Ka Iso Nam N̄kpọ Jehovah ke Ofụri Esịt
Ka Iso Nam N̄kpọ Jehovah ke Ofụri Esịt
“Eyen mi, fiọk Abasi usọ nyụn̄ nam n̄kpọ esie ke ofụri esịt.”—1 CHRON. 28:9.
YOM IBỌRỌ MME MBỤME EMI:
․․․․․
Nso idi ndamban̄a esịt?
․․․․․
Didie ke ikeme ndidụn̄ọde esịt nnyịn?
․․․․․
Didie ke ikeme ndika iso nnam n̄kpọ Jehovah ke ofụri esịt?
1, 2. (a) Ewe ndido idem owo ke Bible awak nditịn̄ mban̄a n̄kan ke ndamban̄a usụn̄? (b) Ntak emi anade idiọn̄ọ se esịt adade aban̄a?
BIBLE esiwak nditịn̄ mban̄a ndido idem owo ke ndamban̄a usụn̄. Ke uwụtn̄kpọ, Job ọkọdọhọ ke ‘afai idụhe imọ ke ekaubọk.’ Edidem Solomon ama ọdọhọ ke “eti etop anam ọkpọ enyene ndia.” Jehovah ọkọdọhọ Ezekiel ke ‘imanam ọkpọiso esie ọsọn̄ akan itiat.’ Ndien ẹma ẹdọhọ apostle Paul ẹte: “Afo amada ndusụk n̄kpọ emi ẹtiede esen esen ke utọn̄ nnyịn edi.”—Job 16:17; N̄ke 15:30; Ezek. 3:9; Utom 17:20.
2 Edi enyene ndido idem owo emi Bible esiwakde nditịn̄ mban̄a ke ndamban̄a usụn̄ akan mbon eken. Hannah, anam-akpanikọ asan̄autom Abasi, ama asiak enye ke akam esie ete: “Esịt mi adara ke Jehovah.” (1 Sam. 2:1) Ke nditịm ntịn̄, mme andiwet Bible ẹtịn̄ ẹban̄a esịt ekpere ndisịm utịm ike tọsịn kiet, ndien emi esiwak ndidi ke ndamban̄a usụn̄. Ntre, enen̄ede ọfọn idiọn̄ọ se esịt adade aban̄a koro Bible ọdọhọ ke ana ikpeme enye.—Kot Mme N̄ke 4:23.
NSO IDI NDAMBAN̄A ESỊT?
3. Didie ke ikeme ndidiọn̄ọ se esịt adade aban̄a ke Bible? Nọ uwụtn̄kpọ.
3 Kpa ye emi Ikọ Abasi mîtịn̄ke ke “esịt” ọwọrọ emi m̀mê oko, se enye etịn̄de anam nnyịn ifiọk se esịt adade aban̄a. Didie? Da ata ediye n̄kpọ emi ẹdade n̄kwaitiat ẹbot ke uwụtn̄kpọ. Edieke adade nsannsan ese, oyokụt ke n̄kwaitiat oro ẹkọkde do ke nde ke nde anam enyene ata ediye n̄kpọ. Ukem ntre, edieke isede nsio nsio itie Bible oro ẹtịn̄de ẹban̄a esịt, iyokụt ke nditan̄ mmọ ndian kiet ẹwụt nnyịn n̄kpọ. Nso ke mmọ ẹwụt nnyịn?
4. (a) Nso ke “esịt” ada aban̄a? (b) Nso ke ikọ Jesus ke Matthew 22:37 ọwọrọ?
