Ndidat Esịt ke Idotenyịn Oro Inyenede
Ndidat Esịt ke Idotenyịn Oro Inyenede
“[Imenyene] idotenyịn nsinsi uwem oro Abasi, emi mîkemeke ndisu nsu, ọkọn̄wọn̄ọde ke anyan ini emi ekebede.”—TITUS 1:2.
NDỤN̄ỌDE
․․․․․
Nnyịn isan̄a didie ifiọk ke ẹsidara ke heaven ke ini kiet ke otu mbon oro ẹyetde aran ọsọn̄ọde ada anam akpanikọ tutu esịm utịt?
․․․․․
Nso ebuana ke idotenyịn mme erọn̄ en̄wen ndisu enyene ye idotenyịn mbon oro ẹyetde aran?
․․․․․
Edieke iyomde ndikụt nte idotenyịn nnyịn osude, ewe “edisana ido uwem” ye “mme edinam uten̄e Abasi” ke ana nnyịn iwụt?
1. Didie ke idotenyịn oro Jehovah ọnọde nnyịn an̄wam nnyịn iyọ?
JEHOVAH edi “Abasi emi ọnọde [idotenyịn].” Apostle Paul eketịn̄ ikọ oro onyụn̄ ọdọhọ n̄ko ete ke Jehovah ekeme ‘ndinam nnyịn iyọhọ ye idatesịt ye emem oto ke nnyịn ndinịm ke akpanikọ, man nnyịn ikpọyọhọ ye idotenyịn oto ke odudu edisana spirit.’ (Rome 15:13) Edieke nnyịn iyọhọde ye idotenyịn, iyekeme ndiyọ afanikọn̄ ekededi, ika iso ikop idatesịt, inyụn̄ inyene emem. Mme Christian emi ẹyetde aran ye mme erọn̄ en̄wen ẹda utọ idotenyịn emi nte “ukwak ubom ukpọn̄ [mmọ], emi mîdikpụhu, emi onyụn̄ ọsọn̄ọde ada.” (Heb. 6:18, 19) Edieke isọn̄ọde inyene idotenyịn, nnyịn idifiọrọke ikpọn̄ usụn̄, ndien idotenyịn nnyịn ayanam mbuọtidem nnyịn ọsọn̄ inyụn̄ iyakke inyene eyịghe.—Kot Mme Hebrew 2:1; 6:11.
2. Ewe ye ewe idotenyịn ke mme Christian ẹnyene mfịn, ndien ntak emi idotenyịn mbon oro ẹyetde aran ebehede mme erọn̄ en̄wen?
2 Idotenyịn iba ẹdu, ndien Christian kiet kiet oro odude ke utịt ini emi enyene kiet ke otu idotenyịn iba emi. “Ekpri otuerọn̄,” m̀mê mme Christian oro ẹyetde aran, emi ẹsụhọde mi ke isọn̄, ẹdot enyịn ndikodu uwem unana n̄kpa ke heaven nte ndidem ye mme oku ke Obio Ubọn̄ Christ. (Luke 12:32; Edi. 5:9, 10) Edi “mme erọn̄ en̄wen” emi ẹnen̄erede ẹwak ẹkan mmọ ẹdori enyịn ndidu uwem nsinsi ke Paradise mi ke isọn̄ nte mbon emi Obio Ubọn̄ Messiah akarade. (Edi. 7:9, 10; John 10:16) Mme erọn̄ en̄wen ikpedehedei ifre ke ibetedem emi mmimọ inọde “nditọete” Christ oro ẹyetde aran, oro ẹsụhọde mi ke isọn̄, edinam ẹnyan̄a mmimọ. (Matt. 25:34-40) Mbon oro ẹyetde aran ẹyebọ utịp mmọ, ndien mme erọn̄ en̄wen iditreke-tre ndibọ eke mmọ n̄ko. (Kot Mme Hebrew 11:39, 40.) Yak itọn̄ọ ye ndineme idotenyịn oro ẹnọde mbon oro ẹyetde aran.
