Enịm-Mbụk Mbono

“MBONO emi ama asuana, mbufo ẹyedọhọ ẹte, ‘Akananam owo inịmke utọ mbono ofụri isua enye emi!’” Stephen Lett, owo Otu Ukara Mme Ntiense Jehovah, eketịn̄ ikọ oro man enen̄ede edemede udọn̄ otuowo emi ẹkedụkde mbono oro. Otuowo oro ẹkedụk mbono ofụri isua eke Watch Tower Bible and Tract Society of Pennsylvania, ọyọhọ 126, emi ẹkenịmde ke October 2, 2010, ke Ufọk Mbono Mme Ntiense Jehovah ke Jersey City ke New Jersey ke U.S.A. Nso idi ndusụk n̄kpọ oro ẹkenemede ke enịm-mbụk mbono emi?

Brọda Lett ọkọnọ akpa utịn̄ikọ emi ekedide ufiop ufiop utịn̄ikọ emi akaban̄ade chariot Jehovah emi ẹtịn̄de ẹban̄a ke n̄wed Ezekiel. Akaka, ubọn̄ ubọn̄ chariot oro ada aban̄a esop Abasi, emi Jehovah ke idem esiemmọ ọnọde ndausụn̄. Brọda Lett ọkọdọhọ ke ikpehe esop emi ke heaven, emi mme angel ẹnamde, ọsọp nte emịnen̄mịnen̄—asan̄a ikpat kiet ye ekikere Jehovah. Ikpehe esop Jehovah Abasi mi ke isọn̄ asasan̄a n̄ko aka iso iso. Brọda Lett ama asiak edemede-owo-udọn̄ mbufa n̄kpọ oro ẹnamde ndondo emi ke ikpehe esop Abasi mi ke isọn̄.

Ke uwụtn̄kpọ, ke ẹtọ ndusụk n̄kọk itieutom ẹdọn̄ kiet, ndien emi ayanam ediwak mbon emi ẹkenamde utom ke mme ufọkidụn̄ Bethel ke mme idụt oro ẹwụk ntịn̄enyịn ke utom ukwọrọikọ. Brọda Lett ama esịn udọn̄ ọnọ mme andidụk mbono oro ete ẹka iso ẹbọn̄ akam ẹte Otu Ukara, emi ẹdade ke ibuot otu asan̄autom, ẹka iso ẹnam akpanikọ ẹnyụn̄ ẹnyene eti ibuot, m̀mê ọniọn̄.—Matt. 24:45-47.

Mbụkutom Emi Ẹsịnde Udọn̄ Ẹnọ Owo ye Ndinem Ndụn̄ọde

Tab Honsberger, owo Kọmiti N̄kọk Itieutom ke Haiti, ama ọnọ mbụk emi akanamde owo mbọm aban̄a se iketịbede ke unyekisọn̄ eke January 12, 2010, emi okowotde n̄kpọ nte owo 300,000, ama okokụre. Enye ọkọdọhọ ke mme ọkwọrọ ederi ẹsiwak ndidọhọ ke Abasi akamia mbon oro ẹkekpan̄ade ufen ke ntak idiọkn̄kpọ mmọ onyụn̄ ekpeme nti owo. Edi ata ediwak tọsịn mme abiatibet ikakpaha ke ini unyekisọn̄ oro okowụride ibibene ufọk-n̄kpọkọbi. Ediwak mbon Haiti emi ẹnyenede eti esịt ke ẹbọ ndọn̄esịt ke ndikpep ata ntak emi afanikọn̄ awakde ntem ke eyo nnyịn. Brọda Honsberger ama etịn̄ ke anam-akpanikọ eyenete kiet ke Haiti, emi n̄wan esie akakpade ke n̄kpọntịbe oro, ọkọdọhọ ete: “Nsụk ntatua tutu mfịn emi. Mfiọkke m̀mê nditua mbịghi adan̄a didie, edi esịt enem mi ndikụt nte esop Jehovah amade nnyịn. Mmenyene idotenyịn, mmonyụn̄ mbiere ndin̄wam mbon en̄wen ẹtiene ẹnyene idotenyịn emi.”

