“Edikụt Unen ke Usụn̄ Fo” Didie?

“EDIKỤT unen” edi n̄kpọ emi ẹnen̄erede ẹma! Ndusụk owo ẹdọk ẹkesịm akamba itie ẹnyụn̄ ẹnen̄ede ẹnyene okụk ẹnyụn̄ ẹwọrọ etop. Mbon en̄wen ẹma ẹnen̄ede ẹdori enyịn ndikụt unen edi emi enen̄ede okpu mmọ.

Se owo adade nte akpan n̄kpọ esinen̄ede ebiere m̀mê enye okụt unen m̀mê ikwe. Akpan n̄kpọ iba en̄wen ẹdi se owo adade ini ye odudu esie anam, ye ukeme editọn̄ọ n̄kpọ ke idemesie.

Ediwak Christian ẹkụt ke ndibuana ọyọhọ ọyọhọ ke utom ukwọrọikọ anam mmimọ inen̄ede ikop uyụhọ. Mme uyen ye ikpọ owo ndinam utom uyọhọ ini edi iso utom an̄wam mmọ ẹkụt unen. Edi ndusụk owo ẹkeme ndida ke utom ukwọrọikọ efefek owo ẹnyụn̄ ẹkpọn̄ enye ẹbịne mme utịtmbuba en̄wen. Ntak-a? Nso ke akpanam mbak udufre enyịn ke ata akpan n̄kpọ? Ndien didie ke afo ekeme “[ndikụt] unen ke usụn̄ fo”?—Josh. 1:8.

Mme Edinam Ufọkn̄wed

Ana mme uyen emi ẹdide Christian ẹwụt ata eti ibuot kaban̄a uka n̄wed ye edinam n̄kpọ Abasi. Mbon oro ẹnamde ntre ẹyekụt unen, onyụn̄ odot ẹtoro mmọ.

Edi ndusụk uyen emi ẹdide Christian ẹsinen̄ede ẹsịn idem ke mme udiana edinam ufọkn̄wed ye ke se mmọ ẹmade. Ekeme ndidi mme n̄kpọ oro idiọkke. Edi akpana mme uyen emi ẹdide Christian ẹbụp idemmọ ẹte: ‘Mme n̄kpọ emi ẹkeme ndidia ini mi adan̄a didie? Mmanie ẹdidu do? Mme edu ewe ke ẹsinyene ke itie edinam emi? Ndien nso ikeme ndikabade ndi akpan n̄kpọ ke uwem mi?’ Ekeme ndidi afo ọmọfiọk ke mme edinam oro ẹkeme ndida ini m̀mê ọbọ odudu emi owo akpadade aka iso anam ufan ye Abasi. N̄kọ omokụt do ndien ntak emi ọfọnde owo enịm akpan n̄kpọ ke nnennen itie.—Eph. 5:15-17.

Kere ban̄a se iketịbede inọ Wiktor. * Enye ọdọhọ ete: “Mma ndụk n̄ka ubre volleyball ke ini n̄kedide isua 12. Nte ini akakade, mma nsikan nnyụn̄ mbọ ediwak enọ. Mma nnyene ifet ndikabade ata mbre emi.” Edi ama afịna Wiktor nte mbre mbuba oro okotụkde itie ebuana esie ye Jehovah. Usen kiet, nte enye okodomode ndikot Bible idap ama emen enye. Enye ama okụt n̄ko ke utom ukwọrọikọ inen̄ekede inọ imọ idatesịt aba. “Mbre mbuba oro ama ọbọ mi odudu, ndien ikebịghike mma ndifiọk n̄ko ke enye ikayakke mi nsịn aba ifịk ke n̄kpọ eke spirit. Mma mfiọk ke n̄kanamke aba ofụri ukeme mi.”

Ufọkn̄wed Ntaifiọk

N̄wed Abasi ọdọhọ Christian etịm n̄kpọ ọnọ ikọt esie, ndien oro esịne ndinọ mmọ n̄kpọ udu uwem. (1 Tim. 5:8) Edi, ndi edi owo enyenyene n̄weditoro ufọkn̄wed ntaifiọk mbemiso anam oro?

Ọfọn owo ekere aban̄a se edika ufọkn̄wed ntaifiọk ekemede ndinam itie ebuana esie ye Jehovah. Ẹyak ida uwụtn̄kpọ N̄wed Abasi inam emi an̄wan̄a.

