Nditọn̄ọ Mmemmem Nsiondi Eke Ikọmbakara

IMOKOP inemesịt ndisian mbufo nte ke ọtọn̄ọde ye nsiondi Enyọn̄-Ukpeme eke ukpepn̄kpọ emi, iyosio n̄ko mmemmem nsiondi eke Ikọmbakara kpukpru ọfiọn̄ ke ufan̄ isua kiet nte ndomonse. Enye eyesịne mme ibuotikọ ukpepn̄kpọ, ndien edieke ufan̄ odude, ẹyesịn n̄ko mme ibuotikọ en̄wen. Imenịm ke emi oyoyụhọ akpan udọn̄ eke spirit ediwak Mme Ntiense Jehovah. Ntak emi idọhọde ntre?

Ikọmbakara edi ọsọ usem ọnọ nditọete nnyịn ke mme utọ idụt nte Fiji, Ghana, Kenya, Liberia, Nigeria, Papua New Guinea, ye Solomon Islands. Okposụkedi emi nditọete nnyịn ke mme idụt emi ẹkemede ndisem usem en̄wen m̀mê usem edem mmọ, mmọ ẹsiwak ndinịm mbono esop nnyụn̄ n̄kwọrọ ikọ ke Ikọmbakara. Edi Ikọmbakara oro mmọ ẹsitịn̄de emem akan eke mme n̄wed nnyịn. N̄ko, ndusụk ke otu ikọt Jehovah ẹwọrọ ẹkedụn̄ ke mme idụt oro anade mmọ ẹtịn̄ Ikọmbakara kpa ye oro mmọ mînen̄ekede ifiọk Ikọmbakara. Akan oro, mbono esop isidụhe ke usem emana mmọ.

Mme ibuotikọ oro isikpepde ke urua ke urua ke Ukpepn̄kpọ Enyọn̄-Ukpeme ẹdi akpan usụn̄ emi ẹsidade ẹnọ nnyịn udia eke spirit ke nnennen ini. Ntem, man kpukpru owo oro ẹdụkde ẹnen̄ede ẹbọ ufọn ukpepn̄kpọ emi, ẹsio mmemmem nsiondi eke Ikọmbakara emi owo mîdaha ikpọ Ikọmbakara ye nnyan udịmikọ emi ẹwakde n̄kukọhọ iwet. Ikpaedem obufa nsiondi emi edidi isio. N̄kpri ibuotikọ, mme ikpehe ekikere, mme mbụme ndụn̄ọde, ye mme ndise ke mme ibuotikọ ukpepn̄kpọ esie ẹdisisan̄a kiet ye eke nsiondi ofụri ini. Emi ayanam owo ekeme ndikama ekededi onyụn̄ etiene abuana ke Ukpepn̄kpọ Enyọn̄-Ukpeme. Man ẹwụt ukpụhọde ke ufọt nsiondi mbiba emi, se uwụtn̄kpọ oro odude ke idak emi, oro ẹdade ẹto ikpehe ekikere 2 ke akpa ibuotikọ ukpepn̄kpọ ke nsiondi emi.

Imenịm ke obufa enọ emi edidi ibọrọ akam oro ediwak owo ẹbọn̄de ẹnọ Jehovah ẹte: “Nam mi nnyene ikike, man n̄kpep mme ewụhọ fo.” (Ps. 119:73) Imenịm ke mbon emi mînen̄ekede ifiọk Ikọmbakara, ọkọrọ ye n̄kpri nditọ emi ẹkpepde-kpep Ikọmbakara, ẹyekeme nditịm idem edifọn edifọn nnọ Ukpepn̄kpọ Enyọn̄-Ukpeme eke urua ke urua. Kpukpru itoro enyene Jehovah koro ke ntak emi enye “[enyenede] ima ọnọ ofụri otu nditọete,” enye amada “ofụn emi anamde akpanikọ onyụn̄ enyenede ọniọn̄” ọnọ udia eke spirit barasuene.—1 Pet. 2:17; Matt. 24:45.

Otu Ukara Mme Ntiense Jehovah