 Mark Sanderson, emi edide owo ubon Bethel Brooklyn idahaemi, ama ọtọt nte utom akade iso ke Philippines. Enye ekedi owo Kọmiti N̄kọk Itieutom Philippines; esịt ama enem enye nditịn̄ nte idụt oro enyenede n̄wakn̄kan ibat mme asuanetop Obio Ubọn̄ utịm ike-32 ke adiana ke adiana, ye nte ibat ukpepn̄kpọ Bible enen̄erede awak akan ibat mme asuanetop. Enye ama etịn̄ aban̄a Miguel, eyenete emi owo okowotde eyeyen esie. Miguel ama esịn ikpafak man ẹkpe ikpe ẹnọ ẹnyụn̄ ẹkọbi owo oro. Nte ini akakade, Miguel ama osobo owotowo oro ke ini ọkọkwọrọde ikọ ke ufọk-n̄kpọkọbi emi ẹkekọbide enye. Kpa ye oro idem ekenyekde Miguel, enye ama etịn̄ ikọ ifụre ifụre ye ufan ufan ye owotowo oro. Ke akpatre, enye ama ekpep ete oro n̄kpọ, ete oro onyụn̄ anam se ekpepde onyụn̄ edima Jehovah. Enye ama ana baptism. Miguel edi n̄kpet n̄kpet ufan esie ndien ke oyom usụn̄ man ẹsọp ẹsio enye ke n̄kpọkọbi. *

Ekem ẹma ẹnam ndụn̄ọde oro akanamde ẹnen̄ede ẹdiọn̄ọ mme owo, emi Mark Noumair, andikpep ke Itieutom Emi Esede Aban̄a Ufọkn̄wed Ukara Abasi, akanamde ye mme owo. Enye ama anam ndụn̄ọde ye mme ebe ye iban emi—Alex ye Sarah Reinmueller, David ye Krista Schafer, ye Robert ye Ketra Ciranko. Alex Reinmueller, emi esin̄wamde Kọmiti Usio N̄wed, ama etịn̄ nte imọ ikanamde akpanikọ odụk imọ esịt ke ini ikanamde utom usiakusụn̄ ke Canada ke ini emi ikedide isua 15 kpọt, emi ikesiwakde ndisan̄a ikpọn̄. Ke ini ẹkebụpde m̀mê anie ekenen̄ede edi uwụtn̄kpọ ọnọ enye ke Bethel, Brọda Reinmueller ama asiak mme anam-akpanikọ iren ita, onyụn̄ etịn̄ nte mmọ kiet kiet ẹken̄wamde imọ ikọri ke n̄kan̄ eke spirit. Sarah n̄wan esie ama etịn̄ aban̄a nte imọ ikanamde ufan ye eyenete an̄wan kiet emi ẹkekọbide ediwak isua ke China ke ntak mbuọtidem esie. Sarah ọkọdọhọ ke imekpep ndiberi edem ke Jehovah ke ndisibọn̄ ọkpọkpọ akam.

David Schafer, emi esin̄wamde Kọmiti Unọ Ukpep, ama otoro eka esie ke ntak akwa mbuọtidem esie onyụn̄ etịn̄ aban̄a nditọete emi ẹkesinamde utom eto, emi ẹkesịnde udọn̄ ẹnọ imọ inam utom usiakusụn̄ unọ un̄wam ke ini ikedide uyen. Krista n̄wan esie ama etịn̄ inem inem aban̄a nte imọ ikekpebede mbon oro ẹma ẹkedu ẹbịghi ke Bethel emi ẹkenamde “akpanikọ ke ata ekpri n̄kpọ,” nte Jesus ọkọdọhọde.—Luke 16:10.

Robert Ciranko, emi esin̄wamde Kọmiti Uwetn̄wed, ama etịn̄ ukpono ukpono aban̄a ete ye eka ete esie ye ete ye eka eka esie emi ẹkewọrọde ke Hungaria ẹdidụn̄ ke United States ẹkenyụn̄ ẹdide mme Christian oro ẹyetde aran. Ke ini enye ekedide eyenọwọn̄, ama esinen̄ede  otụk enye ndifiọk ke ini ekesidụkde ikpọ mbono ke iduọk isua 1950, nte ke esop Jehovah enen̄ede okpon akan esop edem mmimọ. Ketra n̄wan esie ama etịn̄ nte imọ ikekpepde ndinam akpanikọ ke ini ikanamde utom usiakusụn̄ ke esop emi ẹkekpepde ukpepn̄kpọ mbon mfiakedem, emi okonyụn̄ enyenede ediwak mfịna. Enye ama ọyọ, ndien ekem ẹma ẹnọ enye ekedi akpan asiakusụn̄ ke esop emi edidianakiet mmọ ekenen̄erede otụk enye.

Ke oro ebede, Manfred Tonak ama etịn̄ nte utom etiede ke Ethiopia. Idụt emi okodu toto ke eyo Bible, ndien idahaemi se ibede mme asuanetop 9,000 ẹdu do. Ata ediwak mmọ ẹdụn̄ ke ibuot obio, Addis Ababa, m̀mê ke mbọhọ esie. Ntem ẹnen̄ede ẹyom mme asuanetop ke mme obio-in̄wan̄. Man ẹse ẹban̄a oro, ẹma ẹkot nditọ Ethiopia emi ẹdide Mme Ntiense, emi ẹdụn̄de ke mme idụt en̄wen, ẹdi man ẹkekwọrọ ikọ ke mme obio-in̄wan̄. Ediwak mmọ ẹma ẹdi ẹdisịn udọn̄ ẹnọ Mme Ntiense ke Ethiopia, ẹnyụn̄ ẹkụt mbon oro ẹkemade ndikpan̄ utọn̄.