Baruch ekedi ewetn̄wed prọfet Jeremiah. Odu ini emi Baruch okoyomde ikpọ n̄kpọ utu ke nditịn̄ enyịn ke akwa ifet oro enye  ekenyenede ndinam n̄kpọ Jehovah. Jehovah ama okụt emi onyụn̄ ada Jeremiah odụri enye utọn̄ ete: “Afo osụk oyom ikpọ n̄kpọ ọnọ idemfo. Kûyom.”—Jer. 45:5.

Nso ikedi “ikpọ n̄kpọ” oro Baruch okoyomde? Ekeme ndidi enye okoyom ndiwọrọ etop ke editịm n̄kpọ mme Jew. Mîdịghe, ekeme ndidi ikpọ n̄kpọ oro ẹkedi inyene. Edi enye ama efre mme ata akpan n̄kpọ, kpa mme n̄kpọ eke spirit. (Phil. 1:10) Baruch ama anam se Jehovah akadade Jeremiah eteme enye, ndien enye ama ọbọ ukpọn̄ esie nte n̄kpọ mbụme.—Jer. 43:6.

Nso ke mbụk emi ekpep nnyịn? Item oro ẹkenọde Baruch owụt ke n̄kpọ ikasan̄ake ọfọn. Enye okoyom ikpọ n̄kpọ ọnọ idemesie. Edieke enyenede se adade an̄wam idem, ndi enen̄ede oyom abiat ini, okụk, ye ukeme afiak aka n̄wed man esịm ọkpọkpọ utịtmbuba, eke ete ye eka fo, m̀mê eke mme iman fo?

Da Grzegorz emi edide ataifiọk kọmputa, ke uwụtn̄kpọ. Enye ama ọbọ ukpep efen efen sia mme nsan̄autom esie ẹkekpekde enye ẹte anam ntre. Ikebịghike, enye ikenyeneke aba ini inọ mme n̄kpọ eke spirit. Enye ọdọhọ ete: “Mma mfiọk ke n̄kadaha ọfọn. Esịt ama esifịna mi sia n̄kekemeke ndisịm mme utịtmbuba eke spirit oro n̄kenịmde.”

Edisịn Idem N̄kaha ke Utom

Ikọ Abasi esịn udọn̄ ọnọ ata mme Christian ete ẹsịn ifịk ẹnam utom ẹnyụn̄ ẹdi mbonutom m̀mê mme eteutom emi ẹkemede ndibuọt idem. Apostle Paul ekewet ete: “Se ededi eke mbufo ẹnamde, ẹnam ke ofụri ukpọn̄ nte ẹnam ẹnọ Jehovah, inamke inọ owo.” (Col. 3:22, 23) Kpa ye oro ẹdọhọde ẹsịn ifịk ẹnam utom, odu ata akpan n̄kpọ en̄wen emi ẹyomde—eti itie ebuana ye Andibot nnyịn. (Eccl. 12:13) Edieke Christian esịnde idem akaha ke utom idịbi udia esie, enye ekeme ndikpọnọde mme n̄kpọ eke spirit nnịm mmemmem mmemmem.

Ndiyak ofụri idem nsịn ke utom idịbi udia ekeme ndibọ Christian odudu emi enye akpadade aka iso ọsọn̄ọ idem ke n̄kan̄ eke spirit onyụn̄ an̄wam ubon esie. Edidem Solomon ama okụt ke “ekese ọkpọsọn̄ utom” esiwak ndidi “edifehe mbịne ofụm.” Edieke Christian esịnde idem akaha ke utom idịbi udia, emi ekeme ndinam enye okûkop inem idem. Utọ owo oro ekeme ndisịn idem ke utom idịbi udia tutu enye akpa mba ofụri ofụri. Edieke emi etịbede, ndi enye ekeme ndisụk nnen̄ede ‘ndat esịt nnyụn̄ n̄kụt se ifọnde ke kpukpru ọkpọsọn̄ utom esie’? (Eccl. 3:12, 13; 4:6) Ata akpan n̄kpọ edi, ndi enye oyosụk enyene odudu ye udọn̄ ekem  ndinam utom esie ke ufọk nnyụn̄ mbuana ke mme edinam eke spirit?

Janusz, emi odụn̄de ke Eastern Europe, ama enen̄ede esịn idem ke utom in̄wan̄. Enye ọdọhọ ete: “Mbon ererimbot ẹma ẹma mi etieti sia mma nsisio mbufa usụn̄ utọ n̄kpọ ndi nsinyụn̄ nnam se ededi oro ntọn̄ọde nsịm utịt. Edi mma mmem ke n̄kan̄ eke spirit, ndien mma ntre ndisibuana ke utom ukwọrọikọ. Ikebịghike mma ntre ndidụk mme mbono esop. Mma ntan̄ idem tutu nsịn item mbiowo nnyụn̄ mfiọrọ n̄kpọn̄ esop.”

