Spirit Abasi Ada Usụn̄ ke Eyo Mme Apostle ye Mfịn
Spirit Abasi Ada Usụn̄ ke Eyo Mme Apostle ye Mfịn
“Spirit kiet anam kpukpru edinam emi.”—1 COR. 12:11.
1. Nso ke idineme ke ibuotikọ emi?
PENTECOST. Nso mme n̄kpọntịbe oro ẹduaide owo idem ke ikọ oro esinam owo eti ntem! (Utom 2:1-4) Edin̄wan̄a edisana spirit nduọk ke edinam oro ke eyo mme apostle okowụt akwa ukpụhọde oro Abasi akanamde ke nte enye ekesinamde n̄kpọ ye mme asan̄autom esie. Ke ibuotikọ oro ekebemde iso, ima ineme ndusụk usụn̄ oro spirit Abasi akanamde mbon oro ẹkenyenede mbuọtidem ke eset ẹnam ọkpọsọn̄ utom oro awakde n̄kukọhọ. Edi nso idi ukpụhọde ke usụn̄ oro spirit Abasi akanamde utom mbemiso eyo mme apostle ye nte enye akanamde utom ke eyo mme apostle? Ndien didie ke mme Christian ẹbọ ufọn ẹto se edisana spirit Abasi anamde mfịn? Ẹyak ise.
“Sese! Ofụn An̄wan Jehovah!”
2. Didie ke Mary okokụt odudu edisana spirit?
2 Mary ama etiene odu ke akwa ubetenyọn̄ oro ke Jerusalem ke ini ẹken̄wan̄ade edisana spirit oro ẹken̄wọn̄ọde ẹduọk. (Utom 1:13, 14) Edi ke se ibede isua 30 mbemiso n̄kpọntịbe oro, enye ama okụt nte edisana spirit Jehovah anamde n̄kpọ ke mme n̄wọrọnda usụn̄. Jehovah ama osio uwem Eyen esie ke heaven edi isọn̄, anam Mary oyomo ke adan̄aemi osụk edide n̄wan emi mîfiọkke erenowo. Idịbi oro enye okoyomode “[okoto] edisana spirit.”—Matt. 1:20.
3, 4. Nso edu ke Mary ekenyene, ndien didie ke ikeme ndikpebe enye?
3 Ntak emi ẹkenọde Mary anana-mbiet ifet oro? Ke angel ama eketịn̄ se Jehovah aduakde aban̄a Mary, Mary ama atan̄a ete: “Sese! Ofụn an̄wan Jehovah! Akpakam osu ọnọ mi nte uyo fo edide.” (Luke 1:38) Ke nditịn̄ ntem, Mary okowụt orụk esịt emi Abasi ama okokokụt ke enye enyene. Ibọrọ esie owụt ke enye ama eben̄e idem ndinyịme uduak Abasi ke n̄kpọ emi. Enye ikekereke iban̄a nte mme owo ke obio ẹdisede m̀mê se owo oro oyomde ndidọ imọ edinamde ke ntak oro. Ke Mary ndidọhọ ke imọ idi ata usụhọde ofụn, enye okowụt ke imọ ibuọt idem ọyọhọ ọyọhọ ke Jehovah nte Eteufọk imọ.
4 Ndi ndusụk ini emesikere ke mme n̄kpọ-ata m̀mê mme ifetutom fo ke utom Abasi ẹkponi ẹkan fi? Ọfọn owo nnyịn kiet kiet obụp idemesie ete, ‘Ndi mmesibuọt idem ofụri ofụri ke Jehovah ayanam n̄kpọ ẹsan̄a nte ekemde ye uduak esie? Ndi mmesinen̄ede nnyịme ndinọ idemmi unyịme unyịme?’ Nen̄ede fiọk ete ke mbon oro ẹbuọtde idem ye Abasi ke ofụri esịt ẹnyụn̄ ẹnyịmede akakan uduak esie, ke Abasi esinọ spirit esie.—Utom 5:32.
