Ndi Afo ke Owụt Ubọn̄ Jehovah?
Ndi Afo ke Owụt Ubọn̄ Jehovah?
‘Nnyịn iwụt ubọn̄ Jehovah nte ukụtiso.’—2 COR. 3:18.
DIDIE KE AFO ỌKPỌBỌRỌ?
Didie ke ikeme ndinọ Jehovah ubọn̄ kpa ye emi idide mme anamidiọk?
Didie ke akam ye edidụk mbono esop Christian an̄wam nnyịn iwụt ubọn̄ Abasi?
Nso ikeme ndin̄wam nnyịn ika iso iwụt ubọn̄ Jehovah?
1, 2. Ntak emi ikemede ndikpebe mme edu Jehovah?
ENYENE se kpukpru nnyịn idade ibiet ete ye eka nnyịn. Mmọdo, isikpaha nnyịn idem ke ini owo ọdọhọde ekpri eyeneren ete, ‘Eyen mbiet ete.’ Ẹnyụn̄ ẹkeme ndidọhọ ekpri eyenan̄wan ẹte, ‘Okụt eyen okụt eka eyen.’ Ndien nditọwọn̄ ẹsiwak ndikpebe se mmọ ẹkụtde nte ete ye eka mmọ ẹnamde. Edi nso kaban̄a nnyịn? Ndi nnyịn imekeme ndikpebe Jehovah, kpa Ete nnyịn eke heaven? Okposụkedi emi nnyịn mîkwe enye, nnyịn imekeme ndifiọk ndiye edu esie ebe ke ndikpep Ikọ esie, ke ndise mme n̄kpọ-obot esie, ye ke nditie n̄kere se ikotde ke N̄wed Abasi, akpan akpan se iban̄ade ikọ ye edinam Jesus Christ Eyen Abasi. (John 1:18; Rome 1:20) Imekeme ndiwụt ubọn̄ Jehovah.
2 Mbemiso ẹkebotde Adam ye Eve, Abasi ama enịm ke owo eyekeme ndinam uduak imọ, owụt mme edu imọ, onyụn̄ ọnọ imọ ubọn̄. (Kot Genesis 1:26, 27.) Ke edinam uten̄e Abasi nnyịn, nnyịn ikpenyene ndiwụt mme edu Owo emi okobotde nnyịn. Edieke inamde ntre, iyenyene akwa ifet ediwụt ubọn̄ Abasi inamke n̄kpọ m̀mê nso idi ido edem nnyịn, m̀mê nnyịn imọfiọk n̄wed m̀mê ifiọkke, m̀mê nnyịn inyụn̄ ito m̀mọ̀n̄. Ntak-a? Sia “Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.”—Utom 10:34, 35.
3. Esitie mme Christian didie ke idem ke adan̄aemi mmọ ẹnamde n̄kpọ Jehovah?
3 Mme Christian oro ẹyetde aran ẹwụt ubọn̄ Jehovah. Ke ntem, apostle Paul emi ẹkebonde ke spirit ekewet ete: “Kpukpru nnyịn, ke adan̄aemi ikamade iso eke n̄kpọ mîfụhọke nte ukụtiso iwụt ubọn̄ Jehovah, ẹkpụhọde nnyịn ẹsịn ke ukem mbiet oro to ke ubọn̄ sịm ubọn̄.” (2 Cor. 3:18) Ke ini prọfet Moses akakamade itiatn̄wed emi ẹwetde Ibet Duop osụhọde ke Obot Sinai edi, iso esie ama esem ke ntak emi Jehovah eketịn̄de ikọ ye enye. (Ex. 34:29, 30) Okposụkedi emi akanam Jehovah mîtịn̄ke ikọ ye mme Christian ntre, iso mmọ mînyụn̄ isemke, idatesịt esinam iso mmọ ayama ke ini mmọ ẹtịn̄de ẹnọ mbon en̄wen ẹban̄a Jehovah, mme edu esie, ye mme utịbe utịbe n̄kpọ oro enye aduakde aban̄a ubonowo. Mbon oro ẹyetde aran ye mme nsan̄a mmọ oro ẹdidude ke isọn̄ ẹsiwụt ubọn̄ Jehovah ke uwem ye ke utom ukwọrọikọ mmọ ukem nte nsemnsem ukụtiso eset. (2 Cor. 4:1) Ndi afo ke ada mme edu uten̄e Abasi ye utom ukwọrọikọ fo nte asuanetop ofụri ini owụt ubọn̄ Jehovah?
