Mme Ubon Christian—‘Ẹtaba Idap’

“Ẹyak nnyịn itaba idap inyụn̄ inyene ikike.”—1 THESS. 5:6.

1, 2. Nso ke oyom edieke anade ubon ẹdu ke edidemede ke n̄kan̄ eke spirit?

APOSTLE Paul ekewet ntem aban̄a “akwa ye enyene-ndịk usen Jehovah” ọnọ mme Christian ke Thessalonica, ete: “Nditọete, mbufo idụhe ke ekịm, emi akpanamde usen oro abuat mbufo nte inọ, koro kpukpru mbufo ẹdi nditọ un̄wana ye nditọ uwemeyo. Nnyịn idịghe mbon okoneyo inyụn̄ idịghe mbon ekịm.” Paul ama adian do ete: “Ntre, ndien, ẹyak nnyịn ikûde idap nte mmọ eken ẹdede, edi ẹyak nnyịn itaba idap inyụn̄ inyene ikike.”—Joel 2:31; 1 Thess. 5:4-6.

² Item oro Paul ọkọnọde mbon Thessalonica enen̄ede odot ye mme Christian emi ẹdude uwem ke “utịt ini.” (Dan. 12:4) Nte utịt idiọk editịm n̄kpọ Satan asan̄ade ekpere, enye ebiere ndiwọn̄ọde ata ediwak mme andituak ibuot nnọ ata Abasi nte enye ekekeme n̄kpọn̄ utom Abasi. Ke ntem, ọfọn nnyịn inam item Paul emi ọdọhọde idu ke edidemede ke n̄kan̄ eke spirit. Edieke anade ubon Christian odu ke edidemede, ana owo kiet kiet anam se N̄wed Abasi etemede enye. Nso ndien ke mme ebe, ibanndọ, ye nditọ ẹnyene ndinam man ubon mmọ ‘ẹtaba idap,’ m̀mê ẹdu ke edidemede?

Mme Ebe—Ẹkpebe “Eti Ekpemerọn̄”

3. Akpa Timothy 5:8 owụt ke nso ibuana ke se anade ibuot ufọk anam?

³ Bible ọdọhọ ke ‘erenowo edi ibuot ọnọ n̄wan.’ (1 Cor. 11:3) Nso idi utom erenowo nte ibuot ufọk? N̄wed Abasi etịn̄ n̄kpọ kiet emi ibuot ufọk anade anam ete: “Edieke owo ekededi mîtịmke n̄kpọ inọ ikọt esie, akpan akpan mbonufọk esie, enye akan̄ mbuọtidem onyụn̄ ọdiọk akan owo eke mînịmke ke akpanikọ.” (1 Tim. 5:8) Ke akpanikọ, ana erenowo ọnọ ubon esie mme n̄kpọ udu uwem. Edi idịghe mme n̄kpọ udu uwem kpọt ke ana enye ọnọ ubon esie edieke enye oyomde mmọ ẹdu ke edidemede ke n̄kan̄ eke spirit. Ana enye ọsọn̄ọ mmọ idem ke n̄kan̄ eke spirit, an̄wam kpukpru mmọ ẹsọn̄ọ itie ebuana mmọ ye Abasi. (N̄ke 24:3, 4) Didie ke enye edinam oro?

4. Nso idinam erenowo ọbọp ubon esie ọsọn̄ idem ke n̄kan̄ eke spirit?

⁴ Sia “ebe edide ibuot ọnọ n̄wan esie kpa nte Christ n̄ko edide ibuot ọnọ esop,” emi ọwọrọ ke ana owo emi ọdọde n̄wan odụn̄ọde onyụn̄ ekpebe utọ ibuot emi Jesus edide ọnọ esop. (Eph. 5:23) Kere ban̄a se Jesus eketịn̄de aban̄a itie ebuana esie ye mme anditiene enye. (Kot John 10:14, 15.) Nso idinam erenowo emi oyomde ndinam ubon esie ọsọn̄ idem ke n̄kan̄ eke spirit okụt unen? Enye edi emi: Kpep se “eti ekpemerọn̄” oro Jesus eketịn̄de onyụn̄ anamde, nyụn̄ “[tiene] nde ikpat esie ketket.”—1 Pet. 2:21.

