“Ẹdu ke Ukpeme” Ntak Emi Edide Akpan N̄kpọ Ntre?

“NSO [ididi] idiọn̄ọ edidu fo ye eke akpatre ini editịm n̄kpọ emi?” (Matt. 24:3) Ke ibọrọ mbụme oro, nte ẹwetde ke Matthew ibuot 24, Mark ibuot 13, ye Luke ibuot 21, Jesus ama ọnọ mme mbet esie idiọn̄ọ oro an̄wan̄ade, esịnede ọyọhọ ntọt, ẹkemede ndifiọk, emi owo mînyụn̄ ikemeke ndidue nda ke n̄kpọ en̄wen. Enye ama adian do ete: “Ẹdu ke ukpeme.”​—Matt. 24:42.

Edieke idiọn̄ọ emi edinade in̄wan̄-in̄wan̄ ntre, ntak emi ẹketemede ẹte ẹdu ke ukpeme? Kere ban̄a ntak iba emi etiede nte se ikanamde ẹnọ item oro. Akpa, mme n̄kpọ oro ẹwọn̄ọrede owo ntịn̄enyịn ẹkeme ndinam ndusụk owo ẹfep enyịn ke idiọn̄ọ oro, ndien emi ekeme ndinam mmọ ẹmem ke n̄kan̄ eke spirit ẹnyụn̄ ẹtre ndidu ke ukpeme. Ọyọhọ iba, Christian ekeme ndifiọk mme n̄kpọ emi ẹnamde idiọn̄ọ oro, edi sia mîtịbeke ke ebiet emi enye odụn̄de, enye ekeme ndikere ke ibeheke imọ. Oro ekeme ndinam enye ekere ke “akwa ukụt,” emi edidade ntịn̄nnịm ikọ Jesus ikeberi, ke osụk ebebịghi ndien ke ntre ke ufọn idụhe kan̄a ‘ndidu ke ukpeme.’​—Matt. 24:21.

‘Mmọ Ikọfiọkke’

Jesus ama anam mme anditiene enye ẹti mbon eyo Noah. Idụhe nte owo mîkekwe nte Noah ọkwọrọde ikọ, nte ẹkọn̄de akaka ubom, ye afai eyo oro. Kpa ye oro, ata ediwak owo ‘ikọfiọkke.’ (Matt. 24:37-39) Mme owo ẹnyene ukem edu oro ẹban̄a ntọt mfịn. Ke uwụtn̄kpọ, ediwak owo ẹsiwat uwat ọsọp akan nte ibet ọdọhọde. Emi esinam ukara ẹnam mbot ke mme efak man anam mme owo ẹsụhọde ubọk uwat. Kpasụk ntre, Christian ekeme ndikụt idiọn̄ọ mme akpatre usen edi osụk aka iso odu uwem emi owụtde ke idiọn̄ọ oro ibeheke imọ. Oro ama etịbe ọnọ Arielle, uyen kiet mi ke Edem Usoputịn Africa.

Arielle ama esima ndise bọl ubọk emi iban ẹbrede, ke ekebe ndise. Ke ini ufọkn̄wed mmọ ẹketịmde n̄ka mbre bọl ubọk, idotenyịn nditiene mbre ikayakke enye okụt nte oro ekemede ndibiat nsọn̄idem eke spirit esie. Enye ama odụk man ada gol ọnọ mmọ. Nso iketịbe? Enye ọdọhọ ete: “Ndusụk ke otu mbon n̄ka bọl nnyịn ẹma ẹnyene mme ufan irenowo emi ẹkesidade n̄kpọsọn̄ ibọk ẹnyụn̄ ẹn̄wọn̄de sika. Mmọ ẹma ẹsisak mi ke ntak emi mmen̄ketieneke nnyene ufan erenowo, edi mma nsikere ke oro idịghe mfịna. Ke unana idotenyịn, mbre oro ama ọtọn̄ọ ndinam mi mmem ke n̄kan̄ eke spirit. Ofụri ekikere mi okowụhọ ke bọl ubọk. Ke mme mbono esop, ekikere mi ama esiyo ọkpọn̄ Ufọkmbono Obio Ubọn̄ aka an̄wambre bọl ubọk. Emi ama otụk mme edu mi nte Christian n̄ko. N̄kebreke aba ke ntak inem edi ndikan ekedi ata akpan n̄kpọ ọnọ mi. Mma nsinen̄ede nnam ndomonse man n̄keme ndikan. Emi ama anam efịghe mi. Mma n̄kam ntaba mme ufan mi ke ntak bọl ubọk.

