Mme Ekikere Oro Ẹnọde Ẹban̄a Utuakibuot Ubon ye Ukpepn̄kpọ Idemowo

KE NTỌN̄Ọ ntọn̄ọ 2009, mme esop Mme Ntiense Jehovah ke ofụri ererimbot ẹma ẹnam ukpụhọde ke ndutịm mbono esop mmọ. Ẹma ẹtọ mbono esop iba oro ẹkesinịmde ke ufọturua ẹdian kiet ẹnyụn̄ ẹsịn udọn̄ ẹnọ kpukpru owo ẹte ẹda mbubreyo oro mmọ mînyeneke mbono esop do ẹnịm utuakibuot ubon m̀mê ukpepn̄kpọ idemowo. Ndi afo ke ada ini emi anam n̄kpọ nte odotde? Ndi afo ke ọbọ ọyọhọ ufọn esie?

Ndusụk owo ẹkere m̀mê nso ke ikpemek ndida n̄kpep n̄kpọ ke ini utuakibuot ubon. Otu Ukara iduakke ndimek usụn̄ utuakibuot kiet nnọ kpukpru ubon. Sia mme idaha ẹdide nsio nsio, ọfọn ibuot ufọk kiet kiet m̀mê owo kiet kiet odụn̄ọde nte ẹdinamde ndutịm eke urua ke urua emi ke usụn̄ oro ọfọnde akan.

Ndusụk owo ẹsida ini emi ẹtịm idem ẹnọ mme mbono esop, edi idịghe n̄kukụre se ẹkpenamde ke utuakibuot ubon edi oro. Mbon eken ẹsikot, ẹneme, ẹnyụn̄ ẹnanam mme mbụk N̄wed Abasi ẹwụt, akpan akpan ke ntak n̄kpri nditọwọn̄. Ekeme ndidi idiyomke, idinyụn̄ ifọnke ẹsinịm enye ke mbụme ye ibọrọ kpukpru ini nte ẹsinamde ke mme mbono esop. Ndinịm enye ke usụn̄ oro eferede owo ke idem ayanam ẹkeme ndineme nneme nnyụn̄ n̄kọk ibuot nte ọfọnde. Utọ idaha oro esinam ẹkeme ndisio n̄kpọ ndi, ndien emi ekeme ndinam kpukpru owo ẹti ẹnyụn̄ ẹma ndutịm emi.

Ete kiet emi enyenede nditọ ita ewet ete: “Nnyịn isiwak ndida se inamde nto edikot Bible. Nnyịn owo kiet kiet imesikot kan̄a mme ibuot oro iyomde ndineme, ekem nditọ nnyịn ẹmek nsio nsio ikpehe ndida nnam ndụn̄ọde, ndien ekem ẹdineme se mmọ ẹkekụtde. Michael [emi edide isua itiaba] esiwak ndiwet ndise m̀mê ewet n̄kpọ aban̄a ikpehe ekikere kiet. David [isua 13] ye Kaitlyn [isua 15] ẹkeme ndiwet n̄kpọ mban̄a mbụk Bible oro nte n̄kpọ emi ẹkekụtde se iketịbede ke enyịn. Ke uwụtn̄kpọ, ke ini ikokotde iban̄a nte Joseph akakabarede ndap asan̄uyo ye akama cup Pharaoh, Kaitlyn ama ewet n̄kpọ aban̄a mbụk oro nte enye ekedi owo n̄kpọkọbi en̄wen oro okodude do okụt se iketịbede.”—Gen., ib. 40.

Nte ido edide, ubon ye ubon idịghe ukem. Ekeme ndidi se ifọnde ye owo m̀mê ubon kiet idifọnke ye en̄wen. Ekebe oro etienede mi owụt nsio nsio ekikere oro ẹnọde ke nte ẹkemede ndinam utuakibuot ubon m̀mê ukpepn̄kpọ idemowo. Afo emekeme ndinyene ediwak ekikere en̄wen.

[Ekebe/Ndise ke page 6, 7]

 Eke mme ubon emi n̄kparawa ẹdude:

• Ẹkot ẹnyụn̄ ẹneme Mme Mbụme N̄kparawa Owo Ẹbụpde—Mme Ibọrọ Ẹnyenede Ufọn.

• Ẹkpep se ẹkpekenamde “Edieke ẹkpekedude ke eyo Bible.” (Se Enyọn̄-Ukpeme eke May 15, 1996, page 14, ikpehe ekikere 17-18.)

• Ẹneme ẹban̄a mme utịtmbuba anyan ini ye eke ibio ini.

• Ẹse ẹnyụn̄ ẹneme mme vidio esop Abasi ke ini ke ini.

• Ẹneme ibuotikọ Enyọn̄-Ukpeme oro “Eke N̄kparawa Owo.”

Eke mme ebe ye n̄wan emi mînyeneke nditọ:

• Ẹneme ibuot 1, 3, 11-16 ke n̄wed Ukpọhọde Inemesịt Ubon.

• Ẹneme se ẹkedụn̄ọrede ẹkụt ke edikot Bible.

• Ẹtịm idem ẹnọ Ukpepn̄kpọ Bible Esop m̀mê Ukpepn̄kpọ Enyọn̄-Ukpeme.

• Ẹneme nte ẹkemede nditat utom ukwọrọikọ mbufo nte ebe ye n̄wan.

Eke nditọete emi mîdọhọ ndọ m̀mê eke mbon emi iman mmọ ẹkeda ido ukpono en̄wen:

• Ẹkpep mbufa n̄wed emi ẹkebọde ke mbono district.

• Ẹkot n̄kani Yearbook ye eke isua emi.

• Ẹnam ndụn̄ọde ẹban̄a mme mbụme oro ẹsiwakde ndibụp ke efakutom mbufo.

• Ẹtịm se ẹdinemede ke an̄wautom.

Eke mme ubon emi ẹnyenede n̄kpri nditọ:

• Ẹnam mme mbụk Bible ẹwụt.

• Ẹbre mbre emi ẹkemede ndimụm n̄kpọ ndọn̄ ke ibuot, utọ nte mbon oro ẹdude ke page 30 ye 31 ke Awake!

• Ẹkere obufa n̄kpọ ẹnam ke ini ke ini. (Se “Enen̄ede Odot Ẹsịn Ukeme!” ke Enyọn̄-Ukpeme eke February 15, 2011, page 11.)

• Ẹneme ibuotikọ Enyọn̄-Ukpeme oro “Kpep Nditọ Fo.”