Ka Iso Nam N̄kpọ Usọp Usọp
Ka Iso Nam N̄kpọ Usọp Usọp
“Kwọrọ ikọ, nam emi usọp usọp.” —2 TIM. 4:2.
NTE AFO EMEKEME NDINAM AN̄WAN̄A?
․․․․․
Ntak emi mme Christian eyo mme apostle ẹkekwọrọde ikọ usọp usọp?
․․․․․
Didie ke ikeme ndika iso nnam n̄kpọ usọp usọp?
․․․․․
Ntak emi oyomde ẹsọsọp ẹkwọrọ Obio Ubọn̄ idahaemi akan nte akanam ẹkwọrọde?
1, 2. Mme mbụme ewe ẹdemerede ẹban̄a ewụhọ oro ẹnọde ẹte ‘ikwọrọ ikọ usọp usọp’?
MBON oro utom mmọ edide ndinyan̄a mme owo ẹsinam n̄kpọ usọp usọp. Ke uwụtn̄kpọ, mme enịme-ikan̄ ẹsika iwiwa ke ini ẹkotde mmọ sia mmọ ẹfiọkde ke mme owo ẹkeme ndikpan̄a.
2 Sia idide Mme Ntiense Jehovah, nnyịn imọfiọk ke imekeme ndin̄wam mme owo ẹnyene edinyan̄a. Oro esịn ida utom oro ẹnọde nnyịn ndikwọrọ eti mbụk Obio Ubọn̄ nte ata akpan utom. Nte ededi, nnyịn isibụmeke-bụmede ika mme ebiet. Do, nso ke ikọ apostle Paul ọkọwọrọ ke ini enye eketemede ete: “Kwọrọ ikọ, nam emi usọp usọp”? (2 Tim. 4:2) Didie ke ikeme ndikwọrọ ikọ usọp usọp? Ndien ntak emi anade ikwọrọ ikọ usọp usọp?
NTAK EMI ANADE IKWỌRỌ IKỌ USỌP USỌP?
3. Nso ikeme nditịbe ke ini mme owo ẹnyịmede m̀mê ẹsịnde etop Obio Ubọn̄?
3 Ama ekere aban̄a nte utom ukwọrọikọ nnyịn ekemede ndinam ẹnyan̄a owo, ekeme ndidi eyenen̄ede ọdọn̄ fi ndikwọrọ eti mbụk nnọ mme owo. (Rome 10:13, 14) Ikọ Abasi ọdọhọ ete: “Ke ini ndọhọde idiọkowo nte: ‘Afo udutreke ndikpa,’ ndien enye ọwọn̄ọde ọkpọn̄ idiọkn̄kpọ esie onyụn̄ anam unenikpe ye edinen ido, . . . enye iditreke ndidu uwem. Enye idikpaha. Owo iditịghi baba idiọkn̄kpọ esie kiet emi enye akanamde.” (Ezek. 33:14-16) Ke nditịm ntịn̄, Bible ọdọhọ mme ọkwọrọ etop Obio Ubọn̄ ete: “Afo ayanyan̄a idemfo ye mmọ emi ẹkopde uyo fo.”—1 Tim. 4:16; Ezek. 3:17-21.
