Kpebe Nte Jesus Okodude Ke Ukpeme
Kpebe Nte Jesus Okodude Ke Ukpeme
“Ẹdu ke ukpeme ẹnyụn̄ ẹka iso ndibọn̄ akam.”—MATT. 26:41.
DIDIE KE AFO ỌKPỌBỌRỌ?
․․․․․
Didie ke akam nnyịn ekeme ndiwụt ke nnyịn ke idu ke ukpeme?
․․․․․
Didie ke ikeme ndiwụt ke idu ke ukpeme ke utom ukwọrọikọ nnyịn?
․․․․․
Ntak emi oyomde idu ke ukpeme ke ini idomo, ndien didie ke ikeme ndinam oro?
1, 2. (a) Mme mbụme ewe ke owo ekeme ndibụp mban̄a nte Jesus okodude ke ukpeme? (b) Ndi mme anana-mfọnmma owo ẹkeme ndikpebe mfọnmma uwụtn̄kpọ Jesus? Nọ uwụtn̄kpọ.
AFO emekeme ndikere ete: ‘Ndi owo ekeme ndinen̄ede n̄kpebe nte Jesus okodude ke ukpeme? N̄kọ Jesus ekedi mfọnmma owo! Akan oro, ndusụk ini enye ama esifiọk se iditịbede ke ini iso—onyụn̄ akam ọfiọk se iditịbede ediwak tọsịn isua ke iso! Ndi ama enen̄ede oyom enye odu ke ukpeme?’ (Matt. 24:37-39; Heb. 4:15) Ẹyak ibem iso ibọrọ mme mbụme emi kan̄a man ikụt ntak emi oyomde idu ke ukpeme inyụn̄ inam ntre ye unana ubiat ini.
2 Ndi mme anana-mfọnmma owo ẹkeme ndikpebe mfọnmma uwụtn̄kpọ Jesus? Ih, sia owo ekeme ndikpep n̄kpọ nto eti andikpep ye uwụtn̄kpọ esie. Ke uwụtn̄kpọ, kere ban̄a akpa ini emi owo ekpepde nditop idan̄. Enye ikemeke nditop idan̄ esie n̄wụk ke ebiet emi ẹyomde, edi enye aka iso ndibọ ukpep nnyụn̄ nsịn ukeme. Man ekeme ndinam ọfọn, enye etịn̄ enyịn ekpebe andikpep enye, emi edide ata otop-idan̄. Enye enen̄ede ese nte andikpep enye adade, enịmde ubọk, ye nte enye obonde nnuenubọk ke urụk utịgha. Sụn̄sụn̄, owo emi oyomde ndifiọk nte ẹtopde utịgha mi ekpep adan̄a nte okpodụride urụk utịgha; enye ọfiọk ke ofụm ekeme ndimen idan̄, onyụn̄ aka iso esịn ukeme. Nte enye ekpebede andikpep enye, ke akpatre enye otop idan̄ oro ekpere ebiet emi ẹyomde enye owụk. Ukem ntre, nnyịn iyaka iso inam n̄kọri nte mme Christian ke ndinam item Jesus nnyụn̄ n̄kpebe mfọnmma uwụtn̄kpọ esie.
3. (a) Didie ke Jesus okowụt ke oyom imọ idu ke ukpeme? (b) Nso ke idineme ke ibuotikọ emi?
3 Edi nso kaban̄a edidu ke ukpeme? Ndi ama enen̄ede oyom Jesus odu ke ukpeme? Ih, ama oyom. Ke uwụtn̄kpọ, ke okoneyo oro ekesierede usen oro Jesus akakpade, enye ama ekpek mme anam-akpanikọ apostle esie ete: “Ẹtiene mi ẹkpeme.” Enye ama adian do ete: “Ẹdu ke ukpeme ẹnyụn̄ ẹka iso ndibọn̄ akam, mbak mbufo ẹdidụk idomo.” (Matt. 26:38, 41) Okposụkedi oro Jesus ekesidude ke ukpeme kpukpru ini, ama enen̄ede oyom enye odu ke ukpeme onyụn̄ ekpere Ete esie eke heaven ke ini afanikọn̄ oro. Enye ama ọfiọk ke oyom mme mbet imọ ẹnam kpa ntre—idịghe ke ini oro kpọt edi ke ini iso n̄ko. Ntem, ẹyak ineme ntak emi Jesus oyomde nnyịn idu ke ukpeme. Ekem, iyeneme usụn̄ ita emi ikemede ndidu ke ukpeme kpukpru usen uwem nnyịn nte Jesus okodude.
