Mmọ Ẹma Ẹkwọrọ Ikọ Abasi Uko Uko!

Mme ata Christian ẹsinyene uko ẹnyụn̄ ẹsọn̄ esịt ke ini ukọbọ, nte ẹwụtde ke mme utọ n̄wed nte “Ndinọ Ọyọhọ Ikọ Ntiense Mban̄a Obio Ubọn̄ Abasi” ye Jehovah’s Witnesses—Proclaimers of God’s Kingdom. Ukem nte mme anditiene Christ ke eyo mme apostle, nnyịn imesibọn̄ akam iben̄e Jehovah ite ọnọ nnyịn spirit esie onyụn̄ an̄wam nnyịn itịn̄ ikọ esie uko uko.—Utom 4:23-31.

Eyenete kiet ekewet ntem aban̄a utom ukwọrọikọ nnyịn ke ini akpa ekọn̄ ererimbot: “Mme asan̄autom Abasi ke ẹkesuan Studies in the Scriptures, ọyọhọ eboho itiaba emi ẹkekotde The Finished Mystery. Ẹma ẹsuan enye awak akan n̄wed en̄wen ekededi oro akanam ẹsuande. Ẹma ẹsio Mbụk Obio Ubọn̄ Nọ. 1 ke 1918. Ekem ẹma ẹsio Nọ. 2, emi eketịn̄de ntak emi ukara mîkayakke ẹsuan The Finished Mystery. Ke oro ebede, ẹma ẹsio n̄ko Mbụk Obio Ubọn̄ Nọ. 3. Mme anam-akpanikọ Christian oro ẹkeyetde aran ẹma ẹnọ ata ediwak owo mme n̄wed emi. Ama oyom owo enyene mbuọtidem ye uko man ekeme ndinọ mme owo Mbụk Obio Ubọn̄.”

Mfịn, ẹsikpep mbufa mme asuanetop Obio Ubọn̄ nte ẹkpekwọrọde ikọ, edi ikesidịghe ntre. Eyenete kiet emi okotode Poland okonyụn̄ odụn̄de ke United States, ama eti se iketịbede inọ enye ke akpa usen emi enye akakade ukwọrọikọ ke 1922, onyụn̄ ewet ete: “N̄kọfiọkke nte n̄kpenịmde n̄wed, n̄konyụn̄ nnen̄ekede mfiọk Ikọmbakara, kpa ye oro mma n̄ka n̄kọkọn̄ usụn̄ itieutom abiausọbọ kiet. Nurse ekeberede usụn̄. Ndifreke se iketịbede, sia mma n̄kop nduaidem, idem onyụn̄ enyek mi. Nte n̄kokụbọrede ekpat mi, kpukpru n̄wed ẹma ẹduọn̄ọ nurse oro ke ukot. Mfiọkke se n̄ketetịn̄, edi mma nnọ enye n̄wed. Ke ini n̄kọkpọn̄de do, mma nnyene uko nnyụn̄ mfiọk ke Jehovah odu ye ami. Mma nnịm ata ediwak n̄kpri n̄wed ke efak oro mme owo ẹkesinamde mbubehe do.”

Eyenete an̄wan kiet ọkọdọhọ ete: “Ke n̄kpọ nte 1933, ediwak nditọete irenowo ẹkesida ubomisọn̄ usuanetop ẹkwọrọ etop Obio Ubọn̄.” Isan̄ kiet, enye ama asan̄a ye n̄wan ye ebe kiet aka ukwọrọikọ ke obio emi etiede obot obot ke California ke U.S.A. Enye ọdọhọ ete: “Eyenete eren oro ama awat ubomisọn̄ usuanetop emi ikadade ika do ọdọk obot, edi nnyịn idu ke obio. Ke ini enye ọkọtọn̄ọde ndibre etop emi ẹkemụmde ẹdọn̄ ke usanikwọ, eketie nte n̄kpọ eke ẹketiede ke heaven ẹtịn̄ ikọ. Mme enyene-obio ẹma ẹnen̄ede ẹdomo ndikụt eyenete oro, edi mmọ ikekemeke. Ke enye ama ekebre ama, nnyịn ima isan̄a ikwọrọ ikọ inọ mmọ. Mma nsan̄a ke ubomisọn̄ usuanetop iba en̄wen n̄ka ukwọrọikọ, ndien ami ndọhọ fi, ata ediwak owo ikesimaha ndikop etop oro. Edi mmọ ikekemeke ndinyan̄a sia mmọ ẹma ẹsitie ke ufọk mmọ ẹkop etop oro ke ini ẹbrede ke ubomisọn̄ usuanetop. Ima isikụt ke Jehovah esiwụt nnyịn mfọnn̄kan usụn̄ ndikwọrọ ikọ nnọ mme owo. Ama oyom inen̄ede inyene uko man ikeme  ndida ubomisọn̄ usuanetop n̄kwọrọ ikọ, edi oro ama anam mme owo ẹkop etop Obio Ubọn̄ onyụn̄ anam ẹtoro enyịn̄ Jehovah.”

