“Anie ke Ami Ndifehe?”
“Anie ke Ami Ndifehe?”
“Ẹkpeda ekọn̄ ẹbịne mi, ami nyosụk mbuọt idem.”—PS. 27:3.
DIDIE KE MME UFAN̄IKỌ ORO ẸTIENEDE MI ẸN̄WAM FI ENYENE UKO?
1. Mme mbụme ewe ke Psalm 27 ọbọrọ?
NTAK emi nnyịn ikade-ka iso inam ekese ke utom ukwọrọikọ kpa ye emi ererimbot ọdiọn̄de-diọn̄ ọdiọk? Ntak emi esinemde nnyịn ndibiat ini nnyụn̄ nsịn ukeme n̄kwọrọ ikọ kpa ye emi n̄kpọ ọsọn̄de ke ererimbot? Didie ke ikeme ndika iso nnyene uko kpa ye emi mme owo ẹkopde ndịk ẹban̄a ini iso? Ikwọ emi spirit Abasi akadade Edidem David usụn̄ ndiwet ke Psalm 27 ọbọrọ mme mbụme emi.
2. Nso ke ndibak n̄kpọ ekeme ndinam nnyịn, edi nnyịn ibuọt idem ke nso iditịbe?
2 David ọkọtọn̄ọ psalm emi ntem: “Jehovah edi un̄wana mi ye edinyan̄a mi. Anie ke ami ndifehe? Jehovah edi ọkpọsọn̄ ebiet ọnọ uwem mi. Anie ke ami ndibak?” (Ps. 27:1) Kpa ye emi ndifehe n̄kpọ ekemede ndinam idem emem owo, ndibak n̄kpọ akam ekeme ndinam se idiọkde ikan oro. Edi owo emi eten̄ede Jehovah ikpenyeneke ndiyak ndịk n̄kpọ ndomokiet etịmede enye esịt. (1 Pet. 3:14) Edieke idade Jehovah nte ọkpọsọn̄ ebiet nnyịn, ‘iyodụn̄ ke ifụre idinyụn̄ ikopke ndịk afanikọn̄.’ (N̄ke 1:33; 3:25) Ntak emi idọhọde ntre?
“JEHOVAH EDI UN̄WANA MI YE EDINYAN̄A MI”
3. Didie ke Jehovah edi un̄wana nnyịn, edi nso ke ana nnyịn ke idem nnyịn inam?
3 Ikọ oro, “Jehovah edi un̄wana mi,” owụt ke Jehovah ekpep nnyịn akpanikọ onyụn̄ osio nnyịn ke ekịm eke spirit. (Ps. 27:1) Ata un̄wana ekeme ndinam nnyịn ikụt n̄kpọndịk emi odude ke usụn̄, edi enye idimenke n̄kpọndịk oro ifep. Ana nnyịn ke idem nnyịn ifep n̄kpọ oro ikụtde do. Ukem ntre, Jehovah anam se mme n̄kpọntịbe ererimbot emi ẹwọrọde an̄wan̄a nnyịn. Enye anam nnyịn ifiọk mme n̄kpọndịk emi ẹdude ke editịm n̄kpọ emi. Ke Bible, enye ọnọ nnyịn nti item oro ẹnyenede ufọn ẹnọ nnyịn kpukpru ini. Edieke inamde item esie emi, iyenyene ọniọn̄ ikan mme asua nnyịn m̀mê mme andikpep nnyịn.—Ps. 119:98, 99, 130.
4. (a) Ntak emi David eketịn̄de ye ọyọhọ mbuọtidem ete: “Jehovah edi . . . edinyan̄a mi”? (b) Ini ewe ke Jehovah edinen̄ede idi edinyan̄a nnyịn?
