Mme Mbụme Oro Mme Andikot Ẹbụpde

Ndi ẹkeme ndidiọn̄ọ ata nnennen ini emi ẹkekọn̄de Jesus Christ ke eto?

Ẹbụp mbụme emi sia etiede nte ke mbụk Gospel emi Mark ye apostle John ẹkedade odudu spirit Abasi ẹwet ẹban̄a n̄kpa Jesus isan̄ake kiet. Mark ọdọhọ ete: “Ekedi ọyọhọ hour ita, ndien mmọ [mbonekọn̄] ẹkọn̄ enye ke eto.” (Mark 15:25) John ọdọhọ “ke n̄kpọ nte ọyọhọ hour itiokiet” ke Pilate akayak Jesus ọnọ mme Jew ete ẹda ẹkekọn̄ ke eto. (John 19:14-16) Mbon emi ẹsinamde Bible an̄wan̄a ẹdomo ndinam n̄kpọ oro etiede nte isan̄ake kiet do an̄wan̄a ke nsio nsio usụn̄. Edi N̄wed Abasi inen̄ekede itịn̄ mme n̄kpọ emi ẹkemede ndida nnam ukpụhọde oro an̄wan̄a. Kpa ye oro, ndikere mban̄a nte mme owo ẹkesibatde ini ke eyo oro ekeme ndinen̄ede n̄n̄wam.

Ke eyo mme apostle, mme Jew ẹkesibahade un̄wana usen ẹsịn ke hour 12, ọtọn̄ọde ke ini utịn asiahade. (John 11:9) Ke ntre, “ọyọhọ hour ita” ọkọtọn̄ọ ke n̄kanika itiaita usenubọk esịm n̄kanika usụkkiet, ndien “ọyọhọ hour itiokiet” eketre ke n̄kanika duopeba uwemeyo. Edi utịn ekesisiaha onyụn̄ osop ke nsio nsio ini ke isua. Mmọdo, un̄wana usen ekesibịghi m̀mê ọsọp etiene ini emi ẹdude ke isua. Akan oro, ẹkesida ebiet emi utịn adade ẹbiere ini n̄kanika. Ntem, owo ikesifiọkke ata nnennen ini n̄kanika. N̄wed Abasi Christian Usem Greek esiwak ndidọhọ ke n̄kpọ eketịbe ke ọyọhọ hour ita, itiokiet, m̀mê usụkkiet—emi awakde ndiwọrọ ke n̄kpọ nte ini oro. (Matt. 20:3, 5; Utom 10:3, 9, 30) N̄kukụre ini emi ẹkesisiakde ata nnennen ini, utọ nte “ọyọhọ hour itiaba,” ekesidi edieke ini enyenede akpan n̄kpọ ndinam ye se ẹtịn̄de ẹban̄a.—John 4:52.

Mme mbụk Gospel ẹsan̄a kiet kaban̄a ini emi mme n̄kpọ ẹketịbede ke akpatre usen uwem Jesus mi ke isọn̄. Gospel mbinan̄ ẹwụt ke mme oku ye mbiowo ẹma ẹsop idem ke ini eyo esierede ẹnyụn̄ ẹdọhọ ẹda Jesus ẹsọk Pontius Pilate, owo ukara Rome. (Matt. 27:1; Mark 15:1; Luke 22:66; John 18:28) Matthew, Mark, ye Luke ẹdọhọ ke ọyọhọ hour itiokiet, emi ẹma ẹkekọkọn̄ Jesus ke eto, ke ekịm ama ofụk ofụri isọn̄ “tutu esịm ọyọhọ hour usụkkiet.”—Matt. 27:45, 46; Mark 15:33, 34; Luke 23:44.

Akpan n̄kpọ en̄wen oro ekemede ndinyene ebuana ye ini emi ẹkekọn̄de Jesus ke eto edi emi: Ẹkeda umia nte ubak edinam edikọn̄ owo ke eto. Ndusụk ini ẹma ẹsimia owo emi ẹyomde ndikọn̄ ke eto tutu enye akpa. Anaedi ẹma ẹmia Jesus etieti tutu oyom ẹdọhọ owo ọbọ enye eto ndutụhọ esie obiom, ke ini edide enye ọkọtọn̄ọ ndibiom ke idemesie. (Luke 23:26; John 19:17) Edieke ẹkedade umia oro nte ubak edinam edikọn̄ Jesus ke eto, anaedi ke ndusụk ini ama ebe mbemiso ẹkekọn̄de enye ke eto. Ke ntem, nsio nsio owo ẹkeme ndisiak nsio nsio ini emi ẹkekọn̄de Jesus ke eto, etiene edinam emi mmọ ke idemmọ ẹkedade ẹtọn̄ọ ndibat ini ke ofụri ini edikọn̄ enye ke eto oro.

Apostle John ekewet gospel esiemmọ ke ediwak isua ẹma ẹkebe tọn̄ọ mbon eken ẹkewet ekemmọ. Ke ntem enye ama okụt se mmọ ẹkewetde. Edi akpanikọ ke John ekewet ini emi etiede nte ke isan̄ake kiet ye eke Mark. Edi emi enen̄ede owụt ke idịghe se Mark ekewetde ke John okosion̄o ewet ke esiemmọ. Abasi ọkọnọ John ye Mark odudu spirit ẹda ẹwet. Okposụkedi emi ediwak n̄kpọ mîdụhe ke N̄wed Abasi ndida nnam ntak ukpụhọde emi an̄wan̄a, nnyịn imekeme ndinịm ke mme mbụk Gospel ẹnen.