Anie Edi Akakan Owo ke Uwem Fo?

“Afo ikpọn̄ edi Ata Edikon̄ ke ofụri isọn̄.”—PS. 83:18.

1, 2. Ntak emi ndifiọk enyịn̄ Jehovah kpọt mîkemke edieke anade ẹnyan̄a nnyịn-e?

EKEME ndidi akpa ini oro okokụtde enyịn̄ Jehovah ekedi ke ini emi ẹkewụtde fi enyịn̄ oro ke Psalm 83:18. Anaedi idem ama akpa fi ndikot ikọ emi: “Man mme owo ẹkpefiọk ẹte ke afo, emi enyịn̄ fo edide Jehovah, afo ikpọn̄ edi Ata Edikon̄ ke ofụri isọn̄.” Etie nte ọtọn̄ọde ke ini oro, afo emesida itie Bible oro an̄wam mme owo ẹdiọn̄ọ edima Abasi nnyịn, Jehovah.—Rome 10:12, 13.

² Okposụkedi oro ọfọnde mme owo ẹfiọk enyịn̄ Jehovah, ndifiọk enyịn̄ oro kpọt ikemke. Se nte andiwet psalm oro owụtde akpan n̄kpọ efen emi oyomde man ẹnyan̄a nnyịn ke ini enye ọdọhọde ete: “Afo ikpọn̄ edi Ata Edikon̄ ke ofụri isọn̄.” Ke akpanikọ, Jehovah edi akakan Owo ke ofụri ekondo. Sia enye edide Andibot kpukpru n̄kpọ, enye enyene unen ndiyom kpukpru se enye obotde ẹsụk ibuot ẹnọ imọ. (Edi. 4:11) Do, odot ibụp idem nnyịn ite, ‘Anie edi akakan owo ke uwem mi?’ Ana itịn̄ enyịn idụn̄ọde ibọrọ mbụme oro!

Eneni Oro ke In̄wan̄ Eden

3, 4. Satan akanam didie ekeme ndibian̄a Eve, ndien nso ikedi utịp?

³ Mme n̄kpọ emi ẹketịbede ko ke In̄wan̄ Eden ẹnen̄ede ẹwụt ntak emi mbụme emi edide akpan mbụme. Ọsọn̄ibuot angel, emi ẹkedide ẹdidiọn̄ọ nte Satan kpa Devil, ama atap Eve do ete ada se idọn̄de enye nte ebeiso n̄kpọ akan ewụhọ oro Jehovah okowụkde mmọ ete ẹkûdia mfri eto kiet. (Gen. 2:17; 2 Cor. 11:3) Enye ama ọduọ ke idomo emi onyụn̄ owụt ke imọ ikponoke ukara Jehovah. Eve ikenyịmeke ke Jehovah edi akakan Owo ke uwem imọ. Edi Satan akanam didie ekeme ndibian̄a Eve?

⁴ Satan ama ada nsio nsio n̄kari eneme nneme ye Eve. (Kot Genesis 3:1-5.) Akpa, Satan ikasiakke ọkpọkpọ enyịn̄ Jehovah. Enye okonyụn̄ ọdọhọ “Abasi.” Edi andiwet Genesis, emi mîbietke Satan, ama asiak enyịn̄ Jehovah ke akpa ufan̄ikọ ke ọyọhọ ibuot ita oro. Ọyọhọ iba, utu ke Satan nditịn̄ mban̄a ‘ewụhọ’ Abasi, enye akakam obụp aban̄a se Abasi ‘ọkọdọhọde.’ (Gen. 2:16) Ekeme ndidi Satan akada n̄kari emi mbak ẹdida ewụhọ oro ke akpan n̄kpọ. Ọyọhọ ita, okposụkedi emi enye eketịn̄de ikọ ye Eve, enye ọkọdọhọ “mbufo” utu ke afo. Ke ndinam emi, etie nte enye okoyom Eve okụt idem, anam enye ekere ke imedi n̄kpọ—ke imọ ida ke ibuot imọ ye ke ibuot ebe imọ itịn̄ ikọ. Nso ikedi utịp? Etie nte Eve ama ọsọn̄ enyịn ebiere nditịn̄ ikọ ke ibuot mmọ mbiba, ọdọhọ urụkikọt ete: “Nnyịn imekeme ndidia mme mfri eto in̄wan̄ emi.”

5. (a) Satan akanam Eve owụk ekikere ke nso? (b) Eve okowụt nso ke enye ndikadia mfri oro ẹkekpande?