4 Mme andiwet Bible ẹda ikọ oro “esịt” ẹwụt se owo enen̄erede edi. Esịt esịne mme udọn̄, ekikere, ukeme, uduak, edu, ye mme utịtmbuba nnyịn. (Kot Deuteronomy 15:7; Mme N̄ke 16:9; Utom 2:26.) N̄wed ndụn̄ọde kiet ọdọhọ ke esịt ada aban̄a “se owo enen̄erede edi.” Edi enyene mme ini emi esịt esidade aban̄a n̄kpọ kiet m̀mê iba. Ke uwụtn̄kpọ, Jesus ọkọdọhọ ete: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.” (Matt. 22:37) Ke ọtọ emi, “esịt” ada aban̄a se imade, mme udọn̄ nnyịn, ye nte etiede nnyịn ke idem. Jesus akasiak esịt, ukpọn̄, ye ekikere man enen̄ede owụt ke ana iwụt ima emi imade Abasi ke nte idade n̄kpọ, ke nte idude uwem, ye ke nte isikerede n̄kpọ. (John 17:3; Eph. 6:6) Edi ke ini ikọ oro “esịt” adade ikpọn̄, enye ada aban̄a se owo enen̄erede edi ke esịtidem.
NTAK EMI ANADE IKPEME ESỊT NNYỊN
5. Ntak emi anade isịn ofụri ukeme nnyịn inam n̄kpọ Jehovah ke ofụri esịt?
5 Edidem David ama eti Solomon n̄kpọ aban̄a esịt ete: “Solomon eyen mi, fiọk Abasi usọ nyụn̄ nam n̄kpọ esie ke ofụri esịt ye ofụri ukpọn̄ ke idatesịt; koro Jehovah odụn̄ọrede kpukpru esịt, enye onyụn̄ ọfiọk kpukpru ekikere esịt owo.” (1 Chron. 28:9) Ke akpanikọ, Jehovah edi Andidụn̄ọde kpukpru esịt, enye esidụn̄ọde esịt nnyịn. (N̄ke 17:3; 21:2) Nnyịn iyedi ufan Jehovah inyụn̄ idori enyịn ke ini iso eyenem edieke enye okụtde eti n̄kpọ ke esịt nnyịn. Ntre, enen̄ede ọfọn ikop item David ke ndisịn ofụri ukeme nnyịn nnam n̄kpọ Jehovah ke ofụri esịt.
6. Nso ke ana nnyịn idiọn̄ọ iban̄a ubiere nnyịn ndinam n̄kpọ Jehovah?
6 Nnyịn ndisịn ifịk nnam n̄kpọ nte ikọt Jehovah owụt ke imenen̄ede ima ndinam n̄kpọ Abasi ke ofụri esịt. Imọdiọn̄ọ ke mfịghe idiọk ererimbot Satan emi ye unana mfọnmma nnyịn ẹkeme ndibiọn̄ọ nnyịn ndinam emi. (Jer. 17:9; Eph. 2:2) Ntem, oyom isidụn̄ọde esịt nnyịn kpukpru ini man ika iso inam n̄kpọ Abasi ke ofụri esịt. Didie ke ikeme ndinam oro?
7. Nso ke ẹsida ẹdiọn̄ọ se idude nnyịn ke esịt?
7 Ke akpanikọ, owo ikemeke ndifiọk se isịnede nnyịn ke esịt, kpa nte owo mîkemeke ndikụt se idude ke esịt eto. Edi Jesus ọkọdọhọ ke Ukwọrọikọ Oro ke Obot ete ke ẹda mfri eto ẹdiọn̄ọ eto, ntre n̄ko ke mme edinam nnyịn ẹsiyarade se idude nnyịn ke esịt. (Matt. 7:17-20) Ẹyak idụn̄ọde kiet ke otu edinam emi.
ETI USỤN̄ EMI IKEMEDE NDIDỤN̄ỌDE ESỊT NNYỊN
8. Nso ebuana ke ikọ Jesus ke Matthew 6:33 enyene ye esịt nnyịn?
8 Mbemiso Jesus ọkọdọhọde ke ẹda mfri eto ẹdiọn̄ọ eto, enye ama etịn̄ se otuowo emi ẹkekpan̄de utọn̄ ẹnọ enye ẹkpenamde man ẹwụt ke ọdọn̄ mmimọ ndinam n̄kpọ Jehovah ke ofụri esịt. Enye ọkọdọhọ ete: “Ẹka iso, ndien, ndibem iso nyom obio ubọn̄ ye edinen ido esie, ndien ẹyedian kpukpru n̄kpọ emi ẹnọ mbufo.” (Matt. 6:33) Ke akpanikọ, se nnyịn inịmde akpa ke uwem nnyịn owụt se nnyịn iyomde, ikerede, inyụn̄ iduakde ke isọn̄ esịt nnyịn. Ndidụn̄ọde se idide ata akpan n̄kpọ ke uwem nnyịn edi eti usụn̄ ndise m̀mê nnyịn ke inam n̄kpọ Abasi ke ofụri esịt.