NTAK EMI JESUS OYOMDE IDU KE UKPEME
4. Nso ebuana ke mme n̄kpọ oro nnyịn mîfiọkke iban̄a ini iso ẹnyene ye nnyịn ndidu ke ukpeme?
4 Ke nditịn̄ ibio ibio, Jesus oyom nnyịn idu ke ukpeme ke ntak mme n̄kpọ emi nnyịn mîfiọkke ye mbon emi ifiọkde. Ke ini Jesus okodude ke isọn̄, ndi enye ama ọfiọk kpukpru se iditịbede ke ini iso? Ihih, koro enye ama osụhọde idem ọdọhọ ete: “Baba owo kiet ifiọkke usen ye hour oro, mme angel ke heaven ifiọkke, Eyen inyụn̄ ifiọkke, ke mîbọhọke Ete ikpọn̄.” (Matt. 24:36) Ini oro, Jesus, emi edide “Eyen,” ikọfiọkke nnennen ini emi ẹdisobode idiọk ererimbot emi. Nso kaban̄a nnyịn mfịn? Ndi odu mme n̄kpọ emi nnyịn mîfiọkke iban̄a ini iso? Ih, odu! Nnyịn ifiọkke usen emi Jehovah edidọn̄de Eyen esie edisobo idiọk editịm n̄kpọ emi. Edieke ikpọfiọkde, ndi ufọn okpodu ndidu ke ukpeme? Nte Jesus ọkọdọhọde, nsobo ererimbot emi edidi ke mbuari, ke ini emi owo mîkodorike enyịn; ntem oyom inen̄ede idu ke ukpeme.—Kot Matthew 24:43.
5, 6. (a) Didie ke se idiọn̄ọde iban̄a ini iso ye uduak Abasi ẹwụt ke oyom idu ke ukpeme? (b) Ntak emi se idiọn̄ọde iban̄a Satan akpanamde nnyịn inen̄ede ibiere ndidu ke ukpeme?
5 Edi Jesus ama ọfiọk ekese utịbe utịbe n̄kpọ aban̄a ini iso—kpa mme n̄kpọ emi ata ediwak owo ke eyo esie mîkọfiọkke. Ifiọk nnyịn ikpetke-kpet ndimen udomo ye eke Jesus, edi Jesus anam nnyịn ifiọk ekese iban̄a Obio Ubọn̄ Abasi ye se Obio Ubọn̄ oro edinamde ke mîbịghike. Ata ediwak owo ke ufọkn̄wed nnyịn, ke itieutom nnyịn, m̀mê ke efakutom emi isinamde utom ukwọrọikọ ifiọkke baba n̄kpọ kiet iban̄a mme utịbe utịbe akpanikọ emi. Ntem, emi edi ntak en̄wen emi oyomde idu ke ukpeme. Oyom nnyịn idu ke ukpeme kpukpru ini nte Jesus okodude man ikụt mme ifet ndineme se idiọn̄ọde iban̄a Obio Ubọn̄ Abasi nnọ mbon en̄wen. Ifet ekededi emi inyenede ndinam oro enen̄ede ọsọn̄ urua, ndien nnyịn iyomke ndiyak oro atak. Mme owo ẹkeme nditaba uwem mmọ!—1 Tim. 4:16.
6 Jesus ama ọfiọk n̄kpọ en̄wen emi akanamde enye aka iso odu ke ukpeme. Enye ama ọfiọk ke Satan ebiere ndidomo, ndikọbọ, nnyụn̄ mbiat nsọn̄ọnda imọ. Ata idiọk asua emi eketetie ebet “ifet afiak eberede” man odomo Jesus. (Luke 4:13) Jesus ekesidu ke ukpeme kpukpru ini. Sia enye okoyom ndiben̄e idem nnọ se ededi emi enye edisobode, edide idomo, ubiọn̄ọ, m̀mê ukọbọ. Idaha nnyịn onyụn̄ etie nte eke Jesus. Imọfiọk ke Satan osụk etie “nte ekpe eke okụnide, oyom owo eke enye editade.” Ntak edi oro Ikọ Abasi ọdọhọde kpukpru Christian ete: “Ẹnyene ikike, ẹnyụn̄ ẹdu ke ukpeme.” (1 Pet. 5:8) Edi didie ke ikeme ndinam oro?
