‘Eyen Enyịme Ndiyarade Ete’

“Baba owo kiet inyụn̄ ifiọkke enye emi Ete edide ke mîbọhọke Eyen, ye enye emi Eyen enyịmede ndiyarade enye nnọ.”—LUKE 10:22.

DIDIE KE AFO ỌKPỌBỌRỌ?

․․․․․

Ntak emi Jesus ikpọn̄ ekenen̄erede odot ndinam ẹdiọn̄ọ Ete?

․․․․․

Didie ke Jesus akanam mme owo ẹdiọn̄ọ Ete?

․․․․․

Didie ke afo ekeme ndikpebe Jesus nnyụn̄ nnam ẹdiọn̄ọ Ete?

1, 2. Ewe mbụme ke ediwak owo mîsikemeke ndibọrọ, ndien ntak-a?

 ‘ANIE edi Abasi?’ Mbụme emi esisọn̄ ediwak owo ndibọrọ. Ke uwụtn̄kpọ, kpa ye emi ediwak mbon emi ẹdọhọde ke idi Christian ẹnịmde ke Abasi edi Ita-ke-Kiet, ediwak mmọ ẹdọhọ ke utọ ukpepn̄kpọ emi ikemeke-keme ndiwan̄a owo. Ọkwọrọ ederi kiet emi esinyụn̄ ewetde n̄wed ọdọhọ ete: “Owo ikemeke ndinam utọ ukpepn̄kpọ emi an̄wan̄a owo koro ukpepn̄kpọ emi ayan̄a owo ifiọk.” N̄ko, mbon emi ẹnịmde ukpepn̄kpọ edito ke unam mforo owo ẹnịm ke Abasi idụhe. Mmọ ẹdọhọ ke mme utịbe utịbe n̄kpọ-obot ẹkedidu ke idemmọ. Edi Charles Darwin ikọdọhọke ke Abasi idụhe, enye akakam ọdọhọ ete: “Owo ikemeke ndidiọn̄ọ kpukpru n̄kpọ mban̄a Abasi.”

² Inamke n̄kpọ m̀mê nso ke mme owo ẹnịm ke akpanikọ, ediwak mmọ ẹsibụp n̄kpọ ẹban̄a Abasi. Edi ke ini mmọ mînyeneke eti ibọrọ, ediwak mmọ ẹsitre ndiyom ndidiọn̄ọ m̀mê anie edi Abasi. Satan anam “ikike mbon oro mînịmke ke akpanikọ ekịm.” (2 Cor. 4:4) An̄wan̄a ntak emi ata ediwak owo mîdiọn̄ọke Ete, kpa Andibot ekondo.—Isa. 45:18.

3. (a) Anie ayararede Andibot ọnọ nnyịn? (b) Mme mbụme ewe ke iyom ndibọrọ?

³ Enen̄ede oyom mme owo ẹdiọn̄ọ akpanikọ oro aban̄ade Abasi. Ntak-a? Koro mbon emi “ẹsemede ẹkot enyịn̄ Jehovah” kpọt ẹdibọhọ. (Rome 10:13) Ndiseme n̄kot enyịn̄ Abasi esịne ndinen̄ede ndiọn̄ọ Owo emi Jehovah edide. Jesus Christ ama ekpep mme mbet esie mme akpan n̄kpọ emi. Enye ama ayarade Ete ọnọ mmọ. (Kot Luke 10:22.) Ntak emi mîdụhe owo emi ekemede ndiyarade Ete nte  Jesus? Didie ke Jesus akanam ntre? Ndien didie ke ikeme ndikpebe enye nnyụn̄ nyarade Ete nnọ mbon en̄wen? Ẹyak ibọrọ mme mbụme emi.

JESUS CHRIST IKPỌN̄ ENEN̄EDE ODOT

4, 5. Ntak emi Jesus kpọt enen̄erede odot ndiyarade Ete esie?