9. Nso ke Jesus ọkọdọhọ mme owo ẹnam, ndien nso ke nte mmọ ẹkenamde n̄kpọ okowụt?
9 Ikebịghike ke Jesus ama ọkọdọhọ mme anditiene enye “ẹka iso . . . ndibem iso nyom obio ubọn̄,” n̄kpọ ama etịbe emi okowụtde nte se owo adade nte akpan n̄kpọ ke uwem ekemede ndinam ẹdiọn̄ọ se isịnede enye ke esịt. Luke emi eketienede ewet Gospel ama etịn̄ se iketịbede ke ndidọhọ ke Jesus ama “etetịm ebiere ndika Jerusalem,” kpa ye oro enye ọkọdiọn̄ọde se idiwọrọde enye do. Nte Jesus ye mme apostle esie ‘ẹkekade ke usụn̄,’ enye ama osobo ye mme owo onyụn̄ ọdọhọ owo mmọ kiet kiet ete: “Tiene mi.” Mmọ ẹma ẹnyịme nditiene Jesus, edi ama enyene se mmọ ẹkeyomde ndibem iso nnam. Kiet ọkọdọhọ ete: “Yak mi n̄ka kan̄a n̄kobụk ete mi.” En̄wen ọdọhọ ete: “Nyetiene fi, Ọbọn̄; edi yak mbem iso kan̄a n̄kọkọm mbonufọk mi unyọn̄.” (Luke 9:51, 57-61) Ata akwa ukpụhọde odu ke ufọt Jesus emi ekenen̄erede oyom ndinam n̄kpọ Abasi ke ofụri esịt ye mbon emi enye ọkọdọhọde ete ẹtiene imọ! Mmọ ndikekere mbubehe idemmọ mbemiso n̄kpọ Obio Ubọn̄ owụt ke mmọ ikamaha Abasi ke ofụri esịt.
10. (a) Nso ke mme anditiene Jesus ẹnam ẹban̄a ikot esie? (b) Nso ibio ibio uwụtn̄kpọ ke Jesus ọkọnọ?
10 Nnyịn itiehe nte mme owo oro, nnyịn imenyịme nditiene Jesus ndien ke inam n̄kpọ Jehovah kpukpru usen. Ntem ke nnyịn iwụt se nnyịn ikerede ke esịt nnyịn iban̄a Abasi. Edi ikpenyene ndifiọk ke kpa ye oro isịnde idem ke mme edinam esop, ke n̄kpọ ekeme ndibiọn̄ọ nnyịn ndinam emi ke ofụri esịt. Nso idi oro? Jesus ama asiak n̄kpọ emi ke ini enye ekenemede nneme ye mbon oro enye ọkọdọhọde ẹtiene imọ, ete: “Baba owo kiet emi akabarede ese mme n̄kpọ oro ẹdude ke edem ke enye ama ekesịn ubọk ke ufụn̄isọn̄ idotke ndidụk obio ubọn̄ Abasi.” (Luke 9:62) Nso ke uwụtn̄kpọ oro Jesus ọkọnọde mi ekpep nnyịn?
NDI ‘IMEYỊRE KE SE IFỌNDE’?
