Ndi Akpana Mme Uyen Ẹna Baptism?

CARLOS, * ete kiet emi odude ke Philippines, ọkọdọhọ ete: “Esịt enem mi etieti sia eyen mi edi asan̄autom Jehovah idahaemi, mmọfiọk ke esịt onyụn̄ enem enye n̄ko.” Ete en̄wen ke Greece ekewet ete: “Ami ye n̄wan mi imokop inemesịt sia nditọ nnyịn mbita ẹkenade baptism nte Mme Ntiense Jehovah ke ini uyen. Mmọ ke ẹnam n̄kọri eke spirit ẹnyụn̄ ẹnem esịt ndinam n̄kpọ Jehovah.”

Mme ete ye eka emi ẹdide Christian ẹnyene ntak ndidat esịt ke ini nditọ mmọ ẹnade baptism, edi ndusụk ini idatesịt emi esisan̄a ye editịmede esịt. Mma kiet ọkọdọhọ ete: “Mma nnen̄ede n̄kop inemesịt nnyụn̄ n̄kop editịmede esịt.” Ntak emi ekedide ntre? “Mma ndiọn̄ọ ke eyen mi enyene ndinam ibat ke idemesie idahaemi nnọ Jehovah.”

Ndinam n̄kpọ Jehovah nte Ntiense esie oro anade baptism edi utịtmbuba emi kpukpru uyen ẹkpenịmde. Edi mme ete ye eka oro ẹbakde Abasi ẹkeme ndikere ẹte, ‘Mmọdiọn̄ọ ke eyen mi enen̄ede anam n̄kọri, edi ndi enye enyene ukeme ndikan etabi oburobụt ido nnyụn̄ n̄ka iso nsana ke enyịn Jehovah?’ Mbon en̄wen ẹkeme ndibụp idemmọ ẹte, ‘Edieke eyen mi osobode idomo uma-inyene, ndi enye ayaka iso anam n̄kpọ Abasi ye inemesịt ye ifịk?’ Ntem, ewe ndausụn̄ Bible ekeme ndin̄wam mme ete ye eka ẹbiere m̀mê nditọ mmọ ẹdot ndina baptism?

Akpa N̄kpọ Oro Ẹyomde —Ana Owo Edi Mbet

Ikọ Abasi isiakke isua ifan̄ emi owo ekpedide mbemiso anade baptism, edi etịn̄ idaha eke spirit mbon oro ẹdotde ndina baptism. Jesus eketeme mme anditiene enye ete: “Ẹkenam mme owo ke kpukpru idụt ẹdi mbet mi, ẹnịm mmọ baptism.” (Matt. 28:19) Ntem, mbon oro ẹma ẹkededi mbet Christ ẹdot ndina baptism.

Anie edi mbet? Insight on the Scriptures ọdọhọ ete: “Ikọ emi enen̄ede aban̄a kpukpru mbon oro ẹnịmde ukpepn̄kpọ Christ ke akpanikọ ẹnyụn̄ ẹnamde enye ketket.” Ndi mme uyen ẹkeme ndidi ata mme mbet Christ?  Kop se eyenete an̄wan emi anamde utom isụn̄utom ke se ibede isua 40 ke Latin America ewetde mi aban̄a idemesie ye nditọeka esie iban iba: “Nnyịn ima ikpon ikem ndidiọn̄ọ ke iyom ndinam n̄kpọ Jehovah nnyụn̄ ndụn̄ ke Paradise. Nnyịn ndikayak idem nnọ Abasi ama an̄wam nnyịn isọn̄ọ ida ke ini ikosobode mme idomo emi mme uyen ẹsisobode. Nnyịn ituaha n̄kpọfiọk ke ndikayak idem nnyịn nnọ Abasi ke ini ikedide mme uyen.”

Afo edinam didie idiọn̄ọ m̀mê eyen fo edi mbet Christ? Bible ọbọrọ ete: “Se eyenọwọn̄ anamde ke ẹda ẹfiọk m̀mê edinam esie asana onyụn̄ enen.” (N̄ke 20:11) Kere ban̄a ndusụk n̄kpọ emi ẹwụtde ke uyen ke anam ‘kpukpru owo ẹkụt n̄kọri esie’ nte mbet.—1 Tim. 4:15.