5. Eti Ekpemerọn̄ ọfiọk esop adan̄a didie?

⁵ Ke nditịn̄ ke ndamban̄a usụn̄, se isinamde ekpemerọn̄ ye erọn̄ esie ẹkpere kiet eken edi adan̄a nte mmọ ẹfiọkde ẹnyụn̄ ẹbuọtde idem ye kiet eken. Ekpemerọn̄ ọfiọk kpukpru se iban̄ade mme erọn̄ esie, mme erọn̄ n̄ko ẹfiọk ẹnyụn̄ ẹbuọt idem ye enye. Mmọ ẹfiọk ẹnyụn̄ ẹkop uyo esie. Jesus ọkọdọhọ ete: “[Mmọfiọk] mme erọn̄  mi, mme erọn̄ mi ẹnyụn̄ ẹfiọk mi.” Enye inyeneke enyọn̄ enyọn̄ ifiọk iban̄a esop. Ikọ Greek emi ẹkabarede “mmọfiọk” ọwọrọ “ndinyene ntọtụn̄ọ ifiọk mban̄a n̄kpọ kiet kiet.” Eti Ekpemerọn̄ esifiọk erọn̄ esie kiet kiet. Enye ọfiọk se mmọ kiet kiet ẹyomde, se ifịnade mmọ, onyụn̄ ọfiọk ukeme mmọ. Idụhe se Jesus, kpa Uwụtn̄kpọ nnyịn, mîfiọkke iban̄a mme erọn̄ esie. Ndien mme erọn̄ ẹfiọk andikpeme mmọ ẹnyụn̄ ẹbuọt idem ke ndausụn̄ esie.

6. Didie ke mme ebe ẹkeme ndikpebe Eti Ekpemerọn̄?

⁶ Man ebe ada ibuot ukem nte Christ, ana enye ada ke imọ idi ekpemerọn̄ ndien ke mme andidu ke idak imọ ẹdi mme erọn̄. Ana enye enen̄ede ọfiọk owo kiet kiet ke ubon esie. Ndi ebe ekeme ndinam oro? Ih, edieke enye esinemede nneme ediwak ini ye owo kiet kiet ke ubon esie, akpan̄ utọn̄ ke ini mmọ ẹtịn̄de se ifịnade mmọ, ada iso ke se ẹnamde ke ubon, onyụn̄ ada ofụri esịt anam ubiere ke mme utọ n̄kpọ nte utuakibuot ubon, edidụk mbono esop, utom an̄wautom, mme edinam ini nduọkodudu, ye unọ idem inemesịt. Edieke ebe emi edide Christian adade ifiọk Ikọ Abasi ye ifiọk emi enye enyenede aban̄a mbonufọk esie ọnọ ubon ndausụn̄, etie nte ikọt ufọk esie ẹyenịm ke enye ada ibuot ke eti usụn̄, ndien esịt eyenem enye ndikụt mmọ ẹdianade kiet ke utuakibuot akpanikọ.

7, 8. Didie ke ebe ekeme ndikpebe Eti Ekpemerọn̄ ke ndima mbonubon esie?

⁷ Eti ekpemerọn̄ esinen̄ede ama mme erọn̄ esie n̄ko. Ke ini ikotde mbụk uwem ye utom ukwọrọikọ Jesus ke mme Gospel, esịt esinem nnyịn ndikụt nte Jesus akamade mbet esie. Enye ama akam ayak ‘ukpọn̄ esie ọnọ kaban̄a mme erọn̄.’ Akpana mme ebe ẹtiene ẹnyene utọ ima Jesus emi ẹnọ mbonubon mmọ. Utu ke ndikakara n̄wan esie, ebe emi oyomde Abasi ama imọ esika iso ama n̄wan esie “kpa nte Christ n̄ko akamade esop.” (Eph. 5:25) Akpana ebe esitịn̄ nti ikọ onyụn̄ owụt ke imekere iban̄a n̄wan esie sia enye odot ukpono.—1 Pet. 3:7.

⁸ Ibuot ufọk ekpenyene ndikụt nte ke imenen̄ede ida mme edumbet Abasi inọ nditọ imọ ukpep. Edi ana enye owụt ke imama nditọ imọ. Ana enye otụnọ mmọ ke ima edieke oyomde ẹtụnọ. Ekeme ndida ini mbemiso ndusụk nditọwọn̄ ẹfiọkde se ẹyomde ẹto mmọ. Edieke edide ntre, oyom ete enen̄ede eme ime ye mmọ. Edieke irenowo ẹtienede uwụtn̄kpọ Jesus ketket, mmọ ẹyenam ufọk enem onyụn̄ enyene ifụre. Ubon mmọ ẹyenyene orụk ifụre eke spirit oro andiwet psalm ọkọkwọde aban̄a.—Kot Psalm 23:1-6.

