‘Ẹdọn̄ Kpukpru Mbon Mfụhọ Esịt’
‘Ẹdọn̄ Kpukpru Mbon Mfụhọ Esịt’
“Jehovah emeyet mi aran ete . . . ndọn̄ kpukpru mbon mfụhọ esịt.”—ISA. 61:1, 2.
1. Nso ke Jesus akanam ọnọ mbon oro ẹkefụhọde, ndien ntak-a?
JESUS CHRIST ọkọdọhọ ete: “Udia mi edi ndinam uduak enye emi ọkọdọn̄de mi nnyụn̄ nnam utom esie mma.” (John 4:34) Jesus ama owụt mme utịbe utịbe edu Ete esie ke ini enye akanamde utom oro Abasi ọkọnọde enye. Kiet ke otu edu emi edi akwa ima oro Jehovah amade mme owo. (1 John 4:7-10) Apostle Paul ama etịn̄ aban̄a usụn̄ kiet emi Abasi esiwụtde ima oro ke ini enye ọkọdọhọde ke Jehovah edi “Abasi kpukpru ndọn̄esịt.” (2 Cor. 1:3) Jesus ama owụt orụk ima oro ke ini enye akanamde se ẹketịn̄de ke ntịn̄nnịm ikọ Isaiah. (Kot Isaiah 61:1, 2.) Jesus ama okot ntịn̄nnịm ikọ oro ke synagogue ke Nazareth onyụn̄ owụt ke ntịn̄nnịm ikọ oro aban̄a imọ. (Luke 4:16-21) Ke ofụri ini utom ukwọrọikọ esie, Jesus ama ada ima ọdọn̄ kpukpru mbon oro ẹkefụhọde esịt, ọnọ mmọ nsịnudọn̄, onyụn̄ anam mmọ ẹnyene ifụre.
2, 3. Ntak emi anade mme anditiene Christ ẹkpebe enye ke ndidọn̄ mbon en̄wen esịt-e?
2 Oyom kpukpru mme anditiene Jesus ẹkpebe enye ke ndidọn̄ mbon oro ẹfụhọde esịt. (1 Cor. 11:1) Paul ọkọdọhọ ete: “Ẹka iso ẹdọn̄ kiet eken esịt ẹnyụn̄ ẹbọp kiet eken ọkọri.” (1 Thess. 5:11) Enen̄ede oyom idọn̄ mbon en̄wen esịt, sia ubonowo ẹdude ke “ndiọkeyo emi ọsọn̄de ndiyọ.” (2 Tim. 3:1) Ke ofụri ererimbot, nti owo ẹsiwak ndisobo ye mbon oro ẹtịn̄de ẹnyụn̄ ẹnamde n̄kpọ oro abiakde mmọ, obụn̄de mmọ esịt, onyụn̄ anamde mmọ ẹfụhọ.
3 Nte Bible eketịn̄de enịm, ke mme akpatre usen idiọk editịm n̄kpọ emi, ediwak owo ẹdi “mme ama idem, mme ama okụk, ẹkohode idem, ẹseri iseri, ẹsụn̄i isụn̄i, ẹsọn̄ ibuot ye ete ye eka, ẹnana esịtekọm, inyeneke nsọn̄ọnda, inyeneke ndammana ima, inyịmeke ndidụk ediomi ekededi, mbon edidọk, ẹnana mfara ke idem, ẹtie obom obom, imaha eti ido, mme andida owo nnọ, ẹsọn̄ ibuot, ẹkohode idem, ẹma unọ idem inemesịt utu ke ndima Abasi.” Mme utọ edu emi ẹwak etieti mfịn, sia “mme idiọkowo ye mbon abian̄a [ẹdọdiọn̄] ẹdiọk ẹka iso.”—2 Tim. 3:2-4, 13.