4 Ikọ David ke Psalm 27:1 owụt ke anaedi enye ama eti nte Jehovah akanyan̄ade enye ke nsio nsio idaha. Ke uwụtn̄kpọ, Jehovah ama anyan̄a enye “osio ke ubọk ekpe ye ke ubọk bear.” Jehovah ama onyụn̄ anam enye akan Goliath. Nte ini akakade, Edidem Saul ama oyom ndida eduat n̄kịm David, edi kpukpru ini emi enye okodomode ndinam emi, Jehovah ama anyan̄a David. (1 Sam. 17:37, 49, 50; 18:11, 12; 19:10) Ntak edi oro David eketịn̄de ye ọyọhọ mbuọtidem ete: “Jehovah edi . . . edinyan̄a mi”! Jehovah ayakabade edi edinyan̄a ọnọ mme asan̄autom esie kpa nte ekedide ọnọ David. Ini ewe ke enye edinam oro? Ke “akwa ukụt.”—Edi. 7:14; 2 Pet. 2:9.
TI MME INI EMI JEHOVAH AKAN̄WAMDE FI
5, 6. (a) Didie ke nditi se iketịbede ekeme ndin̄wam nnyịn inyene uko? (b) Ntak emi ọfọnde ndikere nte Jehovah akan̄wamde ikọt esie ke ini edem?
5 Ẹsiak akpan n̄kpọ oro iyomde man ikeme ndinyene uko ke Psalm 27:2, 3. (Kot.) David ama eti mme ini emi Jehovah akanyan̄ade enye. (1 Sam. 17:34-37) Mme n̄kpọ oro enye eketide mi ẹma ẹnam enye enịm ke imekeme ndiyọ afanikọn̄ emi akam okponde akan se imọ ikosobode. Ndi emeti mme ini emi Jehovah akan̄wamde fi? Ndi emi anam enyene uko? Ke uwụtn̄kpọ, ndi enyene akamba mfịna emi ekenen̄erede ọbọn̄ akam aban̄a ndien Jehovah ọnọ fi ọniọn̄ m̀mê ukeme ndiyọ mfịna oro? Ndi emeti nte Jehovah akan̄wamde fi akan mfịna oro akanamde ọsọn̄ fi ndinam n̄kpọ esie ye idatesịt? Mîdịghe, ndi emeti nte enye ekebererede akwa usụn̄ ọnọ fi ndinam utom? (1 Cor. 16:9) Esitie fi didie ke idem ke ini etide mme n̄kpọ emi? Ndi mmọ isinamke fi enịm ke Jehovah ayaka iso an̄wam fi akan m̀mê ọyọ n̄kpọsọn̄ ubiọn̄ọ m̀mê afanikọn̄?—Rome 5:3-5.
6 Nso ke nnyịn ikpanam edieke okop-odudu ukara aduakde ndisobo Mme Ntiense Jehovah mfep ofụri ofụri? Ediwak owo ke eyo nnyịn ẹdomo ndinam emi, edi ikemeke. Nditi nte Jehovah akan̄wamde ikọt esie ke ini edem ayanam inyene uko ndiyọ se ededi oro editịbede ke ini iso.—Dan. 3:28.
MA EDISANA UTUAKIBUOT
7, 8. (a) Nte ekemde ye Psalm 27:4, nso ke David ekeben̄e Jehovah? (b) Nso idi akwa temple eke spirit Jehovah, ndien didie ke ẹtuak ibuot do?
