Ẹn̄wam Mme Owo ‘Ẹdemede ke Idap’
Ẹn̄wam Mme Owo ‘Ẹdemede ke Idap’
“Mbufo [ẹmefiọk] ini, ẹte ke ini ekekem nte mmimọ ikpedemerede ke idap.”—ROME 13:11.
NTE AFO EMEKEME NDINAM AN̄WAN̄A?
․․․․․
Ntak emi oyomde mme Christian ẹdu ke edidemede ke n̄kan̄ eke spirit?
․․․․․
Ntak emi mme asan̄autom emi ẹdude ke edidemede ẹkpesikpan̄de utọn̄ ẹnyụn̄ ẹnen̄erede ẹtịn̄ enyịn?
․․․․․
Nso ufọn ke eti ido ye sụn̄sụn̄ ido ẹnyene ke utom ukwọrọikọ nnyịn?
1, 2. Nso utọ idap ke ana ẹdemede mme owo?
KPUKPRU isua, ata ediwak owo ẹsikpan̄a ke ntak emi ẹdede ke ini emi mmọ ẹsụk ẹwatde ubomisọn̄. Ẹsision̄o ndusụk owo ke utom ke ntak emi mmọ mîsibakke idemede ika utom m̀mê ke ntak emi mmọ ẹsidede ke itieutom. Edi ndiyet idap ke n̄kan̄ eke spirit enen̄ede ọdiọk akan ndide ata idap. Utọ idap emi anam Bible ọdọhọ ete: “Owo emi atabade idap onyụn̄ ekpemede . . . okop inemesịt.”—Edi. 16:14-16.
2 Ata ediwak owo ke ẹde ke n̄kan̄ eke spirit nte akwa usen Jehovah asan̄ade ekpere. Ediwak etubom ufọkabasi ẹkot mme erọn̄ mmọ ‘ekpe idap.’ Nso idi idap eke spirit? Ntak emi anade ata mme Christian ẹdu ke edidemede? Didie ke nnyịn ikeme ndin̄wam mbon en̄wen ẹdemede ke utọ idap emi?
NSO IDI IDAP EKE SPIRIT?
3. Afo ọkpọdọhọ ke anie edi owo emi edede idap ke n̄kan̄ eke spirit?
3 Mbon emi ẹdede idap isinamke n̄kpọ ndomokiet. Edi mbon emi ẹdede ke n̄kan̄ eke spirit ẹsinam n̄kpọ etieti, edi idịghe n̄kpọ Abasi. Mmọ ẹkeme ndisịn ibuot nsịn itọn̄ nyom mme n̄kpọ udu uwem, unọ idem inemesịt, uwọrọiso, m̀mê inyene. Mme n̄kpọ emi isiyakke mmọ ẹnen̄ede ẹnyene ini ẹnọ n̄kpọ Abasi. Edi mbon emi mîdehe ke n̄kan̄ eke spirit ẹdiọn̄ọ ke nnyịn idu ke “mme akpatre usen,” ntre, mmọ ẹsịn ifịk ẹnam uduak Abasi ke ofụri ukeme mmọ.—2 Pet. 3:3, 4; Luke 21:34-36.
4. Nso ke item emi, “ẹyak nnyịn ikûde idap nte mmọ eken ẹdede” ọwọrọ?
4 Kot 1 Thessalonica 5:4-8. Apostle Paul eteme ekemmọ mme andinịm ke akpanikọ ete ‘ẹkûde nte mmọ eken ẹdede.’ Nso ke ikọ esie ọwọrọ? Edi emi ifụmide mme edu mbet Jehovah ọwọrọ ke ‘imede.’ Edi emi ifrede ite ke ini emi Jehovah edisobode idiọk owo asan̄a ekpere ọwọrọ n̄ko ke imede. Ana inen̄ede ikpeme mbak utọ mbon oro ẹdinam nnyịn ikpebe mmọ.