NTE IKPODUDE KE UKPEME MAN IBỌN̄ AKAM
7, 8. Nso item ke Jesus ọkọnọ aban̄a akam, ndien nso orụk uwụtn̄kpọ ke enye ekenịm?
7 Bible ọdọhọ ke owo ndidu ke edidemede ke n̄kan̄ eke spirit, m̀mê ndidu ke ukpeme, enen̄ede enyene ebuana ye akam. (Col. 4:2; 1 Pet. 4:7) Ikebịghike ke Jesus ama ọkọdọhọ mme anditiene enye ete ẹka iso ẹdu ke ukpeme, enye ama ọdọhọ ete: “Ẹdu ke ukpeme ẹnyụn̄ ẹka iso ndibọn̄ akam, mbak mbufo ẹdidụk idomo.” (Matt. 26:41) Ndi enye ọkọdọhọ mmọ ẹdu ke ukpeme ke ini afanikọn̄ oro kpọt? Baba, item oro enye ọkọnọde edi edumbet emi oyomde ida isịn ke edinam kpukpru usen.
8 Jesus ama enịm ata eti uwụtn̄kpọ ke ndibọn̄ akam. Afo emekeme nditi ke isan̄ kiet enye ama ada ofụri okoneyo ọbọn̄ akam ọnọ Ete esie. Ẹyak idomo ndida enyịn ikike n̄kụt n̄kpọ emi. (Kot Luke 6:12, 13.) N̄kpọ emi etịbe ke ini utọ, ndien etie nte ekpere Capernaum, kpa obio emi ẹkesikọde iyak, emi Jesus okodụn̄de. Nte eyo ọtọn̄ọde ndikụt, Jesus ọdọk obot emi asakde iso ese Inyan̄ Galilee. Nte enye esede obio, ekeme ndidi enye okụt utuenikan̄ ke Capernaum ye ke mme obio-in̄wan̄ mbọhọ oro. Edi ke ini Jesus ọbọn̄de akam ọnọ Jehovah, enye enen̄ede owụk ekikere ke akam esie. Ediwak minit—ekem ediwak hour—ẹbe. Enye itịn̄ke enyịn nte mme utuenikan̄ ko ke unaisọn̄ ẹnịmede kiet kiet m̀mê nte ọfiọn̄ ebede ke ikpaenyọn̄ m̀mê nte mme unam emi ẹsidiade udia okoneyo ẹsaride n̄kpọ ke ikọt. Etie nte enye ọbọn̄ akam aban̄a akpan ubiere emi enye oyomde ndinam—oro edi, ndimek apostle 12. Imekeme ndikere nte Jesus enen̄erede asian Ete esie ekikere esie ye se ifịnade enye iban̄a mbet esie kiet kiet, nte enye ọbọn̄de akam ke ofụri esịt eben̄e ndausụn̄ ye ọniọn̄.
9. Nso ke ikeme ndikpep nto uwụtn̄kpọ oro Jesus ekenịmde ke ndibọn̄ akam ofụri okoneyo?
9 Nso ke ikeme ndikpep nto uwụtn̄kpọ oro Jesus ekenịmde? Ndi ana ida ediwak hour ibọn̄ akam? Idịghe ntre, koro ima ama anam enye etịn̄ ntem aban̄a mme anditiene enye: “Ke akpanikọ, spirit enyịme, edi obụkidem ememem.” (Matt. 26:41) Kpa ye oro, imekeme ndikpebe Jesus. Ke uwụtn̄kpọ, ndi imesibụp Ete nnyịn eke heaven mbemiso inamde ubiere ekededi oro ekemede nditụk nnyịn, ubon nnyịn, m̀mê nditọete nnyịn ke n̄kan̄ eke spirit? Ndi imesibọn̄ akam iban̄a nditọete nnyịn? Ndi akam nnyịn esito esịt m̀mê isifiak itịn̄ ukem ikọ kpukpru ini? Fiọk n̄ko ete ke Jesus akada ndidu ikpọn̄ ntịn̄ ikọ idịbi esie nnọ Ete esie nte ata akpan n̄kpọ. Ke ererimbot mfịn emi owo mînyeneke ini ẹnyụn̄ ẹnamde n̄kpọ itọk itọk mi, imekeme ndisọp mfre se ikam idide ata akpan n̄kpọ. Edieke isisiode ini emi ekemde inịm ida idu ikpọn̄ ibọn̄ akam ofụri esịt, iyenen̄ede idu ke edidemede ke n̄kan̄ eke spirit. (Matt. 6:6, 7) Iyenen̄ede isan̄a ikpere Jehovah, inyene udọn̄ ndinen̄ede ndi ufan esie, inyụn̄ ifep ndinam n̄kpọ ekededi oro ekemede ndibiat itie ufan oro.—Ps. 25:14.
