄ede ọbuọt idem ke Abasi. Enye ọkwọ ete: “Ndien afo, O Jehovah, edi otuekọn̄ mi, ubọn̄ mi ye Enye emi emenerede ibuot mi ke enyọn̄.” (Ps. 3:3) David enịm ke Jehovah eyekpeme imọ ukem nte otuekọn̄ esikpemede owoekọn̄. Edidem emi ama ọkọsọn̄ mi ke ofụhọ n̄kpọ ke ibuot efehe onyụn̄ onụhọ ke ntak o-bụt. Edi Ata Edikon̄ ayanam enye David afiak enyene ubọn̄. Jehovah ayanam enye enen̄ede ada, afiak emenede ibuot ke enyọn̄ onyụn̄ ada nnennen. David eseme okot Abasi onyụn̄ enịm ke enye eyeyere imọ. Ndi afo emenyene utọ mbuọtidem oro ke Jehovah?

⁵ Ikọ David oro, “Enye emi emenerede ibuot mi ke enyọn̄,” owụt ke enye ama ọfiọk ke Jehovah edin̄wam imọ. Today’s English Version akabade Psalm 3:3 ntem: “Edi afo, O ỌBỌN̄, esikpeme mi kpukpru ini mbak n̄kpọndịk; afo ọnọ mi edikan onyụn̄ anam mi mfiak nnyene uko.” N̄wed ndụn̄ọde kiet etịn̄ ntem aban̄a ikọ oro, “Enye emi emenerede ibuot mi ke enyọn̄,” ete: “Ke ini Abasi emenerede  ‘ibuot’ . . . owo ke enyọn̄, Enye anam owo oro enyene idotenyịn ye uko.” Ndinam David efehe ọkpọn̄ ebekpo Israel odot ndinam idem emem enye. Edi ‘ndimenerede ibuot esie ke enyọn̄’ ayanam enye afiak enyene uko, etre ndikop ndịk, onyụn̄ enyene ọyọhọ mbuọtidem ke Abasi.

‘Jehovah Eyeyere!’

6. Ntak emi David ọkọdọhọde Jehovah etie ke edisana obot esie eyere akam imọ?

⁶ Sia David ọbuọtde idem ye Jehovah onyụn̄ enyenede uko, enye aka iso ọdọhọ ete: “Ami nyada uyo mi n̄kot Jehovah, ndien enye eyetie ke edisana obot esie eyere mi.” (Ps. 3:4) Ẹma ẹmen ekebe ediomi, emi owụtde ke Abasi odu ye mmọ, ẹka Obot Zion nte David ọkọdọhọde ẹnam. (Kot 2 Samuel 15:23-25.) Ntem, odot ke ini David ọbọn̄de akam eben̄e Jehovah etie ke edisana obot esie eyere imọ.

7. Ntak emi David mîkokopke ndịk-e?

⁷ David ikopke ndịk sia enịmde ke Abasi eyeyere akam oro ibọn̄de inọ enye. Utu ke ndikop ndịk, enye ọkwọ ete: “Ami nyosụhọde nna man nde idap; ndien nyedemede, koro Jehovah an̄wamde mi.” (Ps. 3:5) Idem ke okoneyo, emi ẹkemede ndinam owo ibak ke unana idotenyịn, David ikopke ndịk ndide idap. Enye enịm ke imọ iyedemede n̄kpọ inamke imọ, sia se iketịbede inọ enye ke ini edem anam enye enịm ke Abasi ayan̄wam imọ. Kpa ntre ke edidi ye nnyịn edieke ikade iso isan̄a “ke usụn̄ Jehovah” inyụn̄ idehedei ikpọn̄ Jehovah.—Kot 2 Samuel 22:21, 22.