“ODU-UWEM IDOTENYỊN” EMI MME CHRISTIAN ORO ẸYETDE ARAN ẸNYENEDE
3, 4. Didie ke ‘ẹbon’ mme Christian oro ẹyetde aran ‘obufa man ẹnyene odu-uwem idotenyịn,’ ndien nso idi odu-uwem idotenyịn oro?
3 Apostle Peter ama ewet leta iba ọnọ mme Christian oro ẹyetde aran, emi enye okokotde “mbon oro ẹmekde.” (1 Pet. 1:1) Enye ama anam utịbe utịbe idotenyịn oro ekpri otuerọn̄ ẹnyenede enen̄ede an̄wan̄a. Peter ekewet ke akpa leta esie ete: “Itoro enyene Abasi ye Ete Ọbọn̄ nnyịn Jesus Christ, koro nte ekemde ye akwa mbọm esie enye okobon nnyịn obufa ete inyene odu-uwem idotenyịn ebe ke ediset Jesus Christ ke n̄kpa, ete inyene udeme eke mîkemeke ndibiara mînyụn̄ isabakede mînyụn̄ ikemeke ndibe mfep. Ẹnịm enye ke heaven ẹnọ mbufo, emi ẹdade odudu Abasi ẹkpeme oto ke mbuọtidem kaban̄a edinyan̄a eke ẹdiyararede ke akpatre ini. Mbufo ẹmedara etieti ẹban̄a emi.”—1 Pet. 1:3-6.
4 ‘Ẹbon’ ekpri otu mme Christian emi Jehovah emekde ete ẹtiene Christ ẹkara ke Obio Ubọn̄ eke heaven “obufa” nte nditọ Abasi emi ẹbonde ke spirit. Ẹda edisana spirit ẹyet mmọ aran man ẹtiene Christ ẹdi ndidem ye mme oku. (Edi. 20:6) Peter ọkọdọhọ ke ‘ndibon mmọ obufa’ anam mmọ ẹnyene “odu-uwem idotenyịn,” emi enye okokotde “udeme eke mîkemeke ndibiara mînyụn̄ isabakede mînyụn̄ ikemeke ndibe mfep,” emi ẹnịmde ẹnọ mmọ “ke heaven.” Imosụk ise nte mbon oro ẹyetde aran ‘ẹsidarade etieti’ ẹban̄a odu-uwem idotenyịn mmọ! Edi mmọ ẹdibọ se mmọ ẹdoride enyịn oro edieke mmọ ẹkade iso ẹnam akpanikọ.
5, 6. Ntak emi anade mme Christian oro ẹyetde aran ẹsịn ofụri ukeme man ẹnam ikot oro ẹkotde mmọ ndika heaven enyene nsọn̄ọ?
5 Ke ọyọhọ leta iba oro Peter ekewetde mme Christian oro ẹyetde aran, enye ama ọdọhọ mmọ ‘ẹsịn ofụri ukeme ẹnam ikot eke ẹkekotde mmọ ye edimek eke ẹkemekde mmọ enyene nsọn̄ọ.’ (2 Pet. 1:10) Ana mmọ ẹnen̄ede ẹsịn ukeme man ẹkeme ndinyene nti edu Christian nte mbuọtidem, uten̄e Abasi, ima, ye ima nditọete. Peter ọkọdọhọ ete: “Edieke mme n̄kpọ emi ẹdude mbufo ke idem ọyọhọ ọyọhọ, mmọ ẹyenam mbufo ẹkûtre ndinam utom m̀mê nditre ndin̄wụm mfri.”—Kot 2 Peter 1:5-8.
