Mme Mbụme Oro Mme Andikot Ẹbụpde

Didie ke “n̄kpa mbon emi ẹsọn̄ọde ẹda ye Jehovah edi ọsọn̄urua n̄kpọ ke enyịn esie”?

▪ Abasi ọkọnọ andiwet psalm odudu spirit ada ewet ete: “N̄kpa mbon emi ẹsọn̄ọde ẹda ye Jehovah edi ọsọn̄urua n̄kpọ ke enyịn esie.” (Ps. 116:15) Jehovah ada uwem kpukpru mme asan̄autom esie nte ata akpan n̄kpọ. Edi idịghe n̄kpa asan̄autom Abasi kiet kpọt ke ẹtịn̄ ẹban̄a ke Psalm 116:15.

Ke ini ẹnọde utịn̄ikọ ubụkowo, ikpanaha ẹdọhọ ke Psalm 116:15 aban̄a eyenete oro akpade do, okposụkedi emi enye ọkọsọn̄ọde ada anam akpanikọ ọnọ Jehovah tutu esịm n̄kpa. Ntak-a? Koro ikọ andiwet psalm oro iban̄ake owo kiet kpọt. Ikọ esie ọwọrọ ke Jehovah idiyakke ẹsobo ofụri otu mbon emi ẹsọn̄ọde ẹda ye enye ẹfep koro mmọ ẹnen̄ede ẹdi n̄kpọuto ke enyịn esie.—Se Psalm 72:14; 116:8.

Psalm 116:15 anam nnyịn ifiọk ke Jehovah idiyakke ẹsobo mme asan̄autom esie nte otu ẹfep ofụri ofụri ke isọn̄. Mbụk nnyịn eyomfịn owụt ke nnyịn imọyọ n̄kpọsọn̄ idomo ye ukọbọ, ndien emi owụt ke Abasi idiyakke ẹwot kpukpru nnyịn.

Sia odudu Jehovah mînyeneke adan̄a, uduak esie mînyụn̄ ikemeke ndikpu, enye idiyakke ẹsobo kpukpru nnyịn ẹfep. Edieke Abasi akpayakde emi etịbe, ekpetie nte mme asua esie ẹnyene odudu ẹkan enye, ndien tutu amama mmọ ikemeke ndinyene odudu n̄kan enye! Uduak Jehovah ndinam mbon emi ẹsọn̄ọde ẹda ye enye ẹdụn̄ ke isọn̄ emi okpokpu, edi nnyịn imọfiọk ke uduak esie ikemeke ndikpu. (Isa. 45:18; 55:10, 11) Ọwọrọ ẹkpetre ndinam n̄kpọ Jehovah ke isọn̄ edieke ẹkpesobode kpukpru mbon oro ẹtuakde ibuot ẹnọ enye ke ikpehe akwa temple esie eke spirit mi ke isọn̄! Mme owo ikpodụhe ndida ntọn̄ọ “obufa isọn̄”—oro edi, ndinen owo emi ẹdidụn̄de mi ke isọn̄ emi “obufa enyọn̄” edikarade. (Edi. 21:1) Emi n̄ko ọkpọwọrọ ke Tọsịn Isua Ukara Christ ididụhe sia mbon oro enye akpakarade mîdụhe.—Edi. 20:4, 5.

Edieke Jehovah akpayakde mme asua esie ẹsobo ofụri ikọt esie ẹfep ke isọn̄, mme owo ẹkpetịn̄ idiọk ẹdian enye ẹnyụn̄ ẹyịk m̀mê enye enen̄ede enyene odudu. Enye ndikpayak utọ n̄kpọ emi etịbe ikpayakke ẹda enye nte Akakan Andikara Ekondo. N̄ko-n̄ko, sia Jehovah okponode idemesie onyụn̄ amade edisana enyịn̄ esie, enye idiyakke ofụri ikọt esie ẹkpan̄a. Kere ban̄a emi n̄ko: Sia Jehovah ‘mîsikpehe ukwan̄ikpe,’ enye iditreke ndinyan̄a mbon oro ẹsọn̄ọde ẹda ẹnam n̄kpọ esie. (Deut. 32:4; Gen. 18:25) Akan oro, Abasi ndikpayak ẹsobo kpukpru mme asan̄autom esie ikpayakke Ikọ esie emi osu: “Jehovah [idikpọn̄ke] ikọt esie ke ntak akwa enyịn̄ esie.” (1 Sam. 12:22) Ke akpanikọ, ‘Jehovah idisịnke ikọt esie, enye idinyụn̄ ikpọn̄ke udeme esie.’—Psalm 94:14.

Imenen̄ede inem esịt ndifiọk ke ikọt Jehovah ẹyeka iso ẹdu ke isọn̄ emi—kpukpru mmọ idikpan̄ake! Ntem, ẹyak nnyịn ika iso isọn̄ọ ida ye Abasi sia ifiọkde ke enye ayanam kpa nte enye ọkọn̄wọn̄ọde ete: “N̄kpọekọn̄ ekededi eke ẹdibotde ẹban̄a fi idikwe unen, ndien edeme ekededi eke edidahade ada anam ikọ ye afo, afo oyobiom enye ikpe. Emi edi udeme mme asan̄autom Jehovah, edinen ido mmọ onyụn̄ oto mi.”—Isa. 54:17.

[Se ẹwetde ke ikpọ abisi ke page 22]

Abasi idiyakke ẹsobo ofụri ikọt esie ẹfep ke isọn̄