4. Ntak emi mfiakedem akanamde ẹkwọrọ ikọ usọp usọp ke eyo mme apostle?
4 Man ọfiọk ntak emi ẹketemede Timothy ẹte ọkwọrọ ikọ usọp usọp, kere ban̄a ndusụk n̄kpọ emi ẹkenamde ẹwet itien̄wed oro ẹdade ibuotikọ nnyịn ẹto. Itie oro ọdọhọ ete: “Kwọrọ ikọ, nam emi usọp usọp ke ini eke ọfọnde ye ke ini afanikọn̄, sua nọ owo, nen̄ede mmọ, teme mmọ, da anyanime ye usọ unọ ukpep nam emi. Koro ini eyedi eke mme owo mîdibọhọ eti ukpepn̄kpọ, edi mmọ ẹyekọ mme andikpep ẹnọ idemmọ man ẹkop se utọn̄ mmọ amade ndikop, nte ekemde ye udọn̄ mmọ; ẹyenyụn̄ ẹwọn̄ọde utọn̄ ẹkpọn̄ akpanikọ.” (2 Tim. 4:2-4) Jesus ama etetịn̄ ke mme owo ẹyekpep nsunsu ukpepn̄kpọ ke esop. (Matt. 13:24, 25, 38) Nte mfiakedem oro akasan̄ade ekpere, akana Timothy ‘ọkwọrọ ikọ’ usọp usọp idem ke esịt esop mbak ẹdida mme nsunsu ukpepn̄kpọ ẹbian̄a mme Christian. Mme owo ẹma ẹkpere nditaba uwem mmọ. Nso kaban̄a mfịn?
5, 6. Mme ọsọ ukpepn̄kpọ ewe ke ikeme ndikop ke ini inamde utom ukwọrọikọ?
5 Mfiakedem okpon etieti mfịn. (2 Thess. 2:3, 8) Mme ukpepn̄kpọ ewe ẹdọn̄ mme owo ndikop mfịn? Ke ediwak ebiet, ifịk oro ẹdade ẹkpep mme ukpepn̄kpọ ido ukpono ke ẹda ẹkpep ukpepn̄kpọ edito ke unam mforo owo. Okposụkedi emi ẹsidade ifiọk ntaifiọk ẹkpep ukpepn̄kpọ emi, enye ekpere ndikabade ido ukpono emi mînyeneke Abasi. Enye otụk nte mme owo ẹdade Abasi ye owo. Ọsọ ukpepn̄kpọ en̄wen edi ke Abasi inyeneke udọn̄ ke idem nnyịn; ke ntem, ke ufọn idụhe nnyịn ndiyom enye. Ntak emi mme ukpepn̄kpọ emi ẹnemde ata ediwak owo tutu anam mmọ ẹyet idap ke n̄kan̄ eke spirit? Mmọ mbiba ẹkama etop kiet emi, ‘Emekeme ndinam se amama sia idụhe eke edidọhọde fi edinam ibat.’ Ke akpanikọ, se utọn̄ ediwak owo ẹmade ndikop edi oro.—Kot Psalm 10:4.
6 Edi odu ediwak ukpepn̄kpọ en̄wen emi mme owo ẹmade ndikop. Ediwak owo emi ẹsikade ufọkabasi ẹma mme andikpep emi ẹsidọhọde mmọ ẹte, ‘Akpanam se ananam, Abasi osụk amama fi.’ Mme oku ye mme pastọ ẹsitịn̄ se utọn̄ mme owo ẹmade ndikop ke ndinam mmọ ẹnịm ke mme usọrọ, Mass, mme usọrọ ido ukpono, ye ndisọi mbiet ẹsinam owo enyene edidiọn̄ Abasi. Ekeme ndidi mme aka ufọkabasi emi ifiọkke nte idaha mmọ ọdiọkde eketre. (Ps. 115:4-8) Edi edieke nnyịn ikemede ndidemede mmọ ke n̄kan̄ eke spirit man mmọ ẹkpefiọk ata etop Bible, mmọ ẹkeme ndidia ufọn Obio Ubọn̄ Abasi.
NSO KE NDIKWỌRỌ IKỌ USỌP USỌP ỌWỌRỌ?
7. Didie ke ikeme ndiwụt ke imanam n̄kpọ usọp usọp?
7 Ata eti abiausọbọ emi esisiakde owo idem ana enen̄ede etịn̄ enyịn ke utom esie, sia mîdịghe ntre owo ekeme ndikpa. Ke utom ukwọrọikọ nnyịn, imekeme ndiwụt ke inam n̄kpọ usọp usọp ke nditịn̄ enyịn ke utom nnyịn, utọ nte ndikere mban̄a m̀mê nso n̄kpọ, m̀mê mbụme m̀mê ikọ ewe ke mme owo oro isobode ẹdima. Ndinam n̄kpọ usọp usọp ekeme n̄ko ndinam nnyịn inam ukpụhọde ke ndutịm nnyịn man ikpaka ibịne mme owo ke ini emi edinen̄erede inem mmọ ndidara nnyịn.—Rome 1:15, 16; 1 Tim. 4:16.