NTE IKEMEDE NDIDU KE UKPEME KE UTOM UKWỌRỌIKỌ
10. Nso uwụtn̄kpọ iwụt nte Jesus okodude ke edidemede aban̄a mme ifet ndinọ ikọ ntiense?
10 Jesus ama odu ke ukpeme ke utom oro Jehovah ọkọnọde enye ete anam. Odu ndusụk utom oro ekemede ndidi owo ke anam ke ekere n̄kpọ en̄wen edi mfịna inen̄ekede idu. Edi ediwak utom oyom owo enen̄ede etịn̄ enyịn onyụn̄ odu ke edidemede; ndien ke akpanikọ, utom ukwọrọikọ mme Christian etie ntre. Jesus okodu ke ukpeme kpukpru ini ke utom esie, ekpekpeme man okụt mme ifet ndida n̄kwọrọ eti mbụk. Ke uwụtn̄kpọ, ke ini enye ye mme mbet esie ẹkedide ẹdisịm obio Sychar ke ẹma ẹkesan̄a anyan isan̄ usenubọk oro, mme mbet esie ẹma ẹka ndidep udia. Jesus ama osụhọde etie ekpere obube mmọn̄ obio oro ọduọk odudu, edi enye okodu ke edidemede, ndien enye ama okụt ifet ndinọ ikọ ntiense. N̄wan Samaria ama edi ndikoi mmọn̄. Jesus ekpekemek ndide esisịt. Enye ekpekekere aban̄a ediwak ntak oro akpanamde enye etre ndinyene nneme. Edi enye ama enyene nneme ye n̄wan oro onyụn̄ ọnọ enye okopodudu ikọ ntiense emi okotụkde uwem ediwak owo ke obio oro. (John 4:4-26, 39-42) Ndi imekeme ndinen̄ede n̄kpebe uwụtn̄kpọ Jesus ndidu ke ukpeme, eyedi ke ndidomo ndisinen̄ede nyom mme ifet ndineme eti mbụk nnọ mme owo oro isisobode ke usen ke usen?
11, 12. (a) Nso ke Jesus akanam aban̄a mbon oro ẹkeyomde ndiwọn̄ọde ntịn̄enyịn esie n̄kpọn̄ utom esie? (b) Didie ke Jesus okowụt eti ibuot kaban̄a utom esie?
11 Ndusụk ini, mbon oro ẹkenyenede eti esịt ẹma ẹdomo ndiwọn̄ọde Jesus ntịn̄enyịn n̄kpọn̄ utom esie. Otuowo ke Capernaum ẹma ẹnen̄ede ẹkop inemesịt ẹban̄a nte Jesus ọkọkọkde mme owo udọn̄ọ ke utịbe utịbe usụn̄ tutu mmọ ẹyom enye osụhọ do ye mmimọ. An̄wan̄a ntak emi mmọ ẹkeyomde ntre. Nte ededi, utom Jesus ekedi ndikwọrọ ikọ nnọ kpukpru “erọn̄ ufọk Israel emi ẹkesopde usụn̄,” idịghe mbon oro ẹdude ke obio kiet kpọt. (Matt. 15:24) Ntre enye ama asian mmọ ete: “Nnyene nditan̄a eti mbụk obio ubọn̄ Abasi nnọ mme obio en̄wen n̄ko, koro ẹkesio mi ẹdọn̄ ẹte ndinam emi.” (Luke 4:40-44) Ana in̄wan̄-in̄wan̄ ke uwem Jesus okowụhọ ke utom ukwọrọikọ. Enye ikayakke baba n̄kpọ kiet ọwọn̄ọde enye ntịn̄enyịn.