Afo Emekeme Ndikụt Unen

Imeneme n̄kpọ ita emi edide edieke Christian esịnde idem akaha, ẹkeme ndinam enye emem ke n̄kan̄ eke spirit. Ndi afo  emesịn idem ke ndomokiet ke otu emi? Ke edide ntre, mme mbụme, mme itie N̄wed Abasi, ye se ẹnemede ke isọn̄ emi ẹyen̄wam fi ebiere m̀mê enen̄ede asan̄a ke usụn̄ emi edinamde fi okụt unen.

Ufọkn̄wed ye mme udiana edinam ufọkn̄wed: Afo esịn idem ke mmọ adan̄a didie? Ndi mmọ ẹda ini oro ekesidade anam mme n̄kpọ eke spirit? Ndi isinen̄ekede idọn̄ fi aba ndidu ye nditọete? Ke edide ntre, ntak emi mûkpebeke Edidem David emi ekeben̄ede Jehovah ete: “Nam mi mfiọk usụn̄ eke n̄kpasan̄ade”?—Ps. 143:8.

Esenyịn oro asan̄ade-san̄a ama an̄wam Wiktor oro iketịn̄de iban̄a. Esenyịn oro ama ọdọhọ enye ete: “Nte afo etịn̄de ikọ owụt ke emenen̄ede ama nte esibrede volleyball.” Wiktor ọdọhọ ete: “Ikọ oro ama anam enyịn an̄wan̄a mi. Mma ndifiọk ke mma n̄ka anyan n̄kaha. Ikebịghike, mma ndian̄ade nsan̄a ye mbon ererimbot ke n̄ka mbre oro nnyụn̄ ntọn̄ọ ndinam ufan ye mme owo ke esop.” Idahaemi, Wiktor ke esịn ifịk anam n̄kpọ Jehovah ke esop mmọ. Enye eteme mbon en̄wen ete: “Bụp mme ufan fo, ete ye eka fo, m̀mê mbiowo m̀mê mme edinam ufọkn̄wed ẹnanam fi asan̄a ekpere Jehovah m̀mê ẹdadian̄ade fi ẹkpọn̄ enye.”

Ntak emi mûnamke mbiowo ke esop mbufo ẹfiọk ke ikpama ndinyene mme ifetutom en̄wen ke utom Abasi? Ndi afo emekeme ndin̄wam n̄kani owo emi ẹyomde owo odu ye mmimọ m̀mê an̄wam mmimọ, edide ke ndika n̄kedep n̄kpọ m̀mê ke utom esịtufọk? Inamke n̄kpọ m̀mê afo edi isua ifan̄, emekeme ndinam utom ukwọrọikọ uyọhọ ini, etịn̄ se inamde fi okop idatesịt ọnọ mbon en̄wen.

Ufọkn̄wed ntaifiọk: Jesus ama akpan ‘ndiyom ubọn̄ idemfo.’ M̀mê afo ebiere ndika n̄wed n̄ketre ke m̀mọ̀n̄, ndi ‘omodụn̄ọde ọfiọk se idide akpan n̄kpọ ikan’?—Phil. 1:9, 10.

Grzegorz, ataifiọk kọmputa oro, ama anam ukpụhọde. Enye ọkọdọhọ ete: “Mma ndu mmemmem uwem sia n̄kanamde item mbiowo. Mma ndikụt ke ikoyomke n̄ka ufọkn̄wed ntaifiọk. Oro n̄kukụre ọkpọbọ mi ini ye odudu.” Grzegorz ama enen̄ede esịn idem ke mme edinam esop. Nte ini akakade, enye ama aka onyụn̄ okụre ufọkn̄wed emi ẹdiọn̄ọde idahaemi nte Ufọkn̄wed Ukpep Bible Eke Nditọete Iren Emi Mîdọhọ Ndọ. Enye ‘ama edep ifet’ ada ọbọ ukpepn̄kpọ Abasi.—Eph. 5:16.