ỌDỌN̄ NNYỊN NDIWỤT UBỌN̄ JEHOVAH
4, 5. (a) Ukem nte Paul, nso en̄wan ke nnyịn in̄wana? (b) Didie ke idiọkn̄kpọ ọnọmọ nnyịn?
4 Sia nnyịn idide mme asan̄autom Jehovah, ke akpanikọ ọdọn̄ nnyịn ndikpono nnyụn̄ nnọ Andibot nnyịn ubọn̄ ke kpukpru se inamde. Nte ededi, ata ediwak ini nnyịn isinamke nti n̄kpọ oro ọdọn̄de nnyịn ndinam. Paul ke idem esiemmọ ama osobo mfịna emi n̄ko. (Kot Rome 7:21-25.) Kop se enye ekewetde mi aban̄a se isinamde ọsọn̄ ndinam eti n̄kpọ: “Kpukpru owo ẹnam idiọkn̄kpọ ẹnyụn̄ ẹtaba ubọn̄ Abasi.” (Rome 3:23) Ih, ke ntak idiọkn̄kpọ oro ubonowo akadade oto Adam, idiọkn̄kpọ ọsọn̄ ubọk ‘akara mmọ nte edidem.’—Rome 5:12; 6:12.
5 Nso idi idiọkn̄kpọ? Enye edi n̄kpọ ekededi oro mîkemke ye edu, usụn̄, edumbet, ye uduak Jehovah. Idiọkn̄kpọ esibiat ufan owo ye Abasi. Idiọkn̄kpọ iyakke nnyịn iwụt ubọn̄ Abasi kpa nte n̄kpọ ekemede ndibiọn̄ọ otop-utịgha nditọ se enye eketde. Nnyịn imekeme ndikokoi nnam idiọkn̄kpọ mîdịghe inam ke ndudue. (Num. 15:27-31) Idiọkn̄kpọ esesịne owo ke iyịp onyụn̄ adian̄ade mmọ ọkpọn̄ Andibot. (Ps. 51:5; Isa. 59:2; Col. 1:21) Ke ntem, ata ediwak owo ẹdu uwem ke usụn̄ oro adian̄arede mmọ ofụri ofụri ọkpọn̄ Jehovah onyụn̄ anam mmọ ẹtaba anana-mbiet ifet ediwụt ubọn̄ Abasi. Ke akpanikọ, idụhe se inọmọde ubonowo nte idiọkn̄kpọ.
6. Kpa ye oro isinamde idiọkn̄kpọ, didie ke ikeme ndinọ Abasi ubọn̄?
6 Kpa ye idiọkn̄kpọ nnyịn, Jehovah osụk edi “Abasi idotenyịn.” (Rome 15:13, Edisana Ŋwed Abasi Ibom) Enye ọnọ se ẹdidade itre idiọkn̄kpọ—uwa ufak Jesus Christ. Edieke inyenede mbuọtidem ke uwa oro, nnyịn ididịghe aba “ifịn inọ idiọkn̄kpọ,” edi iyekeme ndiwụt ubọn̄ Jehovah. (Rome 5:19; 6:6; John 3:16) Ndika iso ndi ufan Jehovah ntem ayanam inyene edidiọn̄ esie idahaemi ye mme edidiọn̄ ini iso emi edide mfọnmma ye nsinsi uwem. Kpa ye oro isisụk inamde idiọkn̄kpọ, nso edidiọn̄ ke edi ntem Abasi ndida nnyịn nte mbon oro ẹkemede ndiwụt ubọn̄ esie!
NDIWỤT UBỌN̄ ABASI
7. Nso ke ana inyịme man ikeme ndiwụt ubọn̄ Abasi?
7 Man ikeme ndiwụt ubọn̄ Abasi ọyọhọ ọyọhọ, ana inen̄ede inyịme ke idi mme anamidiọk. (2 Chron. 6:36) Ana ifiọk ebiet emi inyenede mmeme inyụn̄ isịn ukeme ikan mmọ man otodo ikpanam n̄kọri isịm idaha emi inen̄erede inọ Abasi ubọn̄. Ke uwụtn̄kpọ, edieke inamde esuene esuene idiọkn̄kpọ edise ndise idan̄, ana inyịme ke imoyom un̄wam ke n̄kan̄ eke spirit, ke onyụn̄ ana inam n̄kpọ iban̄a oro. (Jas. 5:14, 15) Emi edi akpa n̄kpọ oro anade inam man isịn ukeme idu uwem oro enen̄erede ọnọ Abasi ubọn̄. Sia idide mme andituak ibuot nnọ Jehovah, ana ika iso idụn̄ọde idem nnyịn man ise m̀mê nnyịn ke idu uwem nte ekemde ye ndinen edumbet esie. (N̄ke 28:18; 1 Cor. 10:12) Se ededi mmeme oro inyenede, ana ika iso ikan mmọ man ikpowụt ubọn̄ Abasi.