4. N̄kpọ ẹtie didie ke ererimbot ke eyo nnyịn?
4 Kpukpru emi ikpakpaha nnyịn idem, sia Ikọ Abasi etịn̄ in̄wan̄-in̄wan̄ ete ke “ofụri ererimbot esịne ke idak odudu andidiọk.” (1 John 5:19) “Ofụri ererimbot” esịne ndutịm ukaraidem, eke ido ukpono, ye eke unyamurua, ọkọrọ ye mme ndutịm usuanetop. Ke akpanikọ, enen̄ede odot ẹkot Satan kpa Devil “andikara ererimbot emi” ye “abasi editịm n̄kpọ emi.” (John 14:30; 2 Cor. 4:4) N̄kpọ aka iso ndidọdiọn̄ ndiọk ke ofụri isọn̄ koro Satan asan̄a ye akwa iyatesịt, sia enye ọfiọkde ete ini emi osụhọde mbemiso Jehovah osobode imọ efep, edi ibio. (Edi. 12:12) Nnyịn ikop ndọn̄esịt didie ntem ndifiọk ke Abasi ọmọn̄ ososobo Satan ye idiọk editịm n̄kpọ esie efep, ye nte ke ẹmọn̄ ẹbiere eneni oro Satan ekedemerede aban̄a ukara Jehovah!—Gen., ib. 3; Job, ib. 2.
Ke Ẹkwọrọ Eti Mbụk ke Ofụri Isọn̄
5. Didie ke ẹsu ntịn̄nnịm ikọ oro aban̄ade utom ukwọrọikọ ke mme akpatre usen emi?
5 Se Jesus eketịn̄de ke osu ke idiọk ini emi idude uwem mi. Enye ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.” (Matt. 24:14) Ikọ ntiense emi ẹnọde ẹban̄a Obio Ubọn̄ Abasi mi ke ofụri isọn̄ aka iso nditetịm ntara. Mfịn, Mme Ntiense Jehovah emi ẹwakde ẹbe 7,500,000, ẹnyụn̄ ẹdude ke se ibede esop 107,000 ke ofụri isọn̄, ke ẹkwọrọ Obio Ubọn̄ Abasi kpa nte Jesus ọkọkwọrọde onyụn̄ ekpep mme owo n̄kpọ aban̄a Obio Ubọn̄ Abasi. (Matt. 4:17) Utom ukwọrọikọ oro inamde ke eyomfịn anam inen̄ede idọn̄ mbon oro ẹfụhọde esịt. Kamse, ke 2009 ye 2010 kpọt owo 570,601 ẹkena baptism nte Mme Ntiense Jehovah!
6. Nso ke afo ekere aban̄a utom ukwọrọikọ nnyịn nditara ntem?
6 Ndifiọk nte ke Mme Ntiense Jehovah ẹkabade ẹnyụn̄ ẹsuan mme n̄wed Bible ke se ibede usem 500 idahaemi anam ẹkeme ndidiọn̄ọ adan̄a nte utom emi okponde. Akananam owo ikwe orụk n̄kpọ ntem toto ke editọn̄ọ ererimbot! Ikpehe esop Jehovah eke isọn̄ ndidu, nnam utom, nnyụn̄ nnam n̄kọri ẹdi ata n̄wọrọnda n̄kpọ. Emi ikpekemeke nditịbe ke ererimbot emi Satan akarade mi edieke spirit Abasi mîkpan̄wamke inyụn̄ inọ ndausụn̄. Sia ẹkwọrọde eti mbụk ke ofụri isọn̄, mbon mfụhọ oro ẹnyịmede etop Obio Ubọn̄ ke ẹtiene nditọete nnyịn ẹbọ ndọn̄esịt oro N̄wed Abasi ọnọde.
Ndidọn̄ Nditọete Nnyịn Esịt
7. (a) Ntak emi nnyịn mîkemeke ndidori enyịn ite Jehovah osio kpukpru nnanenyịn efep idahaemi-e? (b) Nnyịn isan̄a didie ifiọk ke ẹkeme ndiyọ ukọbọ ye ukụt?