12 Ndi Jesus ama esịn idem ke utom esie tutu enye iwụtke eti ibuot inyụn̄ inyeneke ini ndikop inem uwem? Ndi enye ama esịn idem ke utom ukwọrọikọ esie tutu anam se mbon en̄wen ẹyomde ibeheke enye? Ihih, Jesus ama enịm eti uwụtn̄kpọ ke ndiwụt eti ibuot. Enye ama okop inem uwem, onyụn̄ adat esịt ye mme ufan esie. Enye ama ama mme owo, enen̄ede ekere aban̄a se inanade mmọ ye mme mfịna mmọ, onyụn̄ enen̄ede ama nditọwọn̄.—Kot Mark 10:13-16.
13. Didie ke ikeme ndikpebe uwụtn̄kpọ Jesus ndidu ke ukpeme nnyụn̄ n̄wụt eti ibuot ke utom edikwọrọ Obio Ubọn̄?
13 Didie ke ikeme nditiene n̄wụt eti ibuot ntre nte ikpebede uwụtn̄kpọ Jesus ndidu ke ukpeme? Nnyịn iyakke ererimbot emi ọwọn̄ọde nnyịn ntịn̄enyịn ọkpọn̄ utom nnyịn. Idem mme ufan ye mme iman emi ẹnyenede eti esịt ẹkeme ndidọhọ nnyịn ikûnam utom ukwọrọikọ nnyịn ọkpọsọn̄ nte inamde m̀mê ẹte iyom se mmọ ẹdade nte ata uwem. Edi edieke ikpebede Jesus, nnyịn idida utom ukwọrọikọ nnyịn nte udia. (John 4:34) Utom nnyịn anam nnyịn isọn̄ idem ke n̄kan̄ eke spirit onyụn̄ anam nnyịn ikop idatesịt. Edi iyomke nnyịn idedei inyene ukwan̄ ifiopesịt, inyene edu edida idem ke edinen n̄kaha, m̀mê ndisua inem uwem. Ukem nte Jesus, nnyịn iyom ndidi mme asan̄autom “Abasi inemesịt” oro ẹkopde idatesịt ẹnyụn̄ ẹnyenede eti ibuot.—1 Tim. 1:11.
NTE IKPODUDE KE UKPEME KE INI IDOMO
14. Nso ke mînaha inam ke ini isobode idomo, ndien ntak-a?
14 Nte ima ikokụt, Jesus ọkọnọ ndusụk akpan item oro enye ọkọnọde ete idu ke ukpeme ke ini enye okosobode ọkpọsọn̄ idomo. (Kot Mark 14:37.) Ke ini n̄kpọ ọsọn̄de ye nnyịn, ana itetịm ikpebe uwụtn̄kpọ esie. Ke ini ediwak owo ẹsobode idomo, odu akpan n̄kpọ emi mmọ ẹsifrede, emi edide akpan n̄kpọ tutu n̄wed Mme N̄ke etịn̄ enye utịm ikaba ete: “Enyene usụn̄ eke enende owo ke enyịn, edi utịt esie edi usụn̄ n̄kpa.” (N̄ke 14:12; 16:25) Edieke iberide edem ke ekikere nnyịn, akpan akpan ke ini isobode akamba mfịna, imekeme ndisịn idem nnyịn, mme ufan nnyịn, ye mme iman nnyịn ke fehesan̄.
15. Nso idomo ke ibuot ufọk ekeme ndisobo ke ini n̄kpọ ọsọn̄de?
15 Ke uwụtn̄kpọ, ekeme ndisọn̄ ibuot ufọk ndinọ “mbonufọk esie” mme n̄kpọ udu uwem. (1 Tim. 5:8) Enye ekeme ndikere ke odot inam utom emi esinamde enye etre ndidụk mme mbono esop, ndida usụn̄ ke utuakibuot ubon, m̀mê nditiene n̄wọrọ an̄wautom. Edieke enye anamde ekikere idemesie, ekeme nditie nte ke idiọkke ndinam utọ utom oro, ke oro akam edi nnennen n̄kpọ. Nte ededi, emi ekeme ndinam owo ọdọn̄ọ m̀mê akam akpakpa ke n̄kan̄ eke spirit. Akpakam enen̄ede ọfọn ndinam item oro odude ke Mme N̄ke 3:5, 6. Solomon ọkọdọhọ do ete: “Buọt idem ye Jehovah ke ofụri esịt fo kûnyụn̄ uberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.”