7 Akpan n̄kpọ en̄wen oro ekemede ndinam nnyịn inyene uko edi ndima edisana utuakibuot. (Kot Psalm 27:4.) Ke eyo David, tent utuakibuot ekedi “ufọk Jehovah.” David ke idemesie eketịm n̄kpọ ọnọ akaka temple emi Solomon eyen esie ekenyenede ndibọp. Ediwak isua ke oro ebede, Jesus ama anam an̄wan̄a ke ini eyedi emi ufọn mîdidụhe ndika temple n̄katuak ibuot nnọ Jehovah. (John 4:21-23) Jehovah anam ndutịm emi edinamde nnyịn ikeme ndituak ibuot nnọ enye ke usụn̄ oro enye amade. Enye enyịme utuakibuot nnyịn edieke ibuọtde idem ke uwa ufak Jesus. Ke Mme Hebrew ibuot 8 esịm 10, apostle Paul ọdọhọ ke ndutịm emi edi akwa temple eke spirit “emi owo mîdaha ubọk inam,” emi nnyịn inyụn̄ ituakde ibuot inọ Abasi. Paul ọkọdọhọ ke temple emi ọkọtọn̄ọ ke ini Jesus akanade baptism onyụn̄ ọnọde idemesie ndinam uduak Jehovah. Emi eketịbe ke isua 29 E.N. (Heb. 10:10) Didie ke nnyịn ituak ibuot do? Ke ndibọn̄ akam “ye esịt akpanikọ ye ọyọhọ nsọn̄ọ oro asan̄ade ye mbuọtidem”; ke nditan̄a idotenyịn nnyịn an̄wan̄wa inyụn̄ iyokke; ke ndikere nte ikpedemerede inyụn̄ isịnde udọn̄ inọ ekemmọ mme andituak ibuot ke ini isopde idem ọtọkiet ke mbono esop nnyịn ye ke utuakibuot ubon. (Heb. 10:22-25) Ndima ndutịm oro ẹnamde ẹnọ utuakibuot akpanikọ esisọn̄ọ nnyịn idem ke mme akpatre usen emi ẹdiọkde mi.
8 Mme anam-akpanikọ asan̄autom Jehovah ke ofụri ererimbot ke ẹtat utom ukwọrọikọ mmọ, ke ẹkpep mbufa usem, ke ẹnyụn̄ ẹwọrọ ẹkenam utom ke ebiet emi ẹnen̄erede ẹyom mme andikwọrọ Obio Ubọn̄. Mmọ ẹnyụn̄ ẹnam n̄kpọ nte andiwet Psalm; ẹben̄e Jehovah n̄kpọ kiet kpọt, oro edi, ndise uyai Jehovah nnyụn̄ ntiene nnam edisana utom ke idaha ekededi.—Kot Psalm 27:6.
NỊM KE ABASI AYAN̄WAM FI
9, 10. Nso ke Abasi ọn̄wọn̄ọ ọnọ nnyịn ke Psalm 27:10?
9 Ikọ David anam nnyịn ifiọk adan̄a nte enye ekenịmde ke Jehovah ayan̄wam imọ. Enye ọkọdọhọ ete: “Edieke ete mi ye eka mi ẹkpekpọn̄de mi, Jehovah ekpemen mi akama.” (Ps. 27:10) Ke ikerede iban̄a se ẹwetde ke 1 Samuel ibuot 22, imekeme ndidọhọ ke ete ye eka David ikọkpọn̄ke enye. Nte ededi, ediwak owo ẹdu mfịn emi ubon mmọ ẹsịnde mmọ ofụri ofụri. Edi esop Christian ẹn̄wam ẹnyụn̄ ẹse ẹban̄a ediwak mbon oro ẹsịnde ntre.
10 Sia Jehovah eben̄ede idem ndin̄wam mme asan̄autom esie ke ini mbon en̄wen ẹsịnde mmọ, ndi enye idin̄wamke mmọ ke ini ẹsobode afanikọn̄ ekededi? Ke uwụtn̄kpọ, edieke nnyịn ikerede m̀mê iyekeme ndise mban̄a ubon nnyịn, ndi nnyịn ikpenịmke ke Jehovah ayan̄wam nnyịn? (Heb. 13:5, 6) Enye ọfiọk nte n̄kpọ etiede ye kpukpru mme anam-akpanikọ asan̄autom esie, onyụn̄ ọfiọk se inanade mmọ.