Edisana Spirit Ama An̄wam Peter
5. Ke mme usụn̄ ewe ke Peter okokụt nte edisana spirit anamde n̄kpọ mbemiso Pentecost 33 E.N.?
5 Ukem nte Mary, apostle Peter ama okụt ke idemesie nte edisana spirit anamde okopodudu n̄kpọ mbemiso Pentecost 33 E.N. Jesus ama ọnọ enye ye mme apostle eken odudu ndibịn mme demon nduọn̄ọ. (Mark 3:14-16) Ndien okposụkedi emi N̄wed Abasi mîtịn̄ke ekese n̄kpọ iban̄a oro, etie nte Peter ama esida odudu oro anam n̄kpọ. Ẹma ẹkụt odudu Abasi n̄ko ke ini Jesus ọkọdọhọde Peter asan̄a ebịne imọ ke enyọn̄ Inyan̄ Galilee, Peter onyụn̄ anamde ntre. (Kot Matthew 14:25-29.) Nte an̄wan̄ade, Peter ekeberi edem ke edisana spirit man an̄wam enye anam ikpọ n̄kpọ. Ikebịghike spirit oro ama ada Peter ye mme mbet eken anam n̄kpọ ke mbufa usụn̄.
6. Nso ke spirit Abasi akanam Peter anam ke Pentecost 33 E.N. ye ke oro ebede?
6 Ke Usọrọ Pentecost 33 E.N., ẹma ẹnọ Peter ye mbon en̄wen utịbe utịbe ukeme ndisem usem mbon oro ẹketode nsio nsio ebiet ẹdi Jerusalem. Ke oro ebede, Peter ama ada iso ke nditịn̄ ikọ nnọ otuowo oro. (Utom 2:14-36) Ke akpanikọ, owo emi ndusụk ini ekesinamde n̄kpọ ibụmede ibụmede m̀mê okopde ndịk mi, ama enyene uko ndinọ ikọ ntiense ye unana ndịk kpa ye oro ẹkesịnde mmọ ndịk ke idem ẹnyụn̄ ẹkọbọde mmọ. (Utom 4:18-20, 31) Abasi ama esiyarade n̄kpọ ọnọ enye. (Utom 5:8, 9) Ẹma ẹkam ẹnọ enye odudu ndinam owo eset.—Utom 9:40.
7. Siak mme n̄kpọ emi Jesus ekekpepde emi ẹkedide ẹdin̄wan̄a Peter ke ẹma ẹkeyet enye aran.
7 Idem mbemiso Pentecost, ediwak akpanikọ oro Jesus ekekpepde ẹma ẹn̄wan̄a Peter. (Matt. 16:16, 17; John 6:68) Edi ndusụk n̄kpọ oro Jesus ekekpepde ikan̄wan̄ake enye mbemiso Pentecost. Ke uwụtn̄kpọ, Peter ikọfiọkke ke ẹdinam Christ eset nte spirit ke ọyọhọ usen ita; enye ikonyụn̄ ifiọkke ite ke Obio Ubọn̄ oro edidi ke heaven. (John 20:6-10; Utom 1:6) Peter ikọfiọkke ke owo ekeme ndikabade ndi edibotn̄kpọ eke spirit onyụn̄ akara ke Obio Ubọn̄ heaven. Ke ndondo oro ẹkenịmde enye baptism ke edisana spirit ẹnyụn̄ ẹnọde enye idotenyịn uka heaven, se Jesus ekekpepde aban̄a mme n̄kpọ emi ama an̄wan̄a enye.
8. Nso ifiọk ke mbon oro ẹyetde aran ye “mme erọn̄ en̄wen” ẹnyene?
8 Mme mbet Jesus ẹma ẹdifiọk mme n̄kpọ emi mmọ mîkọfiọkke ke ẹma ẹken̄wan̄a edisana spirit ẹduọk. Odudu edisana spirit ama anam mme andiwet N̄wed Abasi Christian Usem Greek ẹwet mme utịbe utịbe ikpehe uduak Jehovah ẹnịm—ke ufọn nnyịn. (Eph. 3:8-11, 18) Mfịn, mbon oro ẹyetde aran ke spirit ye “mme erọn̄ en̄wen” ẹdia ukem udia eke spirit, ẹnyụn̄ ẹfiọk ukem akpanikọ. (John 10:16) Ndi afo amama ifiọk ye ikike Ikọ Abasi oro edisana spirit anamde fi enyene?