⁴ Jesus ekenen̄ede odot ndiyarade Ete esie. Ntak-a? Koro mbemiso ẹkebotde n̄kpọ enwen ekededi, Jesus, kpa “ikpọn̄-ikpọn̄ edibon Eyen Abasi,” ama ododu ke heaven. (John 1:14; 3:18) Ata san̄asan̄a ifet ekedi oro! Enye ikpọn̄ okodu ke ini Abasi mîkobotke mme n̄kpọ eken, ndien Abasi ama enen̄ede enyene ini ọnọ enye. Enye ama ekpep n̄kpọ oto Abasi onyụn̄ ekpebe edu esie. Anaedi Ete ye Eyen emi ẹma ẹsinen̄ede ẹneme nneme ẹnyụn̄ ẹma kiet eken ke anana-ibat isua. (John 5:20; 14:31) Eyen ama enen̄ede ọfiọk edu Ete esie.—Kot Colossae 1:15-17.

⁵ Ete ama emek Eyen, kpa “Ikọ Abasi,” ete edi etịn̄ikọ ke ibuot imọ. (Edi. 19:13) Ke ntre, ẹma ẹnọ Jesus san̄asan̄a utom ndiyarade Ete nnọ mbon en̄wen. Oro akanam John, andiwet Gospel, ọdọhọde ke Jesus, kpa “Ikọ,” odu “ke ikpanesịt Ete.” (John 1:1, 18) Ikọ John emi owụt se ẹkesinamde ke ini ẹdiade udia ke eyo mmọ. Ẹma ẹsinam isenowo ẹtie ẹkpere kiet eken. Ndien emi ama esinam mmọ ẹkeme ndineme nneme. Ntem, Eyen ndidu “ke ikpanesịt Ete” ọwọrọ ke enye ama esineme nneme ye Ete.

6, 7. Nso ikanam Ete ye Eyen ẹtetịm ẹkpere kiet eken?

⁶ Ete ye Eyen emi ẹketetịm ẹkpere kiet eken. Enye ama “[adat Abasi] esịt kpukpru usen. (Kot Mme N̄ke 8:22, 23, 30, 31.) Ndien enen̄ede enen ndidọhọ ke Eyen ndinam utom ye Ete nnyụn̄ n̄kpebe enye ama anam mmọ ẹtetịm ẹkpere kiet eken. Ke ẹma ẹkebot mme angel ye owo, Eyen ama okụt nte Jehovah akanamde n̄kpọ ye mmọ, ndien emi ama anam enye etetịm ama mme edu Abasi.

⁷ Idem ke ini Satan ọkọdọhọde ke Jehovah inyeneke unen ndikara, Eyen ama okụt nte Jehovah owụtde ima, ekpede edinen ikpe, enyenede ọniọn̄, onyụn̄ owụtde odudu ke ini afanikọn̄. Anaedi emi ama an̄wam Jesus ọyọ mme mfịna emi enye okosobode mi ke isọn̄.—John 5:19.

8. Didie ke mme mbụk Gospel ẹkeme ndin̄wam nnyịn inen̄ede ifiọk mme edu Abasi?

⁸ Eyen edi n̄kukụre owo emi ekemede ndinen̄ede nnam ẹdiọn̄ọ Ete koro enye enen̄ede ekpere Jehovah. Idụhe n̄kpọ enwen emi ekemede ndinam nnyịn idiọn̄ọ Ete nte ndidụn̄ọde se ikpọn̄-ikpọn̄ edibon Eyen ekekpepde onyụn̄ anamde. Ke uwụtn̄kpọ, kere adan̄a nte ọkpọsọn̄de ndifiọk se ima edide edieke ikpokotde-kot kpọt ke n̄wed ukabade ikọ se ikọ oro “ima” ọwọrọde. Edi ndikot mme mbụk Gospel emi ẹban̄ade utom ukwọrọikọ Jesus ye nte enye ekesikerede aban̄a mme owo ekeme ndinam nnyịn inen̄ede idiọn̄ọ se ikọ emi, “Abasi edi ima,” ọwọrọde. (1 John 4:8, 16) Ntre ke edi n̄ko ye mme edu Abasi eken emi Jesus ekekpepde mme mbet esie ke ini enye okodude mi ke isọn̄.

NTE JESUS AKAYARAREDE ETE ESIE

9. (a) Siak akpan usụn̄ iba emi Jesus akayararede Ete esie. (b) Nọ uwụtn̄kpọ emi owụtde nte Jesus akadade se enye ekekpepde ayararede Ete esie.