11. Didie ke mbon en̄wen ẹkeme ndibọ ufọn edieke inịmde ke Jehovah ọyọnọ nnyịn se iyomde? Nọ uwụtn̄kpọ.
11 Kere ban̄a se iketịbede inọ Victoria, emi ekekpepde Bible ke Liberia. Nte enye akanamde n̄kọri ekpere ndina baptism, ndantie esie ama efehe ọkpọn̄ enye ye nditọ ita. Kpa ye oro enye mîkenyeneke ufọk ye utom, enye ama aka iso anam n̄kọri ke n̄kan̄ eke spirit. Ke Victoria ama akana baptism, eyen esie an̄wan emi edide isua 13 ama okụt ekpri ekpat emi okụk ọdọn̄ọde ọyọhọ. Mmọ ẹma ẹbiere ke mmimọ idibatke okụk oro mbak edidọn̄ mmimọ itọn̄. Mmọ ẹma ẹsọsọp ẹyom owoekọn̄ emi ekenyenede ekpatokụk oro. Ke ẹma ẹkekụt enye, enye ama ọdọhọ mmọ ke edieke kpukpru owo ẹkpenamde akpanikọ nte Mme Ntiense Jehovah, ke ererimbot ọkpọfọn onyụn̄ odu ke emem. Victoria ama ada Bible owụt owoekọn̄ oro ke Jehovah ọn̄wọn̄ọ ndinam ererimbot edi obufa. Esịt ama enen̄ede enem owoekọn̄ oro nte Victoria akanamde akpanikọ, ntre enye ama osio ediwak okụk ke ekpat oro ọnọ Victoria. Mme owo ke ofụri ererimbot ẹfiọk ke Mme Ntiense Jehovah ẹsinam akpanikọ kpukpru ini. Mmọ ẹsinam akpanikọ koro mmọ ẹnịmde ke Jehovah ọyọnọ se inanade mmimọ.
12. Edieke ikade iso inam n̄kpọ Jehovah idem edieke itabade utom m̀mê okụk, nso ke oro owụt? Nọ uwụtn̄kpọ.
12 Kere n̄ko ban̄a nte eketiede Thomas ke idem. Enye edi asuanetop emi mînaha baptism ke Sierra Leone. Enye ama ọtọn̄ọ ndikpep n̄wed ke ufọkn̄wed sekọndri, edi owo ikekpehe enye okụk ke n̄kpọ nte isua kiet. Nso ke akana Thomas anam man ẹsikpe enye okụkọfiọn̄ esie ẹnyụn̄ ẹkpe enye eke ini edem oro owo mîkekpehe? Akana etubom ufọkn̄wed oro anam ndụn̄ọde ye enye. Etubom emi ekedi oku ufọkabasi, ndien enye ama ọdọhọ Thomas ke ufọkn̄wed oro inyịmeke se Mme Ntiense Jehovah ẹnịmde ke akpanikọ. Enye ama ọdọhọ ke Thomas ikemeke ndidi kiet ke otu Mme Ntiense Jehovah edieke enye oyomde ndika iso nnam utom ke ufọkn̄wed oro. Thomas ama ọkpọn̄ utom oro onyụn̄ ayak ofụri okụk oro ẹkekamade enye atak. Ke oro ebede, enye ama enyene utom en̄wen—utom udiọn̄ ekebe ukopikọ ye akama-ke-ubọk telefon. Ediwak ifiọkutom ẹwụt ke edieke ibuọtde idem ye Jehovah, ke nnyịn idikopke ndịk ke iyanana se idade idu uwem. Sia Jehovah edide Andibot kpukpru n̄kpọ, esinyụn̄ ekpemede ikọt esie kpukpru ini, imọfiọk ke enye ọyọnọ nnyịn se inanade nnyịn.
