Nduọkodudu Abasi—Ndi Afo Omodụk Enye?

“Ikọ Abasi enyene uwem onyụn̄ enyene odudu.”—HEB. 4:12.

1. Nso idi usụn̄ kiet emi ikemede ndidụk nduọkodudu Abasi mfịn, edi ntak emi ekemede ndinem nditetịn̄?

KE IBUOTIKỌ oro ekebemde iso, ima ikụt ke imekeme ndidụk nduọkodudu Abasi edieke ikopde uyo isan̄a ye enye inam uduak esie. Emi ekeme ndinem nditetịn̄. Ke uwụtn̄kpọ, ke ini ifiọkde ke Jehovah asasua n̄kpọ oro nnyịn imade, akpa n̄kpọ oro idinamde ekeme ndidi ndisọn̄ ibuot. Oro owụt ke oyom inam n̄kọri ke se iban̄ade ‘edinyịme ndikop item.’ (Jas. 3:17) Ke ibuotikọ emi, iyodụn̄ọde ikpehe ifan̄ emi ẹkemede ndisọn̄ nnyịn ndinyịme nditiene nnam uduak Abasi—oro edi, ndikop uyo ke ofụri esịt.

2, 3. Nso ukeme ke ana ika iso isịn man ika iso iye ke enyịn Jehovah?

² Ndi afo emenen̄ede enyịme ndinam item Bible? N̄wed Abasi asian nnyịn ke edi uduak Abasi nditan̄ “ndiye n̄kpọ emi ẹtode kpukpru mme idụt” mbok nnọ idemesie. (Hag. 2:7) Edi akpanikọ, ata ediwak nnyịn ikedịghe ndiye n̄kpọ ke ini ikọtọn̄ọde-tọn̄ọ ndikpep akpanikọ. Nte ededi, ima oro imade Abasi ye edima Eyen esie ama anam nnyịn inam ikpọ ukpụhọde ke ido ye edu nnyịn man ikpenen̄ede  inem Abasi esịt. Ke akpatre, ke ima ikenen̄ede ibọn̄ akam inyụn̄ isịn ukeme, ata akpan usen ama edisịm emi nnyịn ikanade baptism nte Christian.—Kot Colossae 1:9, 10.

³ Edi ikosụk in̄wan̄wana ye unana mfọnmma idem ke ima ikana baptism. En̄wan emi osụk akaka iso edinyụn̄ akaka iso adan̄a nte idide mme anana mfọnmma. Edi ẹn̄wọn̄ọ ẹnọ nnyịn ke edieke ikade iso in̄wana inyụn̄ ibierede ndidọdiọn̄ nye ke enyịn ke Abasi, ke Jehovah ọyọdiọn̄ mme ukeme oro isịnde.

Ke Ini Oyomde Ẹnọ Item

4. Siak usụn̄ ita emi ẹkemede ndida nnọ nnyịn item N̄wed Abasi.

⁴ Ana ifiọk mme ndudue nnyịn mbemiso ikemede ndidomo ndikan mmọ. Utịn̄ikọ oro esịmde owo esịt ke Ufọkmbono Obio Ubọn̄ m̀mê ibuotikọ oro anamde owo ekere n̄kpọ ke n̄wed nnyịn ekeme ndinam nnyịn ikụt akwa ndudue nnyịn. Ke n̄kan̄ eken, edieke nnyịn mîkopke n̄kpọ emi ke ini ẹnemede ke utịn̄ikọ m̀mê edieke itrede ndinam item oro ẹnọde ke n̄wed nnyịn, Jehovah ekeme ndida ekemmọ Christian emen ndudue nnyịn owụt nnyịn.—Kot Galatia 6:1.

5. Siak ndusụk usụn̄ oro ikemede ndinam n̄kpọ nte mîdotke ke ini ẹnọde nnyịn item, nyụn̄ tịn̄ ntak emi anade mme ekpemerọn̄ Christian ẹka iso ẹsịn ukeme ẹn̄wam nnyịn.