8. Didie ke Psalm 27:1-4 owụt ke David ama ọbuọt idem ke Abasi?

⁸ Mme psalm en̄wen emi David ekewetde ẹwụt uko ye ọyọhọ mbuọtidem oro enye enyenede ke Abasi. Kiet esịne ikọ eke odudu spirit emi: “Jehovah edi un̄wana mi ye edinyan̄a mi. Anie ke ami ndifehe? Jehovah edi ọkpọsọn̄ ebiet ọnọ uwem mi. Anie ke ami ndibak? . . . Mbonekọn̄ ẹkpewụk tent ndin̄wana ye ami, esịt mi idifeheke ndịk. . . . N̄kpọ kiet ke ami mben̄e Jehovah—kpa oro ke ami nyom, ndidụn̄ ke ufọk Jehovah ke ofụri  eyouwem mi, man nse uyai Jehovah nnyụn̄ nse temple esie ye inemesịt.” (Ps. 27:1-4) Edieke enyịmede ye mme ikọ oro, idaha fo onyụn̄ ayak fi, ọwọrọ ke afo eyesisop idem kpukpru ini ye nditọete fo emi ẹtuakde ibuot ẹnọ Jehovah.—Heb. 10:23-25.

9, 10. Ntak emi afo ekemede ndidọhọ ke Psalm 3:6, 7 iwụtke ke David enyene edu usio owo usiene?

⁹ Kpa ye oro Absalom eyen David okodụkde odu aban̄a David, ata ediwak mbon en̄wen ẹnyụn̄ ẹdian̄arede ẹkpọn̄ enye, enye ọkwọ ete: “Ami ndifeheke mme tọsịn owo duop emi ẹtịmde idem ẹkan mi ẹkụk ndin̄wana ye ami. Daha ke enyọn̄, O Jehovah! Nyan̄a mi, O Abasi mi! Koro afo eyeyịbi kpukpru mme asua mi mban̄. Afo oyosion̄o mme idiọkowo edet.”—Ps. 3:6, 7.

¹⁰ David inyeneke edu usio owo usiene. Abasi ‘ekpeyịbi mme asua esie ke mban̄,’ edieke akpanade ẹyịbi. Edidem David ama osion̄o Ibet ewet ke idemesie onyụn̄ ọfiọk ke Jehovah ọdọhọ do ete: “Usiene ye ufen ẹnyene mi.” (Deut. 17:14, 15, 18; 32:35) Enye okonyụn̄ ayak ọnọ Abasi ete ‘osion̄o mme idiọkowo edet.’ Ndision̄o mmọ edet ọwọrọ ndibọ mmọ odudu man ẹkûkeme ndinam ibak. Jehovah ọfiọk mmọ eke ẹdide mme idiọkowo koro enye “ese esịt.” (1 Sam. 16:7) Esịt enem nnyịn didie ntem sia Abasi anamde nnyịn inyene mbuọtidem ye ukeme ndida n̄kan Satan emi edide etubom idiọkido! Ndien ẹmọn̄ ẹmụm enye ẹsịn ke editụn̄ọ ukpe nte idiọk ekpe emi mînyeneke edet, emi odotde n̄kpa!—1 Pet. 5:8, 9; Edi. 20:1, 2, 7-10.

“Edinyan̄a Enyene Jehovah”

11. Ntak emi ikpesisịnde nditọete nnyịn ke akam-a?

¹¹ David ọfiọk ke Jehovah ikpọn̄ ekeme ndinọ edinyan̄a oro imọ inen̄erede iyom. Edi andiwet psalm emi ikereke iban̄a idemesie kpọt. Nso kaban̄a ofụri ikọt Jehovah? David ama ada psalm emi Abasi ọkọnọde enye odudu spirit ada ewet mi ekeberi nte odotde ete: “Edinyan̄a enyene Jehovah. Edidiọn̄ fo omodoro ikọt fo ke idem.” (Ps. 3:8) Edi akpanikọ ke David ama enyene ata ikpọ mfịna, edi enye ekere aban̄a ofụri ikọt Jehovah onyụn̄ enen̄ede enịm ke Abasi ọyọdiọn̄ mmọ. Ndi nnyịn ikpetieneke ikere iban̄a nditọete nnyịn? Yak isisịn mmọ ke akam nnyịn, iben̄e Jehovah ọnọ mmọ edisana spirit esie man mmọ ẹnyene uko ẹkûnyụn̄ ẹkop ndịk ndikwọrọ eti mbụk.—Eph. 6:17-20.

12, 13. Nso iketịbe inọ Absalom, ndien David akanam n̄kpọ didie?

