Nte Afo Emeti?

Ndi ama etịn̄ enyịn okot mme nsiondi Enyọn̄-Ukpeme eke ndondo emi? Se m̀mê emekeme ndibọrọ mme mbụme oro ẹtienede mi:

Didie ke Solomon edi ntọt uwụtn̄kpọ ọnọ nnyịn?

Abasi ama ọdiọn̄ Edidem Solomon onyụn̄ ada enye anam ediwak n̄kpọ. Edi Solomon ama etre ndikop item Abasi ke ini enye okosụk edide edidem. Enye ama ọdọ eyen Pharaoh emi ekedide okpono ndem ye ediwak iban en̄wen, ndien mmọ ẹma ẹtap enye sụn̄sụn̄ ẹsịn ke ukpono ndem. Ana nnyịn ikpeme mbak nnyịn iditọn̄ọ sụn̄sụn̄ inyene ndiọi edu m̀mê ekikere. (Deut. 7:1-4; 17:17; 1 Ndi. 11:4-8)​—12/15, page 10-12.

Ntak emi nnyịn ikpadade Sarah nte ata eti an̄wan emi akabakde Abasi?

Ke ini Abasi ọkọdọhọde Abraham ọkpọn̄ Ur, oro ọkọwọrọ ke enye enyene ndikpọn̄ mme iman, mme ufan, ye nte enye ekesidude uwem n̄ka ebiet emi enye mîkọfiọkke. Kpa ye oro, Sarah ama ebere ye enye onyụn̄ enịm ke Abasi ọyọdiọn̄ imọ. Enye ama enen̄ede okpono Abraham onyụn̄ enyene ata nti edu.​—1/1, page 8.

Ntak emi Jehovah ọkọdọhọde Abraham awa edima eyen esie?

Ọfọn iti ite ke Abasi ikayakke Abraham awa Isaac. Emi okowụt se iditakde Abasi ke ini enye ediwade Jesus Eyen esie.​—1/1, page 23.

Nso iwụt ke toto ke eyo mme apostle ke ata mme Christian oro ẹyetde aran ẹsidu kpukpru ini ke isọn̄?

Ke uwụtn̄kpọ emi Jesus ọkọnọde aban̄a “wheat” ye “mbiet,” “eti n̄kpasịp” ọwọrọ “nditọ obio ubọn̄.” (Matt. 13:24-30, 38) Mbiet ye wheat ẹkenyene ndikọri ọtọkiet tutu ini ukpen̄e. Ntre, okposụkedi emi nnyịn mîkemeke ndifiọk m̀mê mmanie ẹkesịne ke otu wheat, anaedi mmọ ẹsisụk ẹdodu kpukpru ini tutu esịm eyo nnyịn.​—1/15, page 7.

Nso ye nso iditịbe mbemiso Armageddon?

Mme idụt ẹyenen̄ede ẹfiori “emem ye ifụre!” (1 Thess. 5:3) Ukara ẹyen̄wana ye nsunsu ido ukpono. (Edi. 17:15-18) Ekem ẹyen̄wana ye ikọt Abasi. Adan̄aoro ke utịt edidi.​—2/1, page 9.

Nso ke ikpanam man itre isịnenyịn?

Mme n̄kpọ emi ikpanamde ẹdi emi: Isịn ukeme ndinyene ima ye ima nditọete, idụk nsan̄a ye mbon emi ẹbakde Abasi, inam se ifọnde, inyụn̄ ‘idara ye mmọ emi ẹdarade.’ (Rome 12:15)​—2/15, page 16-17.

Mmanie ẹsisem usem Nahuatl, ndien nso ke ẹnam ẹnọ mmọ?

Enye ekedi usem mbon Aztec eset, ndien mbon Mexico emi ẹwakde ẹsịm miliọn kiet ye ubak ke ẹsesem usem emi tutu mfịn. Mme Ntiense Jehovah ke ẹda usem emi ẹkwọrọ ikọ ẹnyụn̄ ẹwet mme n̄wed.​—3/1, page 13-14.

Ewe edumbet ke ikpeti ke ini inọde owo item?

Nen̄ede fiọk se idude. Kûsọp ndinọ item. Sụhọde idem da ikọ Abasi sịn ke edinam. Da mme n̄wed ukara Abasi nam n̄kpọ. Fep ndidomo ndinam ubiere nnọ mbon en̄wen.​—3/15, page 7-9.

Nso ke ikọ Jesus ọkọwọrọ ke ini enye ọkọdọhọde mbon emi enye ọkọkwọrọde ikọ ọnọ ete ẹsan̄a itiat iba ke ini ẹdọhọde mmọ ẹsan̄a itiat kiet?—Matt. 5:41.

Ke ini oro ke Isreal, mbon Rome ẹma ẹsinyịk mme owo ẹnam utom. Jesus ndikọdọhọ mme andikpan̄ utọn̄ nnọ enye ete ẹsan̄a itiat iba ọkọwọrọ ke mmọ inyeneke ndiyat esịt, edi ke ẹnyene ndida ofụri esịt nnam utom oro mbon ukara ẹdọn̄de mmọ, oro mîtuahake ye ibet Abasi.​—4/1, page 9.