11. Nso iketịbe inọ utom owoutom oro ke uwụtn̄kpọ Jesus, ndien ntak-a?
11 Ẹyak idian ndusụk n̄kpọ ke uwụtn̄kpọ Jesus oro man inen̄ede ikụt se enye ekpepde nnyịn. Owo emi ẹkpede utom-in̄wan̄ ke esịn ifịk ofụn̄ isọn̄. Nte enye osụk ofụn̄de isọn̄ enye ke ekere ufọk esie emi ubon esie, mme ufan, udia, ikwọ, mme n̄kpọ inemesịt, ye itie nduọkodudu ẹdude. Mme n̄kpọ emi ẹdọn̄ enye. Ke enye ama okofụn̄ isọn̄ aka anyan, mme n̄kpọ emi ẹtetịm ẹdọn̄ enye tutu enye atuak ada “ese mme n̄kpọ oro ẹdude ke edem.” Mme n̄kpọ emi ẹwọn̄ọrede enye ntịn̄enyịn ndien enye inamke aba utom emi enye akpanamde, ke ini edide utom oro osụhọde ndinam mbemiso ẹtọde n̄kpọ osụk okpokpon. Imọfiọk ke owo emi ekekpede enye utom idinemke esịt ye enye ke ntak emi enye mîkaha iso inam utom esie.
12. Didie ke ndusụk Christian mfịn ẹbiet owoutom oro ke uwụtn̄kpọ Jesus?
12 Se nte n̄kpọ emi ekemede nditịbe mfịn mi. Owoutom oro ekeme ndida mban̄a Christian ekededi emi etiede nte ke anam ọfọn edi emi n̄kpọ ekemede nditịbe nnọ esịt esie. Ke uwụtn̄kpọ, yak idọhọ ke eyenete esisịn idem ke utom ukwọrọikọ. Edi kpa ye oro enye esidụkde mme mbono esop onyụn̄ ọwọrọde an̄wautom, enye aka iso ekere mme n̄kpọ ererimbot emi enye amade. Ndien ke ọwọn̄esịt esie, mme n̄kpọ emi ẹnen̄ede ẹdọn̄ enye. Ke akpatre, ke enye ama akanam n̄kpọ Abasi ke ediwak isua, itọn̄ n̄kpọ ererimbot emi ọdọn̄ enye tutu enye ọwọn̄ọde enyịn ese “mme n̄kpọ oro ẹdude ke edem.” Ndien kpa ye oro ediwak n̄kpọ ẹsụk ẹdude ndinam ke utom ukwọrọikọ, enye ‘isọn̄ọke aba imụm ikọ uwem ikama’ onyụn̄ etre ndisịn idem ke n̄kpọ Abasi nte ekesisịnde. (Phil. 2:16) Jehovah emi edide “Enyene-idọk” isinemke esịt ndikụt nnyịn inanade ime.—Luke 10:2.
13. Nso ke ndinam n̄kpọ Jehovah ke ofụri esịt abuana?
13 Se emi ekpepde nnyịn ana in̄wan̄-in̄wan̄. Enen̄ede ọfọn ndisitiene mbuana kpukpru ini ke nti ye ndinem n̄kpọ nte mme mbono esop ye an̄wautom. Edi ndinam n̄kpọ Abasi ke ofụri esịt ikụreke ke oro. (2 Chron. 25:1, 2, 27) Edieke Christian osụk akade iso esịn esịt ke “mme n̄kpọ oro ẹdude ke edem”—oro edi, ndusụk usụn̄ uwem ererimbot emi—enye ekeme ndikpọn̄ Abasi. (Luke 17:32) Ibọhọke nnyịn inen̄ede ‘isua se idiọkde, inyụn̄ iyịre ke se ifọnde,’ nnyịn “[ididotke] ndidụk obio ubọn̄ Abasi.” (Rome 12:9; Luke 9:62) Ntem, ana kpukpru nnyịn ikụt ite ke n̄kpọ ndomokiet ke ererimbot Satan emi—inamke n̄kpọ m̀mê enye enem onyụn̄ ọfọn adan̄a didie—ibiọn̄ọke nnyịn ndinam n̄kpọ Abasi ke ofụri esịt.—2 Cor. 11:14; kot Philippi 3:13, 14.
KA ISO KPEME!