⁵ Isimemke utom ndibọ item emi anana-mfọnmma owo ọnọde, ọkpọkọm enye ada usọ ye ima ọnọ adan̄a didie. Edi, nte Galatia 6:1 ọdọhọde, Jehovah owụk mbon emi ẹdotde ke n̄kan̄ eke spirit ete “ẹdomo” ndinen̄ede nnyịn, ẹnam ntre “ke ifụre ifụre ido.” Edieke ibọde item oro, nnyịn iyọdọdiọn̄ iye ke enyịn Abasi. Nte ido edide, imesitịn̄ ata ifụre ifụre ke idi mme anana mfọnmma ke ini ibọn̄de akam. Nte ededi, ke ini owo en̄wen asiande nnyịn akpan ndudue nnyịn, nnyịn imesinyene udọn̄ ediyom ntak, ndọhọ ke inyeneke se idude do, ibụp ntak emi owo oro ọnọde item oro, mîdịghe idọhọ ke nnyịn imaha nte ẹkenọde item oro. (2 Ndi. 5:11) Ndien edieke item emi otụkde n̄kpọ oro nnyịn mîkoyomke ndikop—oro edi, se mbonubon nnyịn ẹnamde, ọfọn̄ ye ukamaidem nnyịn, usanaidem nnyịn, m̀mê edinam ini nduọkodudu emi nnyịn imade edi Jehovah mîmaha—imekeme ndiyat esịt ntịn̄ se mîkpetịn̄ke, ndien emi ekeme ndinam nnyịn ifụhọ onyụn̄ akpa eyenete oro okodomode ndin̄wam nnyịn idem! Edi esịt ama osụhọde nnyịn, imesiwak ndikụt ke item oro ama odot.

6. Didie ke ikọ Abasi ayarade “mme uduak ye ekikere esịt owo”?

⁶ Itien̄wed oro ọbọpde ibuotikọ emi eti nnyịn ke ikọ Abasi “enyene odudu.” Ih, ikọ Abasi enyene odudu ndikpụhọde uwem mme owo. Enyene odudu ndin̄wam nnyịn inam mme ukpụhọde ke ima ikana baptism, kpa nte akan̄wamde nnyịn inam ntre mbemiso ikanade. Ke leta oro Paul ekewetde ọnọ mme Hebrew, enye ama ewet n̄ko ete ke ikọ Abasi “ekịm abahade ukpọn̄ ye spirit, ye ikek ye ndia esie, onyụn̄ ekeme ndifiọk mme uduak ye ekikere esịt owo.” (Heb. 4:12) Ke nditịn̄ ke usụn̄ en̄wen, ke ini se Abasi aduakde aban̄a nnyịn enen̄erede an̄wan̄a nnyịn, nte nnyịn inamde n̄kpọ iban̄a oro owụt se nnyịn idide ke esịtidem. Ndi ukpụhọde esidu ndusụk ini ke se idide ke enyọn̄ idem (oro edi “ukpọn̄”) ye se nnyịn inen̄erede idi (oro edi “spirit”)? (Kot Matthew 23:27, 28.) Kere ban̄a nte afo akpanamde n̄kpọ ke mme idaha oro ẹtienede mi.

San̄a Ikpat Kiet ye Esop Jehovah

7, 8. (a) Etie nte nso ikanam ndusụk mme Christian oro ẹkedide mme Jew ẹsọn̄ọ ẹyịre ke Ibet Moses? (b) Ndi ukeme oro mmọ ẹkesịnde ama asan̄a ekekem ye uduak Jehovah?

⁷ Ediwak nnyịn imekeme nditịn̄ Mme N̄ke 4:18 ke ibuot: “Usụn̄ ndinen owo ebiet nyayama un̄wana emi akade-ka iso ayama tutu  esịm ufọt uwemeyo.” Oro ọwọrọ ke nnyịn inyene ndinam n̄kọri ke ido nnyịn ye nte mme uduak Abasi ẹn̄wan̄ade nnyịn nte ini ebede.