8. Nso ke ndinam n̄kpọ usọp usọp esiwak ndiwọrọ?
8 Ndinam n̄kpọ usọp usọp abuana n̄ko ndifiọk se idide ata akpan n̄kpọ. (Kot Genesis 19:15.) Ke uwụtn̄kpọ, kere nte ọbọde ibọrọ use idem oro akanamde, ekem abiausọbọ okot fi odụk edi itieutom esie onyụn̄ ọdọhọ ke ofụri esịt ete: “Sese! Oyom anam n̄kpọ usọp usọp. Enyene ke mbịghi-n̄kaha ọfiọn̄ kiet ndinam n̄kpọ mban̄a udọn̄ọ fo.” Anaedi afo udubụmekede uwọrọ ke itieutom esie nte emi enịme-ikan̄ okpobụmerede ọwọrọ ke ini ẹkotde enye. Edi anaedi ekpenen̄ede akpan̄ utọn̄ okop se enye etemede, ọnyọn̄ ufọk ekenen̄ede ekere ata akpa n̄kpọ oro edinamde.
9. Ntak emi ikemede ndidọhọ ke Paul ọkọkwọrọ ikọ usọp usọp ke ini okodude ke Ephesus?
9 Imekeme ndikpebe nte Paul ọkọkwọrọde ikọ usọp usọp ke ndikot se enye eketịn̄de ọnọ mbiowo ke Ephesus aban̄a edikwọrọ eti mbụk ke mbọhọ Asia. (Kot Utom 20:18-21.) Nte an̄wan̄ade, toto ke akpa usen oro enye ekebehede, enye ama esịn ifịk ọkwọrọ eti mbụk ọnọ mme owo ke ufọk ke ufọk. Ke adianade do, ke ofụri isua iba, enye ama “[esinọ] utịn̄ikọ ke usen ke usen ke efe mbono ufọkn̄wed Tyrannus.” (Utom 19:1, 8-10) Paul ndifiọk ke oyom inam n̄kpọ usọp usọp ekebiere nte enye akanamde n̄kpọ. Item oro ẹnọde nnyịn ẹte ‘inam utom ukwọrọikọ usọp usọp’ iwọrọke ke utom ukwọrọikọ ọsọn̄ akaha. Edi ikpenyene ndida utom ukwọrọikọ nte ata akpan n̄kpọ ke uwem nnyịn.
10. Ntak emi ikemede ndikop inemesịt ke Nditọ Ukpepn̄kpọ Bible ẹma ẹkwọrọ ikọ usọp usọp ke se ikande isua 100 emi ẹkebede?
10 Uwụtn̄kpọ ekpri otu Nditọ Ukpepn̄kpọ Bible oro ẹketọn̄ọde ndikwọrọ eti mbụk mbemiso 1914 owụt se ndikwọrọ ikọ usọp usọp ọwọrọde. Okposụkedi emi mmọ ẹkedide tọsịn ifan̄ kpọt, mmọ ẹma ẹfiọk ke ama oyom ẹnam n̄kpọ usọp usọp ini oro ẹnyụn̄ ẹsịn ifịk ẹnam utom edikwọrọ Obio Ubọn̄. Mmọ ẹma ẹnam ẹmịn̄ etop ke ata ediwak n̄wedmbụk n̄kpọntịbe ẹnyụn̄ ẹsio ediye senima emi ẹkekotde “Photo-Drama of Creation.” Emi ama anam mmọ ẹkwọrọ eti mbụk ẹnọ ediwak miliọn owo. Edieke mmọ mîkpakanamke n̄kpọ usọp usọp, owo ifan̄ ke otu nnyịn ẹkpekop etop Obio Ubọn̄?—Kot Psalm 119:60.
