Oto Itieutom Ubon N̄kani N̄kpọ Nnyịn

‘Enye Ama Anam Mi N̄wọrọ Nda Esisịt ke Otuowo’

Ke ini Charlotte White emi ekedide ọkwọrọikọ uyọhọ ini ekedide edisịm Louisville ke Kentucky ke U.S.A., onyụn̄ akpat ekpatisan̄ emi enyenede ikpat, mme owo ẹma ẹnen̄ede ẹse enye.

EKEDI ke 1908, ndien ediwak owo ke obio ẹma ẹse Sista White ke ntak emi enye akakamade obufa n̄kpọ emi ẹkesiode ẹdi—oro edi, Ukpat Dawn (ekpatisan̄ emi enyenede ikpat). Sista White ọkọdọhọ ete: “Enye ama anam mme owo ẹtịn̄ ikọ onyụn̄ anam mi n̄wọrọ nda esisịt ke otuowo.”

Nditọ Ukpepn̄kpọ Bible, nte ẹkesikotde Mme Ntiense Jehovah ini oro, ẹma ẹkụt ke oyom mmimọ ikpep mbon en̄wen akpanikọ Bible oro mmimọ ikọfiọkde ke ndikpep N̄wed Abasi ifịk ifịk. Ediwak owo ẹkefiọk Bible ke ndikpep mme eboho n̄wed oro ẹkekotde Millennial Dawn (emi nte ini akakade ẹkekotde n̄ko Studies in the Scriptures). Mme Christian oro ẹkenyịmede ẹnyụn̄ ẹkemede ẹma ẹka ata ediwak ebiet—ke ikpọ obio, n̄kpri obio, ye mme obio-in̄wan̄—ẹkenọ mbon oro ẹnyenede ọkpọsọn̄ udọn̄ ndikot n̄wed oro ẹkekotde “Un̄wam Nditọ Ukpepn̄kpọ Bible” mi.

Ke 1908, Sista White ye ifịk ifịk mme anditan̄a Obio Ubọn̄ eken ẹkenọ n̄wed emi ekedide eboho itiokiet, ẹnyụn̄ ẹdade ọfọn̄ ẹsịn ikpaedem mi, ke $1.65 (n̄kpọ nte ₦250). Utu ke ndinọ enyeneufọk n̄wed Dawn ke ebe oro, mmọ ẹyewet enye oro owo oyomde ama ekem ẹfiak ẹdi—ndien ẹkesiwak ndifiak ndi ke usen emi ẹkpede okụkọfiọn̄—ẹdinọ mmọ ẹnyụn̄ ẹbọ esisịt okụk, emi edide se ẹkedade ẹmịn̄. Owo kiet emi ọkọbiọn̄ọde utom nnyịn ama ayat esịt ke ntak emi mme owo ẹkesitịpde ata esisịt okụk ke ini ẹbọde n̄wed emi!

Malinda Keefer eti nte ikesibọde eben̄e n̄wed 200 esịm 300 ke urua. Edi akwa udọn̄ oro mme owo  ẹkenyenede ke n̄wed Dawn akasan̄a ye afanikọn̄. Sese, ọyọhọ eboho itiokiet kpọt ekedi page 740! Enyọn̄-Ukpeme ọkọdọhọ ke “n̄wed 50 ẹkedi kilogram 18,” ndien emi ama anam “ọsọn̄ etieti” ndida mme n̄wed n̄kọnọ, akpan akpan ye nditọete iban.

Brọda James Cole ama obot ọkpọnọ oro enyenede ikpat iba, emi ẹkemede ndifụt, ẹnyụn̄ ẹda ẹfiọn̄ ẹyịri ekpatisan̄ man an̄wam nditọete ndisida n̄wed Dawn n̄kọnọ mme owo. Sia enye andisio n̄kpọ emi ndi mîkenyeneke aba ndikama mme katọn emi n̄wed ẹyọhọde, enye ama ọdọhọ ete: “Afara ikọhọkede mi aba.” Enye ama emen obufa n̄kpọ emi enye okosiode edi mi owụt otuowo emi ẹkekopde inemesịt ke akamba mbono Nditọ Ukpepn̄kpọ Bible ke Cincinnati ke Ohio ke 1908. Sia ẹkesidade enye ẹdọn̄ mme eboho Millennial Dawn, ẹma ẹkap enyịn̄ oro Dawn-Mobile (Ukpat Dawn) ke ekop emi odude ke edem mbiba ke ibiọn̄ ukwak. Ye esisịt ukpep, ekedi mmemmem n̄kpọ ndida ubọk kiet n̄kpat ekpat emi ediwak n̄wed ẹdọn̄ọde. Andikama ama ekeme ndinam enye okon̄ m̀mê osụhọde; ẹma ẹnyụn̄ ẹkeme ndidụri enye ke mme usụn̄ oro owo mîsịnke itai. Ẹma ẹkụre utom ukwọrọikọ, ẹma ẹkeme ndifụt mme ikpat esie emi ẹkedide ọkpọ ndian ke mben ekpat ẹkama ẹsan̄a ke ukot m̀mê ẹdụk tren efak ẹnyọn̄ ufọk.

Ẹma ẹsinọ nditọete iban emi ẹkenamde utom uyọhọ ini Ukpat Dawn ke mfọn. Edi ekọmurua esie ekedi $2.50 (n̄kpọ nte ₦380). Sista Keefer, oro odude ke ndise emi, ama enen̄ede ọfiọk ndikama Ukpat Dawn tutu ekeme ndida ubọk kiet n̄kpat ekpat emi n̄wed ọyọhọde onyụn̄ akama ekpatn̄wed emi n̄wed ọdọn̄ọde ke ubọk enye eken. Sia enye ekenyenede ediwak owo emi ẹkenyenede udọn̄ ke obio udọk ukan̄ kiet ke Pennsylvania, U.S.A., enye ama esibe ebọp Akpa Allegheny ikata m̀mê ikanan̄ ke usen emi ẹkesidade n̄wed ẹsọk mme anditobo.

Ke utịt utịt iduọk isua 1980, awat ubomofụm ama osio ekpatisan̄ emi enyenede ikpat edi, ekpat emi edi ọsọ n̄kpọ idahaemi ke mme an̄wambehe ubomofụm ye ke mme efak emi mme owo ẹyọhọde. Edi n̄kpọ nte isua 100 emi ẹkebede, etie nte ama esinem ifịk ifịk Nditọ Ukpepn̄kpọ Bible ke ini mme owo emi ẹkekopde n̄kpaidem ẹkesede mmọ nte mmọ ẹkpatde Ukpat Dawn ẹka iso ẹnyụn̄ ẹfiak edem ke adan̄aemi ẹsuande n̄kpasịp akpanikọ Bible.

[Se ẹwetde ke ikpọ abisi ke page 32]

Sista Keefer ama esibe ebọp utịm ikata m̀mê ikanan̄ ke usen emi ẹkesidade n̄wed ẹsọk mme anditobo

[Se ẹwetde ke ikpọ abisi ke page 32]

Enye ama an̄wam nditọete ndisida n̄wed Dawn n̄kọnọ mme owo