⁸ Nte ikenemede ke ibuotikọ oro ekebede, ke Jesus ama akakpa, ama ọsọn̄ ediwak mme Christian emi ẹkedide mme Jew nditre ndinịm Ibet Moses. (Utom 21:20) Okposụkedi emi Paul eketịn̄de usọ usọ ke mme Christian ikodụhe aba ke idak Ibet, ndusụk mmọ ikenyịmeke se enye akadade odudu spirit ewet. (Col. 2:13-15) Etie nte mmọ ẹkekere ke edieke ikade iso inịm ọkpọkọm ndusụk ikpehe Ibet oro, ke owo idikọbọke mmimọ. Se ifiọkde edi ke Paul ama ewet leta ọnọ ẹsọk mme Christian emi ẹkedide mme Hebrew etịn̄ ọnọ mmọ in̄wan̄-in̄wan̄ ke mmọ ididụkke nduọkodudu Abasi edieke mmọ mînamke n̄kpọ nte ekemde ye uduak Abasi oro ẹyararede. * (Heb. 4:1, 2, 6; kot Mme Hebrew 4:11.) Edieke mmọ ẹkeyomde Jehovah ama mmimọ, akana mmọ ẹnyịme ke Jehovah akada ikọt esie usụn̄ ke usụn̄ en̄wen.

9. Nnyịn ikpanam n̄kpọ didie ke ini ẹnamde ukpụhọde ke nte ukpepn̄kpọ N̄wed Abasi an̄wan̄ade nnyịn?

⁹ Ke eyo nnyịn, ẹmenam ukpụhọde ke nte ndusụk ukpepn̄kpọ Bible ẹn̄wan̄ade nnyịn. Ikpanaha emi afịna nnyịn; akpakam ananam inen̄ede inyene mbuọtidem ke otu ofụn emi anamde akpanikọ onyụn̄ enyenede ọniọn̄. Ke ini mme andida ke ibuot “ofụn” oro ẹkụtde ke oyom ẹnam ukpụhọde ke nte ndusụk akpanikọ ẹn̄wan̄ade nnyịn, mmọ isitreke ndinam ukpụhọde oro. Se ibehede otu ofụn emi ikan edi ndibere ye uduak Abasi utu ke mme ikọ nsụkuyo emi mme owo ẹtịn̄de ẹdian mmọ ke ntak emi mmọ ẹnamde mme ukpụhọde emi. Afo esinam n̄kpọ didie ke ini ẹnamde ukpụhọde ke nte N̄wed Abasi an̄wan̄ade nnyịn?—Kot Luke 5:39.

10, 11. Nso ke ikeme ndikpep nto nte ndusụk owo ẹkenamde n̄kpọ ke ini ẹketọn̄ọde mbufa usụn̄ edikwọrọ eti mbụk?

¹⁰ Ẹyak ineme uwụtn̄kpọ en̄wen. Ke n̄kpọ nte isua 100 emi ẹkebede, ndusụk Nditọ Ukpepn̄kpọ Bible emi ẹkenen̄erede ẹfiọk ndinọ utịn̄ikọ an̄wa ẹkekere ke mfọnn̄kan usụn̄ ndinam utom ukwọrọikọ edi ke nditịm idem n̄ka n̄kọnọ otuowo oro ẹdinen̄erede ẹma ndikop utịn̄ikọ. Mmọ ẹma ẹnen̄ede ẹma an̄wan̄wa utịn̄ikọ, ndien ndusụk mmọ ẹma ẹnen̄ede ẹma itoro oro mme andikpan̄ utọn̄ nnọ mmọ ẹkesinọde mmọ. Edi nte ini akakade, ama edina in̄wan̄-in̄wan̄ ke Jehovah okoyom ikọt esie ẹsịn idem ẹnam nsio nsio orụk utom ukwọrọikọ, emi esịnede utom eke ufọk ke ufọk. Ndusụk mbon oro ẹkenen̄erede ẹfiọk ndinọ utịn̄ikọ ẹma ẹsịn ndidomo obufa n̄kpọ ekededi nse. Ke enyọn̄ enyọn̄, eketie nte mmọ ẹdi mme owo eke spirit, emi ẹkeyakde idem ofụri ofụri ẹnọ Ọbọn̄. Edi ke ini ẹkekụtde ata uyarade uduak Abasi kaban̄a utom ukwọrọikọ, ata ekikere ye uduakesịt mmọ ẹma ẹwụt idem. Jehovah ekese mmọ didie? Enye ikọdiọn̄ke mmọ. Mmọ ẹma ẹkpọn̄ esop Abasi.—Matt. 10:1-6; Utom 5:42; 20:20.