16. (a) Nso uwụtn̄kpọ ke Jesus ekenịm aban̄a ediberi edem ke ọniọn̄ Jehovah utu ke ọniọn̄ idemesie? (b) Didie ke ediwak ibuot ufọk ẹkpebe Jesus ke ndibuọt idem ye Jehovah ke ini n̄kpọ ọsọn̄de?
16 Ke ini Jesus okosobode idomo, enye ama ebiere ke imọ idiberike edem ke asian imọ. Se ise! Owo emi enyenede ọniọn̄ akan kpukpru owo oro akanam ẹdude ke isọn̄ ikeberike edem ke ọniọn̄ esie. Ke uwụtn̄kpọ, ke ini Satan okodomode enye, enye ama ọbọrọ Satan ediwak ini ete: “Ẹwet ẹte.” (Matt. 4:4, 7, 10) Enye akada ọniọn̄ emi Ete esie ọkọnọde enye akan idomo onyụn̄ owụt nsụhọdeidem oro Satan mînyeneke. Ndi nnyịn imesinam ntre? Ibuot ufọk emi ekpebede nte Jesus okodude ke ukpeme ayayak Ikọ Abasi ada enye usụn̄, akpan akpan ke mme ini idomo. Ediwak tọsịn ibuot ufọk ke ẹnam emi ke ofụri ererimbot. Mmọ ẹka iso ẹda Obio Ubọn̄ Abasi ye utuakibuot akpanikọ nte akpa n̄kpọ ke uwem mmọ, ẹkam ẹda ke enye edi akpa n̄kpọ ọnọ mme n̄kpọ udu uwem. Edieke mmọ ẹnamde ntre, ọwọrọ ke mmọ ẹse ẹban̄a mme ubon mmọ ke mfọnn̄kan usụn̄. Ndien Jehovah ọdiọn̄ ukeme emi mmọ ẹsịnde ndinọ ubon mmọ mme n̄kpọ udu uwem, nte Ikọ esie ọn̄wọn̄ọde.—Matt. 6:33.
17. Nso inam fi ekpep ndidu ke ukpeme nte Jesus okodude?
17 Edi ata ofụri akpanikọ ke Jesus ama enịm mfọnn̄kan uwụtn̄kpọ edidu ke ukpeme. Uwụtn̄kpọ esie enyene ufọn, edi se ẹkemede ndikpebe, onyụn̄ ekeme ndinyan̄a uwem. Ti ke Satan enen̄ede oyom ndinam fi ede ke n̄kan̄ eke spirit, anam mbuọtidem fo emem, anam n̄kpọ Abasi ndebe ndebe, onyụn̄ abiat nsọn̄ọnda fo. (1 Thess. 5:6) Kûyak enye anam oro! Ka iso du ke ukpeme nte Jesus okodude—ke akam, ke utom ukwọrọikọ, ye ke nte ọyọde mme idomo. Edieke anamde oro, afo oyokop inemesịt onyụn̄ odu uwem oro enyenede se ọwọrọde ke ererimbot emi ekperede utịt mi. Oro ayanam Eteufọk fo edikụt fi nte odude ke edidemede onyụn̄ esịnde ifịk anam uduak Ete esie ke ini enye edidide ndisobo editịm n̄kpọ emi. Edinem Jehovah didie ntem ndinọ fi utịp edinam akpanikọ fo!—Edi. 16:15.
[Mme Mbụme Ukpepn̄kpọ]
[Ndise ke page 6]
Jesus ama ọkwọrọ ikọ ọnọ n̄wan Samaria ke obube mmọn̄. Ndi afo emesiyom mme ifet ndikwọrọ ikọ ke usen ke usen?
[Ndise ke page 7]
Afo ndise mban̄a ubon fo ke n̄kan̄ eke spirit owụt ke afo ke odu ke ukpeme