Paul “Ọyọhọ ye Edisana Spirit”
9. Nso ke edisana spirit akan̄wam Paul anam?
9 Ke n̄kpọ nte ufan̄ isua kiet ke Pentecost 33 E.N. ama ekebe, owo en̄wen ama ọbọ edisana spirit Abasi. Enye ekedi Saul, emi ẹkedide ẹdidiọn̄ọ nte Paul. Spirit ama ada enye anam utom ke usụn̄ oro enyenede ufọn ọnọ nnyịn mfịn. Ẹma ẹnọ apostle Paul odudu spirit ndiwet n̄wed 14 ke Bible. Ndien kpa nte ekedide ye Peter, edisana spirit Abasi ama anam Paul ọfiọk onyụn̄ ewet in̄wan̄-in̄wan̄ aban̄a idotenyịn uwem unana n̄kpa ye uwem emi mîkemeke ndibiara ke heaven. Edisana spirit ama anam Paul ọkọk udọn̄ọ, ebịn demon, onyụn̄ akam anam akpan̄kpa eset! Edi odudu oro enye ọkọbọde oto edisana spirit ama enyene uduak emi akam edide akpan n̄kpọ akan oro, oro ikọt Abasi ẹbọde odudu ẹda ẹtiene ẹnam mfịn, okposụkedi emi mîdịghe ke utịbe utịbe usụn̄.
10. Didie ke edisana spirit ọkọnọ Paul ukeme nditịn̄ ikọ?
10 Paul, emi ‘ọkọyọhọde ye edisana spirit,’ ama ọsọn̄ọ asua ọnọ abiaidiọn̄ kiet uko uko. Emi okotụk andikara Cyprus, emi akakpan̄de utọn̄ okop ofụri nneme oro didie ntem! Andikara oro ama ọbọ akpanikọ, “sia idem [akakpade] enye aban̄a ukpepn̄kpọ Jehovah.” (Utom 13:8-12) Nte an̄wan̄ade, Paul ama ọfiọk nte edisana spirit ekemede ndinọ owo ukeme ke ini ẹtịn̄de ẹban̄a akpanikọ. (Matt. 10:20) Nte ini akakade, enye ama ekpe esop ke Ephesus ubọk ete ẹnam n̄kpeubọk ẹnọ imọ man ẹnọ imọ ‘ukeme nditịn̄ ikọ.’—Eph. 6:18-20.
11. Didie ke spirit Abasi akada Paul usụn̄?
11 Edisana spirit ama ọnọ Paul ukeme nditịn̄ ikọ, edi ndusụk ini, enye ama esikpan Paul nditịn̄ ikọ ke ndusụk ebiet. Spirit Abasi akada Paul usụn̄ nte enye akanamde utom isụn̄utom esie. (Utom 13:2; kot Utom 16:6-10.) Jehovah osụk adada edisana spirit esie ada usụn̄ ke utom ukwọrọikọ. Ukem nte Paul, kpukpru mme asan̄autom Jehovah oro ẹkopde uyo ẹdomo ndida uko ntan̄a akpanikọ ifịk ifịk. Okposụkedi Abasi mînọhọ ndausụn̄ mfịn ke utịbe utịbe usụn̄ nte ekesinọde ke eyo Paul, imekeme nditịm nnịm ke Jehovah ke ada edisana spirit esie anam mbon oro ẹdotde ẹkop akpanikọ.—John 6:44.
“Nsio Nsio Edinam”
12-14. Ndi spirit Abasi esinam utom ke idem kpukpru mme asan̄autom Abasi ke ukem usụn̄? Nam an̄wan̄a.