¹¹ Oro iwọrọke ke ekedi mmemmem n̄kpọ ọnọ mbon oro ẹkesọn̄ọde ẹda ye esop Abasi ndikwọrọ ikọ an̄wan̄wa. Utom oro ama ọsọn̄ ediwak owo, akpan akpan ke nsonso oro. Edi mmọ ẹma ẹkop uyo. Nte ini akakade, mmọ ikokopke aba editịmede esịt, Jehovah ama onyụn̄ enen̄ede ọdiọn̄ mmọ. Afo esinam n̄kpọ didie ke ini ẹdọhọde fi etiene abuana ke ndusụk orụk utom ukwọrọikọ oro afo mûnen̄ekede uma idahaemi? Ndi emesima ndidomo obufa n̄kpọ nse?

Ke Ini Owo Oro Imade Ọkpọn̄de Jehovah

12, 13. (a) Nso idi uduak Jehovah ke ndisio owo oro mîkabakede esịt mfep ke esop? (b) Nso idomo ke ndusụk ete ye eka ẹsobo, ndien ntak emi idomo emi ọsọn̄de?

¹² Eyịghe idụhe ke kpukpru nnyịn imenyịme  edumbet oro ọdọhọde ke ana isana ke ikpọkidem, ke ido uwem, ye ke n̄kan̄ eke spirit man inem Abasi esịt. (Kot Titus 2:14.) Nte ededi, ekeme ndidu ini emi enen̄erede ọsọn̄ nnyịn ndisọn̄ọ nda ke ikpehe uduak Abasi enye emi. Ke uwụtn̄kpọ, yak idọhọ ke ikpọn̄-ikpọn̄ eyen ete ye eka emi ẹnịmde eti uwụtn̄kpọ ọkpọn̄ esop. Ẹsio eyen emi ke esop sia enye amade “inemesịt idiọkn̄kpọ ke ibio ini” akan ọkpọkpọ itie ebuana esie ye Jehovah ye ete ye eka esie emi ẹbakde Abasi.—Heb. 11:25.

¹³ N̄kpọ emi etịmede ete ye eka esie! Mmọ ẹfiọk ke Bible etịn̄ ntem aban̄a edisio owo mfep ke esop: “Ẹtre ndidụk ndụk ye owo ekededi emi ẹkotde enye eyenete, emi edide owo use m̀mê owo idiọkitọn̄ m̀mê okpono ndem m̀mê osụn̄i isụn̄i m̀mê akpammịn m̀mê owo n̄kanubọk, ẹkûkam ẹdia n̄kpọ ye utọ owo oro.” (1 Cor. 5:11, 13) Mmọ ẹfiọk n̄ko ke “owo ekededi” ke ufan̄ikọ oro esịne owo ubon mmimọ emi mîdụn̄ke ke ufọk ye mmimọ. Edi mmọ ẹma eyen mmọ etieti! Ima eyen ye eka ekeme ndinam mmọ ẹkere ẹte: ‘Nnyịn idisan̄a didie in̄wam eyen nnyịn afiak edi esop edieke itrede ndụk ye enye ofụri ofụri? Ndi nnyịn idinen̄ekede in̄wam enye edieke isisobode ye enye ndien ndien?’ *

14, 15. Nso idi ata ubiere oro anade mme ete ye eka nditọ emi ẹsiode ẹfep ke esop ẹnam?