⁹ Didie ke Jesus akayarade Ete esie ọnọ mme mbet esie ye mbon oro ẹkekabarede ẹdi mme mbet esie nte ini  akakade? Enye akanam ntre ke akpan usụn̄ iba: ke mme ukpepn̄kpọ ye edu uwem esie. Yak ibem iso ineme ukpepn̄kpọ esie. Se Jesus ekekpepde mme mbet esie owụt ke enye enen̄ede ọfiọk ekikere Ete esie, nte esitiede Enye ke idem, ye nte Enye esinamde n̄kpọ. Ke uwụtn̄kpọ, Jesus ọkọdọhọ ke Ete imọ etie nte eti ekpemerọn̄ emi akade ndiyom erọn̄ esie kiet emi osopde usụn̄. Enye ọkọdọhọ ke edieke owo oro okụtde erọn̄ oro, ke “enye [ayadara] enye akan anan̄ ye efịtenan̄ emi mîkosopke usụn̄.” Nso ke uwụtn̄kpọ emi ọkọwọrọ? Jesus ọkọdọhọ ete: “Kpasụk ntre Ete mi emi odude ke heaven iyomke kiet ke otu n̄kpri owo emi atak.” (Matt. 18:12-14) Nso ke uwụtn̄kpọ emi ekpep fi aban̄a Jehovah? Idem edieke esikerede ndusụk ini ke imọ iwọrọke n̄kpọ, ke ẹnyụn̄ ẹfre imọ enyịn, ti ke Ete fo ke heaven ifreke fi; enye ekere aban̄a fi. Enye ada fi nte kiet ke otu “n̄kpri owo emi.”

10. Didie ke Jesus akada edu uwem esie ayarade Ete esie?

¹⁰ Usụn̄ en̄wen emi Jesus akadade ayarade Ete esie ọnọ mme mbet esie edi edu uwem esie. Ntre, ke ini apostle Philip ọkọdọhọde Jesus ete: “Wụt nnyịn Ete,” Jesus ama enen ndidọhọ enye ete: “Owo eke okụtde mi okụt Ete n̄ko.” (John 14:8, 9) Se ndusụk usụn̄ emi Jesus okowụtde ke imọ inyene edu Ete imọ. Ke ini owo akpamfia ekekpede Jesus ubọk ete ọkọk imọ udọn̄ọ, enye ama otụk owo oro “akpamfia [ọkọyọhọde] enye idem” do onyụn̄ ọdọhọ ete: “Mmama. Sana.” Ke ẹma ẹkekọk enye, enye ama ọfiọk ke Jehovah ọkọnọ Jesus odudu ada ọkọk imọ. (Luke 5:12, 13) N̄ko-n̄ko, ke ini Lazarus akakpade, anaedi mme mbet ẹma ẹkụt ke Ete esitua owo mbọm ke ini Jesus “[okomụmde] mmụm ke spirit, esịt onyụn̄ etịmede enye,” enye onyụn̄ “atua eyet.” Okposụkedi oro Jesus ọkọdiọn̄ọde ke imọn̄ inam Lazarus eset, n̄kpa oro ama abiak enye nte akabiakde nditọeka ye mme ufan Lazarus. (John 11:32-35, 40-43) Anaedi enyene mme mbụk Bible emi ẹban̄ade nte Jesus okowụtde mme owo mbọm, emi ẹnamde fi ọfiọk nte Ete esituade owo mbọm.

11. (a) Nso ke Jesus akayarade aban̄a Ete esie ke ini enye akanamde temple asana? (b) Ntak emi mbụk oro aban̄ade nte Jesus akanamde temple asana ọdọn̄de nnyịn esịt?

¹¹ Nso ke Jesus ndikanam temple asana ekpep fi? Da enyịn ikike se se enye akanamde: Jesus ada urụk anam ikpa ebịn kpukpru mme anyam erọn̄ ye enan̄. An̄wan̄a okụk mme okpụhọ okụk ọduọn̄ọ, onyụn̄ onụk mme okpokoro mmọ ọduọn̄ọ. (John 2:13-17) Nte enye akanamde oro odudu odudu ama anam mme mbet esie ẹti ntịn̄nnịm ikọ emi Edidem David ekewetde  ete: “Ifịk ufọk fo [adia] mi idem.” (Ps. 69:9) Nte Jesus akanamde n̄kpọ owụt ke ama enen̄ede ọdọn̄ enye ndida nnọ utuakibuot akpanikọ. Ewe edu Abasi ke afo okụt ke mbụk oro? Emi eti nnyịn ke Abasi enyene odudu nditre idiọkido ke isọn̄, onyụn̄ enen̄ede ọdọn̄ enye ndinam ntre. Nte Jesus ekenen̄erede asua idiọkn̄kpọ owụt nte esitiede Ete ke idem ndikụt idiọkido oro ọyọhọde isọn̄ mfịn. Akpana emi enen̄ede ọdọn̄ nnyịn esịt ke ini iyọde ufịk.

