Nte Afo Emeti?
Nte Afo Emeti?
Nte afo ama ọbọ ufọn oto edikot mme nsiondi Enyọn̄-Ukpeme eke ndondo emi? Ọfọn, se m̀mê emekeme ndibọrọ mme mbụme oro ẹtienede mi:
• Anie ekedi Olivétan, ndien ntak emi ikpenyenede udọn̄ ke n̄wed esie?
Owo France oro, Pierre Robert, ke ẹkediọn̄ọ nte Olivétan. Enye ama akabade Bible ke usem French ke ini Edinam Ukpụhọde ke n̄kpọ nte isua 500 emi ẹkebede. Utu ke “bishop,” enye ekewet esiemmọ, “esenyịn,” n̄ko utu ke “ufọkabasi,” enye ekewet “esop.” Ke ediwak itie, enye ekewet enyịn̄ Abasi “Jehovah.”—9/1, page 18-20.
• Nso ke ikọ Abasi ọkọwọrọ ke ini enye ọkọdọhọde nditọ Levi ete: “Ami ndi udeme fo’’?
Kpukpru esien Israel eken ẹma ẹnyene udeme isọn̄, edi nditọ Levi ẹkenyene Jehovah nte “udeme” mmọ. (Num. 18:20) Mmọ ikenyeneke udeme isọn̄, edi ẹma ẹbọ san̄asan̄a ifetutom. Edi Jehovah ama ọnọ mmọ mme n̄kpọ udu uwem. Mfịn, mbon oro ẹnyenede ifet edinam mme n̄kpọ Obio Ubọn̄ ẹkọri ẹkeme ndinyene mbuọtidem ke ẹyenọ mmimọ mme n̄kpọ udu uwem.—9/15, page 7-8, 13.
• Nnyịn isan̄a didie ifiọk ini emi mbon Babylon ẹkesobode Jerusalem eset?
Mme ewet mbụkeset Greece ye Rome ẹtịn̄ nsio nsio n̄kpọ ẹban̄a ndidem Babylon ye ukara mmọ. Edi nta mme ewet mbụkeset ẹnyịme ke Cyrus II akakan Babylon ke isua 539 M.E.N., kpa ata akpan isua. Ẹma ẹsana mme Jew ẹyak, ndien mmọ ẹma ẹsịm obio emana mmọ etisịm isua 537 M.E.N. Bible ọdọhọ ke mmọ ẹkedu isua 70 ke ntan̄mfep. Mmọdo, anaedi ẹkekan Jerusalem ke isua 607 M.E.N. (2 Chron. 36:21, 22; Jer. 29:10; Dan. 9:1, 2)—10/1, page 26-31.
• Nso ikeme ndin̄wam Christian ebiere m̀mê unọ idem nduọkodudu ọfọn m̀mê ifọnke?
Man ẹbiere m̀mê unọ idem nduọkodudu ọyọfọn onyụn̄ enem Abasi esịt, ọfọn ẹbụp ẹte: Nso isịne ke enye? Ini ewe ke ndinọ idem nduọkodudu? Mmanie ẹdidi nsan̄a mi?—10/15, page 9-12.
• Ntak emi mînenke ndision̄o idịbi?
Abasi ada uwem nte ata akpan n̄kpọ onyụn̄ ada eyen emi mîmanake kan̄a nte owo. (Psalm 139:16) Ndiwot eyen emi mîmanake kan̄a edi uwotowo, sia Ibet Moses okowụtde ke ẹyebọ owo isop edieke enye ọnọde eyen emi mîmanake kan̄a unan. (Ex. 21:22, 23)—11/1, page 6.
• Didie ke mbụk emi odude ke Mme N̄ke 7:6-23 ekeme ndin̄wam nnyịn ifep ndise ndise idan̄?
Itie oro etịn̄ aban̄a akparawa kiet emi akasan̄ade ke efak emi ẹdiọn̄ọde ke n̄wan akpara do odụn̄. N̄wan oro ama atap enye. Mfịn, ọfọn ifep mme ikpehe Intanet emi ndiọi ndise ẹdude, onyụn̄ enen̄ede ọfọn ibọn̄ akam iyom un̄wam Abasi idem mbemiso ikụtde utọ ndise oro ke Intanet.—11/15, page 9-10.
• Nnyịn isan̄a didie ifiọk m̀mê isọn̄ oyodu ebe 2012?
Ibat n̄wed usenọfiọn̄ mbon Maya eset anam ndusụk owo ẹkere ke ererimbot eyebe efep ke 2012. Edi oro ikemeke nditịbe, koro Jehovah okobot isọn̄ man ẹkpedụn̄ ke esịt. Bible ọdọhọ ke isọn̄ edidu ke nsinsi. (Eccl. 1:4; Isa. 45:18)—12/1, page 10.
• Mmanie ke otu mme andiwet Bible ẹkedu ke Pentecost 33 E.N.?
Etie nte owo itiokiet ke otu mme andiwet N̄wed Abasi Christian Usem Greek ẹkedu. Apostle mbita emi ẹma ẹdu—Matthew, John, ye Peter. Nditọeka Jesus mbiba emi ẹma ẹdu n̄ko—James ye Jude. Ndien etie nte Mark emi ekedide akparawa ama odu.—12/1, page 22.