⁵ Satan iketịn̄ke n̄ko akpanikọ. Enye akanam etie nte ke ikenenke Abasi ndidọhọ Adam ye Eve “ẹkûdia kpukpru eto ke in̄wan̄” oro. N̄ko, Satan ama anam Eve ekere aban̄a idemesie ye se enye akadade nte edinam idaha esie amana ọfọn, ndikabade ntie “nte Abasi.” Ke akpatre, enye ama anam Eve owụk ekikere ke eto oro ye mfri esie utu ke ndikere mban̄a itie ebuana esie ye Enye emi ọkọnọde  enye kpukpru n̄kpọ. (Kot Genesis 3:6.) Edi Eve okowụt ke Jehovah idịghe akakan Owo ke uwem imọ ke enye ndikadia mfri oro.

Eneni Oro ke Eyo Job

6. Nso ke Satan ekeneni aban̄a nsọn̄ọnda Job, ndien nso ifet ke ẹkenọ Job?

⁶ Ke ediwak isua ikie ẹma ẹkebe, Job, eren oro akanamde akpanikọ, ama enyene ifet ndiwụt enye emi edide akakan Owo ke uwem esie. Ke ini Jehovah okobụpde Satan aban̄a nsọn̄ọnda Job, Satan ọkọbọrọ uyat uyat ete: “Nte Job abak Abasi ke ikpîkpu?” (Kot Job 1:7-10.) Satan ikenenike ke Job ikokopke uyo Abasi. Edi ekedemede eyịghe aban̄a se ikanamde Job okop uyo Abasi. Enye ama ada n̄kari odori Job ikọ ete ke enye anam n̄kpọ Jehovah ke ntak ufọn idemesie, idịghe sia amade Jehovah. Job ikpọn̄ ekekeme ndiwụt m̀mê ikọ oro edi akpanikọ m̀mê edi nsu, ndien ẹma ẹnọ enye ifet ndinam oro.

7, 8. Mme idomo ewe ke Job ekenyene ndiyọ, ndien enye ndisọn̄ọ nda nnam akpanikọ okowụt nso?

⁷ Jehovah ama ayak Satan ada ediwak afanikọn̄ etiene Job ke adiana ke adiana. (Job 1:12-19) Job akanam n̄kpọ didie ke idiọk idaha oro ẹkesịmde enye? Ẹdọhọ nnyịn ke enye “[ikanamke] idiọk inyụn̄ itịn̄ke se mîdotke idian Abasi.” (Job 1:22) Edi oro ikosụk ikụbike Satan inua. Enye ama adian n̄kpọ en̄wen ete: “Ikpa ke ibuot ikpa, ye kpukpru se owo enyenede ke enye edinọ ke ibuot ukpọn̄ esie.” * (Job 2:4) Satan ọkọdọhọ ke edieke ẹtụhọrede Job ke idemesie, ke enye oyowụt ke Jehovah idịghe akakan Owo ke uwem imọ.

⁸ Ata ndidien ndidien udọn̄ọ ama abiat Job uyai, ndien n̄wan esie ama ọdọhọ enye akan̄ Abasi onyụn̄ akpa. Ekem ufan abian̄a ita ẹma ẹdidori enye ikọ ẹte ke enye idụhe eti uwem. (Job 2:11-13; 8:2-6; 22:2, 3) Kpa ye ofụri ndutụhọ emi, Job iketreke ndisọn̄ọ nda. (Kot Job 2:9, 10.) Job ama owụt ke Jehovah edi akakan Owo ke uwem imọ ke ndisọn̄ọ nda nnam akpanikọ. Job ama owụt n̄ko ke anana-mfọnmma owo ekeme ndiwụt ke Devil edi osu nsu, okposụkedi emi owụtde ke ata ekpri n̄kpọ.—Men Mme N̄ke 27:11 domo.

Mfọnmma Ibọrọ Jesus

9. (a) Didie ke Satan akada se idọn̄de Jesus odomo enye? (b) Jesus akanam n̄kpọ didie aban̄a idomo emi?