14, 15. (a) Didie ke Satan odomo ndisụhọde ifịk ofụri esịt oro nnyịn inyenede? (b) Nọ uwụtn̄kpọ oro owụtde ntak emi n̄kari Satan enen̄erede ọdiọk.
14 Ima emi imade Jehovah akanam nnyịn iyak idem inọ enye. Toto ke ini oro, ediwak nnyịn imowụt ke ediwak isua ke imenen̄ede ibiere ndinam n̄kpọ Jehovah ke ofụri esịt. Edi Satan osụk oyoyom nditre nnyịn ndinam n̄kpọ Abasi. Esịt nnyịn ke enye enen̄ede oyom. (Eph. 6:12) Edi enye ọdiọn̄ọ ke nnyịn ikemeke ndikpọn̄ Jehovah ke ediyịp enyịn. Ntre, enye ada “editịm n̄kpọ emi” odomo n̄kari n̄kari ndinam nnyịn ikpọn̄ Abasi sụn̄sụn̄. (Kot Mark 4:18, 19.) Ntak emi Satan esinen̄erede okụt unen ke n̄kari esie emi?
15 Man ibọrọ mbụme emi, da nte ke emenyene cup mbansan̄ duop ke iko. Ke ini akade in̄wan̄ eyen fo owobi ubọk kiet ata. Ndi afo ọkpọfiọk ke ẹsio mbansan̄ oro? Ukpufiọkke. Ke ndan̄nsiere, enye afiak owobi ubọk iba. Ndi afo ọkpọfiọk? Ukpufiọkke! Ntak-a? Sia ẹsio mbansan̄ oro nsịtnsịt. Kpasụk ntre, odudu idiọk ererimbot Satan emi ekeme ndinam nnyịn ikpọn̄ n̄kpọ Abasi nsịtnsịt. Edieke emi etịbede, onyụn̄ etie nte n̄kpọ eke Satan anamde ifịk ofụri esịt oro ikesidade inam n̄kpọ Jehovah osụhọde. Edieke Christian mîkpemeke, enye idifiọkke ke n̄kpọ ke okpụhọde nsịtnsịt.—Matt. 24:42; 1 Pet. 5:8.
AKAM EDI ATA AKPAN N̄KPỌ
16. Didie ke ikeme ndikpeme idem ke n̄kari Satan?
16 Didie ke ikeme ndikpeme idem ke n̄kari Satan nnyụn̄ n̄ka iso nnam n̄kpọ Jehovah ke ofụri esịt? (2 Cor. 2:11) Ana ibọn̄ akam. Paul ama esịn udọn̄ ọnọ mme Christian ete “ẹsọn̄ọ ẹda ẹn̄wana ye n̄kari Devil.” Ekem enye ama eteme mmọ ete: “[Ẹka] iso ẹda kpukpru orụk akam ye n̄kpeubọk ẹbọn̄ akam kpukpru ini.”—Eph. 6:11, 18; 1 Pet. 4:7.
17. Nso ke akam Jesus ekpep nnyịn?
17 Man isọn̄ọ ida in̄wana ye Satan, ana ikpebe edu ubọn̄ akam Jesus, sia emi okowụt ke enye enen̄ede oyom ndinam n̄kpọ Jehovah ke ofụri esịt. Ke uwụtn̄kpọ, kop se Luke ekewetde mi aban̄a akam emi Jesus ọkọbọn̄de ke okoneyo emi ekesierede usen n̄kpa esie; enye ekewet ete: “Ke ini enye odude ke ọkpọsọn̄ ubiak, enye ọdọdiọn̄ esịn ifịk ọbọn̄ akam.” (Luke 22:44) Jesus ama esibọn̄ akam ke ofụri esịt, edi isan̄ emi, ke ini enye okosobode akakan idomo mi ke isọn̄, enye ama “ọdọdiọn̄ esịn ifịk” ọbọn̄ akam, ndien Abasi ama ọbọrọ akam esie. Uwụtn̄kpọ Jesus emi owụt ke akam ye akam idịghe ukem. Ke ntre, nte idomo ye n̄kari Satan okponde, ntre n̄ko ke ‘ikpọdọdiọn̄ isịn ifịk’ ibọn̄ akam iben̄e Jehovah ekpeme nnyịn.