9. Ukem nte Noah, nso utom ke mme ibuot ufọk Christian ẹnyene, ndien nso idin̄wam mmọ ẹnam emi?

⁹ Noah okodu uwem ke ini emi ẹkeyomde ndisobo ererimbot eyo esie. Edi Jehovah ama ‘anyan̄a Noah ye owo itiaba efen ke ini enye adade ukwọ ofụk ererimbot mbon unana uten̄e Abasi.’ (2 Pet. 2:5) Ekedi utom Noah ndin̄wam ubon esie ọbọhọ Ukwọ oro. Se mme ibuot ubon Christian ẹnyụn̄ ẹnyenede ndinam edi oro ke mme akpatre usen emi. (Matt. 24:37) Edi akpan n̄kpọ didie ntem mmọ ndidụn̄ọde uwụtn̄kpọ “eti ekpemerọn̄” nnyụn̄ ndomo ukeme ndikpebe enye!

Ibanndọ—‘Ẹbọp Ufọk Mbufo’

10. N̄wan ndisụk ibuot nnọ ebe esie edi nso ọnọ n̄wan?

¹⁰ Apostle Paul ekewet ete: “Yak iban ẹsụk ibuot ẹnọ mme ebe mmọ nte ẹnam ẹnọ Ọbọn̄.” (Eph. 5:22) Emi iwọrọke ke ẹsosụhọde iban itie. Ata Abasi ọkọdọhọ mbemiso obotde Eve emi ekedide akpa an̄wan, ete: “Ifọnke owo ndidu ikpọn̄. Nyanam andin̄wam nnọ enye, nte nsan̄a eke ekemde ye enye.” (Gen. 2:18) Ndidi “andin̄wam” ye “nsan̄a eke ekemde”—oro edi, n̄wan ndin̄wam  ebe esie ese aban̄a utom esie ke ubon—edi ata n̄kpọ ukpono.

11. Didie ke eti an̄wan “esibọp ubon esie”?

¹¹ Eti an̄wan esinam n̄kpọ oyom ufọn ufọk esie. (Kot Mme N̄ke 14:1.) Utu ke ndinam nte ndisịme an̄wan emi mîkponoke ndutịm itieibuot, n̄wan emi enyenede ọniọn̄ esinen̄ede okpono ndutịm emi. Utu ke ndisọn̄ ibuot nnyụn̄ nyom ndida ke idem nte ererimbot ẹnamde, enye esisụk ibuot ọnọ ebe esie. (Eph. 2:2) Ndisịme an̄wan esisọp nditịn̄ idiọk ikọ mban̄a ebe esie, edi n̄wan emi enyenede ọniọn̄ esinam nditọ esie ye mbon en̄wen ẹtetịm ẹkpono ebe esie. Utọ an̄wan oro isidehedei isụhọde ebe esie itie ke ndiyom n̄kpọ uyịre uyịre m̀mê ke ndifan̄a n̄kpọ ye enye. Enye n̄ko esikpeme nte abiatde okụk. Etie nte ndisịme an̄wan esitahade se ubon esie ẹbọde ufen ẹn̄wana. N̄wan emi edide andin̄wam isinamke ntre. Enye esibere ye ebe esie ke n̄kpọ oro aban̄ade okụk. Enye esitetie ekere n̄kpọ mbemiso anamde inyụn̄ ibiatke okụk ntịme ntịme. Enye isidọhọke ebe esie anam utom ebe ini man enyene okụk.

12. Nso ke n̄wan ekeme ndinam man ubon esie odu ke edidemede?

¹² Eti an̄wan esin̄wam ubon esie odu ke edidemede ke nditiene ebe esie n̄kpep nditọ mmọ mban̄a Abasi. (N̄ke 1:8) Enye enen̄ede ebere ye ndutịm Utuakibuot Ubon. Ke adianade do, enye esida ye ebe esie ke ini ebe ọnọde nditọ item onyụn̄ otụnọde mmọ. Enye enen̄ede okpụhọde ye n̄wan emi mîdianake ye ebe esie, emi esinamde n̄kpọ ọsọn̄ ye nditọ esie ke ata ata usụn̄ ye ke n̄kan̄ eke spirit!

