Ndi Afo Emenen̄ede Ama Ikọ Abasi?

LORRAINE ọdọhọ ete: “Ke ini n̄kọtọn̄ọde ndikot Bible kpukpru ini, ikenemke mi edi eketie nte ọkpọsọn̄ utom. Se n̄kokotde ikesin̄wan̄ake mi, ntre ekikere mi ama esiyo ọkpọn̄ se n̄kotde.”

Mbon en̄wen ẹdọhọ n̄ko ke ini mmimọ ikọtọn̄ọde ndikot Bible, ke ikesinemke mmimọ. Edi ke mmimọ ima ika iso ikot sia ifiọkde ke ndikot Edisana N̄wed Abasi edi nnennen n̄kpọ ndinam. Marc ọdọhọ ete: “Esimem ndiyak mme n̄kpọ en̄wen ẹbiọn̄ọ owo ndikot Bible nnyụn̄ nnịm ukpepn̄kpọ idemowo. Ama oyom nnen̄ede mbọn̄ akam nnyụn̄ nsịn ukeme man n̄keme ndida edikot Bible ke usen ke usen nte kiet ke otu n̄kpọ oro nsinamde kpukpru ini.”

Nso ke afo ekeme ndinam man enen̄ede ama Bible, kpa Ikọ Abasi oro ẹwetde-wet? Nso idinam enye enem fi ndikot? Kere ban̄a mme ekikere oro ẹtienede mi.

Utịtmbuba ye nte Ẹkpekotde

Bọn̄ akam nyụn̄ tịn̄ enyịn ke ini oyomde ndikot Bible. Ben̄e Jehovah anam fi enyene udọn̄ edikpep Ikọ esie. Ben̄e enye atat ekikere ye esịt fo man enen̄ede okụt ọniọn̄ esie. (Ps. 119:34) Edieke mûnamke ntem, edikot Bible ekeme nditie eto eto, ndien ekeme ndidi ididọn̄ke fi aba ndika iso. Lynn ọdọhọ ete: “Ndusụk ini mmesisọp inua tutu n̄kwe ndusụk akpan n̄kpọ oro n̄kpokụtde. Ediwak ini, nsinen̄ekede mfiọk mme akpan n̄kpọ oro ẹtịn̄de ẹban̄a. Edi mmesibọn̄ akam mben̄e mfara ke idem, ndien emi isiyakke ekikere mi oyo.”

Da se ekpepde ke akpan n̄kpọ. Ti ete ke ndifiọk nnyụn̄ nda akpanikọ Bible ndu uwem ọyọnọ fi uwem nsinsi. Mmọdo, nen̄ede sịn ifịk fiọk mme akpan n̄kpọ oro ẹnemede nyụn̄ da mmọ sịn ke edinam. Chris ọdọhọ ete: “Mmesiyom mme n̄kpọ oro ẹdin̄wamde mi mfiọk ndiọi edu ye uduak oro nnyenede. Esinen̄ede enem mi ndikụt nte Bible ye ediwak n̄wed nnyịn ẹdọn̄ọde mme n̄kpọ oro ẹn̄wamde mi ke idemmi, kpa ye oro akanam mme andiwet mîkwe mi.”

Nịm mme utịtmbuba oro ekemede ndisịm. Domo ndikpep obufa n̄kpọ mban̄a mbon emi ẹtịn̄de ẹban̄a ke Bible. Emekeme ndikụt ndyọ ndyọ n̄kpọ mban̄a ediwak mmọ ke ndidụn̄ọde Insight on the Scriptures m̀mê Watch Tower Publications Index. Adan̄a nte afo ọfiọkde ke mbon oro ẹsiakde ke Bible ẹkedi ata owo emi ẹnyenede edu ye mme ekikere mmọ, se afo ekpepde oto mmọ eyenen̄ede otụk fi.

Yom mbufa usụn̄ ndida N̄wed Abasi n̄kọk ibuot. (Utom 17:2, 3) Sophia esikpep n̄kpọ ye oro ke ekikere. Enye ọdọhọ ete: “Uduak mi edi ndikpep mbufa usụn̄ ndida n̄kọk ibuot ye mme owo ke utom ukwọrọikọ mi ye ke mme ini en̄wen, man n̄kpekeme ndineme akpanikọ Bible ata in̄wan̄-in̄wan̄. Enyọn̄-Ukpeme edi ata eti n̄kpọ ndida nnam emi.”—2 Tim. 2:15.