12, 13. Nte Jesus akanamde n̄kpọ ye mme mbet esie ekpep fi nso aban̄a Jehovah?

¹² Yak ineme uwụtn̄kpọ en̄wen—oro edi, nte Jesus ekesinamde n̄kpọ ye mme mbet esie. Mmọ ẹma ẹsineni m̀mê anie okpon akan ke otu mmimọ. (Mark 9:33-35; 10:43; Luke 9:46) Anyan ini emi Jesus okodude ye Ete esie ama anam enye ọfiọk nte Jehovah adade iseri. (2 Sam. 22:28; Ps. 138:6) Ke adianade do, Jesus ama okụt nte Satan kpa Devil owụtde edu emi. Owo ntan̄idem oro ama uwọrọiso ye ikpọ itie etieti. Ke ntre, anaedi ama abiak Jesus etieti ndikụt nte mme mbet esie emi enye ọkọnọde ukpep ẹnyenede utọ idiọk edu emi. Idem mbon emi enye ekemekde nte mme apostle esie ẹma ẹnyene edu emi! Mmọ ẹma ẹyom ikpọ itie tutu ke idem akpatre usen emi Jesus okodude uwem mi ke isọn̄. (Luke 22:24-27) Jesus ama aka iso an̄wam mmọ sụn̄sụn̄ onyụn̄ enịm ke nte ini akade ke mmọ ẹyekpebe nsụhọdeidem imọ.—Phil. 2:5-8.

¹³ Ndi emekeme ndikụt ke Jesus akanam n̄kpọ nte Ete esie ke nte enye ekenyenede ime an̄wam mme mbet esie ẹkpụhọde? Ndi omokụt nte Jesus etịn̄de ikọ onyụn̄ anamde n̄kpọ nte Ete esie emi mîsisịnke ikọt esie ke ntak ndudue emi mmọ ẹsinamde? Ndi ndifiọk mme edu Abasi emi ikpanamke nnyịn ikabade esịt inyụn̄ ikpe enye ubọk ke ini inamde ndudue?

EYEN AMA AYARADE ETE UNYỊME UNYỊME

14. Didie ke Jesus okowụt ke imọ imenyịme ndiyarade Ete imọ?

¹⁴ Ediwak mme akara ukara ufịk ẹsidomo ndika iso n̄kara mme owo ebe ke ndidịp mmọ se akpanade mmọ ẹfiọk. Edi utu ke Jesus ndinam ntre, enye ama enyịme nditịn̄ nnọ mme owo se enye ọkọfiọkde aban̄a Ete, onyụn̄ ayarade kpukpru se anade mmọ ẹfiọk ẹban̄a Ete ọnọ mmọ. (Kot Matthew 11:27.) Ke adianade do, Jesus ama ‘ọnọ mme mbet esie ikike man mmọ ẹkeme ndifiọk enye emi edide akpanikọ,’ kpa Jehovah Abasi. (1 John 5:20) Nso ke emi ọwọrọ? Jesus ama an̄wam mme mbet esie man ẹfiọk se enye ekekpepde mmọ aban̄a Ete esie. Enye ikedịpke Ete esie ke ndikpep ukpepn̄kpọ Abasi-Ita-ke–Kiet, emi mîn̄wan̄ake owo.