13. Ntak emi ọfọnde n̄wan an̄wam ebe ke ini ebe esịnde ifịk ke mme edinam esop Abasi?

¹³ Didie ke n̄wan emi an̄wamde ebe esie esida ifịk oro ebe esie esịnde ke esop Abasi? Emi esidat enye esịt etieti! Edide ebe esie edi asan̄autom unamutom, ebiowo, m̀mê esịne ke Kọmiti Unyene Nneme ye Mbon Ufọkibọk m̀mê edi andin̄wam Itieutom Ubọp Ufọkmbono Obio Ubọn̄, enye esinem esịt aban̄a ifet oro ẹnọde ebe esie. Oyoyom enye anam ndusụk n̄waidem man ekeme ndinen̄ede n̄n̄wam ebe esie, ke ikọ ye edinam. Edi enye ọfiọk ke ebe imọ ndisịn idem ke mme edinam esop Abasi an̄wam ofụri ubon odu ke edidemede ke n̄kan̄ eke spirit.

14. (a) Nso ikeme ndisọn̄ n̄wan emi ọnọde ebe esie ibetedem ndinam, ndien didie ke enye ekeme ndinam oro? (b) Nso ke n̄wan esinam man ubon mmọ ẹkop inem?

¹⁴ Ekeme ndisọn̄ n̄wan ndinịm eti uwụtn̄kpọ ke ndin̄wam ebe esie ke ini ebe anamde ubiere oro enye mîmaha. Kpa ye oro, enye esiwụt “sụn̄sụn̄ ye ifụre ifụre edu” onyụn̄ ebere ye ebe esie man ubiere  oro ọfọn. (1 Pet. 3:4) Eti an̄wan esidomo ndikpebe uwụtn̄kpọ nti iban emi ẹkebakde Abasi ke eset, utọ nte Sarah, Ruth, Abigail, ye Mary eka Jesus. (1 Pet. 3:5, 6) Enye esikpebe n̄ko iban emi “[ẹsan̄ade] ke ido uten̄e Abasi” mfịn. (Titus 2:3, 4) Eti an̄wan ndima nnyụn̄ n̄kpono ebe esie esinam ndọ mmọ ọfọn onyụn̄ anam ofụri ubon mmọ ẹkop inem. Ufọk esie edidi itie inemesịt ye ifụre. Owo emi abakde Abasi ada n̄wan emi esin̄wamde enye nte ata n̄kpọuto!—N̄ke 18:22.

Mme Uyen—‘Ẹdọn̄ Enyịn ke Mme N̄kpọ Oro Owo Mîkwe ke Enyịn’

15. Didie ke mme uyen ẹkeme ndidiana ye mme ete ye eka mmọ nnam ubon mmọ odu ke edidemede?

¹⁵ Didie ke mbufo mme uyen ẹkeme ndidiana ye mme ete ye eka mbufo nnam ubon mbufo odu ke edidemede ke n̄kan̄ eke spirit? Kere ban̄a se Jehovah enịmde ọnọ mbufo ke ini iso. Ekeme ndidi toto ke ini emi mbufo ẹkedide nditọwọn̄, mme ete ye eka mbufo ẹma ẹsiwụt mbufo ndise oro ẹban̄ade nte uwem editiede ke Paradise. Ndien nte mbufo ẹkekponide, ekeme ndidi mmọ ẹma ẹda Bible ye mme n̄wed esop Abasi ẹn̄wam mbufo ẹkụt nte uwem nsinsi ke obufa ererimbot editiede. Edieke mbufo ẹwụkde enyịn ke utom Jehovah ẹnyụn̄ ẹnamde mme n̄kpọ oro ẹdin̄wamde mbufo ẹnam n̄kpọ Jehovah, emi ayanam mbufo ẹdu ke edidemede.

16, 17. Nso ke mme uyen ẹkeme ndinam man ẹfehe mbuba uwem esịm utịt?

¹⁶ Kûfre se apostle Paul ewetde ke 1 Corinth 9:24. (Kot.) Fehe mbuba uwem emi ke ofụri esịt man akpakan. Fehe ke usụn̄ emi edinamde fi ekeme ndibọ utịp nsinsi uwem. Ediwak owo ẹyak uyom inyene ọwọn̄ọde ntịn̄enyịn mmọ ọkpọn̄ utịp nsinsi uwem. Nso unana ibuot ke emi edi ntem! Owo ndisịn idem nyom inyene inọhọ owo ata inemesịt. Mme n̄kpọ emi ẹdade okụk ẹdep idụhe ke nsinsi. Edi ama edi afo, dọn̄ enyịn ke “mme n̄kpọ oro owo mîkwe ke enyịn.” Ntak-a? Koro “mme n̄kpọ oro owo mîkwe ke enyịn ẹdu ke nsinsi.”—2 Cor. 4:18.