8. Okposụkedi emi nnyịn mîdịghe mfọnmma, nso ke ikpanam?
8 Jesus edi n̄kukụre owo emi akanam mînamke idiọkn̄kpọ ke ofụri eyouwem esie mînyụn̄ itreke ndiwụt ubọn̄ Abasi. Okposụkedi emi nnyịn mîdịghe mfọnmma nte Jesusekedide, imekeme nditiene uwụtn̄kpọ esie, ndien ikpenyene ndidomo ndinam oro. (1 Pet. 2:21) Jehovah esikụt n̄kọri oro inamde ye ukeme oro isịnde ndinọ enye ubọn̄ onyụn̄ ọdiọn̄ ukeme emi.
9. Didie ke Bible ekeme ndin̄wam mme Christian emi ẹyomde ndinam se Abasi oyomde?
9 Bible ekeme ndin̄wam nnyịn ifiọk nte ikemede ndinen̄ede n̄wụt ubọn̄ Jehovah. Oyom inen̄ede ikpep N̄wed Abasi inyụn̄ itie ikere se ikotde ke Bible. (Ps. 1:1-3) Ndikot N̄wed Abasi ke usen ke usen ayanam nnyịn inam n̄kọri. (Kot James 1:22-25.) Ifiọk Bible anam nnyịn inyene mbuọtidem onyụn̄ anam nnyịn inen̄ede ibiere ndifep akwa idiọkn̄kpọ inyụn̄ inem Jehovah esịt.—Ps. 119:11, 47, 48.
10. Didie ke akam ekeme ndinam nnyịn inam n̄kpọ Jehovah ọyọhọ ọyọhọ?
10 Man iwụt ubọn̄ Abasi, ana ‘ikọbọ ke akam’ n̄ko. (Rome 12:12) Imekeme ndibọn̄ akam ite Jehovah an̄wam nnyịn inam n̄kpọ esie ke nnennen usụn̄, ikponyụn̄ inyene ndinam oro. Man inam oro, odot iben̄e enye ite ọnọ nnyịn edisana spirit, anam mbuọtidem nnyịn okpon, ọnọ nnyịn ukeme ndibiọn̄ọ idomo, ye ukeme ‘nditịm nsiak ikọ akpanikọ.’ (2 Tim. 2:15; Matt. 6:13; Luke 11:13; 17:5) Ukem nte eyen esiberide edem ke ete esie, kpa ntre ke oyom iberi edem ke Jehovah, kpa Ete nnyịn eke heaven. Edieke iben̄ede enye ite an̄wam nnyịn inam n̄kpọ esie ọyọhọ ọyọhọ, imekeme nditịm nnịm ke enye ayanam oro ọnọ nnyịn. Akpakam nnyịn idehedei ikere ke idi mbiomo inọ enye! Utu ke oro, ẹyak ida akam itoro enye, ikọm enye, iben̄e enye ọnọ nnyịn ndausụn̄, akpan akpan ke ini isobode idomo, inyụn̄ iben̄e enye an̄wam nnyịn inam n̄kpọ esie ke usụn̄ oro ọnọde edisana enyịn̄ esie ubọn̄.—Ps. 86:12; Jas. 1:5-7.
11. Didie ke mbono esop an̄wam nnyịn iwụt ubọn̄ Abasi.
11 Abasi ayak mme ọsọn̄urua erọn̄ esie esịn “ofụn emi anamde akpanikọ onyụn̄ enyenede ọniọn̄” ke ubọk. (Matt. 24:45-47; Ps. 100:3) Otu ofụn emi enen̄ede enyene udọn̄ ke nte ekemmọ mme andinịm ke akpanikọ ẹwụtde ubọn̄ Jehovah. Mbono esop esinam nnyịn inen̄ede idot nte mme asan̄autom Abasi, kpa nte ekịmọfọn̄ ekemede ndidiọn̄ ọfọn̄ nnyịn man enen̄ede odot nnyịn. (Heb. 10:24, 25) Mmọdo, ẹyak isika mbono esop ke ini, koro edieke iyakde emehe nnyịn ndisika ke idiọk ini, iyesitaba ndusụk n̄kpọ oro akpanamde nnyịn inen̄ede idot nte mme asan̄autom Jehovah.