¹² Absalom akakpa n̄kpa esuene—emi edi uwụtn̄kpọ ọnọ mbon emi ẹnamde mbon en̄wen idiọk, akpan akpan mbon emi Abasi eyetde aran, nte David. (Kot Mme N̄ke 3:31-35.) Ekọn̄ asiaha ẹnyụn̄ ẹkan mbonekọn̄ Absalom. Nte Absalom awatde ke mule efehe, anyan idet esie ama awan̄a ke n̄kọk akamba eto kiet emi ekekperede isọn̄. Enye ama ọkọn̄ọ do—ikpaha inyụn̄ ikemeke ndinyan̄a idem—tutu Joab edi edida eduat ita ekịm enye ke esịt owot.—2 Sam. 18:6-17.

¹³ Ndi David okop inemesịt ke ini okopde se iwọrọde eyen esie? Ikopke. Utu ke oro, enye ama asan̄a mfụhọ mfụhọ aka iso ye edem, eseme, onyụn̄ atua ete: “Eyen mi Absalom, eyen mi, eyen mi Absalom! Akpakam edi ami n̄kakpa utu ke afo, O Absalom eyen mi, eyen mi!” (2 Sam. 18:24-33) Joab kpọt ekekeme nditịn̄ ikọ ndọn̄ David esịt ke ini utọ mfụhọ emi. Nso enyene-ndịk n̄kpọ ikọwọrọ Absalom ntem, ke ntak emi ọkpọsọn̄ uyom akwa n̄kpọ akanamde enye an̄wana ye ete esie—emi Jehovah ekeyetde aran—onyụn̄ esịn edịm ọbọn̄ idem!—2 Sam. 19:1-8; N̄ke 12:21; 24:21, 22.

David Afiak Owụt ke Imọbuọt Idem ye Jehovah

14. Nso ke ẹkeme nditịn̄ mban̄a se ikanamde ẹwet Psalm ọyọhọ 4?

¹⁴ Ukem nte Psalm ọyọhọ 3, ọyọhọ 4 edi akam ofụri esịt emi David ọkọbọn̄de, emi owụtde ke enye enyene ọyọhọ mbuọtidem ke Jehovah. (Ps. 3:4; 4:3) Etie nte David ekewet Psalm emi ada ọkọm Abasi ke odu emi Absalom  okodụkde ama okokpu. Mîdịghe edi ke enye ekewet aban̄a mme Levi emi ẹkesikwọde ikwọ. M̀mê ntre-e, ndikere mban̄a psalm emi ekeme ndinam nnyịn inen̄ede ibuọt idem ye Jehovah.

15. Ntak emi ikemede ndibọn̄ akam ke mbuọtidem nnọ Jehovah ke enyịn̄ Eyen esie?

¹⁵ David afiak owụt ke imọbuọt idem ke Abasi inyụn̄ inen̄ede inịm ke enye eyeyere akam imọ. Enye ọkwọ ete: “O edinen Abasi mi, yere mi ke ini n̄kotde fi. Nam akwa ufan̄ nọ mi ke ini nnanenyịn. Tua mi mbọm nyụn̄ kop akam mi.” (Ps. 4:1) Nnyịn iyenyene ukem mbuọtidem oro edieke inamde se inende. Sia ifiọkde ke Jehovah, kpa “edinen Abasi,” esidiọn̄ mbon emi ẹnamde edinen ido, imekeme ndibọn̄ akam nnọ enye ebe ke Eyen esie ke ntak mbuọtidem emi inyenede ke uwa ufak Jesus. (John 3:16, 36) Emi esinọ nnyịn ata emem!

16. Ntak emi etiede nte idem ama emem David?

¹⁶ Ndusụk ini imekeme ndidu ke idiọk idaha emi anamde idem emem nnyịn. Etie nte idem ama emem David ke ibio ini, sia enye ọkwọ ete: “Mbufo nditọ owo, adan̄a didie ke ubọn̄ mi edidi n̄kpọ usọn̄enyịn, ke adan̄aemi mbufo ẹsụk ẹmade mme ikpîkpu n̄kpọ, ke adan̄aemi mbufo ẹsụk ẹdụn̄ọrede ẹyom nsu?” (Ps. 4:2) Etie nte ikọ oro, “nditọ owo,” ada aban̄a mbon emi mîdụhe eti uwem. Mme asua David ‘ẹkema mme ikpîkpu n̄kpọ.’ New International Version akabade itien̄wed oro ntem: “Adan̄a didie ke mbufo ẹdima nsu ẹnyụn̄ ẹyom mme nsunsu abasi?” Idem edieke se mme owo ẹnamde anamde idem emem nnyịn, ẹyak ika iso ibọn̄ akam ke ofụri esịt inyụn̄ iwụt ke imenyene ọyọhọ mbuọtidem ke ata Abasi kierakiet.