¹⁴ Imokop mbọm iban̄a mme ete ye eka oro. N̄kọ eyen mmọ ama enyene ifet ndimek se enye amade, ndien enye ekemek ndidụk usụn̄ uwem oro mîkemke ye eke mme Christian utu ke ndika iso nnyene n̄kpet n̄kpet itie ebuana ete ye eka esie ye ekemmọ mme andinịm ke akpanikọ. Ndien ete ye eka mmọ ikenyeneke ubọk ke emi. Imosụk ise mmọ mîkemeke ndinyan̄a!

¹⁵ Edi nso ke edima ete ye eka emi ẹdinam? Ndi mmọ ẹyenịm in̄wan̄-in̄wan̄ item Jehovah? Mîdịghe ndi mmọ ẹdidọhọ ke imekeme ndika iso ndụk ndụk ye eyen oro ẹkesiode ẹfep do ẹnyụn̄ ẹdọhọ ke edi “mbubehe ubon oro inyenede ndinam”? Ke ini mmọ ẹnamde ubiere, ana mmọ ẹkere ẹban̄a nte Jehovah esede se mmọ ẹnamde. Uduak esie edi ndinịm esop esie asana, ndien edieke ẹkemede, man ẹnam enyịn an̄wan̄a anamidiọk. Didie ke ete ye eka emi ẹdide Christian ẹkeme ndibere ye uduak oro?

16, 17. Nso ke ikeme ndikpep ke nditie n̄kere uwụtn̄kpọ Aaron?

¹⁶ Aaron eyeneka Moses ama osobo akwa idomo emi aban̄ade nditọiren esie iba. Kere nte eketiede enye ke idem ke ini Nadab ye Abihu nditọ esie ẹkedade esen ikan̄ ẹdi ke iso Jehovah ndien Jehovah ọtọ mmọ owot. Edi akpanikọ ke ete ye eka mmọ ikenyeneke aba ebuana ekededi ye mmọ. Edi n̄kpọ efen do. Jehovah ama eteme Aaron ye nditọiren esie oro ẹkenamde akpanikọ ete: “Ẹkûyak idet asuahade mbufo ke ibuot, ẹkûnyụn̄ ẹwai ọfọn̄idem  mbufo [ke mfụhọ], mbak mbufo ẹdikpan̄a, [Jehovah] edinyụn̄ ayat esịt ye ofụri esop.” (Lev. 10:1-6) Etop oro an̄wan̄a. Ana ima Jehovah ikan mbonubon nnyịn oro mînamke akpanikọ.

¹⁷ Mfịn, Jehovah isiwotke mbon oro ẹbiatde ibet esie inikiet inikiet. Ima esinam enye ọnọ mmọ ifet man ẹkabade esịt ẹkpọn̄ ndiọi utom mmọ. Edi ekere ke Jehovah edise didie edieke ete ye eka anamidiọk emi mîkabakede esịt ẹkade iso ẹdomo Jehovah ke ndidian idem nte mîdotke ye eyen mmọ oro ẹsiode ẹfep?

18, 19. Mme edidiọn̄ ewe ke mbonubon oro ẹnamde item Jehovah oro aban̄ade mbon oro ẹsiode ẹfep ẹkeme ndinyene?

¹⁸ Ediwak mbon oro ẹkesiode ẹfep ini kiet ko ẹnyịme idahaemi ke ntak emi mme ufan ye mbonubon mmimọ mîkadianke idem ye mmimọ nte mîdotke akanam enyịn an̄wan̄a mmimọ. Ke ini mbiowo ẹkewetde ẹte ẹfiak ẹda n̄kaiferi kiet, mmọ ẹkewet ẹte ke “ntak kiet emi enye akafiakde odu edisana uwem edi sia eyeneka esie ama okpono ndutịm edisio owo mfep.” N̄kaiferi oro ọkọdọhọ ke “eyeneka imọ ndikọsọn̄ọ nyịre ye mme edumbet N̄wed Abasi akanam imọ iyom ndifiak ndi esop.”