KPEME MBAK UDUTRE NDIKWỌRỌ IKỌ USỌP USỌP
11. Nso inam ndusụk owo ẹtre ndinam n̄kpọ usọp usọp?
11 Mme n̄kpọ oro ẹwọn̄ọrede owo ntịn̄enyịn ẹkeme ndibiọn̄ọ owo ndikere nte utom ukwọrọikọ edide akpan n̄kpọ. Satan ada editịm n̄kpọ emi anam nnyịn ika iso isịn idem ke ọkpọkpọ mbubehe nnyịn ye mme n̄kpọ oro mîdịghe akpan n̄kpọ. (1 Pet. 5:8; 1 John 2:15-17) Ndusụk owo emi ẹkesidade utom Jehovah nte ata akpan n̄kpọ ini kiet ko inamke aba n̄kpọ usọp usọp. Ke uwụtn̄kpọ, Christian eyo mme apostle emi ekekerede Demas ekedi “nsan̄autom” Paul, edi ererimbot unana uten̄e Abasi ama ọwọn̄ọrede enye ntịn̄enyịn. Utu ke Demas ndika iso nda edisọn̄ọ Paul idem ke ini afanikọn̄ nte ata akpan n̄kpọ, enye ama ọkpọn̄ Paul.—Philem. 23, 24; 2 Tim. 4:10.
12. Nso ifet ke nnyịn inyene idahaemi, ndien mme ifet ewe ke idinyene ke nsinsi?
12 Edieke anade ika iso ikwọrọ ikọ usọp usọp, ana in̄wana ibiọn̄ọ udọn̄ edinam kpukpru se ẹnamde ke editịm n̄kpọ emi. Ana isịn ifịk etieti man ‘ikpọsọn̄ọ imụm ata uwem ikama.’ (1 Tim. 6:18, 19) Anaedi afo emenịm ke nsinsi uwem ke isọn̄ ke idak Obio Ubọn̄ Abasi ọyọnọ nnyịn nsinsi ifet ndinam ekese n̄kpọ. Edi ifet oro inyenede idahaemi ndin̄wam mbon en̄wen ẹtiene ẹbọhọ Armageddon inyeneke mbiet.
13. Sia idide mme Christian idahaemi, didie ke ikeme ndika iso nnam n̄kpọ usọp usọp?
13 Sia ata ediwak owo ke ererimbot emi ẹdede ke n̄kan̄ eke spirit, nso ikeme ndin̄wam nnyịn ika iso inam n̄kpọ usọp usọp? Imekeme nditi ke enyene ini emi nnyịn ikedede idap ke ekịm okoneyo ke ndamban̄a usụn̄. Edi nte Paul ọkọdọhọde, ẹma ẹdemede nnyịn, Christ onyụn̄ ayama ọnọ nnyịn. Idahaemi imenyene ifet ndidi mme ọnọ-un̄wana. (Kot Ephesus 5:14.) Ke Paul ama eketịn̄ oro ama, enye ama ewet ete: “Ẹtịm ẹkpeme nte mbufo ẹsan̄ade, mbak ẹdisan̄a nte mbon ndisịme edi ẹsan̄a nte mbon ọniọn̄, ẹdedep ifet ẹnọ idem mbufo, koro mme usen ẹdiọkde.” (Eph. 5:15, 16) Ẹyak ‘idedep ifet’ ke idiọk ini emi ida inam mme n̄kpọ emi ẹkemede ndinam nnyịn idu ke edidemede ke n̄kan̄ eke spirit.
NNYỊN IDU UWEM KE ATA AKPAN INI
14-16. Nso inam utom edikwọrọ Obio Ubọn̄ edi usọp usọp idahaemi akan nte akanam edide?
