“Mbọk Sio Nnyịn Ndise!”

Ke mbono ama akasuana ke udiana usen mbono district kiet, Josué emi odude ke Bethel ke Mexico ama asan̄a ese obio Querétaro. Javier ye Maru, ebe ye n̄wan, emi ẹketode Colombia ẹdise obio oro n̄ko, ẹma ẹdọhọ Josué osio mmimọ ndise. Sia Josué ye ufan esie emi edide Ntiense ẹkesịnede n̄kpọ ediye ediye ẹnyụn̄ ẹdiande kad mbono, ebe ye n̄wan oro ẹma ẹbụp mmọ m̀mê ẹkeka edinam ukụre ukpep m̀mê akpan edinam en̄wen. Josué ama ọdọhọ ke mmimọ ikaka mbono Mme Ntiense Jehovah onyụn̄ okot mmọ ẹtiene ẹdidụk ke Sunday.

Ebe ye n̄wan oro ẹma ẹdọhọ ke mmimọ idikemeke ndidụk mbono oro, koro mmimọ ikamake ọfọn̄ oro odotde ye utọ edinam oro. Edi Josué ama asiak enyịn̄ esie ọnọ mmọ onyụn̄ ọnọ mmọ urụk ukopikọ n̄kọk itieutom emi enye anamde utom.

Idem ama akpa Josué ke ini Javier okokotde enye ke ọfiọn̄ inan̄ ẹma ẹkebe. Ebe ye n̄wan oro ẹma ẹdụk mbono district oro, ndien mmọ ẹma ẹyom Mme Ntiense Jehovah ẹdi ufọk emi mmọ ẹkedụn̄de ke Mexico City. Ikebịghike, ẹma ẹtọn̄ọ ukpepn̄kpọ Bible ye mmọ mbiba, ndien mmọ ẹma ẹtọn̄ọ ndidụk mme mbono esop ye unana ubiatini. Ke ọfiọn̄ duop ẹma ẹkebe, mmọ ẹma ẹdi mme asuanetop. Okposụkedi emi mmọ ẹkewọrọde ẹka Toronto ke Canada, mmọ ẹma ẹka iso ẹnam n̄kọri eke spirit ẹnyụn̄ ẹna baptism.

Nte ini akakade, Javier ama ewet leta ọnọ Josué etịn̄ se ikanamde enye ọbọ akpanikọ. Enye ekewet ete: “Mbemiso ikodụkde mbono oro, ami ye n̄wan mi ima ineneme nte ke imoyom ndausụn̄ Abasi. Ke ini ikokụtde nte afo esịnede n̄kpọ ediye ediye, nnyịn ima ikere ke ana edi afo akaka ata akpan mboho. Ke mbono oro, nte ẹkedade ima ẹnọ nnyịn itie ye nte ẹken̄wamde nnyịn itiene ise Bible ke ini ẹkotde ye edu uwem mbon oro ẹkedụkde ẹma ẹnen̄ede ẹtụk nnyịn. Etie nte mme owo ikekereke-kere ke nnyịn ikesịne ọfọn̄ emi mîdịghe ọfọn̄ akpan n̄kpọ.”

Ikọ enyene-ọniọn̄ Edidem Solomon ama enen̄ede osu ke idem Josué. Solomon ekewet ete: “Suan n̄kpasịp fo ke usenubọk ndien kûyak ubọk fo ọduọk odudu tutu esịm mbubreyo; koro afo mûfiọkke ebiet oro emi edikụtde unen, edide mi m̀mê ko, m̀mê mmọ mbiba ẹdifọn ukem ukem.” (Eccl. 11:6) Afo emekeme ndisuan n̄kpasịp ke ndikot mme owo ẹdidụk mbono m̀mê ẹdikop utịn̄ikọ an̄wa. Jehovah ekeme ndida fi n̄kot mbon emi ẹkopde biọn̄ ye nsatitọn̄ ikọ Abasi nte Javier ye Maru ẹkekopde.—Isa. 55:1.

[Ndise ke page 32]

Ọtọn̄ọde ke ufien aka nnasia: Alejandro Voeguelin, Maru Pineda, Alejandro Pineda, Javier Pineda, ye Josué Ramírez ke n̄kọk itieutom Mexico