5. Nso ke mbon emi ẹdede ke n̄kan̄ eke spirit ẹkere?
5 Ndusụk owo ẹkere ke Abasi idụhe emi edikotde mmimọ idinam ibat. (Ps. 53:1) Mbon eken ẹkere ke Abasi ikereke iban̄a nnyịn mme owo, ntre ke ufọn idụhe nnyịn n̄ko ndiyom enye. Edi mbon en̄wen ẹkere ke ndinyene ufọkabasi emi owo akade ayanam owo edi ufan Abasi. Kpukpru mmọ ẹdede ke n̄kan̄ eke spirit. Oyom ẹdemede utọ mbon emi. Didie ke nnyịn ikeme ndin̄wam mmọ?
ANA NNYỊN KE IDEM NNYỊN IDU KE EDIDEMEDE
6. Ntak emi Christian ekpenen̄erede ekpeme mbak enye edide ke n̄kan̄ eke spirit?
6 Nnyịn idikeme ndidemede mbon en̄wen ke ini nnyịn ke idem nnyịn idude ke edidemede. Nso ke ikpanam man idu ke edidemede? Inaha nnyịn idu uwem nte mbon emi ẹdede ke n̄kan̄ eke spirit. Bible ọdọhọ ke mbon oro ẹdede idap ke n̄kan̄ eke spirit ẹnam “utom ekịm”—oro edi, uyom uyom usọrọ, mbun̄wọn̄i, oburobụt ido idan̄, obukpo ido, utọk, ye ufụp. (Kot Rome 13:11-14.) Isimemke utom nditre mme edu emi. Oyom inen̄ede ikpeme. Awat ubomisọn̄ enyene ndifiọk nte ke imọ imekeme ndikpa edieke idede idap ke ini isụk iwatde ubomisọn̄. Christian n̄ko enyene ndifiọk ke ndide ke n̄kan̄ eke spirit ekeme ndida imọ ibuot!
7. Didie ke se ikerede iban̄a mme owo editụk nte inamde utom ukwọrọikọ?
7 Ke uwụtn̄kpọ, Christian ekeme ndikere ke tutu amama ke mme owo ke efakutom mmimọ idimaha ndikop eti mbụk. (N̄ke 6:10, 11) Enye ekeme ndikere ete, ‘Ufọn ndisịn ibuot nsịn itọn̄ nyom ndin̄wam mme owo ke ini edide mmọ idinyịmeke ẹn̄wam mmimọ?’ Edi akpanikọ ke ediwak owo ke ede ke n̄kan̄ eke spirit idahaemi, edi mme idaha m̀mê edu mmọ ẹkeme ndikpụhọde. Ndusụk owo ẹsidemede ẹnyụn̄ ẹnyịme eti mbụk. Ndien nnyịn imekeme ndin̄wam mmọ edieke nnyịn ke idem nnyịn mîdehe, edi idomode ndikwọrọ etop Obio Ubọn̄ ke nsio nsio usụn̄ emi edinamde mmọ ẹma ndikop. Edieke itide ke utom ukwọrọikọ nnyịn edi ata akpan utom, emi idiyakke nnyịn ide.
NSO INAM UTOM UKWỌRỌIKỌ NNYỊN EDI ATA AKPAN UTOM?
8. Ntak emi utom ukwọrọikọ nnyịn edide ata akpan utom?
8 Fiọk ete ke idem ekpededi mme owo ikpan̄ke utọn̄ inọ nnyịn, ke utom nnyịn ada ukpono ọsọk Jehovah onyụn̄ anam ẹnam uduak Esie. Abasi ọmọn̄ ebiere ikpe ọnọ mbon oro mîsụkke ibuot inọ eti mbụk. Enye oyosobo mbon emi mîmaha ndikpan̄ utọn̄ nnọ eti mbụk. (2 Thess. 1:8, 9) N̄ko-n̄ko, Christian akpanam ndudue edieke enye ekpekerede ke ufọn idụhe ndisịn ifịk n̄kwọrọ ikọ ke ntak emi Utom 24:15 ọdọhọde ke “ndinen owo ye mme anam ukwan̄n̄kpọ ẹyeset ke n̄kpa.” Ikọ Abasi anam nnyịn ifiọk ke ‘ẹyesịbe mme ebot ẹfep ke nsinsi.’ Abasi ada utom ukwọrọikọ nnyịn owụt mme owo mbọm koro emi anam mme owo ẹnyene ifet ndikabade esịt nnyụn̄ nnyene “nsinsi uwem.” (Matt. 25:32, 41, 46; Rome 10:13-15) Edieke nnyịn mîkwọrọke ikọ, mme owo ẹdinam didie ẹkop etop emi edinamde mmọ ẹnyene nsinsi uwem?