¹⁹ Nso ikpedi ubiere nnyịn? Ekpedi ndin̄wana mbiọn̄ọ udọn̄ editre ndinam item N̄wed Abasi ke ntak unana mfọnmma. Ana inen̄ede inịm ke Abasi esinam n̄kpọ ye nnyịn ke mfọnmma usụn̄ kpukpru ini.

“Ikọ Abasi Enyene Uwem”

20. Nso idi usụn̄ iba emi ẹkemede ndinam Mme Hebrew 4:12 an̄wan̄a? (Se ikọ idakisọn̄.)

²⁰ Ke ini Paul ekewetde ete ke “ikọ Abasi enyene uwem,” idịghe Ikọ Abasi oro ewetde-wet, kpa Bible, ke enye ekenen̄ede etịn̄ aban̄a. * Se enye ekenemede aban̄a owụt ke enye eketịn̄ aban̄a un̄wọn̄ọ Abasi. Ikọ Paul ọkọwọrọ ke Abasi isin̄wọn̄ọke n̄kpọ ndien ekem efre enyịn aban̄a un̄wọn̄ọ oro. Jehovah ama adada prọfet Isaiah ọsọn̄ọ emi ete: “Ikọ mi . . . idifiakke itiene mi ubọk ubọk, edi . . . [oyokụt] unen ke se ndọn̄de enye.” (Isa. 55:11) Ntem, ufọn idụhe ndinana ime ke ini n̄kpọ mîsọpke nte ikpamade ọsọp. Jehovah “ke ananam utom” man okposu uduak esie uforo uforo.—John 5:17.

21. Didie ke Mme Hebrew 4:12 ekeme ndisịn udọn̄ nnọ n̄kani owo emi ẹsịnede ke otu “akwa otuowo” ẹnyụn̄ ẹsọn̄ọde ẹda ẹnam utom ẹbịghi?

²¹ N̄kani owo emi ẹsịnede ke otu “akwa otuowo” ẹmesọn̄ọ ẹda ẹnam n̄kpọ Jehovah ke ata ediwak isua. (Edi. 7:9) Ediwak mmọ ikodorike enyịn ke iyọsọn̄ ke akani editịm n̄kpọ emi. Kpa ye oro, mmọ iyakke idem emem mmọ. (Ps. 92:14) Mmọ ẹfiọk ke un̄wọn̄ọ Abasi idịghe n̄kpọ oro ẹfrede enyịn ẹban̄a—enye enyene uwem, ndien Jehovah ke ananam utom ndisu enye. Sia uduak Abasi edide ata akpan n̄kpọ ọnọ enye, esinem enye esịt ke ini nnyịn n̄ko idade enye nte ata akpan n̄kpọ. Ke ọyọhọ usen itiaba emi, Jehovah ke ọduọk odudu, sia enye enen̄ede ọfiọk ke uduak imọ oyosu ye nte ke ikọt imọ ẹyebere ye uduak oro nte otu. Nso kaban̄a fi? Ndi afo ke idemfo omodụk nduọkodudu Abasi?

[Mme Ikọ Idakisọn̄]

Nte Afo Emeti?

• Nso ke oyom inam man idụk nduọkodudu Abasi mfịn?

• Nso ebuana ke uduak Abasi enyene ye nnyịn ndima ndibọ item N̄wed Abasi?

• Mme idaha ewe ẹkeme ndinam ọsọn̄ nnyịn ndinam item N̄wed Abasi, edi ntak emi oyomde inam item N̄wed Abasi?

• Nso idi usụn̄ iba emi ẹkemede ndinam Mme Hebrew 4:12 an̄wan̄a?

[Mme Mbụme Ukpepn̄kpọ]

[Ndise ke page 31]

N̄kpọ emi etịmede ete ye eka esie!