7 Nnyịn iyosobo mme n̄kpọ emi ẹnamde owo ofụhọ ke ererimbot emi ọyọhọde ye idiọkido ye ndutụhọ mi. Nnyịn ikemeke ndidori enyịn ke Abasi oyosio kpukpru n̄kpọ oro mîyakke owo okop inemesịt m̀mê ẹnamde owo ofụhọ efep tutu enye osobo editịm n̄kpọ emi efep. Kan̄a ke emi, nte isụk isobode ukọbọ emi ẹketịn̄de ẹnịm, ẹyedomo nnyịn n̄ko m̀mê iyaka iso isọn̄ọ ida ye Jehovah ye ukara esie. (2 Tim. 3:12) Edi, sia Ete nnyịn eke heaven an̄wamde onyụn̄ ọdọn̄de nnyịn esịt, nnyịn imekeme ndikpebe mme Christian oro ẹkeyetde aran ke Thessalonica eset, oro ẹkedade ime ye mbuọtidem ẹyọ ukụt ye ukọbọ.—Kot 2 Thessalonica 1:3-5.
8. Nso uyarade idu ke N̄wed Abasi ndiwụt ke Jehovah esidọn̄ mme asan̄autom esie esịt?
8 Ke akpanikọ, Jehovah esinọ mme asan̄autom esie ndọn̄esịt oro mmọ ẹyomde. Ke uwụtn̄kpọ, ke ini Jezebel, idiọk ọbọn̄-an̄wan ekedịghede prọfet Elijah uwem, idem ama enyek prọfet oro enye onyụn̄ efehe, tutu ọdọhọ ke imoyom n̄kpa. Edi utu ke ndisua nnọ Elijah, Jehovah ama ọdọn̄ enye esịt onyụn̄ ọnọ enye uko man aka iso anam utom esie nte prọfet. (1 Ndi. 19:1-21) Se iketịbede ke esop mme Christian eyo mme apostle owụt nnyịn ke Jehovah esidọn̄ ikọt esie esịt. Ke uwụtn̄kpọ, nnyịn imesikot iban̄a ini emi “esop ke ofụri Judea ye Galilee ye Samaria [okodụkde] ini emem onyụn̄ ọkọri.” Ke adianade do, “nte enye [akasan̄ade] ke uten̄e Jehovah ye ke ndọn̄esịt edisana spirit enye [ọkọdọdiọn̄] ọtọt.” (Utom 9:31) Nnyịn iwụt esịtekọm didie ntem nte ke nnyịn n̄ko imenyene “ndọn̄esịt edisana spirit”!
9. Ntak emi ndikpep mban̄a Jesus ekemede ndidọn̄ nnyịn esịt?
9 Nnyịn mme Christian imọbọ ndọn̄esịt ke ndikpep mban̄a Jesus Christ nnyụn̄ nsan̄a ke nde ikpat esie. Jesus ọkọdọhọ ete: “Ẹtiene mi, kpukpru mbufo emi ẹkpade utom ẹnyụn̄ ẹbiomde ndodobi mbiomo, ndien nyọnọ mbufo nduọkodudu. Ẹmen ọkpọnọ mi ẹkọn̄ọ ke itọn̄ mbufo ẹnyụn̄ ẹkpebe mi, koro ami mmenyene ifụre ifụre ido nnyụn̄ nsụhọde idem, ndien mbufo ẹyekụt nduọkodudu ẹnọ ukpọn̄ mbufo. Koro ọkpọnọ mi ememem, mbiomo mi onyụn̄ efefere.” (Matt. 11:28-30) Ndikpep nte Jesus ekesinamde n̄kpọ ye mme owo inem inem nnyụn̄ n̄kpebe eti uwụtn̄kpọ esie eyenen̄ede an̄wam nnyịn ke nnanenyịn ekededi oro ekemede ndisịm nnyịn.