Akpan ikpehe kiet ekedi edinam eke ikpehe ke ikpehe, emi aban̄ade se Mme Ntiense Jehovah ẹnamde ke Russia ye ikpe mmọ do. Aulis Bergdahl, owo Kọmiti N̄kọk Itieutom Russia, ama ọnọ mbụk ukọbọ oro ẹkọbọde Mme Ntiense ke Russia, akpan akpan ke Moscow. Philip Brumley, owo Itieutom Oro Esede Aban̄a Ikpe ke n̄kọk itieutom United States, ama etịn̄ aban̄a nti n̄kpọ oro ẹketịbede ke ọfiọn̄ ifan̄ emi ẹkebede, ke ini Esopikpe Europe Oro Esede Aban̄a Unen Owo (ECHR) okodụn̄ọrede n̄kpọ usụkkiet emi ẹkedọhọde nte Mme Ntiense ẹnamde. Kpukpru owo ke esop oro ẹma ẹnyịme ke ndomokiet ke otu n̄kpọ usụkkiet oro ikenenke, idem ke ndusụk n̄kpọ oro, mmọ ẹma ẹnen̄ede ẹtịn̄ enyịn ẹnọ mme ntak emi ẹwụtde ke ikenenke. Okposụkedi oro owo mîkebiereke ikpe oro kan̄a, Brọda Brumley ama etịn̄ uko uko aban̄a ufọn emi ubiereikpe Esop oro ekemede ndinyene ke mme ikpe oro ẹkotde nnyịn ke mme idụt en̄wen.

Ke ẹma ẹketịn̄ eti mbụk emi, Brọda Lett ama ọtọt ke ECHR ama enyịme ndidụn̄ọde ikpe anyan ini emi ukara France enyenede ye Mme Ntiense Jehovah kaban̄a edikpe tax. Esop emi ẹnen̄erede ẹkpono mi esinyịme ata ibat ibat kpọt ke otu ikpe oro ẹdade ẹka do. Kan̄a ke emi, ECHR ẹse ẹban̄a ikpe Mme Ntiense Jehovah 39, ndien mmọ ẹtebe nnyịn 37 ke otu oro. Brọda Lett ama esịn udọn̄ ọnọ kpukpru ikọt Abasi ete ẹka iso ẹsịn ikpe oro ẹsụk ẹkamade ke ubọk ke akam mmọ ẹnọ Jehovah.

Richard Morlan, emi edide andikpep Ufọkn̄wed Mbiowo, ọkọnọ akpatre mbụkutom.  Enye ama etịn̄ ke ofụri esịt aban̄a ufọkn̄wed emi ye esịtekọm emi mbiowo emi ẹma ẹkedụk ẹwụtde.

Mme Utịn̄ikọ En̄wen Emi Mbon Otu Ukara Ẹkenọde

Guy Pierce, owo Otu Ukara, ama ọnọ utịn̄ikọ ofụri esịt oro akaban̄ade ibuotikọ isua 2011, ‘Nam enyịn̄ Jehovah edi ebiet ubọhọ fo.’ (Zeph. 3:12) Enye ama ọdọhọ ke kpa ye oro idahaemi edide ini inemesịt ọnọ ikọt Jehovah ke ediwak usụn̄, ke enye edi n̄ko ata akpan ini emi anamde owo ekere n̄kpọ. Akwa usen Jehovah ekpere; edi mme owo ke ẹsụk ẹkaka iso ẹyom ubọhọ ke nsunsu ido ukpono, ke ukara owo, ke inyene, ke editre ndidọn̄ enyịn ke se ikade iso ke ererimbot, ye ke mme n̄kpọ ntre. Man inyene ata ubọhọ, ana ikot enyịn̄ Jehovah, emi esịnede ndidiọn̄ọ, ndinen̄ede n̄kpono, nnyụn̄ mbuọt idem ke Owo emi ekerede enyịn̄ oro, nnyụn̄ nda kpukpru se inyenede mma enye.