Se Akpadade Ọdiọn̄ọ m̀mê Eyen Fo Edi Mbet

Ndi eyen fo esikop uyo ọnọ fi? (Col. 3:20) Ndi enye esinam se ọnọde enye anam ke ufọk? Bible etịn̄ ntem aban̄a Jesus ke ini enye ekedide isua 12: “Enye . . . aka iso osụk ibuot ọnọ [ete ye eka esie].” (Luke 2:51) Edi akpanikọ ke idụhe eyen emi edikopde uyo ete ye eka esie mfịn ke mfọnmma usụn̄. Edi ata mme Christian ẹnyene ‘nditiene nde ikpat Jesus ketket.’ Ntem ana mme uyen oro ẹyomde ndina baptism ẹkop uyo ẹnọ mme ete ye eka mmọ.—1 Pet. 2:21.

Kere ban̄a mme mbụme oro ẹtienede mi: Ndi eyen fo ‘aka iso ndibem iso nyom Obio Ubọn̄’ ke ndikwọrọ ikọ? (Matt. 6:33) Ndi enye ama ndibuana eti mbụk emi ye mbon en̄wen, mîdịghe ndi afo esidọhọ enye ọwọrọ an̄wautom onyụn̄ ọkwọrọ ikọ ke enyịnusụn̄? Ndi enye ọdiọn̄ọ utom esie nte asuanetop oro mînaha baptism? Ndi esidọn̄ enye ndifiak n̄ka n̄kese mbon oro enye osobode ke efakutom? Ndi enye esinam nditọ ufọkn̄wed ye mme andikpep mmọ ẹfiọk ke imọ idi kiet ke otu Mme Ntiense Jehovah?

Ndi enye ada edidụk mbono esop nte akpan n̄kpọ? (Ps. 122:1) Ndi esinem enye ndinọ ibọrọ ke Ukpepn̄kpọ Enyọn̄-Ukpeme ye ke Ukpepn̄kpọ Bible Esop? Ndi enye esikop nduaidem nditiene mbuana ke Ufọkn̄wed Utom Ukara Abasi?—Heb. 10:24, 25.

Ndi eyen fo odomo ndisana ke ido uwem ke nditre idiọk nsan̄a ke ufọkn̄wed ye ke mme itie en̄wen? (N̄ke 13:20) Nso orụk ikwọ, fim, edinam ekebe ndise, ye mbre vidio ke enye esima? Enye esinyụn̄ ada Intanet anam n̄kpọ didie? Ndi ikọ ye edinam esie ẹwụt ke enye oyom ndida mme edumbet Bible ndu uwem?

Eyen fo ọdiọn̄ọ Bible ọfọn adan̄a didie? Ndi enye esikeme nditịn̄ se mbufo ẹkpepde ke mbubreyo Utuakibuot Ubon mbufo ke ikọ idemesie? Ndi enye ekeme ndinam mme akpan ukpepn̄kpọ Bible ẹn̄wan̄a? (N̄ke 2:6-9) Ndi esinem enye ndikot Bible nnyụn̄ n̄kpep mme n̄wed ofụn emi anamde akpanikọ onyụn̄ enyenede ọniọn̄? (Matt. 24:45) Ndi  enye esibụp mbụme aban̄a mme ukpepn̄kpọ ye mme ufan̄ikọ Bible?

Mme mbụme emi ẹkeme ndin̄wam fi ọfiọk adan̄a nte eyen fo anamde n̄kọri eke spirit. Ke ama ekekere aban̄a mmọ, emekeme ndibiere ke akpana enye anam n̄kọri ke ndusụk ikpehe mbemiso anade baptism. Edi edieke uwem esie owụtde ke enye edi mbet, enye onyụn̄ enen̄ede ayak uwem esie ọnọ Abasi, afo emekeme ndikere ke akpana iyak enye ana baptism.

Mme Uyen Ẹkeme Nditoro Jehovah

Ediwak mme asan̄autom Abasi ẹma ẹnam akpanikọ ẹnyụn̄ ẹsọn̄ọ ẹda ye Abasi ke ini uyen. Kere ban̄a Joseph, Samuel, Josiah, ye Jesus. (Gen. 37:2; 39:1-3; 1 Sam. 1:24-28; 2:18-20; 2 Chron. 34:1-3; Luke 2:42-49) Anaedi nditọiban Philip inan̄ emi ẹkesitịn̄de prọfesi ẹma ẹbọ ukpep toto ke uyen.—Utom 21:8, 9.