10, 11. Mmanie ẹkeme ndidọn̄ owo esịt ke esop?
10 Nditọete Christian nnyịn ẹkeme ndidọn̄ nnyịn esịt n̄ko. Ke uwụtn̄kpọ, kere ban̄a nte mbiowo ke esop ẹsin̄wamde mbon oro ẹsobode nnanenyịn. James mbet ekewet ete: “Nte odu owo ekededi oro ọdọn̄ọde ke otu mbufo? Yak enye okot mbiowo esop ẹdi ẹbịne enye, ndien yak mmọ ẹbọn̄ akam ẹnọ enye.” Nso ididi utịp? “Akam mbuọtidem ayanam idem ọsọn̄ owo udọn̄ọ oro, ndien Jehovah eyemenede enye ke enyọn̄. N̄ko, edieke enye akanamde idiọkn̄kpọ, ẹyefen enye.” (Jas. 5:14, 15) Mbon en̄wen ke esop ẹkeme ndinọ ndọn̄esịt n̄ko.
11 Esimem iban utom ndinyene nneme ye iban eken mban̄a nsio nsio mfịna. N̄kani iban nditọete emi ẹnyenede mbufiọk ẹkeme ndinọ n̄kpri iban ekese nti item. Ekeme ndidi n̄kani iban nditọete emi ẹma ẹsobo mme ukem n̄kpọ oro. Esịtmbọm mmọ ekeme ndinen̄ede n̄n̄wam. (Kot Titus 2:3-5.) Edi akpanikọ nte ke mbiowo ye mbon eken ẹkeme, ndien okponyụn̄ ana mmọ “ẹsọn̄ọ ukpọn̄ eke ofụhọde esịt” ke otu nnyịn. (1 Thess. 5:14, 15) Ndien ọfọn iti ke Abasi “[esidọn̄] nnyịn esịt ke kpukpru ukụt nnyịn, man nnyịn ikpekeme ndida ndọn̄esịt oro Abasi ọnọde nnyịn ndọn̄ mbon oro ẹdude ke ukụt ekededi esịt.”—2 Cor. 1:4.
12. Ntak emi ọfọnde isidụk mbono esop mme Christian?
12 Akpan usụn̄ kiet ndibọ ndọn̄esịt edi ndidụk mme mbono esop mme Christian emi se ẹsinemede ke Bible ẹsisịnde udọn̄ ẹnọ nnyịn. Nnyịn imesikot ke Judas ye Silas ẹma “ẹda ediwak utịn̄ikọ ẹsịn udọn̄ ẹnọ nditọete ẹnyụn̄ ẹsọn̄ọ mmọ idem.” (Utom 15:32) Mme andibuana ke esop ẹsineme nneme emi ọbọpde-bọp ye kiet eken mbemiso ye ke mme mbono esop nnyịn ẹma ẹkesuana. Ntre idem edieke ibọde ufen ke ntak afanikọn̄ oro esịmde nnyịn, ẹyak nnyịn ikûdian̄ade utie ikpọn̄, sia ndinam oro mîdikọkke mfịna oro. (N̄ke 18:1) Utu ke oro, ọyọfọn inam item oro apostle Paul akadade odudu spirit ọnọ, ete: “Ẹyak nnyịn inyụn̄ ikere nte ikpedemerede kiet eken inọ ima ye nti utom, ikûsịn ndisop idem ọtọkiet, nte ido ndusụk owo edide, edi isịn udọn̄ inọ kiet eken, ndien mbufo ẹdọdiọn̄ ẹnam ntem adan̄a nte ẹkụtde ẹte usen oro ke asan̄a ekpere.”—Heb. 10:24, 25.
Bọ Ndọn̄esịt to Ikọ Abasi
13, 14. Wụt nte N̄wed Abasi ekemede ndidọn̄ nnyịn esịt.