¹⁷ “Mme n̄kpọ oro owo mîkwe ke enyịn” ẹsịne mme edidiọn̄ Obio Ubọn̄. Ẹdiomi ndidu uwem ke usụn̄ emi ẹdikemede ndinyene mmọ. Mbufo ndida uwem mbufo nnam n̄kpọ Jehovah edinam mbufo ẹkop ata inemesịt. Ndinam n̄kpọ ata Abasi ọnọ owo ifet ndisịm utịtmbuba ibio ini ye eke anyan ini. * Ndinịm mme utịtmbuba eke spirit oro ẹkemede ndisịm ekeme ndinam mbufo ẹwụk enyịn ke ndinam n̄kpọ Abasi ẹnyụn̄ ẹnyene idotenyịn nsinsi uwem.—1 John 2:17.

18, 19. Didie ke uyen ekeme ndifiọk m̀mê imanam akpanikọ edi eke imọ?

¹⁸ Mme uyen, akpa n̄kpọ ke nditọn̄ọ itọk uwem emi edi ndinam akpanikọ edi eke mbufo. Ndi amanam oro? Bụp idemfo ete: ‘Ndi mmenen̄ede mma mme n̄kpọ eke spirit, mîdịghe ndi nsinyụn̄ ntiene nnam ke ntak ete ye eka mi? Ndi mmodomo ndinyene mme edu emi ẹnamde Abasi ama mi? Ndi mmesisịn ukeme man mbuana kpukpru  ini ke mme n̄kpọ oro ẹnyenede ebuana ye utuakibuot akpanikọ, utọ nte edibọn̄ akam kpukpru ini, edikpep n̄kpọ, edidụk mme mbono esop, ye ediwọrọ an̄wautom? Ndi mmasan̄a n̄kpere Abasi ke ndikpep ndinyene eti itie ebuana ye enye?’—Jas. 4:8.

¹⁹ Ẹkere ẹban̄a uwụtn̄kpọ Moses. Okposụkedi emi ẹkekpepde enye ido esenidụt, enye ama ama ẹdiọn̄ọ imọ nte andituak ibuot nnọ Jehovah utu ke nte eyen adiaha Pharaoh. (Kot Mme Hebrew 11:24-27.) Mbufo mme uyen Christian, ana mbufo n̄ko ẹbiere ndisọn̄ọ nda nnam n̄kpọ Jehovah. Edieke ẹnamde oro, mbufo ẹyekop ata inemesịt, ẹyedu ata eti uwem idahaemi, ẹnyụn̄ ẹdori enyịn ‘ndisọn̄ọ mmụm ata uwem n̄kama.’—1 Tim. 6:19.

20. Mmanie ẹsibọ utịp ke mbuba uwem?

²⁰ Ke mbuba itọk eset, owo kiet kpọt ekesikan. Edi mbuba uwem itiehe ntre. Uduak Abasi edi “kpukpru orụk owo ẹnyene edinyan̄a ẹnyụn̄ ẹsịm nnennen ifiọk akpanikọ.” (1 Tim. 2:3, 4) Ediwak owo ẹma ẹfehe eke mmọ ẹsịm utịt mbemiso afo, ndien ediwak owo ke ẹfehe ye afo. (Heb. 12:1, 2) Mbon oro mîkpaha mba ẹdibọ utịp. Ntre, biere ndikan ke mbuba emi!

21. Nso ke idineme ke ibuotikọ oro etienede?

²¹ “Akwa ye enyene-ndịk usen Jehovah” emi edide eyesịm kpukpru owo. (Mal. 4:5) Usen oro ikpemenke mme ubon Christian ke mbuari. Edi akpan n̄kpo kpukpru owo ke ubon ndinam se N̄wed Abasi etemede mmọ ete ẹnam. Nso en̄wen ke ẹkeme ndinam man ẹdu ke edidemede ke n̄kan̄ eke spirit ẹnyụn̄ ẹsọn̄ọ itie ebuana mbufo ye Abasi? Ibuotikọ oro etienede eyeneme n̄kpọ ita emi ẹtụkde idaha eke spirit ofụri ubon.

[Ikọ Idakisọn̄]

Nso ke Afo Ekekpep?

• Ntak emi anade mme ubon Christian ẹdu ke edidemede?

• Didie ke ebe ekeme ndikpebe Eti Ekpemerọn̄?

• Nso ke n̄wan emi enịmde eti uwụtn̄kpọ ekeme ndinam man an̄wam ebe esie?

• Didie ke mme uyen ẹkeme ndin̄wam ubon mmọ ẹdu ke edidemede ke n̄kan̄ eke spirit?

[Mme Mbụme Ukpepn̄kpọ]

[Ndise ke page 9]

Owo emi abakde Abasi ada n̄wan emi esin̄wamde enye nte ata n̄kpọuto