Mfọnido Etre Mfụhọ

ESỊT ikenemke mma kiet emi ekekerede Rie ke ini George ye Manon, Ntiense iba ke Netherlands, ẹkekade ẹkekwọrọ eti mbụk Obio Ubọn̄ ẹnọ enye. Mmọ ẹma ẹkop ke akpa ye udiana ebe esie ye eyen esie erenowo ẹma ẹkpan̄a, ndien ke enye enyene ata idiọk ewan̄kọ. Kpa ye oro enye akakpan̄de utọn̄ ọnọ mmọ, esịt ikosụk inemke enye.

Nte ededi, George ama ọdọhọ Manon yak mmimọ ida etuek flawa isọk mma oro ke ntak emi etiede nte enye enen̄ede okop ndobo ye mfụhọ. Idem ama akpa mma oro ke ini mmọ ẹkenọde enye flawa. Edi enye ikenyeneke ini itie ye mmọ, ntre enye ama enịm ini ọnọ mme ete ẹfiak ẹdi. Enye ikodụhe ke ufọk ke ini mmọ ẹkefiakde ẹka. Mmọ ẹma ẹfiak ẹka ediwak ini edi ikosụk ikwe enye. Mmọ ẹma ẹtọn̄ọ ndikere ke enye iyomke ndikụt mmimọ.

Usen kiet, George ama okụt Rie ke ufọk. Rie ama ekpe George ubọk nte mmọ mîkekwe imọ ke ufọk onyụn̄ ọdọhọ ke imọ ikodu ke ufọkibọk. Ekem enye ama ọdọhọ ete: “Ndi ọmọfiọk se n̄kanamde ke mbufo ẹma ẹkenyọn̄ọ? Mma ntọn̄ọ ndikot Bible!” Mmọ ẹma ẹtọn̄ọ nneme ẹnyụn̄ ẹtọn̄ọ ndikpep Bible.

Nte Rie osụk ekpepde Bible, enye ama ọtọn̄ọ ndikpụhọde, ọfọn ido, inyụn̄ ifụhọke aba. Kpa ye emi enye mîkesikemeke ndiwọrọ n̄kpọn̄ ufọk ke ntak udọn̄ọ, enye ama esikwọrọ ikọ ọnọ owo ekededi emi edide edise enye. Udọn̄ọ ikesiyakke enye aka mbono esop kpukpru ini, edi enye ama esima nditọete ẹdi ẹdise imọ. Enye ama odụk mbono circuit ke usen emi enye ọkọyọhọde isua 82 onyụn̄ ayarade uyakidem esie ke baptism.

Enye ama akpa ke ọfiọn̄ ifan̄ ẹbede tọn̄ọ enye akanade baptism, ẹma ẹnyụn̄ ẹkụt uto emi enye ekewetde. Enye ama etịn̄ nte ndobo ọdiọkde ke eyo usọn̄ onyụn̄ etịn̄ ntak emi ọfọnde ndifọn ido. Manon ọdọhọ ete: “Uto esie ama enen̄ede otụk mi. Mmenen̄ede n̄kop inemesịt nte Jehovah akanamde nnyịn ifọn ido ye enye.”

Uwụtn̄kpọ Jehovah ekpep nnyịn ndinyene ima nnyụn mfọn ido. (Eph. 5:1, 2) Nnyịn iyokụt unen ke utom ukwọrọikọ nnyịn edieke ‘iwụtde ke idi mme asan̄autom Abasi’ ke ndifọn ido.—2 Corinth 6:4, 6.