17. Tịn̄ nte ikemede ndinam se ẹtịn̄de ke Psalm 4:3.

¹⁷ Ikọ emi owụt ke David ama enyene mbuọtidem ke Abasi: “Ntre ẹfiọk ẹte ke Jehovah ayadian̄ade owo emi ọsọn̄ọde ada ye enye enịm; Jehovah oyokop ke ini n̄kotde enye.” (Ps. 4:3) Oyom inyene uko ye ọyọhọ mbuọtidem ke Jehovah man ika iso isọn̄ọ ida ye enye. Ke uwụtn̄kpọ, esiyom mme Christian ẹnyene mme edu emi ke ini ẹsiode iman mmọ emi mîkabakede esịt ẹfep ke esop. Abasi esidiọn̄ mbon emi ẹsọn̄ọde ẹda ye enye ẹnyụn̄ ẹtienede usụn̄ esie. Ndien nsọn̄ọnda ye ọyọhọ mbuọtidem ke Jehovah anam ikọt esie ẹkop idatesịt.—Ps. 84:11, 12.

18. Nte Psalm 4:4 ọdọhọde, nso ke ikpanam edieke ẹtịn̄de m̀mê ẹnamde n̄kpọ ye nnyịn idiọk idiọk?

¹⁸ Nso ke ikpanam edieke owo etịn̄de m̀mê anamde se iyatde nnyịn esịt? Iyaka iso ikop idatesịt edieke inamde se David etịn̄de emi: “Ẹyat esịt, edi ẹkûnam idiọkn̄kpọ. Ẹna ke bed mbufo ẹneme ke esịt mbufo, ẹnyụn̄ ẹdop uyo.” (Ps. 4:4) Yak nnyịn ikûnam idiọkn̄kpọ ke ndisio usiene edieke ẹtịn̄de m̀mê ẹnamde n̄kpọ ye nnyịn idiọk idiọk. (Rome 12:17-19) Imekeme ndina ke bed nnyịn mbọn̄ akam ke esịt mban̄a n̄kpọ emi. Edieke ibọn̄de akam iban̄a emi, imekeme ndikụt n̄kpọ emi ke usụn̄ en̄wen inyụn̄ inyịme ndifen ke ntak ima. (1 Pet. 4:8) Enen̄ede ọfọn ikere iban̄a item apostle Paul emi, oro etiede nte ada oto Psalm 4:4: “Ẹyat esịt, edi ẹkûnam idiọkn̄kpọ; ẹkûyak utịn osụhọde edisịm iyatesịt mbufo, ẹkûnyụn̄ ẹyak ufan̄ ẹnọ Devil.”—Eph. 4:26, 27.

19. Didie ke Psalm 4:5 ekeme ndin̄wam nnyịn ke ndamban̄a uwa oro iwade inọ Abasi?

¹⁹ Man enen̄ede owụt ufọn edibuọt idem ke Abasi, David ọkwọ ete: “Ẹwa mme uwa edinen  ido, ẹnyụn̄ ẹbuọt idem ye Jehovah.” (Ps. 4:5) Abasi ekesibọ mme uwa nditọ Israel ke ini mmọ ẹwade enye ye eti esịt. (Isa. 1:11-17) Edieke iyomde Abasi ọbọ ndamban̄a uwa oro iwade inọ enye, ana nnyịn n̄ko inyene eti esịt ye ọyọhọ mbuọtidem ke Abasi.—Kot Mme N̄ke 3:5, 6; Mme Hebrew 13:15, 16.

20. ‘Un̄wana iso Jehovah’ ada aban̄a nso?