Utom idịbi udia: Ndi emesịn idem ke utom fo tutu ọkpọnọde mme n̄kpọ eke spirit enịm? Ndi emesida ini eneme nneme ye ubon fo? Ndi ke onyụn̄ anam n̄kọri ke mme utịn̄ikọ oro ẹnọde fi ọnọ ke esop? Ndi emesinyene nneme oro ọbọpde-bọp ye mbon en̄wen? “Bak ata Abasi nyụn̄ nịm mme ibet esie,” ndien afo ọyọbọ ekese edidiọn̄ Jehovah onyụn̄ “okụt se ifọnde ke ọkpọsọn̄ utom [fo].”—Eccl. 2:24; 12:13.

Janusz, oro iketịn̄de iban̄a, ikenen̄ekede ikụt unen ke utom in̄wan̄ esie, edi ntakurua akakam esịm enye. Enye ama asan̄a ubọk ubọk onyụn̄ akama ata akamba isọn afiak edibịne Jehovah. Enye ama enen̄ede n̄kpọ obon, ndien idahaemi enye edi asiakusụn̄ ye ebiowo. Enye ọdọhọ ete: “Ke ini nyụhọde ye mme n̄kpọ udu uwem nnyụn̄ ndade odudu mi nnam mme n̄kpọ eke spirit, mmesinyene ifụre, esịt esinyụn̄ ana mi sụn̄.”—Phil. 4:6, 7.

Da ini kere se inen̄erede idọn̄ fi ye se afo adade nte akpan n̄kpọ. Ndinam n̄kpọ Jehovah anam owo okụt unen ke ofụri eyouwem. Nam oro edi akpan n̄kpọ ke uwem fo.

Ekeme ndiyom anam mme ukpụhọde, akam ekeme ndiyom ọkpọn̄ mme n̄kpọ oro mînen̄ekede inyene ufọn man odomo “[ọfiọk] uduak Abasi eke edide eti onyụn̄ enemde enye esịt onyụn̄ ọfọnde ama.” (Rome 12:2) Edi afo emekeme “[ndikụt] unen ke usụn̄ fo” ke ndinam n̄kpọ Abasi ke ofụri ukpọn̄.

[Ikọ Idakisọn̄]

[Ekebe/Ndise ke page 31]

Ekeme Ndisan̄a Didie N̄kụt Unen ke Usụn̄ Fo?

Sia enyenede ediwak n̄kpọ ndinam, afo ekeme ndisan̄a didie ntre ndifre enyịn mban̄a se idide ata akpan n̄kpọ? Da ini tie kere se idọn̄de inyụn̄ idide akpan n̄kpọ inọ fi ke ndikere mban̄a mme mbụme emi:

MME UDIANA EDINAM UFỌKN̄WED YE SE AMADE

▪ Mme edu ewe ke ẹsinyene ke itie edinam oro?

▪ Mme n̄kpọ emi ẹkeme ndidia ini mi adan̄a didie?

▪ Ndi mmọ ẹkeme ndikabade ndi akpan n̄kpọ ke uwem fo?

▪ Ndi mmọ ẹda ini oro ekesidade anam mme n̄kpọ eke spirit?

▪ Mmanie ẹdidu do?

▪ Ndi emenen̄ede ama ndidu ye mmọ akan ndidu ye nditọete?

UFỌKN̄WED NTAIFIỌK

▪ Edieke enyenede se adade an̄wam idem, ndi enen̄ede oyom abiat ini, okụk, ye ukeme afiak aka n̄wed?

▪ Ndi edi enyenyene n̄weditoro ufọkn̄wed ntaifiọk mbemiso ese aban̄a idemfo?

▪ Ndi enye ayayak fi esidụk mme mbono esop?

▪ Ndi ‘omodụn̄ọde ọfiọk se idide akpan n̄kpọ ikan’?

▪ Ndi oyom etetịm enyene mbuọtidem ke Jehovah ọyọnọ se inanade fi?

UTOM IDỊBI UDIA

▪ Ndi utom oro afo emekde ayak fi okop ‘idatesịt onyụn̄ okụt se ifọnde ke kpukpru ọkpọsọn̄ utom fo’?

▪ Ndi emenyene odudu ye udọn̄ ekem ndinam utom fo ke ufọk nnyụn̄ mbuana ke mme edinam eke spirit?

▪ Ndi emesida ini eneme nneme ye ubon fo?

▪ Ndi emesịn idem ke utom fo tutu ọkpọnọde mme n̄kpọ eke spirit enịm?

▪ Ndi enye esiyak fi ọnọ nti utịn̄ikọ?

[Ndise ke page 30]

Jehovah ama ọdọhọ Baruch ete okûyom ikpọ n̄kpọ