⁹ Esisịt ini ke Jesus ama akana baptism, Satan ama odomo nditap enye ebịne se idọn̄de enye utu ke ndida Jehovah nte akakan Owo ke uwem esie. Devil ama odomo Jesus idomo ita. Akpa, enye ama ada biọn̄ oro ọkọdọn̄de Jesus odomo enye, ọdọhọ Jesus anam itiat  akabade uyo. (Matt. 4:2, 3) Ndondo oro ke Jesus okokụre nditie utreudia ke usen 40, ndien biọn̄ ama ọdọn̄ enye etieti. Ntem Devil ama akpak enye ete ada utịbe utịbe odudu esie anam n̄kpọ ke ufọn idemesie man etre biọn̄ oro ọkọdọn̄de enye. Nso ke Jesus akanam? Utu ke ndinam nte Eve, Jesus okowụk ekikere ke Ikọ Jehovah onyụn̄ ọsọsọp ebe idomo oro.—Kot Matthew 4:4.

10. Ntak emi Satan akamiade ata ye Jesus ete ọfrọ ke enyọn̄ ibibene temple ediduọ ke isọn̄?

¹⁰ Satan ama odomo ndinam Jesus anam n̄kpọ oyom ufọn idemesie. Enye ama amia ata ye Jesus ete ọfrọ ke enyọn̄ ibibene temple ediduọ ke isọn̄. (Matt. 4:5, 6) Nso ikedi uduak Satan? Enye ọkọdọhọ ke edieke Jesus mîdaha unan, ke emi oyowụt ke enye ekedi “eyen Abasi.” Ana in̄wan̄-in̄wan̄ ke Devil okoyom Jesus enen̄ede ekere aban̄a etop esie tutu enye ananam owụt nte iwọrọde etop. Satan ama ọfiọk ke owo ekeme ndinam ata ekededi oro ẹmiade ye enye ke ntak ntan̄idem ye ke ntak emi mîyomke ndidia bụt ke iso mbon en̄wen. Satan ama abuan n̄wed Abasi ke usụn̄ oro mîdotke, edi Jesus ama owụt ke imọ imetịm ifiọk Ikọ Jehovah. (Kot Matthew 4:7.) Jesus ama esịn ndinam ata oro onyụn̄ afiak owụt ke Jehovah edi akakan Owo ke uwem imọ.

11. Ntak emi Jesus ekesịnde kpukpru obio ubọn̄ ererimbot oro Devil ọkọnọde enye?

¹¹ Satan osio idomo en̄wen edi ke mbrenyịn, ọnọ Jesus kpukpru obio ubọn̄ ererimbot emi. (Matt. 4:8, 9) Jesus ọsọsọp esịn enọ oro. Enye ama ọfiọk ke imọ ndibọ enọ emi edi ukem ye ndisịn ukara Jehovah—kpa unen oro Abasi enyenede ndidi Andikon̄ N̄kan. (Kot Matthew 4:10.) Ke idomo kiet kiet, Jesus okokot itie N̄wed Abasi emi esịnede san̄asan̄a enyịn̄ Jehovah ada ọbọrọ Satan.

12. Nso ọkpọsọn̄ ubiere ke akana Jesus anam ke utịt utịt uwem esie mi ke isọn̄, ndien nso ke ikpep ito usụn̄ emi enye akanamde n̄kpọ aban̄a ubiere oro?

¹² Akana Jesus anam ata ọkpọsọn̄ ubiere nte enye ekekperede utịt uwem esie mi ke isọn̄. Ke ofụri ini utom ukwọrọikọ esie, enye ama esidọhọ ke imenyịme ndinọ uwem imọ  nte uwa. (Matt. 20:17-19, 28; Luke 12:50; John 16:28) Edi enye ama ọfiọk n̄ko ke ẹyedori imọ ikọ, ẹda ibet mme Jew ẹbiom imọ ikpe, ẹnyụn̄ ẹwot imọ nte owo emi osụn̄ide Abasi. Edikpa nte owo emi osụn̄ide Abasi mi ama etịmede enye esịt etieti. Enye ama ọbọn̄ akam ete: “Ete mi, edieke usụn̄ odude, yak cup emi ebe ọkpọn̄ mi.” Ekem enye adian do ete: “Edi, okûdi nte ami nduakde, edi yak edi nte afo aduakde.” (Matt. 26:39) Jesus ndikanam akpanikọ tutu esịm n̄kpa ama enen̄ede owụt enye emi edide akakan Owo ke uwem esie!