ẸYAK IKPEBE ABASI
12. Didie ke ikeme ndikpebe Abasi?
12 Ana “[idi] mme andikpebe Abasi” edieke anade iwụt ubọn̄ Jehovah. (Eph. 5:1) Usụn̄ kiet emi ikemede ndikpebe Jehovah edi ndise n̄kpọ nte enye esede. Edi edieke nnyịn mîsehe n̄kpọ nte enye esede, ọwọrọ ke nnyịn ikponoke enye, ndien emi ifọnke ye nnyịn. Ana isịn ukeme isua se Jehovah asuade inyụn̄ inen̄ede ima se enye amade, koro Satan kpa Devil emi edide andidiọk akara ofụri ererimbot emi. (Ps. 97:10; 1 John 5:19) Oyom inen̄ede inịm ke n̄kukụre usụn̄ ndikpono Abasi edi ndinam kpukpru n̄kpọ nnọ enye ubọn̄.—Kot 1 Corinth 10:31.
13. Ntak emi nnyịn ikpasuade idiọkn̄kpọ, ndien nso ke emi akpanam nnyịn inam?
13 Jehovah asasua idiọkn̄kpọ, nnyịn ikponyụn̄ inyene ndisua n̄ko. Akpana ifehe ikpọn̄ idiọkn̄kpọ adan̄a nte ikekeme, inyụn̄ idomoke ndise adan̄a nte ikemede ndisan̄a n̄kpere idiọkn̄kpọ edi inamke. Ke uwụtn̄kpọ, akpana ifep mfiakedem, koro enye edi ata idiọkn̄kpọ emi ekemede ndinam nnyịn ikûdot ndinọ Abasi ubọn̄. (Deut. 13:6-9) Ke ntre, ẹyak ikûnyene n̄kpọ ndomokiet ndinam ye mbon mfiakedem m̀mê mbon emi ẹkotde idemmọ nditọete, edi emi mînọhọ Abasi ubọn̄. Nte ikpanamde n̄kpọ edi emi idem ekpededi owo oro edi iman nnyịn. (1 Cor. 5:11) Ufọn idụhe ndifan̄a n̄kpọ ye mbon mfiakedem m̀mê ye mbon emi ẹkụtde ndudue ẹnọ esop Jehovah. Ndikot n̄kpọ oro mbon mfiakedem ẹwetde ke n̄wed m̀mê ke Intanet ifọnke, koro emi ekeme ndinam nnyịn imem ke n̄kan̄ eke spirit.—Kot Isaiah 5:20; Matthew 7:6.
14. Ke ini isịnde ukeme ndiwụt ubọn̄ Abasi, nso idi n̄wọrọnda edu emi nnyịn ikpowụtde, ndien ntak-a?
14 Ndiwụt ima edi n̄wọrọnda usụn̄ ndikpebe Ete nnyịn eke heaven. Ana ima mme owo kpa nte Jehovah. (1 John 4:16-19) Ke nditịm ntịn̄, ima emi inyenede ke otu idem nnyịn anam ẹdiọn̄ọ nnyịn nte mme mbet Jesus ye nte mme asan̄autom Jehovah. (John 13:34, 35) Okposụkedi emi unana mfọnmma ekemede ndinam ọsọn̄ nnyịn ndiwụt ima ndusụk ini, ana idomo ndiwụt ima kpukpru ini. Ndiwụt ima ye mme edu Abasi eken idiyakke nnyịn inam se mîfọnke.—2 Pet. 1:5-7.
15. Didie ke idinam n̄kpọ ye mme owo edieke imade mmọ?
15 Ima esinam ọdọn̄ nnyịn ndinam nti n̄kpọ nnọ mbon en̄wen. (Rome 13:8-10) Ke uwụtn̄kpọ, ima oro imade nsan̄a ndọ nnyịn idiyakke nnyịn isabade bed ndọ. Ima oro imade mbiowo, adianade ye ukpono oro inyenede inọ utom mmọ, ayanam nnyịn ikop uyo inyụn̄ isụk ibuot itiene ndausụn̄ mmọ. Nditọ emi ẹmade ete ye eka mmọ ẹsikop uyo mmọ ẹnyụn̄ ẹkpono mmọ, inyụn̄ itịn̄ke n̄kpọ ibiat mmọ. Edieke imade mme owo, nnyịn idisehe mmọ ke usụhọde idinyụn̄ itịn̄ke ikọ ye mmọ esuene esuene. (Jas. 3:9) Ndien mbiowo emi ẹmade mme erọn̄ Abasi ẹdinam n̄kpọ ye mmọ sụn̄sụn̄.—Utom 20:28, 29.