18. (a) Nso ke ana nnyịn ibụp idem nnyịn iban̄a akam, ndien ntak-a? (b) Nso ye nso ikeme ndifọn ye esịt nnyịn, ndien didie? (Se ekebe ke page 16.)
18 Nso ufọn ke utọ akam oro edinam inọ nnyịn? Paul ọkọdọhọ ete: “Ke kpukpru n̄kpọ ẹda akam ye n̄kpeubọk ọkọrọ ye ekọm ẹben̄e Abasi se mbufo ẹyomde; ndien emem Abasi emi akande kpukpru ekikere eyekpeme mbufo esịt.” (Phil. 4:6, 7) Ana ibọn̄ akam ifịk ifịk kpukpru ini man ikpekeme ndinam n̄kpọ Jehovah ke ofụri esịt. (Luke 6:12) Ntem, bụp idemfo ete, ‘Ndi mmesibọn̄ akam ifịk ifịk kpukpru ini?’ (Matt. 7:7; Rome 12:12) Ibọrọ fo owụt adan̄a nte ọdọn̄de fi ndinam n̄kpọ Abasi ke ofụri esịt.
19. Nso ke afo edinam man aka iso anam n̄kpọ Jehovah ke ofụri esịt?
19 Nte ima iketetịn̄, se nnyịn idade nte ata akpan n̄kpọ ke uwem ekeme ndinam nnyịn inen̄ede idiọn̄ọ se idude nnyịn ke esịt. Ana ikụt ite ke mme n̄kpọ oro ikọkpọn̄de ke edem ye mme n̄kari Satan inamke ifịk oro inyenede ndinam n̄kpọ Jehovah ke ofụri esịt osụhọde. (Kot Luke 21:19, 34-36.) Ukem nte David, nnyịn ika iso iben̄e Jehovah ite anam nnyịn inam n̄kpọ esie ke“ofụri esịt.”—Ps. 86:11.
[Mme Mbụme Ukpepn̄kpọ]
[Ekebe ke page 16]
N̄KPỌ ITA EMI ẸFỌNDE YE ESỊT NNYỊN
Imekeme ndinam n̄kpọ emi ọfọnde ye ndamban̄a esịt nnyịn kpa nte isinamde n̄kpọ emi ẹfọnde ye ata esịt nnyịn. Kere ban̄a ata akpan n̄kpọ ita emi:
1 Udia: Oyom isidia eti udia man ọfọn ye ata esịt nnyịn. Kpasụk ntre, man n̄kpọ okûnam ndamban̄a esịt nnyịn, oyom isidia udia eke spirit kpukpru ini ke ukpepn̄kpọ idemowo, editie n̄kere n̄kpọ, ye edidụk mme mbono esop.—Ps. 1:1, 2; N̄ke 15:28; Heb. 10:24, 25.
2 Nsịn̄edeidem: Man ata esịt nnyịn aka iso ọfọn, oyom isisịn̄ede idem man enye atuak odudu odudu. Kpasụk ntre, ndisịn̄ede ndamban̄a esịt nnyịn ke ndinen̄ede nsịn idem ke utom ukwọrọikọ nnyụn̄ nnam se ikemede ke utom ukwọrọikọ ọfọn ye ndamban̄a esịt nnyịn.—Luke 13:24; Phil. 3:12.
3 Ebiet: Idiọk ererimbot emi idụn̄de inyụn̄ inamde utom mi ekeme ndifịna ata esịt ye ndamban̄a esịt nnyịn. Edi imekeme ndisụhọde mfịna emi edieke inen̄erede idụk nsan̄a ye nditọete nnyịn, emi ẹnen̄erede ẹma nnyịn ẹnyụn̄ ẹnamde n̄kpọ Abasi ke ofụri esịt.—Ps. 119:63; N̄ke 13:20.