David Splane, owo Otu Ukara, ama ọnọ utịn̄ikọ ofụri esịt en̄wen emi ekedemerede owo udọn̄; ibuotikọ esie ekedi “Ndi Afo Omodụk Nduọkodudu Abasi?” Enye ọkọdọhọ ke Abasi ndiduọk odudu iwọrọke ke enye inamke utom, sia Jehovah ye Eyen esie ke “[ẹnanam] utom” ke ofụri ndamban̄a usen nduọkodudu oro man ẹkpesu uduak Abasi kaban̄a mme n̄kpọ emi ẹkebotde ke isọn̄. (John 5:17) Edi didie ke nnyịn ikeme ndidụk nduọkodudu Abasi? Emi esịne edikpọn̄ idiọkn̄kpọ ye edida idem nnyịn ke edinen. Ana inyene mbuọtidem inyụn̄ isiti uduak Abasi ke kpukpru se inamde, inọ uduak emi ibetedem nte ikekeme. Oro ekeme ndisọn̄ ndusụk ini, edi ana ibọ item inyụn̄ ibere ye esop Jehovah. Brọda Splane ama ekpe ye otuowo emi ete ẹnam kpukpru se ẹkekeme man ẹdụk nduọkodudu Abasi.

Ibuotikọ akpatre utịn̄ikọ, emi Antony Morris, owo Otu Ukara, ọkọnọde ekedi “Nnyịn Ibet Nso?” Brọda Morris ama etịn̄ nte edima ete emi oyomde nditọ esie ẹkụt se imọ itịn̄de ọnọ otuowo aban̄a se iditịbede ke mîbịghike, kpa mme n̄kpọ emi mme anam-akpanikọ asan̄autom Abasi ẹtiede-tie ẹbet. Mme ntịn̄nnịm ikọ oro ẹsịne mfiori “Emem ye ifụre!” ye nsobo mme nsunsu ido ukpono. (1 Thess. 5:2, 3; Edi. 17:15-17) Brọda Morris ama odụri mme owo utọn̄ aban̄a ndisidọhọ “Anaedi Armageddon ọtọn̄ọ oro,” ke ini mmọ ẹkopde se itịbede ke mbụk n̄kpọntịbe. Enye ọkọdọhọ yak ẹdat esịt, ẹnyene ime, ẹtie ẹbet nte ẹdọhọde ke Micah 7:7. Enye ama esịn udọn̄ n̄ko ọnọ kpukpru owo ete ẹdiana kiet ye Otu Ukara, nte mbonekọn̄ emi ẹdude ke iso ekọn̄. Enye ama ọdọhọ ete: “Ẹsọn̄ esịt, kpukpru mbufo emi ẹbetde Jehovah.”—Ps. 31:24.

Ke ndida n̄keberi, ẹma ẹnọ mme enịm-mbụk ntọt. Geoffrey Jackson, owo Otu Ukara, ama ọtọt ke ẹdiomi ndisio mmemmem nsiondi Enyọn̄-Ukpeme eke ukpepn̄kpọ ke Ikọmbakara nte ndomonse nnọ mbon oro mînen̄ekede ifiọk ndikot Ikọmbakara. Ekem Stephen Lett ama ọtọt ke Otu Ukara ẹyenam ndutịm man ẹka utom ubọkerọn̄ ẹnọ mme esenyịn district ye iban mmọ ke United States. Enye ama ọtọt n̄ko ke Ufọkn̄wed Unọ Mme Asan̄autom Ukpep edikere Ufọkn̄wed Ukpep Bible Eke Nditọete Iren Emi Mîdọhọ Ndọ. Enye ama onyụn̄ ọdọhọ ke ẹyesọp nditọn̄ọ Ufọkn̄wed Ukpep Bible Eke Mme Christian Oro Ẹdọde Ndọ. Ufọkn̄wed emi ọyọnọ mme ọdọ ndọ n̄kaiso ukpep man ẹkpenen̄ede ẹnyene ufọn ẹnọ esop Jehovah. Brọda Lett ama ọtọt n̄ko ke Ufọkn̄wed Mme Esenyịn Oro Ẹsan̄ade-San̄a ye Iban Mmọ ye Ufọkn̄wed Mbon Kọmiti N̄kọk Itieutom ye Iban Mmọ ẹdisidi ikaba ke isua ke Patterson, ndien ke ẹyenam ndutịm man mbon oro ẹma ẹkedodụk ẹfiak ẹdụk.

Se ikenen̄erede itụk owo ke utịt mbono oro ekedi akam nsụhọdeidem emi John E. Barr, emi edide owo Otu Ukara ke ediwak isua, okonyụn̄ edide isua 97, ọkọbọn̄de ke ofụri esịt. * Kpukpru owo ẹma ẹkụt ke akananam owo inịmke utọ mbono ofụri isua enye emi.

[Mme Ikọ Idakisọn̄]

[Se ẹwetde ke ikpọ abisi ke page 19]

Kpukpru owo ẹma ẹma ndụn̄ọde oro akanamde ẹnen̄ede ẹdiọn̄ọ mme owo

[Se ẹwetde ke ikpọ abisi ke page 20]

Jehovah ọmọdiọn̄ utom ukwọrọikọ ke Ethiopia