‘Ndinam Didie N̄keme Ndikwọrọ Ikọ?’

Imenyene nditọete irenowo ye iban ke ofụri ererimbot emi ẹkade iso ẹkwọrọ ikọ kpa ye oro ẹdọn̄ọde idiọk idiọk. Ke uwụtn̄kpọ, kere ban̄a Dalia emi odụn̄de ke Vilnius, ibuot obio Lithuania.

Dalia edi n̄kpọ nte isua 35. Toto ke emana, enye ọdọn̄ọ udọn̄ọ mfre emi esinamde owo akpauben̄. Emi anam enye ọdọn̄ọ akpauben̄ inyụn̄ iyakke enye etịn̄ ikọ ọfọn. Ntem, ikọ esie esin̄wan̄a mbonubon mmọ kpọt. Enye odụn̄ ye Galina eka esie, emi esisede aban̄a enye. Kpa ye oro Dalia enyenede ekese mfịna onyụn̄ enen̄erede okop editịmede esịt, enye osụk enyenyene idotenyịn. Nso inam enye enyene idotenyịn?

Eka esie ọdọhọ ete: “Ke 1999, Apolonija iman mi ama edise nnyịn. Ima ikụt ke Apolonija, emi edide kiet ke otu Mme Ntiense Jehovah, enen̄ede ọdiọn̄ọ Bible, ndien Dalia ama obụp enye ediwak mbụme. Ikebịghike, enye ama ọtọn̄ọ ndikpep Dalia Bible. Mma nsitiene ndu ndusụk ini man ntịn̄ se ikọ Dalia ọwọrọde. Edi mma n̄kụt ke kpukpru se Dalia ekekpepde ẹma ẹnen̄ede ẹn̄wam enye. Ikebịghike ami n̄ko mma ndọhọ ẹtiene ẹkpep mi Bible.”

Nte akpanikọ Bible ẹketọn̄ọde ndin̄wan̄a Dalia, n̄kpọ kiet ama ọtọn̄ọ ndinen̄ede mfịna enye. Ke akpatre, enye ama obụp Apolonija ete: “Owo nte ami—emi ọdọn̄ọde akpauben̄—ekeme ndinam didie n̄kwọrọ ikọ?” (Matt. 28:19, 20) Apolonija ama ọbọrọ enye sụn̄sụn̄ ete: “Kûyak idem enyek fi. Jehovah ayan̄wam fi.” Jehovah onyụn̄ an̄wam enye.

Edi Dalia esinam didie ọkwọrọ ikọ? Enye esinam ntre ke ediwak usụn̄. Nditọete iban ẹsin̄wam enye ẹda etop Bible ẹwet leta. Akpa, Dalia esitịn̄ se isịnede enye ke esịt ọnọ nditọete iban oro. Ekem, mmọ ẹwet se enye eketịn̄de ke leta. Dalia esinọ n̄ko ikọ ntiense ke ndida akama-ke-ubọk telefon esie nnọ mme owo etop. Ndien ke ini emi eyo ọfọnde, nditọete ke esop ẹsida enye ẹwọrọ an̄wa man ọkọkwọrọ ikọ ọnọ mbon emi mmọ ẹsobode ke mme itie nduọkodudu ye ke efak.

Dalia ye eka esie ẹka iso ndinam n̄kọri ke n̄kan̄ eke spirit. Mmọ mbiba ẹma ẹyak idem ẹnọ Jehovah ẹnyụn̄ ẹna baptism ke November 2004. Ke September 2008, ẹma ẹsiak otu usem Polish ke Vilnius. Sia otu oro okoyomde-yom mme asuanetop Obio Ubọn̄, Dalia ye eka esie ẹma ẹwọrọ ẹka do. Dalia ọdọhọ ete: “Ndusụk ọfiọn̄ esịt esitịmede mi edieke mmen̄wọrọke kan̄a an̄wautom. Edi mma mbọn̄ akam mban̄a emi nnọ Jehovah, ibịghike owo ọyọdọhọ mi ke imọn̄ ida mi ika ukwọrọikọ.” Edima Dalia eyenete nnyịn ese se iwọrọde enye didie? Enye ọdọhọ ete: “Udọn̄ọ emi owot ndido idem mi, edi iwotde ekikere mi. Esịt enen̄ede enem mi ke ntak emi n̄kemede nditịn̄ nnọ mbon en̄wen mban̄a Jehovah!”