13 Edide nnyịn idi mme Christian oro ẹnade baptism m̀mê itọtọn̄ọ ndikpep mban̄a Abasi ye mme uduak esie, imekeme ndibọ ekese ndọn̄esịt nto Ikọ Abasi oro ẹwetde-wet. Paul ekewet ete: “Kpukpru n̄kpọ oro ẹkewetde ke ini edem, ẹkewet mmọ ndida nteme nnyịn, man ikpenyene idotenyịn oto ke nnyịn ndiyọ nnyụn̄ mbọ ndọn̄esịt oro N̄wed Abasi ọnọde.” (Rome 15:4) Edisana N̄wed Abasi ekeme ndinọ nnyịn ndọn̄esịt onyụn̄ anam nnyịn “[iben̄e] idem ọyọhọ ọyọhọ ndinam eti utom ekededi.” (2 Tim. 3:16, 17) Ndinen̄ede mfiọk uduak Abasi nnyụn̄ nnyene ata idotenyịn kaban̄a ini iso eyenen̄ede ọnọ nnyịn ndọn̄esịt. Ke ntre, ẹyak nnyịn isinen̄ede ikot Ikọ Abasi ye mme n̄wed ukpep Bible emi ẹkemede ndinọ nnyịn ndọn̄esịt nnyụn̄ n̄n̄wam nnyịn ke ediwak usụn̄.
14 Jesus ama enịm uwụtn̄kpọ ọnọ nnyịn ke ndida N̄wed Abasi nteme nnyụn̄ ndọn̄ mbon en̄wen esịt. Ke uwụtn̄kpọ, kiet ke otu ini oro enye okowụtde mme owo idem ke ama ekeset, enye ‘ama atat N̄wed Abasi ọyọhọ ọyọhọ’ ọnọ mbet esie iba. Ikọ esie ama enen̄ede otụk mmọ esịt. (Luke 24:32) Apostle Paul ama ekpebe uwụtn̄kpọ Jesus onyụn̄ “ada N̄wed Abasi ọkọk ibuot.” Ke Beroea, mbon oro ẹkekopde ikọ esie ẹma “[ẹbọ] ikọ Abasi ye ata ọkpọsọn̄ udọn̄, ẹnen̄ede ẹdụn̄ọde N̄wed Abasi ke usen ke usen.” (Utom 17:2, 10, 11) Odot didie ntem nnyịn ndisikot Bible ke usen ke usen, ibọ ufọn ito Bible ye n̄wed mme Christian oro ẹsion̄ode man ẹnọ nnyịn ndọn̄esịt ye idotenyịn ke ini afanikọn̄ emi!
Mme Usụn̄ En̄wen Ndidọn̄ Mbon En̄wen Esịt
15, 16. Nso idi ndusụk n̄kpọ oro ikemede ndinam man in̄wam inyụn̄ idọn̄ nditọete nnyịn esịt?
15 Nnyịn imekeme ndin̄wam nnyụn̄ ndọn̄ nditọete Christian nnyịn esịt ke nsio nsio nti usụn̄. Ke uwụtn̄kpọ, imekeme ndika n̄kedep n̄kpọudia nnọ eyenete nnyịn emi ọdọn̄ọde m̀mê ọsọn̄de. Imekeme ndin̄wam mbon en̄wen nnam n̄kpọ ke esịtufọk inyụn̄ iwụt ke imese mbubehe mmọ. (Phil. 2:4) Imonyụn̄ ikeme nditoro nti edu emi nditọete nnyịn ẹnyenede, utọ nte ima, usọ, uko, ye mbuọtidem.