15. Ntak emi Jesus mîkayarakede kpukpru n̄kpọ emi aban̄ade Ete esie?

¹⁵ Ndi Jesus ama ayarade kpukpru n̄kpọ oro enye ọkọfiọkde aban̄a Ete esie? Ihih, enyene ediwak n̄kpọ emi enye mîkayarakede. (Kot John 16:12.) Ntak-a? Sia mme mbet esie ‘ikekemeke ndibiom’ mmọ ini oro. Edi nte Jesus ọkọdọhọde, ẹkenyene ndinam mme owo ẹfiọk ediwak n̄kpọ ke ini “andin̄wam,” m̀mê edisana spirit, emi edidade mmọ odụk ke “ofụri akpanikọ,” edidide. (John 16:7, 13) Ukem nte ete ye eka emi ẹnyenede ọniọn̄ mîsitịn̄ke ndusụk n̄kpọ inọ nditọ mmọ tutu mmọ ẹkponi ẹkem ndifiọk n̄kpọ oro, Jesus ama ebet tutu ini emi mme mbet esie ẹdikemede ndifiọk ndusụk akpanikọ  emi ẹban̄ade Ete. Enye ama ọfọn ido onyụn̄ ọfiọk ukeme mmọ.

KPEBE JESUS KE NDIN̄WAM MME OWO ẸDIỌN̄Ọ JEHOVAH

16, 17. Ntak emi afo ekemede ndinam mbon en̄wen ẹdiọn̄ọ Ete?

¹⁶ Edieke enen̄erede ọdiọn̄ọ owo onyụn̄ amade nti edu esie, ndi ukpûtịn̄ke unọ mbon en̄wen uban̄a enye? Ke ini Jesus okodude ke isọn̄, enye ama etịn̄ aban̄a Ete esie ọnọ mme owo. (John 17:25, 26) Ndi nnyịn imekeme ndikpebe enye ke ndiyarade Jehovah nnọ mbon en̄wen?

¹⁷ Nte ima ikeneneme, Jesus enen̄ede ọdiọn̄ọ Ete esie akan nte owo en̄wen ọdiọn̄ọde. Edi enye ama enyịme nditịn̄ ndusụk se enye ọkọfiọkde nnọ mbon en̄wen, akam ọnọ mme anditiene enye ikike man mmọ ẹkeme ndinen̄ede mfiọk edu Abasi. Jesus anam nnyịn inen̄ede ifiọk Ete ke usụn̄ emi ediwak owo mfịn mîfiọkke. Esịt enen̄ede enem nnyịn nte Jesus ekenyịmede ndida ukpepn̄kpọ ye edu uwem esie nyarade Ete esie nnọ nnyịn. Ke akpanikọ, imekeme ndibụre mbụre ke imọdiọn̄ọ Ete. (Jer. 9:24; 1 Cor. 1:31) Jehovah enen̄ede ekpere nnyịn ke ntak emi nnyịn isịnde ukeme ndisan̄a n̄kpere enye. (Jas. 4:8) Ke ntre, nnyịn imekeme ndibuana ifiọk emi ye mbon en̄wen. Didie ke ikeme ndinam oro?

18, 19. Siak mme usụn̄ emi ẹkemede ndinam mme owo ẹdiọn̄ọ Ete. Ndien didie ke ikeme ndinam emi?

¹⁸ Nnyịn inyene ndikpebe Jesus ke ndida ikọ ye edinam nyarade Ete. Ti ete ke ediwak mbon oro nnyịn isobode ke an̄wautom ifiọkke Abasi. Ekeme ndidi nsunsu ukpepn̄kpọ iyakke mmọ ẹdiọn̄ọ Abasi. Imekeme ndida Bible n̄kpep mmọ enyịn̄ Abasi, se enye aduakde ọnọ ubonowo, ye orụk owo emi enye edide. Ke adianade do, imekeme ndineme mme mbụk Bible oro ẹyararede mme edu Abasi ke usụn̄ oro nnyịn mîkekereke ye nditọete nnyịn. Emi ekeme ndinyene ufọn nnọ mmọ.

¹⁹ Nso kaban̄a ndikpebe Jesus nnyụn̄ ndu uwem ke usụn̄ emi edinamde ẹdiọn̄ọ Ete? Ke ini mme owo ẹkụtde ima Christ ke edu nnyịn, emi ayanam mmọ ẹsan̄a ẹkpere Ete ye Jesus. (Eph. 5:1, 2) Apostle Paul ọkọdọhọ nnyịn ‘ikpebe imọ, kpa nte imọ ikpebede Christ.’ (1 Cor. 11:1) Nso akwa ifet ke inyene ntem ndida edu nnyịn n̄n̄wam mme owo ẹfiọk Jehovah! Ih, ẹyak nnyịn ika iso ikpebe Jesus ke ndiyarade Ete nnọ mbon en̄wen.

[Mme Mbụme Ukpepn̄kpọ]