12 Ndi mme mbụk oro ẹban̄ade nte Jehovah ọkọdiọn̄de esop mbon oro ẹyetde aran ke eyo mme apostle ẹnen̄ede ẹsịn udọn̄ ẹnọ mme asan̄autom Abasi oro ẹyakde idem ẹnọ mfịn? Edi ntre! Ti ikọ eke odudu spirit oro Paul ekewetde ọnọ esop ke Corinth aban̄a mme utịbe utịbe enọ eke spirit ke eyo esie, ete: “Nsio nsio enọ ẹdu, edi spirit edi kiet; nsio nsio utom ẹnyụn̄ ẹdu, edi Ọbọn̄ edi kiet; nsio nsio edinam ẹnyụn̄ ẹdu, edi Abasi kiet anam kpukpru edinam emi ke idem kpukpru owo.” (1 Cor. 12:4-6, 11) Ke akpanikọ, edisana spirit ekeme ndinam n̄kpọ ke nsio nsio usụn̄ ke idem mme asan̄autom Abasi man ẹnam akpan uduak. Ke akpanikọ, edisana spirit ada “ekpri otuerọn̄” Christ ye “mme erọn̄ en̄wen” esie usụn̄. (Luke 12:32; John 10:16) Edi idịghe kpukpru ini ke enye esinam n̄kpọ ke ukem usụn̄ ke idem owo kiet kiet ke esop.
13 Ke uwụtn̄kpọ, edisana spirit esimek mbiowo. (Utom 20:28) Edi idịghe kpukpru mbon oro ẹyetde aran ke spirit ẹdi mme esenyịn ke esop. Nso ke emi ọwọrọ? Ọwọrọ ke spirit Abasi esinam n̄kpọ ke nsio nsio usụn̄ ke idem mme owo ke esop.
14 Spirit oro anamde mbon oro ẹyetde aran ẹnyene “spirit emi anamde ẹda [mmọ] ẹnyene nte nditọ,” m̀mê ẹnịm ke idi nditọ, ke Jehovah okosụk ada anam Jesus eset okodu uwem unana n̄kpa ke heaven. (Kot Rome 8:11, 15.) Kpa spirit oro ke Jehovah akada obot ofụri ekondo. (Gen. 1:1-3) Kpa edisana spirit oro ke Jehovah akada anam Bezalel odot ndinam san̄asan̄a utom ke tent utuakibuot, ọnọ Samson odudu man anam utom oro okoyomde n̄wọrọnda ukeme, onyụn̄ anam Peter asan̄a ke enyọn̄ mmọn̄. Mmọdo, owo ndinyene spirit Abasi edi ata isio ye ndida spirit Abasi nyet owo aran, sia ndida spirit nyet owo aran edi sụk akpan usụn̄ kiet emi spirit anamde utom. Abasi esimek owo emi enye eyetde aran ke spirit.
15. Ndi ẹdinịm mme owo baptism ke spirit ke nsinsi? Nam an̄wan̄a.
15 Edisana anam-utom odudu Abasi amanam utom ke nsio nsio usụn̄ ke idem mme anam-akpanikọ asan̄autom Abasi toto ke ini emi Abasi ọkọtọn̄ọde ndinyene mme anam-akpanikọ asan̄autom, oro edi, ke ediwak tọsịn isua mbemiso ẹketọn̄ọde ndiyet mme owo aran ke spirit. Ke Pentecost 33 E.N. ke ẹketọn̄ọ ndiyet owo aran ke spirit, edi owo idiyetke ke nsinsi. Ẹyetre ndinịm owo baptism ke spirit, edi edisana spirit ayaka iso ndinam utom ke idem ikọt Abasi man mmọ ẹkpenam utom esie ke nsinsi nsinsi.
16. Nso ke spirit Abasi anam mme asan̄autom Abasi ẹnam mfịn?
16 Nso akpan n̄kpọ ke ẹda edisana spirit Jehovah ẹnam idahaemi ke isọn̄? Ediyarade 22:17 ọbọrọ ete: “Spirit ye n̄wanndọ ẹdọhọ ẹte: ‘Di!’ Ndien yak owo eke okopde ọdọhọ ete: ‘Di!’ Yak owo eke itọn̄ asatde edi; yak owo eke amade edibọ mmọn̄ uwem ke mfọn.” Edisana spirit anam mme Christian mfịn ẹkot “owo eke amade” edibọ mmọn̄ uwem. Mme Christian oro ẹyetde aran ẹda iso ke ndinam emi. Edi mme erọn̄ en̄wen ke ẹtiene mmọ ẹkot mme owo. Otu mbiba emi ẹdiana kiet ye edisana spirit ẹnam utom emi. Mbon otu mbiba emi ẹma ẹyarade uyakidem mmọ nnọ Jehovah ke ndina baptism “ke enyịn̄ Ete ye Eyen ye edisana spirit.” (Matt. 28:19) Ndien kpukpru mmọ ẹnyịme spirit Abasi ada mmimọ usụn̄, ẹyak enye anam mmọ ẹsio mbun̄wụm esie. (Gal. 5:22, 23) Ukem nte mbon oro ẹyetde aran, mme erọn̄ en̄wen ẹyak spirit Abasi an̄wam mmọ. Enye an̄wam mmọ ẹsịn ofụri ukeme mmọ ndisana nte Jehovah oyomde.—2 Cor. 7:1; Edi. 7:9, 14.