Nte Nnyịn Ibọrọde Mbụme Oro

13. Nso ye nso ke ikpep kan̄a ito uwụtn̄kpọ Eve, Job, ye Jesus Christ?

¹³ Nso ke nnyịn ikpep kan̄a ke emi? Imekpep ito Eve nte ke mbon oro ẹduọde ke afia udọn̄ idemmọ m̀mê udọn̄ edida idem ke n̄kpọ ẹwụt ke idịghe Jehovah edi akakan Owo ke uwem mmimọ. Edi Job ndikọsọn̄ọ nda ekpep nnyịn nte ke idem mme anana-mfọnmma owo ẹkeme ndiwụt ke mmimọ ida Jehovah nte akakan Owo ke ndiyọ afanikọn̄—idem ke ini mmimọ mîtịmke ifiọk se idade afanikọn̄ oro isọk mmimọ. (Jas. 5:11) Ke akpatre, uwụtn̄kpọ Jesus ekpep nnyịn ndibat bụt ke ekpri n̄kpọ nnyụn̄ ntre ndikere n̄kaha mban̄a etop oro idiwọrọde. (Heb. 12:2) Edi didie ke ikeme ndinam se ikpepde emi?

14, 15. Didie ke nte Jesus akanamde n̄kpọ aban̄a idomo okpụhọde ye nte Eve akanamde, ndien didie ke nnyịn ikeme ndikpebe Jesus? (Tịn̄ n̄kpọ ban̄a ndise oro odude ke page 18.)

¹⁴ Kûdedei uyak idomo anam fi efre Jehovah. Eve ama ayak ẹwọn̄ọde ntịn̄enyịn esie ẹsịn ke idomo oro akanade enye ke iso. Enye ama okụt nte mfri “oro ọfọnde ke udia onyụn̄ ọdọn̄de owo ndise onyụn̄ eyede ndikụt.” (Gen. 3:6) Nte Jesus akanamde n̄kpọ aban̄a idomo ita oro okokpụhọde didie ntem! Jesus ama okụt se ikande idomo oro onyụn̄ ekere aban̄a utịp edinam esie. Enye ekeberi edem ke Ikọ Abasi onyụn̄ okot enyịn̄ Jehovah.

¹⁵ Ke ini ẹdomode nnyịn mme idomo man inam se mînemke Jehovah esịt, nnyịn isiwụk ekikere nnyịn ke nso? Nte iwụkde ekikere ke idomo oro, ntre ke idiọk udọn̄ oro editetịm isọn̄ ubọk. (Jas. 1:14, 15) Oyom isọsọp isio idiọk udọn̄ oro ifep ke esịt, idem ekpedi oyom inam ọkpọsọn̄ n̄kpọ emi etiede nte edisịbe ndido idem nnyịn mfep. (Matt. 5:29, 30) Ukem nte Jesus, ana iwụk ekikere nnyịn ke utịp edinam nnyịn—nte mmọ ẹditụkde itie ebuana nnyịn ye Jehovah. Ana iti se Ikọ esie, kpa Bible, etịn̄de. Ntem ke idiwụt ke Jehovah edi akakan Owo ke uwem nnyịn.

16-18. (a) Nso ikeme ndinam esịt etịmede nnyịn? (b) Nso idin̄wam nnyịn iyọ nnanenyịn oro isobode?

¹⁶ Kûdedei uyak afanikọn̄ oro osobode anam fi ayat esịt ye Jehovah. (N̄ke 19:3) Nte idiọn̄de-diọn̄ isan̄a ikpere utịt idiọk ererimbot emi, ata ediwak ikọt Jehovah ke ẹsobo mme afanikọn̄ ye mme n̄kpọ mmọn̄eyet. Nnyịn idorike enyịn ke ẹyekpeme nnyịn ke utịbe utịbe usụn̄ idahaemi. Kpa ye oro, esịt ekeme nditịmede nnyịn ukem nte eketịmerede Job ke ini mme owo nnyịn ẹkpan̄ade m̀mê n̄kpọ ọsọn̄de ye nnyịn.

¹⁷ Job ikọdiọn̄ọke ntak emi Jehovah akayakde ndusụk n̄kpọ ẹtịbe, ndien ndusụk ini nnyịn ididiọn̄ọke ntak emi ndiọi n̄kpọ ẹtịbede. Ekeme ndidi imokop iban̄a nte unyekisọn̄, nte emi eketịbede ke Haiti, m̀mê mme oto-obot afanikọn̄ eken ẹkewotde mme anam-akpanikọ nditọete nnyịn. Mîdịghe ekeme ndidi imọdiọn̄ọ owo nsọn̄ọnda emi osobode afai m̀mê oro akakpade ke enyene-ndịk mbabuat n̄kpọntịbe. Mîdịghe nnyịn ke idem nnyịn imekeme ndidu ke nnanenyịn m̀mê ikere ke ẹnam n̄kpọ ye nnyịn ke ufịk. Imekeme nditịmede esịt mbụp ite: ‘Oh Jehovah, ntak emi utọ n̄kpọ emi ọwọrọde mi-e? Nso ke ndue?’ (Hab. 1:2, 3) Nso idin̄wam nnyịn iyọ ke utọ ini oro?