Ntiense kiet ke Greece ọkọdọhọ ete: “N̄kana baptism ke ini n̄kedide isua 12. Akananam ntuaha n̄kpọfiọk mban̄a ubiere oro. Isua 24 ẹmebe tọn̄ọ n̄kana baptism, ndien mmesịn isua 23 ke otu emi ke utom uyọhọ ini. Ima oro mmade Jehovah aman̄wam mi nse mban̄a nsọn̄ọn̄kpọ oro nsobode toto ke uyen. Ke ini n̄kedide isua 12, n̄kọdiọn̄ọke Bible nte ndiọn̄ọde idahaemi. Edi mma ndiọn̄ọ ke mmama Jehovah, nnyụn̄ nyom ndinam n̄kpọ esie ke nsinsi. Esịt enem mi ke enye ndin̄wam mi n̄ka iso nnam utom esie.”

Owo oro owụtde ke idi ata mbet enyene ndina baptism, edide enye edi uyen m̀mê akwa owo. Apostle Paul ekewet ete: “Owo ada esịt ọbuọt idem enyene edinen ido, edi ada inua atan̄a an̄wan̄wa enyene edinyan̄a.” (Rome 10:10) Ke ini mbet Christ oro edide uyen anade baptism, enye ye ete ye eka esie ẹnam akpan n̄kpọ. Kûyak baba n̄kpọ kiet ọbiọn̄ọ fi m̀mê nditọ fo ndikop idatesịt oro asan̄ade ye emi.

[Ikọ Idakisọn̄]

[Ekebe ke page 5]

Ndinyene Nnennen Ekikere Mban̄a Baptism

Ndusụk mme ete ye eka ẹda nditọ mmọ ndina baptism nte eti n̄kpọ emi asan̄ade ye afanikọn̄—ukem nte owo ndinyene n̄wed uwat. Edi ndi akanam baptism ye utom Abasi ẹbiọn̄ọ owo ndidi se enye ekpedide ke ini iso? Bible ọbọrọ ihih. Mme N̄ke 10:22 ọdọhọ ete: “Edidiọn̄ Jehovah ofori owo, enye inyụn̄ idianke ubiak ke esịt.” Paul okonyụn̄ ewet ọnọ ẹsọk ekpri Timothy ete: “Ke akpanikọ, uten̄e Abasi emi edi usụn̄ akwa udori ke ini asan̄ade ye ediyụhọ ye se owo enyenede.”—1 Tim. 6:6.

Edi akpanikọ ke imemke utom ndinam n̄kpọ Jehovah. Jeremiah ama osobo ekese nsọn̄ọn̄kpọ nte prọfet Abasi. Kpa ye oro, enye ama ewet ete: “Ikọ fo onyụn̄ akabade edi n̄kpọ idara ọnọ mi ye se idatde mi esịt; koro ẹkotde mi ẹdian enyịn̄ fo, O Jehovah Abasi mme udịm.” (Jer. 15:16) Jeremiah ama ọdiọn̄ọ ke utom Abasi ọkọnọ imọ idatesịt. Ererimbot Satan esinam n̄kpọ ọsọn̄ ye owo. Mme ete ye eka ẹnyene ndinam nditọ mmọ ẹfiọk ukpụhọde oro.—Jer. 1:19.

 [Ekebe/Ndise ke page 6]

Ndi Akpana Eyen Mi Esịk Baptism Enịm Kan̄a?

Ndusụk ini, idem ke ini nditọ ẹdotde ndina baptism, mme ete ye eka ẹsidọhọ mmọ ẹbet kan̄a. Nso ikeme ndinam mmọ ẹnam emi?

Nsikere ke eyen mi ama ana baptism, ke enye ekeme ndinam akwa idiọkn̄kpọ emi edinamde ẹsio enye ẹfep ke esop. Ndi esịne ifiọk ndinịm ke eyen emi mînaha kan̄a baptism idinamke ibat inọ Abasi ke se enye anamde? Solomon ekewet mme ikọ emi ọnọ nditọwọn̄, ete: “Fiọk ete ke Abasi edikot fi edi ikpe aban̄a [mme edinam fo].” (Eccl. 11:9) Paul eketi kpukpru owo, n̄kpri ye ikpọ, ete: “Owo nnyịn kiet kiet ayanam ibat aban̄a idemesie ọnọ Abasi.”—Rome 14:12.