9. Didie ke ndikwọrọ eti mbụk enyene ufọn ọnọ fi ye mbon en̄wen?
9 Edikwọrọ eti mbụk enyene ufọn ọnọ nnyịn n̄ko. (Kot 1 Timothy 4:16.) Ndi ukwe ke nditịn̄ mban̄a Jehovah ye Obio Ubọn̄ esie ọsọn̄ọ mbuọtidem fo onyụn̄ anam fi etetịm ama Abasi? Ndi utom emi in̄wamke fi enyene mme edu Christian? Ndi ndiwụt ke amama Abasi ke ndinam utom ukwọrọikọ inamke fi okop inemesịt? Ediwak owo ẹnyene ifet ndikpep mme owo akpanikọ nnyụn̄ n̄kụt nte spirit Abasi an̄wamde mbon emi mmọ ẹkpepde n̄kpọ ẹkpụhọde.
NEN̄EDE TỊN̄ ENYỊN
10, 11. (a) Didie ke Jesus ye Paul ẹkenen̄ede ẹtịn̄ enyịn ẹfiọk se mme owo ẹyomde? (b) Didie ke nnyịn ikeme nditịn̄ enyịn ke an̄wautom?
10 Nsio nsio usụn̄ ẹdu emi ikemede ndida nnam mme owo ẹnyene udọn̄ ke eti mbụk. Ke ntre, ana mme Christian emi ẹsikwọrọde ikọ ẹnen̄ede ẹtịn̄ enyịn. Jesus ama enịm uwụtn̄kpọ ọnọ nnyịn. Sia enye ekedide mfọnmma, enye ama ekeme ndidiọn̄ọ ini emi esịt ayatde owo Pharisee kiet kpa ye oro owo oro mîkosioho itịn̄, ọfiọk ke n̄wan kiet ama enen̄ede akabade esịt, onyụn̄ ọfiọk ke enọ emi ebeakpa kiet ọkọnọde ekedi ke ofụri esịt. (Luke 7:37-50; 21:1-4) Jesus ama ọfiọk se owo kiet kiet oyomde ke n̄kan̄ eke spirit. Edi iwọrọke ke ana asan̄autom Abasi edi mfọnmma mbemiso enye ekeme ndinen̄ede ntịn̄ enyịn. Apostle Paul ama owụt ke emi edi ntre. Enye ama esikwọrọ ikọ ke nsio nsio usụn̄ man enye ekeme ndin̄wam kpukpru owo.—Utom 17:22, 23, 34; 1 Cor. 9:19-23.
11 Edieke inen̄erede itịn̄ enyịn inyụn̄ ifiọkde se mme owo ẹyomde nte Jesus ye Paul, nnyịn iyekeme ndinam mme owo ẹma ndikop eti mbụk. Ke uwụtn̄kpọ, ke ini oyomde ndinyene nneme ye mme owo, se m̀mê oyokụt n̄kpọ oro ekemede ndinam ọfiọk ido obio mmọ, ido edinam mmọ, m̀mê idaha ubon mmọ. Eyedi imekeme ndifiọk se mmọ ẹnamde ke ubọk inyụn̄ itịn̄ eti n̄kpọ iban̄a se mmọ ẹnamde oro man ida itọn̄ọ nneme.