 ¹⁸ Ana inen̄ede ikpeme mbak idikere ke utọ n̄kpọ oro ndiwọrọ nnyịn owụt ke Jehovah imaha nnyịn aba. Jesus ama owụt emi ke ini enye eketịn̄de aban̄a n̄kpọ mmọn̄eyet iba oro ẹketịbede ke eyo esie. (Kot Luke 13:1-5.) “Ini ye n̄kpọntịbe unana idotenyịn” ẹsinam ediwak n̄kpọ mmọn̄eyet ẹsịm owo. (Eccl. 9:11) Edi inamke n̄kpọ m̀mê nso idi ntak nnanenyịn nnyịn, imekeme ndiyọ edieke iwụkde ntịn̄enyịn ke “Abasi kpukpru ndọn̄esịt.” Enye ọyọnọ nnyịn odudu ndika iso nnam akpanikọ.—2 Cor. 1:3-6.

19, 20. Nso ikan̄wam Jesus ọyọ mme n̄kpọ oro ẹnamde owo bụt, ndien nso ikeme ndin̄wam nnyịn iyọ n̄ko?

¹⁹ Kûdedei uyak ntan̄idem m̀mê edikop bụt edi ata akpan n̄kpọ ọnọ fi. Nsụhọdeidem Jesus akanam enye ‘asana kpukpru n̄kpọ ayak onyụn̄ emen mbiet ofụn esịne.’ (Phil. 2:5-8) Enye ama ọyọ ediwak n̄kpọ o-bụt ke ntak emi enye ekeberide edem ke Jehovah. (1 Pet. 2:23, 24) Ke ndinam ntem, Jesus akada uduak Jehovah nte ata akpa n̄kpọ, ndien emi ama anam ẹmenede enye ẹnịm ke itie emi okon̄de akan. (Phil. 2:9) Jesus ọkọdọhọ mme mbet esie ẹtiene ẹdu utọ uwem oro.—Matt. 23:11, 12; Luke 9:26.

²⁰ Ndusụk ini, mme idomo mbuọtidem nnyịn ẹkeme ndinam nnyịn bụt. Kpa ye oro, akpana inyene ukem mbuọtidem emi apostle Paul ekenyenede. Enye ọkọdọhọ ete: “Ntak emi esịn mi n̄kụt ndutụhọ emi, edi bụt inamke mi. Koro mmọfiọk enye emi nnịmde ke akpanikọ, mmonyụn̄ nnịm ke akpanikọ nte ke enye ekeme ndikpeme se n̄kayakde nsịn enye ke ubọk tutu esịm usen oro.”—2 Tim. 1:12.

21. Kpa ye oro mme owo ke ererimbot ẹyomde akpa itie, nso ke afo ebiere ndinam?

²¹ Bible ama ebem iso etịn̄ ke mme owo ẹyedi “mme ama idem” ke eyo nnyịn. (2 Tim. 3:2) Ntak edi oro mbon emana emi ẹmade ndidi akpa ke mme n̄kpọ. Akpakam nnyịn idehedei inyene utọ edu oro! Utu ke oro, edide isobo idomo, n̄kpọ mmọn̄eyet, m̀mê ẹnam n̄kpọ man bụt anam nnyịn, ẹyak nnyịn owo kiet kiet ibiere ndiwụt ke Jehovah edi akakan Owo ke uwem nnyịn!

[Ikọ Idakisọn̄]

Nso ke Ikeme Ndikpep Nto . . .

• nte Satan akasan̄ade abian̄a Eve?

• nte Job akanamde n̄kpọ aban̄a nnanenyịn oro enye okosobode?

• se Jesus ekenen̄erede owụk enyịn?

[Mme Mbụme Ukpepn̄kpọ]

[Ndise ke page 17]

Eve ikowụkke ekikere ke itie ebuana esie ye Jehovah

[Ndise ke page 18]

Jesus ama akan mme idomo Satan onyụn̄ owụk ekikere ke ndinam uduak Jehovah

[Mme Ndise ke page 20]

Edinọ ikọ ntiense to ke ataya sịm ataya ke unyekisọn̄ ama eketịbe ke Haiti

Imekeme ndiwụk ekikere ke “Abasi kpukpru ndọn̄esịt” ke ini nnanenyịn