“Utịbe Utịbe Esenyịn ye Edima Ufan”

JOHN (JACK) BARR, emi ekedide owo Otu Ukara Mme Ntiense Jehovah, ama okụre utom esie ke isọn̄ ke usenubọk Saturday, December 4, 2010. Enye ekedi isua 97. Ẹdọhọ ke enye ekedi “utịbe utịbe esenyịn ye edima ufan.”

Brọda Jack Barr akamana ke Aberdeen ke Scotland, ndien enye ekedi ekperedem ke otu nditọ ita. Ete ye eka esie ẹkedi mbon oro ẹyetde aran. Brọda Barr ekesiwak nditịn̄ ikọ inem inem mban̄a uwem ubon mmọ ke ini emi enye ekedide eyenọwọn̄; enye ama enen̄ede owụt esịtekọm aban̄a ata eti uwụtn̄kpọ oro edima ete ye eka esie ẹkenịmde ẹnọ enye.

Ke ini Jack okodude ke ufọt isua 13 esịm 19, ama ọtọn̄ọ ndinen̄ede nsọn̄ enye ndinyene nneme ye isenowo. Edi enye ama enen̄ede esịn ukeme man akan mfịna emi, ndien ke uwemeyo Sunday kiet ke 1927, ke ini enye ekedide isua 14, enye ama asian ete esie ete ke imọ imeben̄e idem nditiene enye n̄ka ukwọrọikọ eke enyịnusụn̄ ke enyịnusụn̄. Ntọn̄ọ ekedi oro. Toto ke usen oro tutu Brọda Barr akpa, enye ekedi ifịk ifịk andikwọrọ eti mbụk.

Enyene-ndịk unọmọ oro akayakde nsịn̄ ndida uwem edima eka esie, ama anam ekpri Jack enen̄ede ekere aban̄a uduak uwem, ndien ke 1929, enye ama ayak idemesie ọnọ Jehovah, onyụn̄ ayarade uyakidem oro ke ata akpa ifet emi enye ekenyenede, ke 1934. Ekem, ke 1939, enye ama akabade edi owo ubon Bethel ke London ke England. Ntem ke utom uyọhọ-ini emi ebịghide ke isua 71 ọkọtọn̄ọ.

Ke October 29, 1960, Brọda Barr ama ọtọn̄ọ se enye okokotde “ata ọsọn̄urua itie ebuana” ke ini enye ọkọdọde Mildred Willett, emi akanamde utom usiakusụn̄ ye utom isụn̄utom ifịk ifịk ke anyan ini. Ẹkediọn̄ọ Brọda ye Sista Barr nte ifịk ifịk ebe ye n̄wan emi ẹnịmde eti uwụtn̄kpọ, ndien mmọ ẹketie ntre tutu Mildred okụre utom esie ke isọn̄ ke October 2004. Brọda ye Sista Barr ẹma ẹsikot Bible ọtọkiet kpukpru usen emi mmọ ẹkedude uwem ọtọkiet.

Enyịn̄ oro Jack Barr editi mbon oro ẹkediọn̄ọde enye iban̄a owo emi ekesinọde eti item—kpa owo emi ekesinyenede eti ibuot, ọfọnde ido, onyụn̄ enen̄erede ọfiọk N̄wed Abasi. Enye ekedi owo emi enyenede ifịk utom, esenyịn emi esikerede aban̄a onyụn̄ amade owo, onyụn̄ edi ata ufan. Ikọ esie, utịn̄ikọ esie, ye akam esie ẹma ẹwụt ke enye enen̄ede edi owo eke spirit onyụn̄ enyene n̄kpet n̄kpet itie ebuana ye Jehovah.

Okposụkedi emi abiakde nnyịn sia nnyịn mîdikwe aba edima Brọda Barr, imadara ye enye ke emi enye ọbọde enọ uwem unana n̄kpa—kpa ifet emi enye eketiede-tie ebet, ekesinyụn̄ awakde nditịn̄ mban̄a. Ofụri ekikere esie okowụhọ do. *

[Ikọ Idakisọn̄]