12. Ntak emi ikpekpemede se inemede ke ini inamde utom ukwọrọikọ?
12 Owo emi enen̄erede etịn̄ enyịn isiyakke n̄kpọ ọwọn̄ọde ntịn̄enyịn esie. Nneme oro inemede ke an̄wautom ekeme ndisịn udọn̄ nnọ owo emi idade isan̄a. Edi, oyom iti ke akpan ntak oro isiwọrọde an̄wautom edi ndikwọrọ ikọ nnọ mbon en̄wen. (Eccl. 3:1, 7) Ke ntre, ikpenyene ndikpeme mbak nneme oro inemede ye kiet eken ke an̄wautom edikpan nnyịn ndinam utom ukwọrọikọ. Usụn̄ kiet emi ikemede ndiwụk ntịn̄enyịn ke utom nnyịn edi ndineme se iduakde ndineme ye mme owo oro idisobode. Ke adianade do, okposụkedi oro akama-ke-ubọk telefon ekemede ndin̄wam nnyịn ndusụk ini inen̄ede inam utom ukwọrọikọ nnyịn, ikpenyene ndikụt nte ke enye iditịmekede nneme oro inemede ye enyeneufọk.
NNEN̄EDE NYENE UDỌN̄ KE IDEM MME OWO
13, 14. (a) Didie ke ikeme ndidiọn̄ọ se ibehede owo? (b) Nso ikeme ndinam owo enyene udọn̄ ke n̄kpọ Abasi?
13 Mme ọkwọrọikọ emi ẹdude ke edidemede ẹnyụn̄ ẹtịn̄de enyịn ẹsinen̄ede ẹkpan̄ utọn̄ ẹnọ mbon emi mmọ ẹsobode ke an̄wautom. Nso utọ mbụme ikeme ndinam owo ke efakutom mbufo etịn̄ se isịnede enye ke esịt? Ndi edi nte ufọkabasi ẹwakde, afai ke edem mmọ, m̀mê nte ukara okpude? Ndi ndineme mban̄a utịbe utịbe usụn̄ oro ẹkebotde mme n̄kpọ, m̀mê adan̄a nte item Bible enyenede ufọn ekeme ndinam enye enyene udọn̄ ke n̄kpọ Abasi? Ata ediwak owo, ye idem mbon emi mînịmke ke Abasi do, ẹnen̄ede ẹma akam. Ediwak owo ẹsikere m̀mê osụk odu owo emi esikopde akam. Ndusụk owo ẹkpema ndifiọk ibọrọ mbụme emi: Ndi Abasi esikop kpukpru akam? Edieke enye mîsikopke kpukpru akam, nso ke owo akpanam man Abasi okop akam esie?
14 Imekeme ndikpep nte ẹtọn̄ọde nneme edieke isede nte mme asuanetop emi ẹnyenede mbufiọk ẹsitọn̄ọde nneme. Se nte mmọ ẹbụpde mbụme ke usụn̄ emi mînamke owo ekere ke ẹfefịna mmimọ m̀mê ke ẹyom ndisịn idem ke n̄kpọ ufọk mmimọ. Se nte uyo ye iso mmọ ẹwụtde ke mmimọ iyom ndidiọn̄ọ ekikere enyene-ufọk.—N̄ke 15:13.
NYENE ETI IDO NNYỤN̄ NYENE USỌ
15. Ntak emi ikpenyenede eti ido ke ini ikwọrọde ikọ?
15 Ndi esinem fi edieke owo edemerede fi ke ini idap enen̄erede enem fi? Ediwak owo isimaha ẹdemede mmimọ inikiet inikiet. Mmọ ẹsima ẹdemede mmimọ sụn̄sụn̄. Kpasụk ntre ke edi ye edidemede mme owo ke idap eke spirit. Ke uwụtn̄kpọ, nso idi nnennen n̄kpọ oro akpanamde edieke owo ayatde esịt ke ntak emi akade ufọk esie ndikwọrọ ikọ? Tịn̄ sụn̄sụn̄ nte ke imokụt ke esịt inemke enye, kọm enye ke ntak emi etịn̄de nte etiede enye ke idem, nyụn̄ daha sụn̄sụn̄ nyọn̄. (N̄ke 15:1; 17:14; 2 Tim. 2:24) Eti ido emi ekeme ndinam enye enyịme ndikpan̄ utọn̄ nnọ mme Ntiense ini en̄wen.