Nam nte omokụt se okotde ke Bible. Mme Hebrew 4:12 ọdọhọ ke “ikọ Abasi enyene uwem.” Nte okotde N̄wed Abasi, yak etop Esie osụhọde odụk fi esịt ebe ke ndinam nte  omokụt se mbon oro ẹtịn̄de ẹban̄a ke Bible ẹkekụtde. Domo ndikop se mmọ ẹkekopde nyụn̄ nam etie fi ke idem nte eketiede mmọ. Da se mmọ ẹkesobode buan ye mme akpan idaha oro afo esisobode. Kpep n̄kpọ to nte mmọ ẹkesede ẹban̄a nsio nsio idaha. Emi ayanam fi enen̄ede ọfiọk onyụn̄ eti mme mbụk Bible.

Da ini dụn̄ọde mme itie N̄wed Abasi oro ẹsọn̄de ye nte ẹnamde mmọ ẹn̄wan̄a man etịm ọfiọk mmọ. Da ini oro ekemde kpep n̄kpọ kpukpru ini. Emekeme ndikụt ata nti mbụme oro oyomde anam ekese ndụn̄ọde. Se mme ikọ oro mûfiọkke se ẹwọrọde, kot mme ikọ idakisọn̄, mme itien̄wed efen oro ẹtịn̄de ukem n̄kpọ ke Bible. Adan̄a nte afo ọfiọkde onyụn̄ anamde se afo okotde, ntre ke afo edinen̄ede ama Ikọ Abasi oro ẹwetde-wet. Do ke afo edikeme nditịn̄ nte andiwet psalm eketịn̄de, ete: “Mmada se afo [Jehovah] etide mi nte inyene ke nsinsi, koro mmọ ẹdatde mi esịt.”—Ps. 119:111.

Kûkot itọk itọk. Da eti ibuot nịm ini oro oyomde ndida nnịm ukpepn̄kpọ idemfo. Kûyak emi ada ini oro esidade etịm idem ọnọ mme mbono esop. Raquel ọdọhọ ete: “Ediwak ini esịt esitịmede mi tutu n̄kemeke nditịn̄ enyịn ke se n̄kotde. Ntre ndisikpep n̄kpọ nsịtnsịt esifọn ye ami. Emi an̄wam mi nnen̄ede mbọ ufọn nto se n̄kpepde.” Chris ọdọhọ ete: “Mma n̄kpep n̄kpọ itọk itọk esịt esifịna mi sia se mmụmde isiwakke. Se n̄kpepde isiwakke ndisịm mi esịt.” Ke ntre, da ini kpep n̄kpọ.

Nen̄ede nyene udọn̄ ke ikọ Abasi. Apostle Peter ọkọdọhọ ete: “Nte nseknditọ, ẹnen̄ede ẹyom ata mmọn̄eba emi otode ikọ Abasi, man enye anam mbufo ẹkọri ẹsịm edinyan̄a.” (1 Pet. 2:2) Isiyomke nseknditọ ẹkpekpep ndima mmọn̄eba. Emi edi ndammana n̄kpọ ọnọ mmọ. Edi N̄wed Abasi ọdọhọ ke oyom nnyịn ikpep ndima ikọ Abasi. Edieke afo okotde page Bible kiet kpọt kpukpru usen, ọyọsọp enyene ima oro. Idibịghike se iketiede ke akpa nte ọsọsọn̄ edinenem.

Tie kere mme itie N̄wed Abasi oro okotde. Eyenyene ata akamba ufọn n̄ko ke ini etiede ekere se afo okotde. Emi ayanam fi ekeme ndida nsio nsio ibuotikọ oro okotde n̄kabuan ye kiet eken. Idibịghike afo eyenyene ọsọn̄urua ọniọn̄ eke spirit—kpa ata eti inyene.—Ps. 19:14; N̄ke 3:3.

