Mme Mbụme Oro Mme Andikot Ẹbụpde
Mme Mbụme Oro Mme Andikot Ẹbụpde
Ndi ẹkeme ndidiọn̄ọ nnennen ibat ntịn̄nnịm ikọ oro ẹban̄ade Messiah ke N̄wed Abasi Usem Hebrew?
Edieke itịn̄de enyịn idụn̄ọde N̄wed Abasi Usem Hebrew, iyokụt ediwak ntịn̄nnịm ikọ oro ẹkesude Jesus Christ ke idem. Ntịn̄nnịm ikọ emi ẹma ẹtịn̄ ẹban̄a ubon emi Messiah editode, ini emi enye ediwụtde idem, se enye edinamde, nte ẹdinamde n̄kpọ ye enye, ye itie oro enye enyenede ke ndutịm Jehovah Abasi. Kpukpru emi ẹdiana kiet ẹnam ifiọk ke Jesus edi Messiah. Edi oyom ikpeme edieke iyomde ndifiọk nnennen ibat ntịn̄nnịm ikọ oro ẹban̄ade Messiah ke N̄wed Abasi Usem Hebrew.
Kpukpru owo inyeneke ekikere kiet ke ntịn̄nnịm ikọ oro ẹban̄ade Messiah. Alfred Edersheim ekewet ke n̄wed esie oro The Life and Times of Jesus the Messiah, ete ke uwetn̄kpọ mme rabbi eset ẹkedọhọ ke itie 456 ke N̄wed Abasi Usem Hebrew ẹban̄a Messiah, okposụkedi emi ediwak mmọ mîsiakke Messiah. Edi, edieke itịn̄de enyịn idụn̄ọde itie 456 oro, emi anam ikere m̀mê ndusụk mmọ ẹsụk ẹdi ntịn̄nnịm ikọ oro ẹkeban̄ade Jesus Christ. Ke uwụtn̄kpọ, Edersheim ọkọdọhọ ke mme Jew ẹkekere ke Genesis 8:11 aban̄a Messiah. Mmọ ẹkenịm ke “ikọn̄ olive oro ibiom akadade edi okoto Obot Messiah.” Edersheim ama asiak n̄ko Exodus 12:42. Man owụt ukwan̄ ekikere oro mme Jew ẹkenyenede ẹban̄a itien̄wed oro, enye ekewet ete: “Ukem nte Moses okotode desat edi, kpa ntre ke Messiah edito Rome edi.” Edisọsọn̄ ediwak nditọ ukpepn̄kpọ ye mbon en̄wen ndidọhọ ke Genesis 8:11, Exodus 12:42, ye nte ẹnamde mmọ ẹn̄wan̄a ẹnyene ẹbuana ye Jesus Christ.
Idem ke ini ibatde sụk mme ntịn̄nnịm ikọ oro ẹkesude Jesus Christ ke idem, edisụk isọsọn̄ ndinyịme m̀mê mmọ ẹdi ifan̄. Da ke uwụtn̄kpọ, Isaiah ibuot 53, emi esịnede ediwak ntịn̄nnịm ikọ oro ẹban̄ade Messiah. Isaiah 53:2-7 eketịn̄ ntem enịm: “Enye iyehe idem . . . Ẹma ẹsịn enye ke ndek, mme owo ẹnyụn̄ ẹsọn enye . . . Enye ama emen mme udọn̄ọ nnyịn obiom . . . Ẹkekịm enye ke ntak ubiatibet nnyịn . . . Ẹda enye ẹka nte erọn̄ eke ẹdade ẹka ndiwot.” Ndi ẹkpeda kpukpru se idude emi ke Isaiah 53:2-7 nte ntịn̄nnịm ikọ kiet emi aban̄ade Messiah, mîdịghe ndi ẹkpeda mmọ kiet kiet nte nsio nsio ntịn̄nnịm ikọ?
Se n̄ko Isaiah 11:1, emi ọdọhọde ete: “N̄kọk eyetịbe ke etak Jesse; nsehe eke edin̄wụmde mfri oyonyụn̄ asiaha ke orụn̄ esie.” Ntịn̄nnịm ikọ emi odu n̄ko ke ufan̄ikọ 10. Ndi ikpada ufan̄ikọ mbiba emi nte nsio nsio ntịn̄nnịm ikọ mîdịghe ndi ikpada mmọ nte ntịn̄nnịm ikọ kiet emi ẹfiakde-fiak ẹtịn̄? Nte idade Isaiah ibuot 53 ye ibuot 11 oro ekeme ndinam mme ntịn̄nnịm ikọ oro ẹban̄ade Messiah awak m̀mê ekpri.
Mmọdo, ọfọn itre ndisiak ata nnennen ibat ntịn̄nnịm ikọ oro ẹban̄ade Messiah ke N̄wed Abasi Usem Hebrew. Esop Jehovah ewet ediwak ntịn̄nnịm ikọ emi ẹban̄ade Jesus ye nte mmọ ẹkesude. * Mmọ ẹkeme ndin̄wam nnyịn ke ukpepn̄kpọ idemowo, ke ukpepn̄kpọ ubon, ye ke an̄wan̄wa utom ukwọrọikọ. Akan oro, ata ediwak ntịn̄nnịm ikọ oro ẹban̄ade Messiah, inamke n̄kpọ m̀mê mmọ ẹdi ifan̄, ẹnen̄ede ẹnam ifiọk ke Jesus edi Christ, m̀mê Messiah.
[Ikọ Idakisọn̄]
^ ikp. 7 Insight on the Scriptures, Eboho 1, page 1223; Eboho 2, page 387; “All Scripture Is Inspired of God and Beneficial,” page 343-344; Nso ke Bible Enen̄ede Ekpep? page 200.