16, 17. Didie ke ikeme ndida mbufiọk nnam n̄kpọ ke an̄wautom?
16 Edi enyene ini emi ikemede ndisụk n̄kwọrọ ikọ nnọ mbon emi mînyeneke udọn̄. Owo ekeme ndidọhọ ete, “Mbọk nyomke ndikop. Mmenyene ufọkabasi emi nsikade” mîdịghe ọdọhọ ete, “Nyomke ndikop ukwọrọikọ mbufo,” sia adade emi nte mmemmem usụn̄ nditre nneme oro. Edi emekeme ndida mbufiọk ye usọ mbụp enye mbụme emi edinamde enye oyom ndifiọk n̄kpọ mban̄a Abasi.—Kot Colossae 4:6.
17 Ndusụk ini, ke ini isobode mme owo oro ẹdọhọde ke mmimọ inyeneke ini, ọfọn idaha ukpono ukpono inyọn̄. Edi enyene ini emi ikemede ndikụt ke imekeme nditịn̄ akpan n̄kpọ kiet nnọ enye ibio ibio. Ke uwụtn̄kpọ, ndusụk nditọete ẹsida n̄kpọ nte minit kiet n̄kụbọde Bible, n̄kot ebiet emi enen̄erede otụk owo, nnyụn̄ mbụp owo oro mbụme. Ibio ibio nneme ntem esitụk ndusụk owo tutu mmọ ẹdọhọ ẹsụhọde ẹtetie ẹneme nneme ye mmimọ. Afo n̄ko emekeme ndinam ntem ini en̄wen emi edisobode utọ owo oro.
18. Nso ke ikpanam man ikeme ndinen̄ede nnọ ikọ ntiense ido nneme?
18 Edieke isitịmde idem inọ ukwọrọikọ ido nneme, imekeme ndinam mme owo oro isisobode ke usen ke usen ẹnyene udọn̄ ke eti mbụk. Ediwak nditọete nnyịn ẹsidọn̄ n̄wed nnyịn ke ekpatọfọn̄ mmọ m̀mê ke ekpat ubọk mmọ ẹsan̄a. Mmọ ẹsinyụn̄ ẹben̄e idem ndikot akpan itie Bible kiet nnọ mbon oro mmọ ẹsobode. Emekeme ndidọhọ esenyịn utom mbufo m̀mê mme asiakusụn̄ ke esop mbufo ẹwụt fi nte akpanamde emi.
NTE IKPEDEMEREDE IMAN NNYỊN SỤN̄SỤN̄
19. Ntak emi nnyịn mîkpakpaha mba ndin̄wam iman nnyịn?
19 Idụhe owo nnyịn ndomokiet emi mîkpamaha ndin̄wam mme iman esie ẹnyịme eti mbụk. (Josh. 2:13; Utom 10:24, 48; 16:31, 32) Edieke mme iman nnyịn mîkpan̄ke utọn̄ inọ nnyịn ke akpa ini emi ikwọrọde ikọ inọ mmọ, emi ekeme ndinam inen̄ekede idọn̄ nnyịn ndin̄wam mmọ. Imekeme ndikere ke inyeneke se iditịn̄de oro edinamde mmọ ẹkpụhọde. Edi, n̄kpọ ekeme nditịbe emi anamde iman fo okpụhọde. Mîdịghe, ekeme ndidi emenen̄ede ọfiọk ndikpep owo n̄kpọ idahaemi ndien emi ekeme ndinam enye akpan̄ utọn̄ ọnọ fi.
20. Ntak emi oyomde inyene usọ ke ini itịn̄de ikọ ye mme iman nnyịn?
20 Akpana idiọn̄ọ ke mmọ ẹnyene unen ndikere n̄kpọ nte mmọ ẹkerede. (Rome 2:4) Ndi nnyịn ikpetịn̄ke ikọ ye mmọ nte isitịn̄de ye mbon emi isobode ke utom ukwọrọikọ? Tịn̄ ikọ sụn̄sụn̄ ye ukpono ukpono ye mmọ. Wụt se afo ndifiọk akpanikọ anamde ọnọ fi, edi kûdomo ndikwọrọ ikọ nnọ iman fo kpukpru ini. (Eph. 4:23, 24) Nam mmọ ẹkụt nte Jehovah oforide uwem fo onyụn̄ “ekpepde fi man afo ọbọ ufọn.” (Isa. 48:17) Nam mme iman fo ẹkụt ke afo odu uwem nte akpanade Christian odu.
