Nyene Ọniọn̄ Yom “Eti Ndausụn̄”

Ẹdọhọ ke uwem etie nte owo ndika isan̄ mmọn̄. Edi ifiọk owo ikemeke ndin̄wam mme owo ẹdu uwem uforo uforo ke ererimbot emi etiede nte mmọn̄ emi etịmerede mi. Ediwak owo ẹsịp ke mmọn̄ emi. (Ps. 107:23, 27) Ntak emi odotde ndimen uwem ndomo ye owo ndika isan̄ ke idiọk mmọn̄?

Ke eset, mbon emi ẹnyenede ifiọk ẹban̄a mmọn̄ kpọt ẹkesika isan̄ mmọn̄ sia utọ isan̄ oro ikesimemke. N̄kani mme awat-inyan̄, akpan akpan mme etie etak ubom, ẹkesikpep mme owo ndiwat inyan̄. (Utom 27:9-11) Ediwak mbuwet eset ẹma ẹsinam mme etie etak ubom ẹkponi ẹkan kpukpru owo ke ubom man ẹwụt nte utom mmọ edide akpan n̄kpọ. Mbemiso awat-inyan̄ ọwọrọde akpa, enye ekenyene ndifiọk n̄kpọ mban̄a ntantaọfiọn̄, ofụm, ye mme n̄kpọ eken oro ẹban̄ade mmọn̄. Enyene ndusụk mme awat-inyan̄ emi Bible ọdọhọde ke ẹkedi “mbonusọ,” ndien ikọ emi ekeme n̄ko ndiwọrọ mbon emi ẹnyenede ọniọn̄.—Ezek. 27:8.

Ndiyọ mfịna uwem idahaemi onyụn̄ etie nte owo ndika isan̄ mmọn̄ ke eset. Nso ikeme ndin̄wam nnyịn?

M̀MỌ̀N̄ KE IKEME NDIKỤT “ETI NDAUSỤN̄”?

Ke adan̄aemi osụk ekerede aban̄a uwem nditie nte ndika isan̄ mmọn̄, kop akpanikọ Bible emi: “Owo ọniọn̄ ayakpan̄ utọn̄ onyụn̄ aka iso ọbọ item, enyene-ibuot owo oyonyụn̄ ọbọ eti ndausụn̄.” (N̄ke 1:5, 6) Ẹkeme n̄ko ndida ikọ Hebrew oro ẹkabarede “eti ndausụn̄” ntịn̄ mban̄a utom emi etubom nsụn̄ikan̄ eset ekesinamde. Ikọ emi aban̄a ndikeme ndida usụn̄ nte ọfọnde.

Kpa ye oro esịnede utom, nnyịn imekeme ndinyene “eti ndausụn̄” inyụn̄ ikpep ndidu uwem ke idiọk ererimbot emi etiede nte ndika uwat ke idiọk mmọn̄ mi. Nte n̄wed Mme N̄ke owụtde, ana iyak “ọniọn̄,” “asian” ye “ikike” ẹdiana kiet ẹnam utom ke idem nnyịn. (N̄ke 1:2-6; 2:1-9) Inaha isịn ndausụn̄ Abasi, koro idem mme idiọkowo ẹfiọk “ndausụn̄” emi anade mmọ ẹtiene man ẹyụhọ idiọk udọn̄ mmọ.—N̄ke 12:5.

Ntem, ọfọn nnyịn inen̄ede ikpep Ikọ Abasi. Ukpepn̄kpọ emi ayanam nnyịn ifiọk ekese iban̄a Jehovah ye Jesus Christ emi enen̄erede ekpebe enye. (John 14:9) Ẹsinọ nti item n̄ko ke mme mbono esop Christian nnyịn. Ke adianade do, imekeme ndikpep n̄kpọ nto mbon en̄wen ye idem mme ete ye eka nnyịn.—N̄ke 23:22.

KERE SE IKEMEDE NDITỊBE NYỤN̄ BIERE SE EDINAMDE

Imenen̄ede iyom “eti ndausụn̄” akpan akpan ke ini mmọn̄ ọdiọkde, oro edi, ini nnanenyịn. Nditre ndifiọk se ikpanamde ke ini inyenede akamba mfịna  ekeme ndinam idem emem nnyịn, onyụn̄ etetịm anam mfịna nnyịn okpon.—Jas. 1:5, 6.

N̄ko-n̄ko, ẹsida ikọ oro “eti ndausụn̄” ẹtịn̄ ẹban̄a ekọn̄. Bible ọdọhọ ete: “Eti ndausụn̄ ke afo edida an̄wana ekọn̄ fo, ndien edinyan̄a odu ke ini mme ọnọitem ẹwakde.”—Mme N̄ke 20:18; 24:6.