²⁰ David aka iso ete: “Ediwak owo ẹdọhọ ẹte: ‘Anie ediwụt nnyịn se ifọnde?’ O Jehovah, nam un̄wana iso fo ayama ọnọ nnyịn.” (Ps. 4:6) ‘Un̄wana iso Jehovah’ ada aban̄a mfọn Abasi. (Ps. 89:15) Ntem, ke ini David ọbọn̄de akam ete: “Nam un̄wana iso fo ayama ọnọ nnyịn,” enye ọkọdọhọ ‘fọn nnyịn mfọn.’ Sia nnyịn ibuọtde idem ke Jehovah, imenyene mfọn esie inyụn̄ ikop akwa idatesịt nte inamde uduak esie uko uko.

21. Nso ke ẹn̄wọn̄ọ ẹnọ nnyịn edieke inen̄erede isịn idem inam utom idọk eke spirit idahaemi?

²¹ Sia David odoride enyịn ke idatesịt emi Abasi ọnọde, emi okponde akan eke ini idọk, enye ọkwọ ọnọ Jehovah ete: “Afo ọyọnọ mi idatesịt okpon akan ini emi wheat mmọ ye obufa wine mmọ ẹwakde.” (Ps. 4:7) Imekeme ndinen̄ede nnịm ke iyokop ata idatesịt edieke inen̄erede isịn idem ke utom idọk eke spirit oro ẹnamde idahaemi. (Luke 10:2) Sia ‘idụt’ mbon emi ẹyetde aran ẹdade usụn̄, nnyịn imokop idatesịt ndikụt nte ibat ‘mbon emi ẹnamde utom ukwọrọikọ’ akade-ka iso ọkọri. (Isa. 9:3) Ndi afo emenen̄ede esịn idem ke utom ukwọrọikọ emi ọnọde owo idatesịt mi?

Ẹsan̄a Uko Uko Ẹnyene Ọyọhọ Mbuọtidem ke Abasi

22. Nte Psalm 4:8 ọdọhọde, n̄kpọ eketie didie ye nditọ Israel ke ini mmọ ẹkenịmde Ibet Abasi?

²² David akada psalm emi ekeberi ke ndidọhọ: “Nyosụhọde nna nnyụn̄ nde idap ke emem, koro afo ikpọn̄, O Jehovah, anam mi ndụn̄ ke ifụre.” (Ps. 4:8) Nditọ Israel ẹma ẹsidu ke emem ye Jehovah ẹnyụn̄ ẹnyene ifụre ke ini mmọ ẹkenịmde Ibet esie. Ke uwụtn̄kpọ, ‘Judah ye Israel ẹma ẹdụn̄ ke ifụre’ ke ini ukara Solomon. (1 Ndi. 4:25) Mbon emi ẹkebuọtde idem ye Abasi ẹma ẹdu ke emem, idem ke adan̄aemi mme idụt oro ẹkekande mmọ ẹkụk ẹketiede ekọn̄ ekọn̄. Ukem nte David, nnyịn imeside idap ke emem sia Abasi ọnọde nnyịn ifụre.

23. Nso ke idinyene edieke inyenede ọyọhọ mbuọtidem ke Abasi?

²³ Ẹyak ika iso inam n̄kpọ Jehovah uko uko. Ẹyak ida mbuọtidem n̄ko ibọn̄ akam inyụn̄ inyene “emem Abasi emi akande kpukpru ekikere.” (Phil. 4:6, 7) Nso idatesịt ke oro edinọ nnyịn ntem! Ndien nnyịn idikopke ndịk iban̄a ini iso edieke ikade iso inyene ọyọhọ mbuọtidem ke Jehovah.

Didie ke Afo Ọkpọbọrọ?

• Mme afanikọn̄ ewe ke David okosobo ke ntak Absalom?

• Didie ke Psalm ọyọhọ 3 anam inyene uko?

• Didie ke Psalm ọyọhọ 4 ekeme ndinam inen̄ede inyene mbuọtidem ke Jehovah?

• Nso ke ọyọhọ mbuọtidem ke Jehovah ekeme ndinam nnyịn inyene?

[Mme Mbụme Ukpepn̄kpọ]

[Ndise ke page 29]

David ama ọbuọt idem ke Jehovah, idem ke ini ekefehede ke ntak Absalom

[Mme Ndise ke page 32]

Ndi afo emenyene ọyọhọ mbuọtidem ke Jehovah?