21, 22. Bụk ifiọkutom emi owụtde ntak emi nnyịn mîkpakpaha mba ndin̄wam mme iman nnyịn.
21 Eyenete an̄wan kiet ekewet ke ndondo emi ete: “Mmesidomo ke ikọ ye ke edinam ndinọ nditọeka mi 13 ikọ ntiense. Idụhe isua emi mmensiwetke owo mmọ kiet kiet leta. Edi ami ikpọn̄ n̄kedi Ntiense ke ubon nnyịn ke ofụri isua 30.”
22 Eyenete oro ọdọhọ n̄ko ete: “Usen kiet, mma n̄kot eyeneka mi emi odụn̄de ke obio emi enen̄erede oyom usụn̄ ke telefon. Enye ama ọdọhọ mi ke imọ ikọdọhọ pastọ mmimọ ekpep imọ Bible, edi ke enye imaha. Ke ini n̄kọdọhọde enye ke n̄kpama ndikpep enye, enye ama ọdọhọ mi ete: ‘Ọfọn, edi nyom ndinam fi ọfiọk kan̄a ke tutu amama ndidịghe kiet ke otu Mme Ntiense Jehovah.’ Mma nnọ n̄wed Nso ke Bible Enen̄ede Ekpep? ẹsọk enye nnyụn̄ nsikot enye ke usen ifan̄ ẹbede. Edi enye ikokụbọkede n̄wed oro. Ke akpatre, mma ndọhọ enye emen n̄wed esie akama ndien ima ida minit 15 ikot inyụn̄ ineme ndusụk itie N̄wed Abasi emi ẹkotde ẹsịn ke n̄wed oro. Ke mma n̄kafiak n̄kot enye ikafan̄, enye ama ọdọhọ yak nnyịn ikûsukpep n̄kpọ ke minit 15 kpọt. Ekem enye ekesikam okot mi ete ikpep n̄kpọ, ndusụk ini mbemiso ndemerede idap, ndusụk ini ikaba ke usen. Enye ama ana baptism ke isua oro eketienede onyụn̄ ọtọn̄ọ usiakusụn̄ ke isua kiet ebede.”
23. Ntak emi nnyịn mîkpakpaha mba ndidemede mme owo ke idap eke spirit?
23 Oyom ida usọ inyụn̄ ika iso isịn ukeme in̄wam mme owo ẹdemede ke n̄kan̄ eke spirit. Ndien mbon nsụhọdeidem ke ẹkpan̄ utọn̄ ẹnọ eti mbụk. Edieke ẹbaharede ukem ukem, se ibede owo 20,000 ẹsina baptism kpukpru ọfiọn̄. Ke ntre, ẹyak nnyịn iti ikọ emi apostle Paul eketịn̄de ọnọ Archippus ete: “Tịn̄ enyịn ke utom emi afo ọkọbọde ke Ọbọn̄, man anam enye ama.” (Col. 4:17) Ibuotikọ oro etienede ayanam nnyịn idiọn̄ọ se ndikwọrọ ikọ usọp usọp ọwọrọde.
[Mme Mbụme Ukpepn̄kpọ]
[Ekebe ke page 13]
MME N̄KPỌ EMI ẸDINAMDE FI ODU KE EDIDEMEDE
▪ Sịn idem nam uduak Abasi
▪ Fep mme utom ekịm
▪ Fiọk ete ke edide ke n̄kan̄ eke spirit ekeme ndida owo ibuot
▪ Da nte ke mme owo ke efakutom mbufo ẹkeme ndikpụhọde
▪ Domo ndida mbufa usụn̄ n̄kwọrọ ikọ nnọ mme owo
▪ Ti ke utom ukwọrọikọ nnyịn edi ata akpan utom