Ẹka Iso Ẹben̄e Edisana Spirit
17. Didie ke ikeme ndiwụt ke imenyene spirit Abasi?
17 Ke ntre, edide idotenyịn oro Abasi ọnọde fi edi nsinsi uwem ke heaven m̀mê mi ke isọn̄, Jehovah ekeme ndinọ fi “odudu eke ebede ukeme owo” man aka iso ọsọn̄ọ ada onyụn̄ ọbọ utịp fo. (2 Cor. 4:7) Afo ndika iso n̄kwọrọ eti mbụk Obio Ubọn̄ ekeme ndinam mme owo ẹsak fi. Edi ẹti ete ke “edieke ẹsuenede mbufo ke ntak enyịn̄ Christ, mbufo ẹkop inemesịt, koro spirit ubọn̄, kpa spirit Abasi, omodoro mbufo ke idem.”—1 Pet. 4:14.
18, 19. Didie ke Jehovah ekeme ndida edisana spirit esie n̄n̄wam fi, ndien nso idi ubiere fo ke afan̄ emi?
18 Edisana spirit edi enọ ntatubọk emi Abasi ọnọde mbon oro ẹyomde enye ke ofụri esịt. Enye ekeme ndifori usọ fo onyụn̄ anam fi enen̄ede enyene udọn̄ ndinam ofụri ukeme fo ke utom Abasi. “Abasi anam utom ke esịt mbufo, nte enemde enye, man mbufo ẹnyịme ẹnyụn̄ ẹnam.” Ọsọn̄urua enọ edisana spirit ye ukeme ofụri esịt oro isịnde ‘ndisọn̄ọ mmụm ikọ uwem n̄kama,’ ẹyenam nnyịn ‘ika iso isan̄a ke ndịk ye nnyekidem inam edinyan̄a nnyịn ọwọrọ usụn̄.’—Phil. 2:12, 13, 16.
19 Do, nyene ọyọhọ mbuọtidem ke spirit Abasi, da ofụri esịt fo nam kpukpru utom, nen̄ede fiọk utom eke ẹnọde fi anam, nyụn̄ dọhọ Jehovah an̄wam fi. (Jas. 1:5) Enye ọyọnọ fi se afo oyomde man ọfiọk Ikọ esie, ọyọ mme mfịna uwem, onyụn̄ ọkwọrọ eti mbụk. “Ẹka iso ẹben̄e, ndien ẹyenọ mbufo; ẹka iso ẹyom, ndien mbufo ẹyekụt; ẹka iso ẹkọn̄, ndien ẹyeberede ẹnọ mbufo,” ndien emi esịne ndinọ edisana spirit. (Luke 11:9, 13) Ntem, ka iso kpe Jehovah ubọk ete anam fi etie nte mbon mbuọtidem—eke eset ye mfịn—emi spirit Abasi akadade mmọ usụn̄.
Nte Afo Emekeme Ndinam An̄wan̄a?
• Ukem nte Mary, nso edu ke ikeme ndinyene emi edinọde nnyịn mme edidiọn̄?
• Didie ke spirit Abasi akada Paul usụn̄?
• Didie ke spirit Abasi ada mme asan̄autom Abasi usụn̄ mfịn?
[Mme Mbụme Ukpepn̄kpọ]
[Ndise ke page 24]
Spirit Abasi ama anam Paul akan odudu ndiọi spirit
[Ndise ke page 26]
Mfịn, edisana spirit ekeme ndin̄wam mme Christian, inamke n̄kpọ m̀mê nso idi idotenyịn mmọ