6 Ke etop oro Christ emi ẹkenamde eset ọkọnọde ẹsọk mbiowo oro ẹyetde aran ke esop Philadelphia ke Asia Minor, enye ama ọdọhọ ete: “Sia afo ama ọkọsọn̄ọ omụm ikọ emi aban̄ade ime mi akama, ami n̄ko nyekpeme fi ke ini idomo emi edisịmde ofụri isọn̄, man ẹdomo kpukpru mbon emi ẹdụn̄de ke isọn̄. Ami mmọn̄ ndedi iwiwa. Ka iso sọn̄ọ mụm se afo enyenede kama, mbak owo edibọ fi anyanya fo.” (Edi. 3:10, 11) Edieke Christian emi ẹyetde aran etrede ndinam akpanikọ, enye idibọhọ “anyanya ubọn̄ eke mîdibiarake,” emi ẹn̄wọn̄ọde ndinọ mme Christian oro ẹyetde aran, emi ẹnamde akpanikọ tutu esịm n̄kpa.—1 Pet. 5:4; Edi. 2:10.
USỤN̄ OBIO UBỌN̄
7. Utịbe utịbe idotenyịn ewe ke Jude eketịn̄ aban̄a ke leta esie?
7 Ke isua 65 E.N., Jude udọeka Jesus ama ewet leta ọnọ ekemmọ mme Christian oro ẹyetde aran, emi enye okokotde “mbon emi ẹkotde.” (Jude 1; men Mme Hebrew 3:1 domo.) Uduak esie ekedi ndiwet leta nnọ mmọ mban̄a utịbe utịbe idotenyịn edinyan̄a emi mme Christian oro ẹdikara ke Obio Ubọn̄ heaven ‘ẹnyenede.’ (Jude 3) Okposụkedi emi enye ekenyenede mme n̄kpọ en̄wen oro akanade enye ọsọsọp ewet aban̄a, ke utịt ibio ibio leta esie oro, enye ama ewet aban̄a utịbe utịbe idotenyịn oro mme Christian oro ẹyetde aran ẹnyenede, ete: “Amaedi enye emi ekemede ndikpeme mbufo mbak mbufo ẹdituak ukot ẹduọn̄ọ emi onyụn̄ anamde mbufo ẹnana ndo ke iso ubọn̄ esie ye akwa idatesịt, emi edide n̄kukụre Abasi Andinyan̄a nnyịn ebe ke Jesus Christ Ọbọn̄ nnyịn, yak ubọn̄, ye ubom, ye odudu, ye edikara, ẹnyene enye ke ofụri eyo emi ekebede ye ke eyo emi ye ke nsinsi nsinsi.”—Jude 24, 25.
8. Didie ke Jude 24 owụt ke idara esidu ke heaven ke ini kiet ke otu mbon oro ẹyetde aran ọsọn̄ọde ada tutu esịm utịt?
8 Ke akpanikọ, Christian kiet kiet oro ẹyetde aran oyom Abasi ekpeme imọ mbak idituak ukot iduọ inyụn̄ inam ẹsobo imọ. Mmọ ẹnyene idotenyịn emi Bible ọnọde nte ke Jesus Christ ayanam mmimọ iset nte mfọnmma owo eke spirit man ida ke iso Abasi ye akwa idatesịt. Ke ini kiet ke otu mbon oro ẹyetde aran anamde akpanikọ tutu esịm utịt, enye akpa ye idotenyịn ke “[ẹyenam imọ iset] ke idem eke spirit,” iset “nte se mîkemeke ndibiara,” iset “ke ubọn̄.” (1 Cor. 15:42-44) Edieke “idatesịt [esinen̄erede odu] ke heaven aban̄a anamidiọk kiet emi akabarede esịt,” kere utọ idatesịt emi esidude do ke ini kiet ke otu nditọete Christ oro ẹbonde ke spirit ọsọn̄ọde ada anam akpanikọ tutu esịm utịt! (Luke 15:7) Jehovah ye mme anam-akpanikọ angel esie ẹsitiene Christian oro ẹyetde aran ẹdat esịt ke ini enye edibọde utịp ye “akwa idatesịt.”—Kot 1 John 3:2.