16. Didie ke idinam utom ukwọrọikọ nnyịn edieke inyenede ima?
16 Akpana ima edi n̄wọrọnda edu n̄ko ke utom ukwọrọikọ nnyịn. Ima emi imade Jehovah idiyakke idem emem nnyịn ke ntak unana udọn̄ m̀mê ke ntak emi ndusụk owo mîmaha ndikop etop nnyịn. Utu ke oro, nnyịn iyaka iso ikwọrọ eti mbụk. Ima ayanam inen̄ede itịm idem inọ utom ukwọrọikọ inyụn̄ idomo ndidi nti mme andikpep Ikọ Abasi. Edieke inen̄erede ima Abasi ye mbọhọidụn̄ nnyịn, nnyịn idinamke utom edikwọrọ Obio Ubọn̄ ke ntak emi ẹnyụn̄ ẹdọhọde inam. Utu ke oro, idida enye nte ata n̄kpọ ukpono inyụn̄ inam enye ye idatesịt.—Matt. 10:7.
KA ISO NỌ JEHOVAH UBỌN̄
17. Nso idi ufọn edidiọn̄ọ ke kpukpru nnyịn imanam idiọkn̄kpọ inyụn̄ itaba ubọn̄ Abasi?
17 Mme owo ke ererimbot idiọn̄ọke se idiọkn̄kpọ anamde owo, edi nnyịn imọdiọn̄ọ. Emi anam nnyịn isịn ukeme in̄wana ye idiọk udọn̄. Ndidiọn̄ọ ke nnyịn idi mme anamidiọk anam nnyịn inọ esịt nnyịn ukpep man enye ekpekeme ndin̄wam nnyịn inam se inende ke ini udọn̄ ndinam idiọkn̄kpọ odụkde nnyịn ekikere ye esịt. (Rome 7:22, 23) Imọfiọk ke idem ekeme ndimem nnyịn sia idide owo, edi Abasi ekeme ndinọ nnyịn odudu ndinam se inende ke idaha ekededi.—2 Cor. 12:10.
18, 19. (a) Nso idin̄wam nnyịn ikan ke en̄wan oro in̄wanade ye udịm mme idiọk spirit? (b) Nso ke nnyịn ikpebiere ndinam?
18 Ana in̄wana ye udịm mme idiọk spirit edieke iyomde ndinọ Jehovah ubọn̄. Mme n̄kpọekọn̄ eke spirit emi Abasi ọnọde nnyịn ayan̄wam nnyịn ikan ke en̄wan emi. (Eph. 6:11-13) Satan ikpaha mba ndiyom ubọn̄ emi edide Jehovah ikpọn̄ odot ndinyene. Devil ke esịn ifịk kpukpru ini ndidian̄ade nnyịn n̄kpọn̄ Jehovah. Edi esidi ata n̄kpọ esuene ọnọ Satan ke ini nnyịn ye ata ediwak mme anana-mfọnmma nditọete nnyịn iren, iban, ye nditọwọn̄ isọn̄ọde ida inọ Abasi ubọn̄! Ke ntre, ẹyak ika iso itoro Jehovah nte mme angel ke heaven ẹtorode enye ẹte: “Jehovah, Abasi nnyịn, afo omodot ndibọ ubọn̄ ye ukpono ye odudu, koro afo okobotde kpukpru n̄kpọ, ndien ke ntak uduak fo ke mmọ ẹkedu, oro okonyụn̄ anam ẹbot mmọ.”—Edi. 4:11.
19 Nnyịn ikpakam ibiere ndika iso nnọ Jehovah ubọn̄ inamke n̄kpọ m̀mê nso itịbe. Esịt enen̄ede enem enye nte ediwak mbon nsọn̄ọnda ẹsịnde ofụri ukeme mmọ ẹkpebe enye ẹnyụn̄ ẹwụtde ubọn̄ esie. (N̄ke 27:11) Akpakam etie nnyịn ke idem nte eketiede David emi ọkọkwọde ete: “O Jehovah Abasi mi, ami mmotoro fi ke ofụri esịt mi, nyonyụn̄ nnọ enyịn̄ fo ubọn̄ ke nsinsi.” (Ps. 86:12) Nnyịn itetie ibet usen emi idiwụtde ubọn̄ Jehovah ke mfọnmma usụn̄ inyụn̄ itoro enye ke nsinsi! Mbon oro ẹkopde Abasi ẹyekop idatesịt etieti ndidu uwem ini oro. Ndi ke owụt ubọn̄ Jehovah Abasi idahaemi onyụn̄ odori enyịn ndinam oro ke nsinsi nsinsi?
[Mme Mbụme Ukpepn̄kpọ]
[Mme ndise ke page 27]
Ndi ke owụt ubọn̄ Jehovah ke mme usụn̄ emi?