Nte owo emi etịmde mbonekọn̄ idem esitiede ekere mme n̄kpọndịk emi mmọ ẹkemede ndisobo, ọkpọfọn ikere iban̄a mme n̄kpọ oro ẹkemede ndibiat ufan nnyịn ye Jehovah. (N̄ke 22:3) Ke uwụtn̄kpọ, edieke enyenede utom m̀mê ẹmenerede fi itie ke itieutom, oyoyom ebiere m̀mê ayanam utom oro mîdịghe m̀mê eyenyịme ndibọ akwa itie oro. Oyowụt ifiọk ndikere mban̄a okụk oro ẹdikpede fi, ini emi edisidade fi ndika nnyụn̄ nnyọn̄ utom, ye mme n̄kpọ eken. Edi enyene mme n̄kpọ en̄wen oro anade eti: Ndi utom emi atuaha ye mme edumbet Bible? Ndi ibat hour oro anade nnam utom, utọ nte utom emi ẹsikpụhọde-kpụhọ ini, ayayak nsịn idem ke n̄kpọ Abasi?—Luke 14:28-30.

Loretta, emi edide kiet ke otu Mme Ntiense Jehovah, ama enyene ata eti utom. Ke ini ẹkeyomde ndimen itieutom mmọ n̄ka ebiet en̄wen, ẹma ẹnọ Loretta ata akamba itie ke obufa ebiet oro. Ikpọ owo itieutom mmọ ẹkedọhọ enye ẹte: “Enye emi edi etịp atua. Kûfịna idem, imokụt Ufọkmbono Obio Ubọn̄ do.” Edi Loretta okoyom ndidu mmemmem uwem man ekpenen̄ede esịn idem anam n̄kpọ ọnọ Andibot. Enye ama ọfiọk ke obufa itie oro ẹnọde imọ idinọhọ imọ ini ndinen̄ede nnam n̄kpọ Abasi. Ntem, enye ama esịn n̄wed ukpọn̄ utom okposụkedi emi kiet ke otu ikpọ owo itieutom mmọ ọkọdọhọde ke enye edi n̄kukụre owo oro mmimọ mîyomke nditaba. Loretta amanam utom usiakusụn̄ ofụri ini ke isua 20 idahaemi, ndien enye enịm ke nti utịp oro imọ ibọde edi ke ntak emi iketienede “eti ndausụn̄”—oro edi, ndinam item oro ẹnọde ke Ikọ Abasi. Enye ama etetịm ekpere Jehovah onyụn̄ enyene ifet ndin̄wam nsio nsio owo ẹkpep akpanikọ Bible.

Ke akpanikọ, ẹyom “eti ndausụn̄” n̄ko ke ubon. Ndibọk nditọ idịghe ifia ubọk kiet, ndien ubiere oro ete ye eka ẹnamde ẹban̄a n̄kpọ Abasi ye n̄kpọ obụkidem ekeme ndibiere se iditịbede inọ owo kiet kiet ke ubon. (N̄ke 22:6) Mme ete ye eka oro ẹdide Christian ẹkeme ndibụp idemmọ ẹte: ‘Ndi nnyịn imada ikọ ye edinam ikpep nditọ nnyịn ndikpere Jehovah man mmọ ẹkpekeme ndiyọ mme mfịna oro mmọ ẹdisobode ke ini iso? Ndi usụn̄ oro nnyịn idude uwem anam mmọ ẹfiọk nte ẹkpedude mmemmem uwem ẹnyụn̄ ẹwụk ntịn̄enyịn ke utom Abasi?’—1 Tim. 6:6-10, 18, 19.

Idịghe inyene ye uwọrọiso oro mme owo ke ererimbot ẹyomde anam owo enen̄ede okụt unen. Edidem Solomon ama ọfiọk emi. Abasi ọkọnọ enye odudu spirit Esie ada ewet ete: “Edifọn ye mmọ emi ẹbakde ata Abasi, koro mmọ ẹbakde enye.” (Eccl. 8:12) Ke akpanikọ, oro owụt ke esịne ifiọk ndiyom “eti ndausụn̄” oro otode Ikọ Abasi.—2 Tim. 3:16, 17.

[Ndise ke page 30]

Ke mbuwet eset, ẹma ẹsinam mme etie etak ubom ẹkponi ẹkan kpukpru owo ke ubom man ẹwụt nte utom mmọ edide akpan n̄kpọ

[Ebiet Ẹdade N̄kpọ Ẹto]

Su concessione del Ministero per i Beni e le Attività Culturali. Owo inyịmeke ẹfiak ẹsio m̀mê ẹmịn̄ ndise emi ke usụn̄ ekededi.