9. Didie ke ‘ẹbererede’ usụn̄ Obio Ubọn̄ “ẹnịm ata in̄wan̄” ẹnọ mbon oro ẹyetde aran, emi ẹnamde akpanikọ, ndien didie ke idotenyịn emi otụk ndusụk mmọ emi ẹsụhọde ke isọn̄?
9 Peter ama ewet n̄ko ete ke edieke mme Christian oro ẹyetde aran ẹnamde ikot eke ẹkekotde mmọ ọsọn̄ọ ke ndika iso nnam akpanikọ, ke “[ẹyeberede] usụn̄ ẹnịm ata in̄wan̄ ẹnọ [mmọ] ndibe ndụk nsinsi obio ubọn̄ Ọbọn̄ ye Andinyan̄a nnyịn Jesus Christ.” (2 Pet. 1:10, 11) ‘Ẹyeberede’ usụn̄ “ẹnịm ata in̄wan̄” ẹnọ mmọ ndibọ utịp mmọ ke heaven, ndien edu emi mmọ ẹnyenede nte mme Christian eyenen̄ede ayama. Peter ndidọhọ ke ‘ẹbererede’ usụn̄ Obio Ubọn̄ “ẹnịm ata in̄wan̄” ekeme n̄ko ndiwọrọ ke ẹyenen̄ede ẹdiọn̄ mbon emi ẹsịnde ofụri ukeme ẹfehe mbuba uwem emi. Mmọ ẹyenen̄ede ẹkop idatesịt ẹnyụn̄ ẹwụt esịtekọm ke ini mmọ ẹtide nte mmimọ ikọsọn̄ọde ida inam akpanikọ. Ke akpanikọ, idotenyịn emi anam mme Christian oro ẹyetde aran, emi ẹsụhọde ke isọn̄ ẹka iso ‘ẹfak ọfọn̄ esịt mmọ.’—1 Pet. 1:13.
NTAK EMI MME ERỌN̄ EN̄WEN ẸNYENEDE “IDOTENYỊN”
10, 11. (a) Nso idotenyịn ke mme erọn̄ en̄wen ẹnyene? (b) Nso ebuana ke Christ ye ‘ediyarade nditọ Abasi’ ẹnyene ye idotenyịn ndidu ke isọn̄?
10 Apostle Paul ama ewet aban̄a utịbe utịbe idotenyịn emi “nditọ Abasi” oro ẹyetde aran ẹnyenede nte mme anditiene Christ “[nnyene] udeme.” Ekem enye ama etịn̄ aban̄a utịbe utịbe idotenyịn oro Jehovah ọnọde mme erọn̄ en̄wen emi mînyeneke ibat, ete: “Mme n̄kpọ oro ẹbotde [oro edi, mme owo, ẹtie] ye ọkpọsọn̄ udọn̄ ẹbet ini eke ẹdiyararede nditọ Abasi. Koro ẹkenam mme n̄kpọ oro ẹbotde ẹsụk idem ẹnọ ikpîkpu n̄kpọ, itoho ke uduak mmọ edi oto ke enye oro akanamde mmọ ẹsụk idem, edi ọnọde idotenyịn nte ke ẹyenam mme n̄kpọ oro ẹbotde ẹbọhọ ufụn itie mbiara ẹnyụn̄ ẹnyene ubọn̄ ubọn̄ ifụre nditọ Abasi.”—Rome 8:14-21.