Ke iduọk isua 1930 esịm ntọn̄ọ ntọn̄ọ iduọk isua 1940, ikesida n̄kpọ ubre usanikwọ ye mme etop Bible emi ẹkemụmde ẹdọn̄ ke usanikwọ ikwọrọ ikọ. Eyenete an̄wan kiet ọkọdọhọ ete: “Ekpri eyenete an̄wan kiet ama akama n̄kpọ ubre usanikwọ asan̄a ke ufọk ke ufọk. Ke ama ọkọtọn̄ọ ndibre etop Bible ke ufọk kiet, ete enyeneufọk ama ayat esịt tutu atịgha n̄kpọ ubre usanikwọ oro ọduọk ke an̄wa. Edi usanikwọ ndomokiet ikobomoke. Irenowo ita emi ẹkediade udia uwemeyo ke ubomisọn̄ mbiomo kiet do ẹma ẹkụt se iketịbede, ẹkot eyenete an̄wan oro ẹte edibre ọnọ mmimọ, ẹnyụn̄ ẹbọ n̄wed. Oro ama anam enye efre se ete oro akanamde enye.” Ama oyom owo enyene uko man ekeme ndiyọ mme utọ idomo oro.

Eyenete an̄wan oro ama ọdọhọ n̄ko ete: “Mmeti ini emi ikọtọn̄ọde ndisinọ mme owo magazine ke efak, ke 1940. Mbemiso ini oro, ima isisan̄a ke udịm isuan etop. Nditọete ẹsisan̄a ke udịm ke mben ọkpọ-usụn̄ ẹkama mme n̄wed emi ọkọdọhọde ẹte: ‘Ido Ukpono Edi Afia ye N̄kpọ Etabi’ ye ‘Nam N̄kpọ Abasi ye Eke Christ, kpa Edidem.’ Ima isinọ mme owo tract emi owo mîbọhọ okụk n̄ko. Ama oyom owo enyene uko man ekeme ndinam nsio nsio ikpehe utom emi, edi oro ama anam mme owo ẹka iso ẹti enyịn̄ Jehovah ẹnyụn̄ ẹti ikọt esie.”

Eyenete an̄wan en̄wen ọkọdọhọ ete: “Ama esinen̄ede ọsọn̄ ndinam utom magazine ke n̄kpri obio. Emi ekesitịbe ke ini emi ẹkenen̄erede ẹkọbọ Mme Ntiense. . . . Ama oyom owo enen̄ede enyene uko man ekeme ndikama mme magazine n̄kada ke efak ntoho ufiet emi ẹkedọhọde ẹtoho. Edi, nnyịn ikawakke nditre an̄wautom ke Saturday. Ndusụk ini mme owo ẹma ẹsifọn ido. Edi ke mme ini eken mbon emi mîkamaha nnyịn ẹma ẹsidọn̄ idem ẹdi en̄wan, ndien ke ndusụk idaha ima isiyom usụn̄ ifiọnọde ibọhọ.”

Mme Ntiense Jehovah ẹma ẹka iso ẹkwọrọ ikọ uko uko kpa ye oro ẹkekọbọde mmọ ke ini ọyọhọ ekọn̄ ererimbot iba. Ke n̄kpọ nte ọfiọn̄ kiet ye ubak, oro edi, ọtọn̄ọde ke December 1, 1940, esịm January 12, 1941, emi ẹkedade ẹsuan n̄wed, n̄kpọ nte asuanetop 50,000 ke United States ẹma ẹnọ mme owo se ikekperede ndisịm n̄kpri n̄wed miliọn itiaita. Ẹkekot ini oro, Ini Edinọ Ikọ Ntiense “Uko Uko.”

Ediwak n̄kani owo ke esop Abasi ẹnen̄ede ẹti mme idomo emi okoyomde mmọ ẹda uko ẹkan. Ndusụk mmọ ẹti nte ke ediwak isua, ke ufiet emi ẹkesitohode ẹte, Ẹn̄wana tutu esịm utịt, okowụt ke mmọ ẹnyene uko! Nnyịn ifiọkke nte idisikwọrọde etop emi Abasi ọnọde nnyịn mi mbemiso idiọk ererimbot emi esịm utịt esie. Edi Jehovah Abasi ayan̄wam nnyịn ika iso itan̄a etop esie ye mbuọtidem ye uko.

[Se ẹwetde ke ikpọ abisi ke page 9]

Kpukpru ini, esiyom owo enyene uko man ekeme ndikwọrọ etop Obio ubọn̄