Mme andituak ibuot nnọ Abasi emi ẹnade baptism ye mbon oro mînaha kan̄a ẹyenam ibat ẹnọ Abasi. Kûfre ke Jehovah ekpeme mme asan̄autom esie ke nditre ndiyak ‘ẹdomo mmọ ẹbe se mmọ ẹkemede ndiyọ.’ (1 Cor. 10:13) Adan̄a nte mmọ ẹkade iso “ẹnyene ikike” ẹnyụn̄ ẹbiọn̄ọde idomo, mmọ ẹkeme ndidori enyịn ke Abasi ayan̄wam mmimọ. (1 Pet. 5:6-9) Mma kiet emi edide Christian ewet ete: “Nditọ emi ẹnade baptism ẹsinyene ediwak n̄kpọ emi ẹnamde mmọ ẹkpeme idem ke idiọkn̄kpọ ererimbot emi. Eyen mi emi akanade baptism ke isua 15 ọdọhọ ke oro edi ukpeme ọnọ imọ. Enye ọkọdọhọ ete, ‘Emi iyakke fi abiat ibet Jehovah.’ Baptism esinen̄ede esịn udọn̄ ọnọ owo anam se inende.”

Edieke afo adade ikọ ye uwụtn̄kpọ ekpep nditọ fo ndikop uyo nnọ Jehovah, emekeme ndinịm ke mmọ ẹyenam oro n̄ko ke ẹma ẹkena baptism. Mme N̄ke 20:7 ọdọhọ ete: “Edinen owo asan̄a ke nsọn̄ọnda esie. Nditọ esie emi ẹtienede enye ke edem ẹkop inemesịt.”

N̄kpama eyen mi anam akpan n̄kpọ ifan̄ kan̄a. Oyom mme uyen ẹkpep ndinam utom man nte ini akade mmọ ẹkpekeme ndise mban̄a idemmọ. Edi ifọnke ẹsịn udọn̄ ẹnọ mmọ ẹwụk ntịn̄enyịn ke uka ufọkn̄wed ye ke unyene okụk utu ke utuakibuot akpanikọ. Jesus eketịn̄ ntem aban̄a “n̄kpasịp,” m̀mê ikọ Obio Ubọn̄, emi mîn̄wụmke mfri, ete: “Amaedi enye emi ẹsuande ke otu n̄kukịm, emi edi owo oro okopde ikọ, edi editịmede esịt editịm n̄kpọ emi ye abian̄a abian̄a odudu inyene ababa ikọ oro, ndien enye in̄wụmke mfri.” (Matt. 13:22) Ndinịm mme utịtmbuba emi ẹnamde ẹnịm mme n̄kpọ ererimbot akpa utu ke n̄kpọ eke spirit ekeme ndinam uyen anana udọn̄ ndinam n̄kpọ Abasi.

Ebiowo kiet emi enyenede mbufiọk eketịn̄ ntem aban̄a mme uyen emi ẹdotde ndina baptism edi emi mme ete ye eka mînyịmeke, ete: “Edieke ẹkpande eyenọwọn̄ ndina baptism, emi ekeme nditịp n̄kọri eke spirit eyen oro onyụn̄ anam idem emem enye.” Ndien esenyịn oro asan̄ade-san̄a ekewet ete: “Uyen ekeme ndikere ke imọ ikemeke ndinam n̄kọri ke n̄kan̄ eke spirit m̀mê ke imọ iwọrọke n̄kpọ. Enye ekeme ndiwọrọ n̄ka ererimbot man etie nte enyene se enye anamde.”

[Ndise]

Ndi ufọkn̄wed ntaifiọk ekpedi akpa n̄kpọ?

[Ndise ke page 3]

Eyenọwọn̄ ekeme ndiwụt ke imọ idi mbet

[Mme Ndise ke page 3]

Nditịm idem nnọ nnyụn̄ ntiene mbuana ke mbono esop

[Ndise ke page 4]

Edikop uyo nnọ ete ye eka

[Ndise ke page 4]

Editiene mbuana ke utom ukwọrọikọ

[Ndise ke page 4]

Akam idemowo