11 Jehovah ọkọnọ ubonowo “idotenyịn” ke ini enye ọkọdọhọde ke “mfri” emi ẹken̄wọn̄ọde ayanyan̄a ubonowo osio ke ubọk “akani urụkikọt” emi ẹdiọn̄ọde nte Satan kpa Devil. (Edi. 12:9; Gen. 3:15) Jesus Christ edi akpan “mfri” oro. (Gal. 3:16) Enye ndikakpa nnyụn̄ nset ama anam ẹnen̄ede ẹfiọk ke ẹyesio ubonowo ke ufụn idiọkn̄kpọ ye n̄kpa. Idotenyịn emi enyene n̄kpọ ndinam ye ‘ediyarade nditọ Abasi.’ Mbon oro ẹyetde aran ẹnyụn̄ ẹnọde ubọn̄ ẹdi ubak “mfri” oro. “Ẹdiyararede” mmọ ke ini mmọ ẹdidianade ye Christ isobo idiọk ererimbot Satan emi. (Edi. 2:26, 27) Emi ayanam mme erọn̄ en̄wen, emi ẹdibọhọde akwa ukụt, ẹnyene edinyan̄a.—Edi. 7:9, 10, 14.
12. Nso ufọn ke ediyarade mbon oro ẹyetde aran edida isọk ubonowo?
12 Nso ubọhọ ke “mme n̄kpọ oro ẹbotde,” oro edi, mme owo, ẹdinyene ntem ke Tọsịn Isua Ukara Christ! Ini oro, ẹyedọdiọn̄ ‘ẹyararede’ “nditọ Abasi” emi ẹnọde ubọn̄ ke ini mmọ ẹdinamde utom nte mme oku ye Christ, ẹda utịp uwa ufak Jesus ẹnam ufọn ẹnọ ubonowo. Sia “mme n̄kpọ oro ẹbotde,” emi ẹdide mme owo, ẹdidude ke idak Obio Ubọn̄ heaven, mmọ ẹyetọn̄ọ ndikụt nte ẹsiode mmimọ ke ufụn idiọkn̄kpọ ye n̄kpa. Sụn̄sụn̄, ẹyenam mbon oro ẹkopde item “ẹbọhọ ufụn itie mbiara.” Edieke mmọ ẹnamde akpanikọ ke Tọsịn Isua oro ẹnyụn̄ ẹbede akpatre udomo ke utịt Tọsịn Isua oro, ẹyewet enyịn̄ mmọ ẹsịn ke “n̄wed uwem.” Mmọ ẹyenyene “ubọn̄ ubọn̄ ifụre nditọ Abasi.” (Edi. 20:7, 8, 11, 12) Nte fi, ata ubọn̄ ubọn̄ idotenyịn!
KÛYAK IDOTENYỊN FO AKPA
13. Nso inam nnyịn inyene idotenyịn, ndien ini ewe ke ẹdiyarade Christ?
13 Leta iba oro Abasi ọkọnọde Peter odudu ndiwet ẹsịne ediwak n̄kpọ emi ẹdin̄wamde mbon oro ẹyetde aran ye mme erọn̄ en̄wen ẹkûyak idotenyịn mmọ akpa. Enye ama owụt ke idịghe utom mmọ ẹnam mmọ ẹnyene idotenyịn, edi ke mfọnido Jehovah oro owo mîdotke anam. Enye ekewet ete: “Ẹnen̄ede ẹkpeme ukeme ukere n̄kpọ mbufo; ẹdori enyịn ke mfọnido oro owo mîdotke emi ẹdidade ẹsọk mbufo ke ini ediyarade Jesus Christ.” (1 Pet. 1:13.) Ẹdiyarade Christ ke ini enye edidide idinọ mme anditiene enye emi ẹnamde akpanikọ utịp mmọ inyụn̄ isobo mbon oro mîbakke Abasi.—Kot 2 Thessalonica 1:6-10.
14, 15. (a) Nso ke ana inam mbak idotenyịn nnyịn edikpa? (b) Nso item ke Peter ọkọnọ?