 Ini Oro Ẹdade Ẹnam N̄kpọ ke Mfọnn̄kan Usụn̄

Oyom ẹsịn ukeme man ẹkeme ndika iso n̄kpep n̄kpọ kpukpru ini, edi owo ikemeke ndibat mme ufọn esie. Afo eyenen̄ede ọfiọk N̄wed Abasi. (Heb. 5:12-14) Ikike ye ọniọn̄ oro afo ekpepde oto N̄wed Abasi eke odudu spirit ọyọnọ fi inemesịt, idatesịt, ye emem. Ọniọn̄ oro odude ke Ikọ Abasi eke odudu spirit edi “eto uwem” ọnọ mmọ eke ẹmụmde enye ẹkama ẹnyụn̄ ẹdade enye ẹsịn ke edinam.—N̄ke 3:13-18.

Edinen̄ede n̄kpep Ikọ Abasi ekeme ndinam fi enyene esịt asian. (N̄ke 15:14) Oro ayan̄wam fi esinọ item ofụri esịt oro enen̄erede oto Bible. Edieke afo adade se okotde ke N̄wed Abasi ye mme n̄wed “ofụn emi anamde akpanikọ onyụn̄ enyenede ọniọn̄” anam mme ubiere, afo eyenyene ifụre ye uko emi Ikọ Jehovah eke odudu spirit ọnọde. (Matt. 24:45) Afo eyenyene eti edu, idotenyịn, ndien Ikọ Jehovah ayakara ekikere, ikọ, ye edinam fo. Ke adianade do, kpukpru n̄kpọ fo oro ẹban̄ade itie ebuana fo ye Abasi ẹyekụt unen.—Ps. 1:2, 3.

Esịt oro ọyọhọde ye ima Abasi ayanam fi ọkwọrọ se afo enịmde ke akpanikọ ọnọ mbon en̄wen. Emi n̄ko ekeme ndinen̄ede n̄kama utịp. Sophia ke esịn ukeme odomo nditi nnyụn̄ nda nsio nsio itie N̄wed Abasi ndemede udọn̄ mme enyeneufọk nnyụn̄ nnam utom ukwọrọikọ esie enyene uforo ye inem. Enye ọdọhọ ete: “Mma n̄kụt nte mme owo ẹnamde n̄kpọ ẹban̄a se ẹtịn̄de ke Bible, emi esidat mi esịt tutu.”

Nte ededi, akakan ufọn oro ibọde ito edima Ikọ Abasi edi n̄kpet n̄kpet itie ebuana ye Jehovah. Ukpepn̄kpọ Bible anam fi ọfiọk mme edumbet esie onyụn̄ owụt esịtekọm aban̄a ima, ntatubọk, ye edinen ikpe esie. Idụhe edinam en̄wen ekededi oro edide akpan n̄kpọ m̀mê oro akamade utịp ntem. Nen̄ede sịn idem ke edikpep Ikọ Abasi. Ke akpanikọ, ndinam ntre edi edida ini nnam n̄kpọ ke mfọnn̄kan usụn̄.—Ps. 19:7-11.

[Ekebe/Mme Ndise ke page 5]

EDIKOT BIBLE: MME UTỊTMBUBA YE NTE ẸKPEKOTDE

▪ Bọn̄ akam nyụn̄ tịn̄ enyịn ke ini oyomde ndikot Bible.

▪ Da se ekpepde ke akpan n̄kpọ.

▪ Nịm mme utịtmbuba oro ekemede ndisịm.

▪ Yom mbufa usụn̄ ndida N̄wed Abasi n̄kọk ibuot.

▪ Nam nte omokụt se okotde ke Bible.

▪ Da ini dụn̄ọde mme itie N̄wed Abasi oro ẹsọn̄de ye nte ẹnamde mmọ ẹn̄wan̄a man etịm ọfiọk mmọ.

▪ Kûkot itọk itọk.

▪ Nen̄ede ma ikọ Abasi.

▪ Tie kere mme itie N̄wed Abasi oro okotde.

[Ndise ke page 4]

Nam nte odu ke ukem idaha oro se afo okotde ke Bible eketịbede