16 Imekeme ndika ufọk nditọete nnyịn oro ẹsọn̄de n̄kese mmọ inyụn̄ ikpan̄ utọn̄ ikop se mmọ ẹditịn̄de iban̄a nte n̄kpọ eketiede ye mmọ ke ini edem ye mme edidiọn̄ oro mmọ ẹbọde ke utom Jehovah man idọn̄ mmọ esịt. Emi akam ekeme ndisịn udọn̄ nnọ nnyụn̄ ndọn̄ nnyịn esịt! Imekeme ndikot Bible m̀mê mme n̄wed nnyịn oro ẹkọn̄ọde ke Bible nnọ mbon oro ikade ikese. Imekeme ndineme ibuotikọ Ukpepn̄kpọ Enyọn̄-Ukpeme oro ẹdikpepde urua oro m̀mê se ẹdinemede ke Ukpepn̄kpọ Bible Esop urua oro. Imekeme nditiene mmọ nse DVD oro esop Abasi osiode. Ke adianade do, imekeme ndikot m̀mê ndineme ndinem ifiọkutom oro ẹdude ke mme n̄wed nnyịn ye mmọ.
17, 18. Sia idide mme asan̄autom Jehovah oro ẹsọn̄ọde ẹda, isan̄a didie ifiọk ke Jehovah ayan̄wam onyụn̄ ọdọn̄ nnyịn esịt?
17 Edieke idiọn̄ọde ke ekemmọ andituak ibuot nnọ Jehovah oyom ndọn̄esịt, imekeme ndisiak enyịn̄ esie ke ọkpọkpọ akam nnyịn. (Rome 15:30; Col. 4:12) Nte nnyịn ke idem nnyịn iyọde mme mfịna uwem emi inyụn̄ isịnde ifịk ndidọn̄ mbon en̄wen esịt, imekeme ndinyene ukem mbuọtidem oro andiwet psalm ekenyenede, emi ọkọkwọde ete: “Top mbiomo fo nọ Jehovah, ndien enye ọyọsọn̄ọ fi idem. Tutu amama enye idiyakke edinen owo esehede.” (Ps. 55:22) Ke akpanikọ, Jehovah oyodu ye nnyịn kpukpru ini ndidọn̄ nnyịn esịt nnyụn̄ nnọ nnyịn ibetedem sia idide mme anam-akpanikọ asan̄autom esie.
18 Abasi ọkọdọhọ mbon emi ẹketuakde ibuot ẹnọ enye ke eset ete: “Ami ndi Enye emi ọdọn̄de mbufo esịt.” (Isa. 51:12) Jehovah ayaka iso ọdọn̄ nnyịn esịt onyụn̄ ọdiọn̄ ukeme oro isịnde ndidọn̄ mbon mfụhọ esịt. Edide nnyịn inyene idotenyịn ndidu uwem ke heaven m̀mê ke isọn̄, se Paul ọkọdọhọde nditọete Christian esie oro ẹyetde aran ekeme ndidọn̄ nnyịn esịt: “Ọbọn̄ nnyịn Jesus Christ ye Abasi Ete nnyịn, emi akamade nnyịn okonyụn̄ ọnọde nsinsi ndọn̄esịt ye eti idotenyịn ebe ke mfọnido oro owo mîdotke, ẹkpekam ẹdọn̄ mbufo esịt ẹnyụn̄ ẹnam mbufo ẹsọn̄ọ ẹda ke kpukpru nti edinam ye ikọ.”—2 Thess. 2:16, 17.
Nte Afo Emeti?
• Utom oro idade idọn̄ mbon mfụhọ esịt atara adan̄a didie?
• Nso idi ndusụk n̄kpọ oro ikemede ndinam man idọn̄ mbon en̄wen esịt?
• Mme itie N̄wed Abasi ewe ẹwụt ke Jehovah esidọn̄ ikọt esie esịt?
[Mme Mbụme Ukpepn̄kpọ]
[Ndise ke page 28]
Ndi afo emesitiene ọdọn̄ mbon mfụhọ esịt?
[Ndise ke page 30]
N̄kpri ye ikpọ owo ẹkeme ndisịn udọn̄ nnọ mbon en̄wen