14 Edieke nnyịn mîyomke idotenyịn nnyịn akpa, ana iwụk ekikere ke “usen Jehovah,” inyụn̄ isiti ke enye ke edi. Usen oro ke ẹdisobo “enyọn̄,” m̀mê ukara owo oro odude ke emi, ẹnyụn̄ ẹsobo “isọn̄,” oro edi, mme owo emi mîbakke Abasi ye “mme n̄kpọ oro ẹnamde [isọn̄].” Peter ekewet ete: “Nso orụk owo ke mbufo ẹkpedi . . . , mbufo emi ẹtiede ẹbet ẹnyụn̄ ẹsọn̄ọde ẹnyene edidu usen Jehovah ke ekikere, kpa usen eke enyọn̄ emi asakde ikan̄ editarade ndien mme n̄kpọ oro ẹnamde enyọn̄ ye isọn̄ ẹdinyụn̄ ẹtarade ke ọkpọsọn̄ ufiop!”—2 Pet. 3:10-12.
15 “Mbufa enyọn̄ [ukara Obio Ubọn̄ Christ] ye obufa isọn̄ [obufa n̄ka owo]” ẹdida itie “ẹnyọn̄” ye “isọn̄” emi ẹdude idahaemi. (2 Pet. 3:13) Peter ama eteme nnennen n̄kpọ emi ikpanamde nte isụk ‘itiede ibet’ m̀mê idoride enyịn ke obufa ererimbot, ete: “Ntem, ndima, sia mbufo ẹtiede ẹbet mme n̄kpọ emi, ẹsịn ofụri ukeme man ke akpatre enye okpokụt mbufo nte ẹnanade ntọi ẹnyụn̄ ẹnanade ndo ẹnyụn̄ ẹdude ke emem.”—2 Pet. 3:14.
DU UWEM EKEKEM YE IDOTENYỊN NNYỊN
16, 17. (a) Ewe “edisana ido uwem” ye “mme edinam uten̄e Abasi” ke ana nnyịn iwụt? (b) Didie ke se idoride enyịn iban̄a edisu?
16 Ke adianade ye nnyịn ndinam n̄kpọ mbak idotenyịn nnyịn edikpa, ana idu uwem n̄ko ekekem ye idotenyịn nnyịn. Ana inen̄ede ikere iban̄a orụk owo emi nnyịn idide ke iso Abasi. “Edisana ido uwem” esịne nnyịn “[ndinyene] eti edu uwem ke otu mme idụt,” nnyụn̄ nnam se Abasi ọdọhọde ke enen. (2 Pet. 3:11; 1 Pet. 2:12) Ana inyene ‘ima ke otu idem nnyịn.’ Oro esịne ndinam se ededi oro ikemede man edidianakiet emi odude ke otu nditọete nnyịn ke ofụri ererimbot aka iso odu, onyụn̄ odu n̄ko ke esop nnyịn. (John 13:35) “Mme edinam uten̄e Abasi” ẹdi mme edinam emi ẹwụtde ke nnyịn idi ata mme ufan Jehovah. Emi esịne nte isibọn̄de akam, edikot Bible ke usen ke usen, edinen̄ede n̄kpep n̄kpọ ke idem nnyịn, nnịm utuakibuot ubon, nnyụn̄ mbuana ifịk ifịk ke utom edikwọrọ “eti mbụk obio ubọn̄.”—Matt. 24:14.
17 Kpukpru nnyịn iyom ndidi orụk owo emi Jehovah amade, emi enye edinyụn̄ anyan̄ade ke ini idiọk ererimbot emi ‘editarade.’ Ini oro ke idikụt nte se nnyịn idoride enyịn iban̄a edisude, oro edi, “idotenyịn nsinsi uwem oro Abasi, emi mîkemeke ndisu nsu, ọkọn̄wọn̄ọde ke anyan ini emi ekebede.”—Titus 1:2.
[Mme Mbụme Ukpepn̄kpọ]
[Ndise ke page 22]
‘Ẹsibon’ mme Christian oro ẹyetde aran ‘obufa man ẹnyene odu-uwem idotenyịn’
[Ndise ke page 24]
Kûyak idotenyịn ubon mbufo akpa