14 Kpukpru ini esiyom ẹnam utom ukwọrọikọ usọp usọp, edi idahaemi ke oyom ẹnam enye usọp usọp ẹkan. Toto ke 1914, nnyịn imokụt ntan̄ndian idiọn̄ọ oro ẹtịn̄de ẹban̄a ke Ikọ Abasi. (Matt. 24:3-51) Enen̄ede etie nte ke ẹkeme ndisobo ofụri ubonowo. Kpa ye mme ediomi emem ndondo emi, ediwak n̄kpọsọn̄ idụt ẹsụk ẹnyenyene se ibede ikpọ bọmb nuclear 2,000 oro ẹkemede nditop ke ebiet ekededi ke ererimbot. Ukara ẹtọt ke owo ikwe ediwak n̄kpọekọn̄ nuclear ẹnyụn̄ ẹdọhọ ke mmọ ẹsosomo. Okûdi mbon edinam oyomonsia ẹda ndusụk-o? Ndusụk owo ẹdọhọ ke mbon edinam oyomonsia ẹkeme nditọn̄ọ ekọn̄ oro ekemede ndisobo ofụri ubonowo mfep. Edi idịghe ekọn̄ kpọt ekeme ndisobo ubonowo mfep.
15 University College London ye n̄wed oro ẹkotde The Lancet, ẹma ẹtọt ke 2009 ẹte: “Ukpụhọde idaha eyo edi akakan mfịna nsọn̄idem ofụri ekondo.” Ntọt oro ọdọhọ ete: “Ukpụhọde idaha eyo ayafịna nsọn̄idem ata ediwak owo ke mme iduọk isua ifan̄ ke iso onyụn̄ ekeme ndinam ata ediwak owo ẹtaba uwem mmọ.” Emi ekeme ndida n̄kpan̄a ndi ke ntak emi enye anamde inyan̄ ọtọ akan nte ekesidide, anamde edịm okûdep, adade ukwọ, ntatara udọn̄ọ ye oyobio edi, onyụn̄ anamde ẹn̄wana ekọn̄ ke ntak emi mme n̄kpọ udu uwem ẹtọn̄ọde ndikụre. Ke akpanikọ, ekọn̄ ye afanikọn̄ ẹkeme ndisobo ubonowo mfep.
16 Ndusụk owo ẹkeme ndikere ke ekọn̄ nuclear ekeme ndinam “idiọn̄ọ” utịt editịm n̄kpọ emi osu. Edi ata ediwak owo ifiọkke se idiọn̄ọ oro enen̄erede ọwọrọ. Imokụt idiọn̄ọ oro ke ediwak iduọk isua idahaemi, ndien enye owụt ke Christ enen̄ede odu ye nte ke utịt editịm n̄kpọ emi enen̄ede ekpere. (Matt. 24:3) Akananam owo ikwe ediwak ikpehe idiọn̄ọ oro nte ẹkụtde idahaemi. Ini emi anade mme owo ẹdemede ke idap eke spirit edi emi. Utom ukwọrọikọ nnyịn ekeme ndidemede mmọ.
17, 18. (a) Didie ke “ini” oro idude uwem otụk nnyịn? (b) Nso ikeme ndinam mme owo ẹnyịme etop Obio Ubọn̄?
17 Inyene ata esisịt ini ndiwụt ima oro imade Jehovah nnyụn̄ n̄kụre utom ukwọrọikọ oro ẹnọde nnyịn ke mme akpatre usen emi. Se Paul eketịn̄de ọnọ mme Christian eyo mmọ ke Rome enen̄ede edi ata akpan n̄kpọ ọnọ nnyịn mfịn; enye ọkọdọhọ ete: “Mbufo [ẹmefiọk] ini, ẹte ke ini ekekem nte mmimọ ikpedemerede ke idap, koro ke emi edinyan̄a nnyịn emekpere akan nte ekekperede ke ini emi nnyịn ikakabarede idi mme andinịm ke akpanikọ.”—Rome 13:11.
18 Mme n̄kpọ oro ẹkedọhọde ke ẹyetịbe ke mme akpatre usen emi ẹkeme ndinam mme owo ẹfiọk unana mmọ ke n̄kan̄ eke spirit. Mbon en̄wen ẹdikụt ke owo oyom un̄wam ke ini mmọ ẹkerede nte ukara owo mîkemeke nditre unana, ndịk ekọn̄ nuclear, afai, m̀mê edibiat isọn̄. Ndusụk owo ẹdikụt unana mmọ ke n̄kan̄ eke spirit ke ntak se itịbede ke ubon mmọ, utọ nte unana nsọn̄idem, edidian̄ade ndọ, m̀mê n̄kpa. Ke ini inamde utom ukwọrọikọ, nnyịn imekeme ndin̄wam mme utọ owo oro.