13. Didie ke utom edikwọrọ Obio Ubọn̄ aka iso ke mme idụt emi mme owo mînen̄ekede inyene n̄kpọ?
13 Ke ediwak idụt emi n̄kpọ ọsọn̄de, mme anditan̄a Obio Ubọn̄ ẹnen̄ede ẹsịn idem ẹkwọrọ ikọ. Ntak emi edide ntre? N̄kọk itieutom kiet ewet ete: “Ediwak mme enyeneufọk emi ẹnyịmede ukpepn̄kpọ Bible inyeneke utom, ntre mmọ ẹsinyene ekese ini ndikpep n̄kpọ uwemeyo. Nditọete n̄ko ẹsinyene ekese ini ndikwọrọ ikọ. Mbon emi ẹdụn̄de ke mme ebiet emi n̄kpọ enen̄erede ọsọn̄ ẹsisọp ẹnyịme ke idu uwem ke mme akpatre usen; se mmọ ẹdade enyịn mmọ ẹkụt owụt oro.” Isụn̄utom kiet emi ama akanam utom ke se ibede isua 12 ke idụt emi kpukpru mme asuanetop ẹnyenede se ibede ukpepn̄kpọ Bible ita ke ẹbaharede ukem ukem, ọdọhọ ete: “Sia ediwak mme asuanetop ẹdude mmemmem uwem, mmọ inyeneke ediwak n̄kpọ emi ẹwọn̄ọrede mmọ ntịn̄enyịn. Ntre mmọ ẹsinyene ekese ini ndikwọrọ ikọ nnyụn̄ nnịm ukpepn̄kpọ Bible.”
14. Ke mme usụn̄ ewe ke Abasi edikpeme akwa otuowo?
14 Jehovah ọn̄wọn̄ọ ndin̄wam, ndikpeme, ndinyụn̄ nnyan̄a ikọt esie nte otu, ndien imenịm ke enye ayanam kpa nte enye ọn̄wọn̄ọde. (Ps. 37:28; 91:1-3) Akwa otuowo ẹyebọhọ “akwa ukụt.” (Edi. 7:9, 14) Ntem, Abasi eyekpeme akwa otuowo emi, idinyụn̄ iyakke ẹsobo ikọt esie ofụri ofụri ẹfep ke mme akpatre usen editịm n̄kpọ emi. Enye ọyọnọ mmọ kpukpru se mmọ ẹyomde man ẹkeme ndiyọ idomo ẹnyụn̄ ẹka iso ẹdi ufan esie. Ndien ke Armageddon, Jehovah eyekpeme mme asan̄autom esie—ayanyan̄a mmọ.
“TEME MI USỤN̄ FO, O JEHOVAH”
15, 16. Didie ke nnyịn ibọ ufọn ke ini inamde item Abasi? Nọ uwụtn̄kpọ.
15 Edieke iyomde ndika iso nnyene uko, ana iyak Abasi aka iso ekpep nnyịn n̄kpọ. David ọkọdọhọ ete: “Teme mi usụn̄ fo, O Jehovah, nyụn̄ da mi san̄a ke usụn̄ edinen ido ke ntak mme asua mi.” (Ps. 27:11) Man inam n̄kpọ ekekem ye akam emi, oyom inen̄ede ikpan̄ utọn̄ inọ ndausụn̄ N̄wed Abasi oro esop Jehovah ọnọde nnyịn inyụn̄ ida enye isịn ke edinam inikiet inikiet. Ke uwụtn̄kpọ, ediwak owo ẹnam eti item oro ẹnọde ẹban̄a edidu mmemmem uwem. Mmọ ẹkpe isọn mmọ ẹnyụn̄ ẹnyam mme n̄kpọ oro mmọ mîyomke. Ntre ke ini nsọn̄ọn̄kpọ emi, mfịna okụk oro mmọ ẹnyenede inen̄ekede iwak. Idahaemi mmọ inyeneke ndinam utom ọkpọsọn̄ man ẹka iso ẹkpe okụk ke mme n̄kpọ emi mmọ mînen̄ekede iyom. Mmọ ẹnyụn̄ ẹkeme ndinam ekese ke an̄wautom. Akpana owo nnyịn kiet kiet obụp idemesie ete: ‘Ndi mmesisọp nnam kpukpru se n̄kotde ke Bible ye mme n̄wed ofụn emi anamde akpanikọ onyụn̄ enyenede ọniọn̄, idem ọkpọkọm emi imemke utom?’—Matt. 24:45.