“Kpukpru emi ẹma ẹtre ke ini ẹkenọde mbon oro ẹketuahade ye nnyịn penalti. Mma mben̄e idem ndimụm penalti oro. N̄kọfiọkke  tutu mbọn̄ akam nnọ Jehovah nte an̄wam mi mmụm ke ini ẹtopde! N̄kpọ emi ama anam mfiọk nte idaha eke spirit mi ọkọdiọkde eketre. N̄kasan̄a didie mfiak nsọn̄ idem ke n̄kan̄ eke spirit?

“Mma nse DVD nnyịn oro Young People Ask—What Will I Do With My Life? * Mma mbiere ndifiak nse enye nnyụn̄ nnen̄ede ntịn̄ enyịn nse enye isan̄ emi. Idem n̄kpọ, n̄kọ idaha mi ebiet eke André, akparawa oro drama oro aban̄ade. Mma nnen̄ede ntịn̄ enyịn ke ekikere oro ebiowo ọkọnọde André ete​—kot nyụn̄ tie kere Philippi 3:8. Se ikan̄wamde mi edi oro. Mma n̄kpọn̄ n̄ka mbre bọl oro.

“Nso akwa ukpụhọde ke emi ekedi ntem! N̄kenyeneke aba edu umia mbuba ye mfịghe oro akasan̄ade ye enye. Mma nnen̄ede n̄kop inemesịt nnyụn̄ nnen̄ede n̄kpere nditọete mi. Mme edinam eke spirit ẹma ẹnen̄ede ẹnyene se ẹwọrọde ẹnọ mi. Mma n̄wụk ekikere ke mbono esop, mmọ ẹnyụn̄ ẹfiak ẹnen̄ede ẹnem mi. Mma nnam n̄kọri n̄ko ke utom ukwọrọikọ mi. Idahaemi mmesinam usiakusụn̄ unọ un̄wam ke ini ke ini.”

Edieke mme n̄kpọ oro ẹwọn̄ọrede owo ntịn̄enyịn ẹnamde fi efep enyịn ke idiọn̄ọ oro Jesus ọkọnọde nnyịn, oyom anam n̄kpọ, ukem nte Arielle akanamde. Afo emekeme ndinam ndusụk ke otu se itienede emi. Nam ndụn̄ọde ke Watch Tower Publications Index, emi etiede nte n̄wed ndise obio emi owụtde owo ebiet emi n̄kpọuto ẹdịbede. Enye oyowụt fi ebiet emi ekemede ndikụt nti item ye ọkpọkpọ ifiọkutom mbon oro ẹkesobode mme idomo. Bọ ọyọhọ ufọn to mbono esop mme Christian ebe ke ndinen̄ede ntịm idem nnyụn̄ n̄wet n̄kpọ mbio mbio. Ndusụk owo ẹkụt ke nditie ke iso iso ufọkmbono esin̄wam mmimọ. Ke ini oyomde otuowo ẹtiene ẹbuana, domo ndibabak nnọ ibọrọ. Ke adianade do, du ke edidemede ke n̄kan̄ eke spirit ebe ke ndida se okopde ke mbụk n̄kpọntịbe idahaemi ndomo ye mme ikpehe idiọn̄ọ oro ye mme n̄kpọ eken oro ẹdade ẹdiọn̄ọ “mme akpatre usen.”​—2 Tim. 3:1-5; 2 Pet. 3:3, 4; Edi. 6:1-8.

“Ẹdu ke Mben̄eidem”

Idiọn̄ọ mme akpatre usen etịbe ke ofụri ererimbot, emi esịnede “ofụri isọn̄.” (Matt. 24:7, 14) Ata ediwak owo ẹdụn̄ ke mme ebiet emi ndiọi udọn̄ọ, akan̄, unyekisọn̄, ye mme n̄kpọ eken oro ẹketịn̄de ẹban̄a ẹnen̄erede ẹnọmọ. Edi ndusụk owo ẹdụn̄ ke mme ebiet emi ukeuke emem ye ifụre ẹdude. Edieke akanam afo ke idemfo mûkwe ndusụk ikpehe idiọn̄ọ emi, ndi afo ekpenyene ndikere ke akwa ukụt ke osụk ebebịghi? Oro ikpowụtke eti ibuot.