NDIFIỌK KE OYOM ẸNAM N̄KPỌ USỌP USỌP ESỊN UDỌN̄ ỌNỌ MMỌ
19, 20. Didie ke ndifiọk ke ana inam n̄kpọ usọp usọp anam ediwak Christian ẹkpụhọde nte ẹdude uwem?
19 Ata ediwak mme Christian ẹnen̄ede ẹsịn idem ke utom ukwọrọikọ ke ntak emi ẹfiọkde ke oyom ẹnam n̄kpọ usọp usọp. Ke uwụtn̄kpọ, akparawa kiet ke Ecuador ye n̄wan esie ẹma ẹbiere ndidu mmemmem uwem ke ẹma ẹkedụk usen akpan mbono eke 2006, emi ibuotikọ ekedide “Nam Enyịn Fo Enen̄ede Ese.” Mmọ ẹma ẹwet mme n̄kpọ oro mmọ mîkenen̄ekede iyom, ndien ke ufan̄ ọfiọn̄ ita mmọ ẹma ẹwọrọ ke ufọk emi enyenede ubet ita ẹkedụn̄ ke ufọk emi enyenede ubet kiet, ẹnyam ndusụk n̄kpoduoho mmọ, ẹnyụn̄ ẹkpe kpukpru isọn mmọ. Ikebịghike, mmọ ẹma ẹtọn̄ọ ndinam usiakusụn̄ unọ un̄wam ẹnyụn̄ ẹnyịme ndiwọrọ n̄kan̄wam esop oro udọn̄ okponde ke ini esenyịn circuit ọkọdọhọde mmọ ẹnam ntre.
20 Eyenete kiet ke Edem Edere America ekewet ete: “Ke ini ami ye n̄wan mi ikodụkde mbono kiet ke 2006, nnyịn ima inana baptism ke isua 30. Ke usụn̄ unyọn̄, nnyịn ima ineme nte ikpadade item oro ẹkenọde ẹban̄a edidu mmemmem uwem isịn ke edinam. (Matt. 6:19-22) Nnyịn ima inyene ufọk ita, isọn̄, ata ndiye ubomisọn̄, ubom, ye ufọkisan̄. Sia ikekerede ke anaedi nnyịn ikebiet mme ndisịme Christian, nnyịn ima ibiere ndidụk utom uyọhọ ini. Ke 2008, nnyịn ima itiene eyen nnyịn inam utom usiakusụn̄ ofụri ini. Nso inem nte ndinen̄ede ndiana kiet ye nditọete nnam utom! Nnyịn ima ika ikanam utom ke ebiet emi udọn̄ okponde. N̄ko-n̄ko, ndinam ekese nnọ Jehovah anam nnyịn inen̄ede ikpere enye. Se inemde nnyịn ikan edi ndikụt nte mme owo ẹsikopde idatesịt ke ini akpanikọ Ikọ Abasi an̄wan̄ade mmọ.”
21. Nso inam nnyịn inam n̄kpọ usọp usọp?
21 Imọfiọk se idisịmde idiọk editịm n̄kpọ emi ke mîbịghike—oro edi, “usen ubiereikpe ye usen emi edisobode mmọ eke mîten̄eke Abasi.” (2 Pet. 3:7) Ifiọk Ikọ Abasi oro inyenede anam isịn ifịk itan̄a ke akwa ukụt ke edi ndien ke oro ebede, ke obufa ererimbot ayada itie. Nnyịn imokụt ke oyom isọsọp ida ata idotenyịn isọk mme owo. Ke nditiene nnam utom emi edide usọp usọp mi, nnyịn iwụt ke imenyene ata ima inọ Abasi ye mme owo.
[Mme Mbụme Ukpepn̄kpọ]