16 Edieke iyakde Jehovah ekpep nnyịn n̄kpọ onyụn̄ ada nnyịn asan̄a ke usụn̄ edinen ido, nnyịn idifeheke ndịk. Asiakusụn̄ ofụri ini ke United States ama esịn n̄wed oyom utom emi edinamde enye ye ofụri ubon esie ẹkeme ndika iso nnam utom uyọhọ ini. Edi akwa owo itieutom esie ama asian enye ke enye ikemeke-keme ndinyene utom oro edieke enye mîkaha ufọkn̄wed ntaifiọk. Edieke utọ n̄kpọ emi ekpetịbede ọnọ fi, ndi akpatua n̄kpọfiọk aban̄a nte akanamde utom uyọhọ ini utu ke ndika ufọkn̄wed ntaifiọk? Urua iba ke oro ebede, ẹma ẹsio akwa owo oro ke utom, ndien obufa owo oro ẹkenọde edi ama obụp eyenete oro aban̄a utịtmbuba esie. Eyenete oro ama ọbọrọ ete ke imọ ye n̄wan imọ idi Mme Ntiense Jehovah, ke inyụn̄ inam utom ukwọrọikọ uyọhọ ini, ndien ke ikpama ndika iso nnam oro. Obufa akwa owo emi ama ọbọ eyenete oro ikọ ke inua, ete: “Mma n̄kokụt ke afo utiehe nte mbon eken. Ke ini ete mi akanade ke nna n̄kpa, owo iba ke ido ukpono mbufo ẹma ẹsidi ẹdikot Bible ẹnọ enye kpukpru usen. Mma ndọhọ ke esịt mi nte ke edieke nnyenede ifet ndin̄wam kiet ke otu Mme Ntiense Jehovah, ke nyanam ntre.” Ke ndan̄nsiere, ẹma ẹnọ eyenete emi utom oro akani akwa owo oro mîkamaha ndinọ enye. Ke akpanikọ, edieke inịmde n̄kpọ Obio Ubọn̄ akpa ke uwem nnyịn, Jehovah ayanam kpa nte enye ọkọn̄wọn̄ọde ete ke nnyịn idinanake se idade idu uwem.—Matt. 6:33.
OYOM INYENE MBUỌTIDEM YE IDOTENYỊN
17. Nso idin̄wam nnyịn ikûfehe ini iso?
17 David anam nnyịn ifiọk ntak emi edide akpan n̄kpọ ndinyene mbuọtidem ye idotenyịn. Enye ọkọdọhọ ke imọ ikpenyeneke idotenyịn edieke imọ ‘mîkpenyeneke mbuọtidem ndikụt mfọn Jehovah.’ (Psalm 27:13) Kere ise nte uwem nnyịn ekpetiede edieke Abasi mîkpọnọhọ nnyịn idotenyịn, edieke nnyịn mîkponyụn̄ ifiọkke mme n̄kpọ oro ẹnemede ke Psalm 27! Ke ntre, ẹyak nnyịn ika iso iben̄e Jehovah ite ọnọ nnyịn uko onyụn̄ anyan̄a nnyịn ke Armageddon.—Kot Psalm 27:14.
[Mme Mbụme Ukpepn̄kpọ]
[Ndise ke page 23]
David ama enyene uko ke ini enye eketide nte Jehovah akanyan̄ade imọ
[Ndise ke page 25]
Ndi nnyịn imesida ini nsọn̄ọn̄kpọ nte ifet nditat utom ukwọrọikọ nnyịn?