Ke uwụtn̄kpọ, kere ban̄a se Jesus eketịn̄de aban̄a “ndiọi udọn̄ọ ye akan̄.” (Luke 21:11) Akpa, enye ikọdọhọke ke mmọ ẹdisịm kpukpru ebiet ini kiet m̀mê ke ukem udomo. Utu ke oro, enye ọkọdọhọ ke emi editịbe “ke nsio nsio ebiet.” Ntre nnyịn idorike enyịn ke mme ukem n̄kpọ ẹditịbe ke kpukpru ebiet ke ukem ini. Ọyọhọ iba, esisịt ini ke Jesus ama eketịn̄ aban̄a akan̄, enye ama odụri ndusụk mme anditiene enye utọn̄ aban̄a uyụhọ udia, ete: “Ẹkpeme idem mbak uyụhọ udia . . . ẹdinam esịt mbufo ẹkabade ẹdobi.” (Luke 21:34) Ke ntem, kpukpru Christian ikpodorike enyịn ndikụt nte kpukpru  ikpehe idiọn̄ọ oro ẹtịbede ke edem mmọ. Utu ke oro, Jesus ọkọdọhọ ete: “Ke ini mbufo ẹkụtde nte mme n̄kpọ emi ẹtịbede, ẹfiọk ẹte obio ubọn̄ Abasi emekpere.” (Luke 21:31) Mme n̄kpọ unyene nneme eyomfịn ẹnam ikụt kpukpru ikpehe idiọn̄ọ oro, inamke n̄kpọ m̀mê etịbe ke edem nnyịn m̀mê itịbeke.

Ti n̄ko ete ke Jehovah ama ememek “usen ye hour” emi akwa ukụt editọn̄ọde. (Matt. 24:36) Nte mme n̄kpọ ẹtịbede ke isọn̄ idikpụhọkede usenọfiọn̄ oro.

Jesus ọkọtọt mme Christian ke kpukpru ebiet ete: “Ẹdu ke mben̄eidem.” (Matt. 24:44) Ikpenyene ndidu ke mben̄eidem kpukpru ini. Edi akpanikọ ke nnyịn ikemeke ndinam mme n̄kpọ ukara Abasi tọn̄ọ ke usenubọk tutu n̄kụteyo kpukpru usen. Akan oro, idụhe owo nnyịn emi ọfiọkde se enye edinamde ke ndondo oro akwa ukụt editọn̄ọde. Ekeme ndidi ndusụk owo ẹdinam utom ke in̄wan̄ m̀mê ẹnam n̄kpọ ke ufọk. (Matt. 24:40, 41) Ke ntre, nso ke ikeme ndinam man idu ke mben̄eidem?

Emmanuel, Victorine, ye nditọiban mmọ mbitiokiet ẹdụn̄ ke ikpehe Africa emi mînen̄ekede ikụt kpukpru ikpehe idiọn̄ọ oro. Ntre, mmọ ẹma ẹbiere ndisineme n̄kpọ eke spirit kpukpru usen man an̄wam mmọ ẹdu ke mben̄eidem. Emmanuel ọdọhọ ete: “Ikememke utom ndinyene ini oro ọfọnde ye kpukpru owo. Ke akpatre, ima imek ubak hour, ọtọn̄ọde ke n̄kanika itiokiet esịm ebe itiokiet usenubọk. Ke ima ikeneme itie N̄wed Abasi eke usen, imesikpep ikpehe ekikere ifan̄ ke kiet ke otu n̄wed oro ẹyomde ndikpep urua oro ke mbono esop.” Ndi ndutịm emi an̄wam mmọ ẹka iso ẹdu ke mben̄eidem? Ih! Emmanuel edi anam-ndutịm otu mbiowo ke esop. Victorine esiwak ndinam utom usiakusụn̄ unọ un̄wam ndien enye aman̄wam ediwak owo ẹbọ akpanikọ. Kpukpru nditọ mmọ ke ẹnam n̄kọri eke spirit edifọn edifọn.

Jesus eteme nnyịn ete: “Ẹka iso ẹse, ẹdu ke edidemede.” (Mark 13:33) Kûyak n̄kpọ oro ọwọn̄ọrede owo ntịn̄enyịn anam fi etre ndidu ke edidemede ke n̄kan̄ eke spirit. Utu ke oro, tịn̄ enyịn ke nti item oro ẹnọde ke mme n̄wed nnyịn ye ke mme mbono esop, ukem nte Arielle. Ukem nte ubon Emmanuel, domo ndinam n̄kpọ kpukpru usen man odu ke mben̄eidem onyụn̄ ‘odu ke ukpeme.’

[Ikọ Idakisọn̄]

[Ndise ke page 4]

Edineme mme n̄kpọ eke spirit ke usen ke usen an̄wam Emmanuel ye ubon esie “ẹdu ke mben̄eidem”